တလဲၤထီၣ်သုးမီၤစိရိၤအတၢ်တၢၣ်ပီၣ်တဲသကိးတၢ်မုာ်တၢ်ခုၣ်တၢ်ရဲၣ်တၢ်ကျဲၤဘၣ်အဂ့ၢ် ခ့ၣ်အဲၣ်ယူၣ်စံး၀ဲ

လါဖ့ၤဘြူၤအါရံၤ ၈ သီႇ ၂၀၂၂ နံၣ်ႇ ခ့ၣ်အဲးစံၣ်

ပယီၤသုးမီၤစိရိၤတီခိၣ်ရိၣ်မဲကမၤ၀ဲကီၢ်စၢဖှိၣ်မုၢ်နံၤဆၢက့ၤတၢ်ရဲၣ်တၢ်ကျဲၤအပူၤ ကွဲမုာ်၀ဲကလုာ်ဒူၣ်ဖီၣ်စုက၀ဲၤတၢ်ပၢၢ်ဆၢကရူၢ်တဖၣ်ကဟဲထီၣ်၀ဲဒီးကမၤ၀ဲတၢ်တၢၣ်ပီၣ်တဲသကိးတၢ်မုာ်တၢ်ခုၣ်အဖီခိၣ်အံၤ အလီၢ်တအိၣ်လၢကလဲၤထီၣ်တၢၣ်ပီၣ်တဲသကိး၀ဲဘၣ်အဂ့ၢ်န့ၣ် ခ့ၣ်အဲၣ်ယူၣ်လီၢ်ခၢၣ်သးထံဂုၤကီၢ်ဂၤ၀ဲၤကျိၤခိၣ် ပဒိၣ်စီၤတီနံစံး၀ဲန့ၣ်လီၤႉ

တလါအံၤလါဖ့ၤဘြူၤအါရံၤ ၁၂ သီအနံၤ ပယီၤသုးမီၤစိရိၤကမၤ၀ဲကီၢ်စၢဖှိၣ်မုၢ်နံၤၦဲၤထီၣ်(၇၅) ၀ီတ၀ီတၢ်တၢၣ်ပီၣ်တဲသကိးအပူၤ ဘၣ်ထွဲဒီးပယီၤသုးမီၤစိရိၤကွဲမုာ်၀ဲတၢ်ကရၢကရိလၢအဆဲးလီၤ ထံကီၢ်ဒီဘ့ၣ်တၢ်ပတုာ်တၢ်ခး(NCA)လံာ်ဃံးဃာ်တကးဒံးဘၣ်အမဲာ်ညါ ကလုာ်ဒူၣ်ဖီၣ်စုက၀ဲၤလၢအတဆဲးလီၤဘၣ်ဒံး(NCA)သ့ၣ်တဖၣ်လၢကဟဲတၢၣ်ပီၣ်တဲသကိး၀ဲတစိၤသးတၢ်မုာ်တၢ်ခုၣ်အဖီခိၣ်အံၤ ခ့ၣ်အဲၣ်ယူၣ် ပဒိၣ်စီၤတီနံစံး၀ဲဒ်အံၤန့ၣ်လီၤႉ

