လါယနူၤအါရံၤ ၁၀ သီ, ၂၀၂၆ နံၣ်, ခ့ၣ်အဲးစံၣ်
လၢခ့ၣ်အဲၣ်ယူၣ် ဖၣ်အၣ်ကီၢ်ရ့ၣ်(သုးက့ ၇)တၢ်ြကဲၢ်ကီၢ်ဆၣ် သဝီကရူၢ်တဖၣ်အပူၤ သုးမီၤစိရိၤအံၤဟ့ၣ်ထီၣ်တၢ်ဂ့ၢ်လၢ တၢ်ဃုထၢတၢ်ဖးဒၢတၢ်ဘံၣ်တၢ်ဘၢ အဂီၢ်ဒီး နုၥ်လီၤဟံန့ၢ်ဝဲလီၢ်ကျဲအါအါဂီၢ်ဂီၢ်အဂ့ၢ်န့ၣ် သဝီဖိဒီးပှၤဘၣ်မူဘၣ်ဒါတဖၣ်စံးဘၣ်ခ့ၣ်အဲးစံၣ်-ကညီတၢ်ကစီၣ် န့ၣ်လီၤ.
စးထီၣ်ဖဲလါယနူၤအါရံၤ ၇ သီအနံၤန့ၣ် ပယီၤသုးလၢအနီၣ်ဂံၢ်ကအိၣ်အဂၤ(၃၀၀)ဃၣ်ဃၣ်အံၤ နုၥ်လီၤဝဲလၢလူၢ်ပျဲၢ်-တၢ်ြကဲၢ်ကျဲ ကစိၤ,ကမၤလ့,ငပၠီတီ),နီၤခလိသဝီပူၤဝံၤ နုၥ်လီၤဟံန့ၢ်အလီၢ်အကျဲလၢသဝီပူၤ တၢ်ဖးဒၢလီၢ်ဒီးကၠိကရၢၢ်ပူၤအါမးအဂ့ၢ်န့ၣ် တၢ်ြကဲၢ်ကမျၢၢ်ပိၥ်ခွါတဂၤ စံးဝဲန့ၣ်လီၤ.
“ဖဲတၢ်ကြဲၢ်ဒီးလူၢ်ပျဲၢ်ကျဲဒူသဝီတဖၣ်အပူၤန့ၣ်အါဒၣ်တက့ၢ်အဝဲသ့ၣ်ဟဲပၥ်လီၤဝဲတၢ်ဖးဒၢအဃိ အဝဲသ့ၣ်ဟဲဟံန့ၢ်ဝဲတၢ်ဘံၣ်တၢ်ဘၢ ဒ်န့ၣ်လီၤ. ကယဲၢ်မ့ၢ်ဒူသဝီလၢအိၣ်ဒီးတၢ်ဖးဒၢလီၢ်န့ၣ်အဝဲသ့ၣ်အပှၤအိၣ်လီၤ.အဝဲသ့ၣ်နီၤဖးလီၤသးအိၣ်ဝဲ ၄ ဂၤ ၅ ဂၤတဒူၣ်ဒ်န့ၣ်” အဂ့ၢ်န့ၣ် စံးဝဲန့ၣ်လီၤ.
ဒ်န့ၣ်အသိးတကီၢ်ခါခဲအံၤတၢ်အိၣ်ခိးတြဲၤတၢ်သမံသမိးလီၢ်လၢအိၣ်လူၢ်ပျဲၢ်-တၢ်ြကဲၢ်ကျဲမုၢ်ဒီတကျိၤန့ၣ် ပယီၤသုးမၤဃံးထီၣ်ဝဲ တၢ်ဘံၣ်တၢ်ဘၢအသိး နုၥ်လီၤဟံန့ၢ်တၢ်ဘံၣ်တၢ်ဘၢလၢတၢ်ဖးဒၢအဂီၢ်အမဲၥ်ညါ မ့ၢ်အတၢ်ပညိၣ်လၢအဂၤအိၣ်ဒံးမနုၤလဲၣ်န့ၣ် ကဘၣ်အိၣ်ခိးကွၢ်ဒံးအဂ့ၢ်န့ၣ် လီၢ်ကဝီၤကမျၢၢ်သးစၢ်တဂၤဃီဝဲန့ၣ် စံးအါထီၣ်ဝဲန့ၣ်လီၤ.
