ခိ၀ံၣ်တၢ်ဆါရၤလီၤသးအါထီၣ်အဃိ(ခ့ၣ်အဲၣ်ယူၣ်)ဆူၣ်ချ့၀ဲၤကျိၤမၤဃံးထီၣ်တၢ်နုာ်လီၤဟးထီၣ်

လါမးရှး ၁ သီႇ ၂၀၂၂ နံၣ်ႇ ခ့ၣ်အဲးစံၣ်

ခီဖျိ(အိၤမံၤခြိၤ)တၢ်ဆါဘၣ်ကူဘၣ်ဂာ်ဟဲအါထီၣ်လၢခ့ၣ်အဲၣ်ယူၣ်-ကညီဒီကလုာ်စၢဖှိၣ်ကရၢတၢ်ပၢဟီၣ်က၀ီၤပူၤအဃိ တၢ်မၤဃံးထီၣ်က့ၤတၢ်နုာ်လီၤဟးထီၣ်လၢဟီၣ်က၀ီၤပူၤအဂ့ၢ်န့ၣ် ခ့ၣ်အဲၣ်ယူၣ်ဆူၣ်ချ့မၤစၢၤ၀ဲၤကျိၤ(KDHW)ၦၤဘၣ်မူဘၣ်ဒါတဖၣ်စံး၀ဲန့ၣ်လီၤႉ

(အိၤမံၤခြိၤ)တၢ်ဆါဘၣ်ကူဘၣ်ဂာ်ရၤလီၤသးဟဲအါထီၣ်၀ဲလၢဟီၣ်ခိၣ်ဒီဘ့ၣ်အသိး လၢကီၢ်ပယီၤအပူၤစ့ၢ်ကီးခီဖျိတၢ်ဆါဘၣ်ကူဘၣ်ဂာ်ရၤလီၤသးဟဲအါထီၣ်အဃိ တၢ်သိၣ်တၢ်သီလၢအပူၤကွံာ်တၢ်ပာ်လီၤဃာ်၀ဲသ့ၣ်တဖၣ်အံၤတၢ်က့ၤမၤဃံးထီၣ်အီၤလၢခ့ၣ်အဲၣ်ယူၣ်တၢ်ပၢဟီၣ်က၀ီၤကီၢ်ရ့ၣ်ႇကီၢ်ဆၣ်တဖၣ်အပူၤလီၤအဂ့ၢ်န့ၣ် (KDHW)၀ဲၤကျိၤခိၣ်ပဒိၣ်စီၤဒဲမိခ့ၤ စံး၀ဲဒ်အံၤန့ၣ်လီၤႉ

အ၀ဲစံး၀ဲလၢ“အပတီၢ်ခီဒုခဲအံၤမ့ဘၣ်တဲဘၣ်ဖဲအဟဲကဲထီၣ်ဒီးအသဟီၣ်ဆူၣ်မးႇဒီးဖဲန့ၣ်ပပာ်လီၤ၀ဲတၢ်ဘျၢၦၤကိး ဂၤဒဲးန့ၣ်မ့ကလဲၤလၢတၢ်လီၢ်တခါခါမ့ၢ်ဂ့ၤႇမ့အိၣ်ဟဲက့ၤလၢ(risk area)မ့ၢ်ဂ့ၤန့ၣ်ပကဘၣ်မၤကွၢ်(test)လီၤႉဒ်သိးကီၢ်ရ့ၣ်ကီၢ်ဆၣ်ကဟံးမူဒါအဂီၢ်ပပာ်လီၤ၀ဲဒၣ်ခိ၀ံၣ်တၢ်သိတၢ်သီတဖၣ်လီၤႉကဘၣ်လဲၤဒ်တၢ်သိၣ်တၢ်သီအသိးလီၤ”အဂ့ၢ်န့ၣ်စံးဘၣ်ခ့ၣ်အဲးစံၣ်န့ၣ်လီၤႉ