အ၀ဲစံး၀ဲလၢ“အ၀ဲသ့ၣ်တဲ၀ဲလၢကတၢၣ်ပီၣ်တဲသကိးတၢ်မုာ်တၢ်ခုၣ်အဂီၢ်န့ၣ် ကတီၢ်အံၤပကဘၣ်လဲၤတၢၣ်ပီၣ်တဲသကိးတၢ်ဒီးအ၀ဲသ့ၣ်န့ၣ်အလီၢ်တအိၣ်ဘၣ်ႉ ဘၣ်မနုၤအဃိလဲၣ်န့ၣ် တၢ်ဆဲးလီၤထံကီၢ်ဒီဘ့ၣ်တၢ်ပတုာ်တၢ်ခး၀ံၤအလီၢ်ခံန့ၣ် ပလဲၤထံၣ်လိာ်တၢၣ်ပီၣ်တဲ သကိးတၢ်ဒီးအ၀ဲသ့ၣ်န့ၣ်အနံၣ်အါႇအလါအါလံလီၤႉ အ၀ဲသ့ၣ်ဟံးန့ၢ်ဆူၣ်ကွံာ်တၢ်စိတၢ်ကမီၤႉ မ့၀ံၤမၤဟးဂီၤကွံာ်တၢ်အၢၣ်လီၤအီလီၤသ့ၣ်တဖၣ်လီၤႉ တၢ်အဃိန့ၣ်တလိၣ်ပကဘၣ်လဲၤတၢၣ်ပီၣ်တဲသကိးတၢ်လၢၤဘၣ်ႉ ခဲအံၤတၢ်လၢပကဘၣ်မၤန့ၣ် ပယီၤသုးမီၤစိရိၤန့ၣ်ကဘၣ်အိၣ်လၢအ၀ဲသ့ၣ်အကစၢ်အလီၢ်အကျဲလီၤႉ မ့၀ံၤတဘၣ်နုာ်လီၤပၣ်ဃုာ်လၢထံရူၢ်ကီၢ်သဲးအပူၤဘၣ်ႉ တဘၣ်မုၢ်လၢ်လၢကဒိးန့ၢ်ဘၣ်ဖဲၣ်ဒရၢၣ်ဒံၣ်မိၣ်ခြ့ၣ်စံၣ်လၢအ၀ဲသ့ၣ်အအိၣ်တဂ့ၤ”အဂ့ၢ်န့ၣ် စံးဘၣ်ခ့ၣ်အဲးစံၣ်န့ၣ်လီၤႉ

လၢန့ၣ်အမဲာ်ညါတၢ်တၢၣ်ပီၣ်တဲသကိးတၢ်ရဲၣ်တၢ်ကျဲၤလၢပယီၤသုးမီၤစိရိၤကွဲမုာ်၀ဲအကျါ တၢ်တပာ်ပနီၣ်ဘၣ်ထွဲတၢ်ကတၢၣ်ပီၣ်တဲသကိးတၢ်ဂ့ၢ်တၢ်ကျိၤတဖၣ်ဘၣ်ဒီး တသ့ဖဲအသ့ဟ့ၣ်ခီဟ့ၣ်နီၤလိာ်သးဖျိဖျိဖျါဖျါသ့၀ဲအဂ့ၢ်န့ၣ် သုးမီၤစိရိၤအလံာ်ကွဲမုာ်အပူၤပာ်ဖျါ၀ဲန့ၣ်လီၤႉ

တကီၢ်ခါတၢ်အိၣ်သးခဲအံၤ အၣ်စံၣ်ယၣ်ထံကီၢ်သ့ၣ်တဖၣ်စ့ၢ်ကီးတဟ့ၣ်၀ဲပယီၤသုးမီၤစိရိၤခိၣ်နၢ်တဖၣ်အလီၢ်ဘၣ်န့ၣ် ၦၤခဲလၢာ်သ့ၣ်ညါ၀ဲလံအဃိ တၢ်တၢၣ်ပီၣ်တဲသကိးလၢပယီၤသုးမီၤစိရိၤခိၣ်နၢ်ကမၤ၀ဲအံၤ ၦၤလၢအမ့လဲၤထီၣ်၀ဲတၢ်တၢၣ်ပီၣ်တဲသကိးအံၤန့ၣ်လီၤဂာ်ဒ်သိးပဟ့ၣ်ဂံၢ်ဟ့ၣ်ဘါပာ်ပနီၣ်ပယီၤသုးမီၤစိရိၤအတၢ်ဖံးတၢ်မၤသ့ၣ်တဖၣ်အဃိ ကဘၣ်လဲၤမၤဘၣ်ထွဲသးအလီၢ်တအိၣ်ဘၣ်အဂ့ၢ်န့ၣ် ခ့ၣ်အဲၣ်ယူၣ်တကပၤစံး၀ဲန့ၣ်လီၤႉ