ခီဖျိလၢပယီၤသုးနုၥ်လီၤလၢသဝီပူၤသတူၢ်ကလၥ်ဒ်အံၤအဃိ လီၢ်ကဝီၤကမျၢၢ်တဖၣ်ဘၣ်ယိၢ်ဝဲလၢတၢ်ဒုးကကဲထီၣ် ကဒါအဖီခိၣ် တနီၤန့ၣ်ဟးပလဲၥ်ဟးဆှဲးဆိအသးလၢတၢ်လီၢ်အဂၤအိၣ်ဝဲအဂ့ၢ်န့ၣ် တၢ်ကြဲၢ်ကီၢ်ဆၣ်ခိၣ် ပဒိၣ်စီၤပလဲဒံၤဝါ စ့ၢ်ကီး စံးဘၣ်ခ့ၣ်အဲးစံၣ်-ကညီတၢ်ကစီၣ်န့ၣ်လီၤ.
“ကမျၢၢ်လၢအိၣ်ဘူးဒီးတၢ်ဖးဒၢတဖၣ်တနီၤန့ၣ်ဟးပလဲၥ်သးလဲၤအိၣ်လၢသဝီလၢအဂၤ. မ့မ့ၢ်ပယီၤသုးဒုအဝဲသ့ၣ်တဲဝဲလၢမူဒါအိၣ် အဃိမၤဝဲလီၤ. တၢ်ဃုထၢမ့ဝံၤန့ၣ်တဲဝဲလၢအကက့ၤလီၤ”အဂ့ၢ်န့ၣ် စံးဝဲန့ၣ်လီၤ.
တၢ်ြကဲၢ်ကီၢ်ဆၣ်အံၤမ့ၢ်ဝဲ(ခ့ၣ်အဲၣ်ယူၣ်)တၢ်ပၢဟီၣ်ကဝီၤအသိး မ့ၢ်စ့ၢ်ကီးဝဲသုးခိးကီၢ်ဆၢ(BGF)လၢအဆီတလဲက့ၤအသးဆူ (KNA)အံၤအဟီၣ်ကဝီၤန့ၣ်လီၤ. အဃိဘၣ်ဃးတၢ်ဃုထၢဘျီဝဲအံၤစ့ၢ်ကီး(KNA)ဟံစၢၤဝဲတၢ်ဘံၣ်တၢ်ဘၢအိၣ်အဂ့ၢ် ကမျၢၢ်စံးဝဲ အိၣ်ဘၣ်ဆၣ် ပခ့ၣ်အဲးစံၣ်-ကညီတၢ်ကစီၣ် ပၥ်ဂၢၢ်ပၥ်ကျၢၤအီၤတန့ၢ်ဒံးဘၣ်န့ၣ်လီၤ.
တၢ်ဃုထၢအကူၥ်-၁ ဝံၤလီၢ်ခံ တၢ်ဃုထၢအကူၥ်-၂ လၢသုးမီၤစိရိၤကမၤဝဲဖဲခဲမုၢ်ဆ့ၣ်လါယနူၤအါရံၤ ၁၁ သီအံၤ တၢ်ကမၤဝဲလၢ ကီၢ်ဆၣ်အဘ့ၣ်(၁၀၀)ဃၣ်ဃၣ်အပူၤ ဒီး ဖဲန့ၣ်အကျါ ပၣ်ဃုၥ်ဝဲလူၢ်ပျဲၢ်ကီၢ်ဆၣ်ဒီးဖၣ်ပူၣ်န့ၣ်လီၤ.
