လါဖ့ၤဘြူၤအါရံၤ ၂၄ သီႇ ၂၀၂၂ နံၣ်ႇ ခ့ၣ်အဲးစံၣ်
စးထီၣ်ဖဲ(၂၀၂၂)နံၣ် လါဖ့ၤဘြူၤအါရံၤ ၁ သီတုၤလၢ ၂၀ သီအနံၤ လၢခ့ၣ်အဲၣ်ယူၣ်ကီၢ်သူလ့ၤတၢ်ပၢဟီၣ်က၀ီၤအပူၤ ကညီဒီကလုာ်တၢ်ထူၣ်ဖျဲးသုးမုၢ်ဒိၣ်(KNLA)ႇကညီဒီကလုာ်ဂၢၤသးကရၢ(KNDO)ဒီးပယီၤသုးႇသုးခိးကီၢ်ဆၢ(BGF)သုးတဖၣ်အဘၢၣ်စၢၤတၢ်ခးလိာ်သးကဲထီၣ်ပာ်ဖှိၣ်ခဲလၢာ်(၆၇)ဘျီဒီးဖဲန့ၣ်ပယီၤသုးတကပၤသံ၀ဲ(၂၂၇)ဂၤႇဘၣ်ဒိ၀ဲ(၁၅၉)ဂၤအဂ့ၢ်န့ၣ် ခ့ၣ်အဲၣ်ယူၣ်ပာ်ဖျါ၀ဲဖဲတနံၤအံၤလါဖ့ၤဘြူၤအါရံၤ ၂၄ သီအနံၤန့ၣ်လီၤႉ
ဒ်ခ့ၣ်အဲၣ်ယူၣ်ထုးထီၣ်ပာ်ဖျါ၀ဲဖဲအသိး လၢအသီ(၂၀)အတီၢ်ပူၤမ့မ့ၢ်ကညီဒီကလုာ်တၢ်ထူၣ်ဖျဲးသုးမုၢ်ဒိၣ်(KNLA)ႇကညီဒီကလုာ်ဂၢၤသးကရၢ (KNDO)တကပၤ ဘၣ်ဟ့ၣ်လီၤကွံာ်အသးသမူ(၅)ဂၤဒီးဘၣ်ဒိ၀ဲ(၂၁)ဂၤန့ၣ်လီၤႉ
လၢန့ၣ်အမဲာ်ညါခီဖျိယီၤသုးကဘီယူၤဟဲကွံာ်လီၤမ့ၣ်ပိၢ်(၇)ဖျၢၣ်ဆူဒွဲၣ်လိကီၢ်ဆၣ်ဒီးလူၢ်သီကီၢ်ဆၣ်တဖၣ်အပူၤအဃိ လီၢ်က၀ီၤကမျၢၢ်သံ၀ဲ(၄)ဂၤႇဘၣ်ဒိ၀ဲ(၁၄)ဂၤဒီး ဒူသ၀ီလီၢ်က၀ီၤကမျၢၢ်တနီၤဘၣ်ပာ်တ့ၢ်ကွံာ်အဟံၣ်အဃီဘၣ်ဟးဃ့ၢ်အိၣ်ခူသူၣ်၀ဲလၢၦၢ်ပူၤန့ၣ်လီၤႉ
ခီဖျိပယီၤသုးဒီးသုးခိးကီၢ်ဆၢ(BGF)သုးပာ်ဖှိၣ်တဖၣ်ခးလီၤနါစိၤကျိအဃိ လၢအသီ(၂၀)အတီၢ်ပူၤလီၢ်က၀ီၤကမျၢၢ်ဘၣ်ဒိဘၣ်ထံး၀ဲ(၄)ဂၤတကးဒံးဘၣ်ဟံၣ်ဃီဟးဂူာ်ဟးဂီၤအိၣ်စ့ၢ်ကီး၀ဲတနီၤအသိး လီၢ်က၀ီၤသ၀ီဖိတဖၣ်ဘၣ်ဟးဃ့ၢ်အိၣ်ကဒု၀ဲလၢၦၢ်ပူၤအဂ့ၢ်န့ၣ် ခ့ၣ်အဲၣ်ယူၣ်လံာ်တၢ်ပာ်ဖျါအပူၤပာ်ဖျါ၀ဲန့ၣ်လီၤႉ