ပဒိၣ်စီၤတီနံစံးအါထီၣ်၀ဲလၢ“ထီဘိအ၀ဲသ့ၣ်မၤ၀ဲန့ၣ် တကပၤန့ၣ်ကိး၀ဲတၢ်တၢၣ်ပီၣ်တဲသကိးထံရူၢ်ကီၢ်သဲးလီၤႉ ဘၣ်ဆၣ်လၢပဟီၣ်က၀ီၤပူၤန့ၣ်မၤ၀ဲတၢ်ထီၣ်ဒုးႇ မၤ၀ဲဒ်အံၤအါလံ ပန့ၢ်ဘၣ်တၢ်မၤလိအါမးလံႉ အ၀ဲသ့ၣ်မ့တဲ၀ဲလၢကတၢၣ်ပီၣ်တဲသကိးထံရူၢ်ကီၢ်သဲးန့ၣ် ပကဘၣ်အိၣ်ကတဲၤကတီၤသးလၢကဘၣ်ဖီၣ်ထီၣ်ကျိဒီးကဘၣ်နီဟးထီၣ်ကွံာ်အီၤလီၤႉ တၢ်သ့ၣ်တဖၣ်အံၤမ့ၢ်တၢ်လၢပလဲၤခီဖျိဘၣ်တဖၣ်လီၤ”အဂ့ၢ်န့ၣ် စံး၀ဲန့ၣ်လီၤႉ

ဒ်ပယီၤသုးမီၤစိရိၤတၢ်မုာ်တၢ်ခုၣ်လံာ်ကွဲမုာ်အပူၤအသိး တၢ်မၤအကျဲလၢထံကီၢ်ကဘၣ်ဆဲးမၤ၀ဲသ့ၣ်တဖၣ်အကျါ ဒီကလုာ်တၢ်မၤအကျဲႇထံရူၢ်ကီၢ်သဲးတၢ်မၤအကျဲအမဲာ်ညါ တၢ်မုာ်တၢ်ခုၣ်ဒီးတၢ်စိတၢ်ကမီၤၦဲၤတုာ်ကအိၣ်ဂၢၢ်ဆိးကျၢၤတၢ်မၤအကျဲတဖၣ် စးထီၣ်တနံၣ်အံၤကစးထီၣ်၀ဲခီၣ်ခါအသီလၢတၢ်မုာ်တၢ်ခုၣ်အဂီၢ်အဂ့ၢ်န့ၣ် ပာ်ဖျါဃာ်၀ဲန့ၣ်လီၤႉ

ပယီၤသုးမီၤစိရိၤဘိးဘၣ်ရၤလီၤ၀ဲလၢစးထီၣ်(၂၀၂၁)နံၣ် လါအီးကထိဘၢၣ် ၁ သီ တုၤလၢ(၂၀၂၂)နံၣ် လါဖ့ၤဘြူၤအါရံၤလၢာ်န့ၣ် ကဆိကတီၢ်ဃာ်တၢ်ဒုးတၢ်ယၤလၢထံကီၢ်ဒီတဘ့ၣ်အပူၤဘၣ်ဆၣ်သနါက့ လၢဟီၣ်က၀ီၤကိးဘ့ၣ်ဒဲးအပူၤတၢ်ဒုးကဲထီၣ်၀ဲကိးမုၢ်နံၤဒဲးဃၣ်ဃၣ်ညါအသိး လၢခ့ၣ်အဲၣ်ယူၣ်တၢ်ပၢဟီၣ်က၀ီၤတဖၣ်အပူၤစ့ၢ်ကီး ပယီၤသုးမီၤစိရိၤမၤအါထီၣ်သုးဂံၢ်ဘါႇမၤ၀ဲခိခိၣ်တၢ်ဒုးတကးဒံးဘၣ် မၤ၀ဲတၢ်ထီၣ်ဒုးလၢကလံၤကျါစ့ၢ်ကီးန့ၣ်လီၤႉ