(၂၀၂၄-၂၀၂၅)တၢ်သိၣ်လိနံၣ်,ကၠိဖိလၢအဖျိထီၣ်(၁၂)တီၤကီၢ်သူလ့ၤပဒိၣ်တၢ်ဒိးဆဲးအိၣ်ဝဲ(၉၀၀)ဘျဲၣ်

လါအ့ဖြ့ၣ် ၃၀သီ, ၂၀၂၅နံၣ်, ခ့ၣ်အဲးစံၣ်,

ကီၢ်သူလ့ၤတၢ်ပၢဟီၣ်ကဝီၤကညီကူၣ်သ့ဆဲးလၤဝဲၤကျိၤဖီလၥ်(၂၀၂၄)(၂၀၂၅)နံၣ်ကၠိတၢ်မၤလိနံၣ်အပူၤ(၁၂)တီၤကၠိဖိလၢအဖျိထီၣ်ဝဲကီၢ်သူလ့ၤပဒိၣ်တၢ်ဒိးစဲးခဲလၢၥ်အိၣ်ဝဲ(၉၀၀)ဘျဲၣ်အဂ့ၢ်,ကညီကူၣ်သ့ဆဲးလၤဝဲၤကျိၤ(KECD)ပှၤဘၣ်မူဘၣ်ဒါတဖၣ်စံးဝဲဒၣ်န့ၣ်လီၤ.

(၂၀၂၄)(၂၀၂၅)တနံၣ်အံၤကၠိတၢ်မၤလိနံၣ်အပူၤကညီကူၣ်သ့ဆဲးလၤဝဲၤကျိၤအတၢ်တီခိၣ်ရိၢ်မဲဖီလၥ်ကၠိ(၄၂)ဖျၢၣ်အပူၤ(၁၂)တီၤကၠိဖိမုၣ်ခွါ(၁၅၃၇)ဂၤနုၥ်လီၤဝဲတၢ်ဒိးစဲးဒီးဖျိထီၣ်ဝဲအဂၤ(၉၆၉)ဂၤအဂ့ၢ်,သ့ၣ်ညါဒ်(KECD)ပှၤဘၣ်မူဘၣ်ဒါသ့ၣ်တဖၣ်စံးဝဲဒၣ်အသိးန့ၣ်လီၤ.

ကၠိဖိသ့ၣ်တဖၣ်အံၤတနံၣ်အံၤကၠိတၢ်မၤလိနံၣ်အပူၤတၢ်တၤအိၣ်ဝဲအါန့ၢ်နံၣ်လၢအပူၤကွံၥ်ဘၣ်ဆၣ်,ခီဖျိတဟ့ၣ်ဃၣ်တၢ်အိၣ်ဒီးတၢ်သးဆွံကတုၥ်ဒီးဖျိထီၣ်ဝဲဒ်အံၤအဖီခိၣ်မ့ၢ်တၢ်သူၣ်မံသးမုၥ်လီၤအဂ့ၢ်,(KECD)ဂံၢ်ခီၣ်ထံးပီညါဝဲၤဒ့ခိၣ်နီၢ်နယူထဲဘၢၣ်ထိစံးဝဲဒၣ်ဒ်အံၤန့ၣ်လီၤ.

“တနံၣ်ညါအံၤတၢ်အိၣ်သးတၢ်တၤတၢ်ဒီးပှၤဒုအိၣ်အါန့ၢ်ဒံးနံၣ်လၢအပူၤကွံၥ်န့ၣ်ပတဲသ့လီၤ.ဟီၣ်ခိၣ်မဲၥ်ဖံးခိၣ်တၢ်ဒုးတၢ်ယၤဆူၣ်ထီၣ်ဒီးသုးကီၣ်ကးကဘီယူၤဒုးသုးဟဲခးပကၠိမ့ၢ်ဂ့ၤကျိဖးဒိၣ်ခးလီၤတၢ်လၢပအိၣ်ဆိးတၢ်လီၢ်မ့ၢ်ဂ့ၤအဃိန့ၣ်,ပကၠိတနီၤနီၤဘၣ်စံၣ်ထီၣ်ဘၣ်အိၣ်ကဒုသးအိၣ်ဝဲတကးဘၣ်,ဘၣ်မၤလိဝဲတၢ်လၢတၢ်ပျံၤတၢ်ဖုးတၢ်နးတၢ်ဖှီၣ်အပူၤလီၤ.ဘၣ်ဆၣ်နါက့အဝဲသ့ၣ်တတ့ၢ်စၢ်လီၤဂံၢ်ဘါဘၣ်.အိၣ်ဒီးတၢ်သးဆွံကတုၥ်,တဟ့ၣ်တၢ်အဃၣ်ဘၣ်အဃိန့ၣ်တုၤလၢနံၣ်ကတၢၢ်ဖျိထီၣ်ဝဲဒ်အံၤအဖီခိၣ်,မ့ၢ်တၢ်သူၣ်မံသးမုၥ်လီၤ”အဂ့ၢ်စံးဝဲဒၣ်န့ၣ်လီၤ.