ပယီၤသုးႇသုးခိးကီၢ်ဆၢ(BGF)သုးရ့ၣ်(၁၀၁၄)သုးပာ်ဖှိၣ်တဖၣ်ခးလီၤကျိဖးဒိၣ်ဆူ ခ့ၣ်အဲၣ်ယူၣ်ကညီဒီကလုာ်စၢဖှိၣ်ကရၢ(သုးက့ ၁)ဒူသထူၣ်ကီၢ်ရ့ၣ် ဖၣ်အၣ်ကီၢ်ဆၣ်ႇကၠဲၣ်ထိၤကီၢ်ဆၣ်ဒီးသထူၣ်ကီၢ်ဆၣ် လီၢ်က၀ီၤကမျၢၢ်ဒူသ၀ီတၢ်ဖံးအီၣ်မၤအီၣ်လီၢ်ကျဲပူၤတလီၢ်လီၢ်အမဲာ်ညါ မၤပျံၤမၤဖုးဟံးန့ၢ်ဆူၣ်၀ဲလီၢ်က၀ီၤဖိအစ့ႇတၢ်အီၣ်တၢ်အီႇတၢ်ဖိတၢ်လံၤဒီးမၢဆူၣ်၀ဲလီၢ်က၀ီၤဖိတဖၣ်န့ၣ်လီၤႉ
တကးဒံးဘၣ်လၢ(သုးက့ ၃)ဘျံးဒ၀ဲၢ်ကီၢ်ရ့ၣ် လၢၢ်ဒိၣ်ကီၢ်ဆၣ်ႇမိကီၢ်ဆၣ်ႇဆီထံးကီၢ်ဆၣ်တဖၣ်အပူၤစ့ၢ်ကီး ခီဖျိပယီၤသုးသမံသမိး၀ဲလီၢ်က၀ီၤကမျၢၢ်လၢအဟးထီၣ်က့ၤလီၤသ့ၣ်တဖၣ်ဟဲအါထီၣ်၀ဲအဃိ လီၢ်က၀ီၤကမျၢၢ်သ့ၣ်တဖၣ်လဲၤဖံးလဲၤမၤတၢ်တသဘျ့၀ဲဘၣ်အဂ့ၢ်န့ၣ် ခ့ၣ်အဲၣ်ယူၣ်ပာ်ဖျါ၀ဲန့ၣ်လီၤႉ
လၢခ့ၣ်အဲၣ်ယူၣ်(သုးက့ ၅)မုၢ်တြီၢ်ကီၢ်ရ့ၣ် ဒွဲၣ်လိကီၢ်ဆၣ်ႇဘုသိၣ်ကီၢ်ဆၣ်ဒီးလူၢ်သီကီၢ်ဆၣ်တဖၣ်အပူၤစ့ၢ်ကီး ပယီၤသုးဒီးသုးခိးကီၢ်ဆၢ(BGF)သုးရ့ၣ်(၁၀၁၂ႇ၁၀၁၃ႇ၁၀၁၄)တဖၣ်ခးလီၤကျိဖးဒိၣ်ဆူလီၢ်က၀ီၤကမျၢၢ်တၢ်ဖံးအီၣ်မၤအီၣ်လီၢ်ကျဲဒူသ၀ီပူၤကိးမုၢ်နံၤဒဲးအဂ့ၢ်န့ၣ် ခ့ၣ်အဲၣ်ယူၣ်ထုးထီၣ်ပာ်ဖျါ၀ဲအသိးသ့ၣ်ညါဘၣ်န့ၣ်လီၤႉ