ခိ၀ံတၢ်ဆါဘၣ်ကူဘၣ်ဂာ်လၢတကီၢ်ခါခဲအံၤန့ၣ်ပနီၢ်ကစၢ်ဒၣ်၀ဲသမံသမိးလီၤသးသ့၀ဲအသိး ခီဖျိကတီၢ်အံၤတၢ်ဒုးကဲထီၣ်လၢဟီၣ်က၀ီၤပူၤအဃိတၢ်ထၢန့ၢ်တၢ်ဆါဘၣ်ကူဘၣ်ဂာ်တၢ်အိၣ်သးတန့ၢ်ဒံး၀ဲဘၣ်ဘၣ်ဆၣ် ထံၣ်ဘၣ်လၢတၢ်ဘၣ်ကူဘၣ်ဂာ်အိၣ်၀ဲအါဒီးတၢ်သံတၢ်ၦၢ်တအိၣ်ဒံး၀ဲဘၣ်အဂ့ၢ်န့ၣ် ပဒိၣ်စီၤဒဲမိခ့ၤစံးအါထီၣ်၀ဲန့ၣ်လီၤႉ

ကတီၢ်အံၤခီဖျိတၢ်ဆါဘၣ်ကူဘၣ်ဂာ်ရၤလီၤသးဟဲအါထီၣ်လၢခ့ၣ်အဲၣ်ယူၣ်(သုးက့ ၇)ဟီၣ်က၀ီၤဖၣ်အၣ်ကီၢ်ရ့ၣ်ပူၤအဃိ တၢ်မၤဃံးထီၣ်၀ဲတၢ်ဟးထီၣ်နုာ်လီၤဒီး ကတီၢ်အံၤလၢတၢ်ကနုာ်လီၤသမံသမိး၀ဲအဂီၢ်စ့ၢ်ကီးတၢ်ကီတၢ်ခဲအိၣ်အဃိ ခိ၀ံၣ်တၢ်သိၣ်တၢ်သီလၢလီၢ်ခၢၣ်သးႇကီၢ်ရ့ၣ်ႇကီၢ်ဆၣ်အပတီၢ်ထုးထီၣ်ဃာ်၀ဲသ့ၣ်တဖၣ်တၢ်ကက့ၤဘှီဘၣ်ထုးထီၣ်ကဒါ၀ဲဒီးတၢ်သမံသမိးခိ၀ံၣ်တၢ်ဖိတၢ်လံၤလၢတၢ်ဆှၢလီၤ၀ဲသ့ၣ်တဖၣ်အံၤဒ်တၢ်လိၣ်အိၣ်အသိးထုးထီၣ်သူ၀ဲသ့အဂ့ၢ်န့ၣ် (KDHW)စံး၀ဲန့ၣ်လီၤႉ

ဒ်န့ၣ်အသိး(အိၤမံၤခြိၤ)တၢ်ဆါဘၣ်ကူဘၣ်ဂာ်ရၤလီၤသးဟဲအါထီၣ်လၢခ့ၣ်အဲၣ်ယူၣ်ဒူပျာ်ယာ်ကီၢ်ရ့ၣ်လ့က့ၣ်ကိာ်ဟီၣ်က၀ီၤကမျၢၢ်ၦၤဃ့ၢ်မှံဟးဖျိးအကျါဒီး ဖဲအပူၤကွံာ်တနွံန့ၣ်တၢ်ထံၣ်န့ၢ်ၦၤဘၣ်တၢ်ဆါအဂၤ(၅၀)ဘျဲၣ်ဒီး ကတီၢ်အံၤၦၤလၢတၢ်တယးကွၢ်၀ဲလၢအအိၣ်ဒီးတၢ်ဆါအံၤသ့ၣ်တဖၣ်အဂီၢ်န့ၣ် တၢ်တ့ထီၣ်ဘှီထီၣ်န့ၢ်၀ဲ(ခွၤရထံ)အလီၢ်တဖၣ်အဂ့ၢ်န့ၣ် သ့ၣ်ညါဘၣ်န့ၣ်လီၤႉ