လါဖ့ၤဘြူၤအါရံၤ ၈ သီႇ ၂၀၂၂ နံၣ်ႇ ခ့ၣ်အဲးစံၣ်
ခ့ၣ်အဲၣ်ယူၣ်-ကညီဒီကလုာ်စၢဖှိၣ်ကရၢတၢ်ပၢဟီၣ်က၀ီၤအပူၤ ဖဲအပူၤကွံာ်လါယနူၤအါရံၤတလါအတီၢ်ပူၤ ခီဖျိပယီၤသုးမီၤစိရိၤအံၤသူ၀ဲကဘီယူၤဟဲကွံာ်လီၤကျိဖးဒိၣ်ဒီးခးလီၤကျိဖးဒိၣ်တဖၣ်ဆူဒူသ၀ီပူၤအဃိ လီၢ်က၀ီၤကမျၢၢ်သံ၀ဲ(၁၂)ဂၤႇဘၣ်ဒိ(၃၂)ဂၤအဂ့ၢ်န့ၣ် ခ့ၣ်အဲၣ်ယူၣ်ထုးထီၣ်ပာ်ဖျါ၀ဲဖဲတနံၤအံၤန့ၣ်လီၤႉ
ခီဖျိပယီၤသုးကဘီယူၤဟဲကွံာ်လီၤမ့ၣ်ပိၢ်လၢခ့ၣ်အဲၣ်ယူၣ်မုၢ်တြီၢ်ကီၢ်ရ့ၣ်ဒီးဒူပျာ်ယာ်ကီၢ်ရ့ၣ်ပူၤတကးဘၣ်အမဲာ်ညါ ခီဖျိပယီၤသုးမီၤစိရိၤဒီးသုးခိးကီၢ်ဆၢ(BGF)သုးပာ်ဖှိၣ်တဖၣ် နုာ်လီၤမၤ၀ဲဒုးယၤဂ့ၢ်၀ီဒီးခးလီၤကျိဖးဒိၣ်ဆူဒူသထူၣ်ကီၢ်ရ့ၣ်ႇချၢၣ်လွံၢ်ထူၣ်ကီၢ်ရ့ၣ်ဒီးဘျံးဒ၀ဲၢ်ကီၢ်ရ့ၣ်ပူၤအဃိ လီၢ်က၀ီၤကမျၢၢ်(၇၀ႇ၀၀၀)ဃၣ်ဃၣ်ဘၣ်ဃ့ၢ်မှံဟးဖျိး၀ဲအဂ့ၢ်န့ၣ် ခ့ၣ်အဲၣ်ယူၣ်တၢ်ကစီၣ်ဒီးတၢ်ဘိးဘၣ်ရၤလီၤ၀ဲၤကျိၤအလံာ်တၢ်ပာ်ဖျါအပူၤ ပာ်ဖျါ၀ဲန့ၣ်လီၤႉ
လၢန့ၣ်အမဲာ်ညါသုးမီၤစိရိၤဒီးသုးခိးကီၢ်ဆၢ(BGF)သုးပာ်ဖှိၣ်တဖၣ်ခးလီၤ၀ဲကျိဖးဒိၣ်တဖၣ်ဆူကမျၢၢ်ဖိအဒူသ၀ီႇတၢ်ဖံးအီၣ်မၤအီၤလီၢ်ကျဲကိးမုၢ်နံၤဒဲးဃၣ်ဃၣ်အဂ့ၢ်န့ၣ် ခ့ၣ်အဲၣ်ယူၣ်လံာ်တၢ်ပာ်ဖျါအပူၤ ပာ်ဖျါ၀ဲန့ၣ်လီၤႉ
ဖဲအပူၤကွံာ်လါယနူၤအါရံၤတလါအတီၢ်ပူၤ လၢခ့ၣ်အဲၣ်ယူၣ်ကီၢ်သူလ့ၤတၢ်ပၢဟီၣ်က၀ီၤအပူၤ ကညီဒီကလုာ်တၢ်ထူၣ်ဖျဲးသုးမုၢ်ဒိၣ်(KNLA)ႇကညီဒီကလုာ်ဂၢၤသးကရၢ(KNDO)ဒီးသုးမီၤစိရိၤဒီးသုးခိးကီၢ်ဆၢ(BGF)သုးပာ်ဖှိၣ်တဖၣ်အဘၢၣ်စၢၤ တၢ်ဘၣ်သဂၢၢ်ခးလိာ်သးကဲထီၣ်ခဲလၢာ်(၄၃၅)ဘျီဒီး ဖဲန့ၣ်ပယီၤသုးမီၤစိရိၤအၦၤသံ၀ဲ(၃၉၉)ဂၤႇဘၣ်ဒိ၀ဲ(၃၁၃)ဂၤအဂ့ၢ်န့ၣ် လံာ်တၢ်ပာ်ဖျါအပူၤပာ်ဖျါ၀ဲန့ၣ်လီၤႉ
ဒ်န့ၣ်အသိးမ့မ့ၢ်ဟီၣ်က၀ီၤ(KNLA)ဒီး(KNDO)တကပၤဘၣ်ဟ့ၣ်လီၤကွံာ်အသးသမူခဲလၢာ်(၇)ဂၤဒီး ဘၣ်ဒိ၀ဲ(၂၄)ဂၤအဂ့ၢ်န့ၣ် ခ့ၣ်အဲၣ်ယူၣ်ထုးထီၣ်ပာ်ဖျါ၀ဲအသိး သ့ၣ်ညါဘၣ်န့ၣ်လီၤႉ