လၢန့ၣ်အမဲၥ်ညါ,(၁၂)တီၤကၠိဖိလၢအဖျိထီၣ်ဝဲပဒိၣ်တၢ်ဒိးစဲးသ့ၣ်တဖၣ်အံၤခါဆူညါကဆဲးမၤလိအဂီၢ်အတၢ်ခွဲးတၢ်ယၥ်အိၣ်ဝဲလၢကပတံထီၣ်ဝဲ(KECD)ဝဲၤကျိၤဝဲၤဒ့တၢ်ပၢဆှၢဖီလၥ်ပတီၢ်ထီပီညါကၠိဒ်အမ့ၢ်(HE-Higher Education),(Junior College),KarenTeacher Training College(KTTC),သ့ၣ်တဖၣ်ဃုၥ်ဒီးကၠိလၢအမၤသကိးတၢ်ဒီး(KECD)ဒ်အမ့ၢ်Thanbyah College and Institutes(TCI),ဒီးချၢၣ်မုၢ်ကၠိသ့ၣ်တဖၣ်အဂ့ၢ်,ဂံၢ်ခီၣ်ထံးပီညါဝဲၤဒ့ခိၣ်နီၢ်နယူထဲဘၢၣ်ထိစံးအါထီၣ်ဝဲဒၣ်န့ၣ်လီၤ.

ကီၢ်သူလ့ၤတၢ်ပၢဟီၣ်ကဝီၤကီၢ်ရ့ၣ်(၇)ဘ့ၣ်အပူၤတနံၣ်အံၤ(၂၀၂၄)(၂၀၂၅)ကၠိတၢ်မၤလိနံၣ်အပူၤ(၆)တီၤ(၉)တီၤ(၁၂)တီၤကၠိဖိတၣ်ကနုၥ်လီၤဝဲပဒိၣ်တၢ်ဒိးစဲးအဂီၢ်ကၠိ(၂၂၂)ဖျၢၣ်,ကၠိဖိအဂၤ(၅၄၀၀)ဘျဲၣ်ဟ့ၣ်ထီၣ်ဝဲစရီအိၣ်ဝဲဘၣ်ဆၣ်,ခီဖျိတၢ်အိၣ်သးအကလုၥ်ကလုၥ်အဃိနံၣ်ကတၢၢ်ပဒိၣ်တၢ်ဒိးစဲးအပူၤကၠိလၢနုၥ်လီၤက့ၤဝဲပဒိၣ်တၢ်ဒိးစဲအိၣ်က့ၤဒၣ်ထဲ(၁၃၈)ဖျၢၣ်ဒီးကၠိဖိအိၣ်တ့ၢ်က့ၤထဲအဂၤ(၃၈၀၀)ဘျဲၣ်အဂ့ၢ်,(KECD)ပှၤဘၣ်မူဘၣ်ဒါတဖၣ်စံးဝဲဒၣ်န့ၣ်လီၤ.

ဒီး(၆)တီၤ,(၉)တီၤ,(၁၂)တီၤကၠိဖိအဂၤ(၃၈၀၀)ဘျဲၣ်လၢအနုၥ်လီၤဝဲပဒိၣ်တၢ်ဒိးစဲးသ့ၣ်တဖၣ်အံၤပၥ်ဖှိၣ်ခဲလၢၥ်ဖျိထီၣ်ဝဲအဂၤ(၂၃၀၀)ဘျဲၣ်အိၣ်ဝဲအဂ့ၢ်,(KECD)ပှၤဘၣ်မူဘၣ်ဒါတဖၣ်စံးစ့ၢ်ကီးဝဲဒၣ်န့ၣ်လီၤ.

တကတီၢ်ဃီ,ကီၢ်သူလ့ၤတၢ်ပၢဟီၣ်ကဝီၤကၠိတၢ်မၤလိမၤဒိးတဖၣ်အပူၤခီဖျိသုးကီၣ်ကးကဘီယူၤတၢ်ထီၣ်ဒုးဒီးဒြိမ့ၣ်ပိၢ်တၢ်ခးလီၤတၢ်အဃိ,(၂၀၂၄)နံၣ်လါယူၤတုၤလၢ(၂၀၂၅)နံၣ်လါအ့ဖြ့ၣ်အပူၤကၠိဘၣ်ဟးဂီၤဝဲ(၁၄)ဖျၢၣ်ဃၣ်ဃၣ်အိၣ်ဝဲအဂ့ၢ်,သ့ၣ်ညါဘၣ်န့ၣ်လီၤ.

ဒ်န့ၣ်အသိး,ခီဖျိသုးကီၣ်ကးကဘီယူၤတၢ်ထီၣ်ဒုးဒီးခးလီၤတၢ်အဃိ,(၂၀၂၄)လါယူၤတုၤလၢ(၂၀၂၅)နံၣ်လါအ့ဖြ့ၣ်အပူၤကၠိဖိမုၣ်ခွါဘၣ်သံဝဲ(၃)ဂၤဒီးဘၣ်ဒိဘၣ်ထံးဝဲ(၁၅)ဂၤအိၣ်ဝဲအဂ့ၢ်,သ့ၣ်ညါဘၣ်ဒ်(KECD)အတၢ်မၤနီၣ်မၤဃါအိၣ်ဝဲအသိးန့ၣ်လီၤ.