လါဖ့ၤဘြူၤအါရံၤ ၂ သီႇ ၂၀၂၂ နံၣ်ႇ ခ့ၣ်အဲးစံၣ်
၂၀၂၁ နံၣ် လါဖ့ၤဘြူၤအါရံၤ ၁ သီ သုးဟံးန့ၢ်ဆူၣ်ကွံာ်တၢ်စိတၢ်ကမီၤ၀ံၤအလီၢ်ခံ တနံၣ်ၦဲၤအတီၢ်ပူၤ လၢဖၣ်ပူၣ်ကီၢ်ရ့ၣ်အပူၤ ပယီၤသုးမီၤစိရိၤအတၢ်ပၢတၢ်ပြးအိၣ်တ့ၢ်က့ၤထဲ(၁၀)မျးကယၤလီၤအဂ့ၢ်န့ၣ် ကညီဒီကလုာ်စၢဖှိၣ်ကရၢ-KNU (သုးက့ ၅)တကပၤစံး၀ဲန့ၣ်လီၤႉ
သုးဟံးန့ၢ်ဆူၣ်ကွံာ်တၢ်စိတၢ်ကမီၤ၀ံၤအလီၢ်ခံ လၢခ့ၣ်အဲၣ်ယူၣ်(သုးက့ ၅)ဟီၣ်က၀ီၤ ဖၣ်ပူၣ်ကီၢ်ရ့ၣ်အပူၤ ဆူၣ်ချ့ႇကူၣ်သ့တၢ်ဖံးတၢ်မၤလၢပယီၤသုးမီၤစိရိၤပာ်လီၤ၀ဲတဖၣ်အံၤ ကတီၢ်အံၤအိၣ်တ့ၢ်က့ၤထဲလၢအ၀ဲသ့ၣ်တၢ်ပၢ၀့ၢ်ပူၤက၀ီၤဒ့ပူၤတဖၣ်လီၤအဂ့ၢ်န့ၣ် ခ့ၣ်အဲၣ်ယူၣ်(သုးက့ ၅)ဒုးယၤခိၣ် သုးခိၣ်ဒိၣ်စိ စီၤထူကဆှီ စံး၀ဲဒ်အံၤန့ၣ်လီၤႉ
“အ၀ဲသ့ၣ်တၢ်ပၢတၢ်ပြးတဖၣ်မ့ၢ်ဘၣ်တဲန့ၣ်အိၣ်တ့ၢ်က့ၤထဲအမျးကယၤ(၁၀)လီၤန့ၣ်ပတဲသ့လီၤႉ လၢဖၣ်ပူၣ်၀့ၢ်ယၢ်ပၤယၢ်ပၤဒီးဖၣ်ပူၣ်-ကမၤမိၢ်ယၢ်ပၤယၢ်ပၤန့ၣ် လၢအပူၤကွံာ်ပမ့တဲန့ၣ်ဆီလီၤ၀ဲဒၣ်ကူၣ်သ့ႇဆူၣ်ချ့တဖၣ်န့ၣ် ခဲအံၤပမ့ဘၣ်တဲန့ၣ်လီၤၦီၢ်လၢာ်လံမီၤနီၤႉ အတၢ်အိၣ်က့ၤထဲဖၣ်ပူၣ်ႇကမၤမိၢ်ႇဒီးကတၢၢ်တံာ်န့ၣ် အတၢ်ပၢတၢ်ပြးအိၣ်တ့ၢ်က့ၤထဲအမျးကယၤ(၁၀)လီၤန့ၣ်ပတဲသ့လီၤ”အဂ့ၢ်န့ၣ် စံးဘၣ်ခ့ၣ်အဲးစံၣ်န့ၣ်လီၤႉ
ဒ်န့ၣ်အသိးလၢဖၣ်ပူၣ်ဟီၣ်က၀ီၤအပူၤ ပယီၤသုးမီၤစိရိၤအၦၤဖံးတၢ်မၤတၢ်ဖိသ့ၣ်တဖၣ်စ့ၢ်ကီး အတၢ်လူၤပိာ်ထွဲတၢ်ဖီခိၣ်တၢ်ကလုၢ်စ့ၢ်ကီးလီၤစှၤ၀ဲအသိး ပာ်တ့ၢ်ကွံာ်အ၀ဲသ့ၣ်အသုးကလၢၤစ့ၢ်ကီးအိၣ်၀ဲဒီး ပယီၤသုးမီၤစိရိၤအၦၤဟဲက့ၤဟ့ၣ်လီၤသးဆူခ့ၣ်အဲၣ်ယူၣ်(သုးက့ ၅)အအိၣ်တစှၤန့ၢ်(၅၀)ဂၤဘၣ်အဂ့ၢ်န့ၣ် ခ့ၣ်အဲၣ်ယူၣ်(သုးက့ ၅)တကပၤစံး၀ဲန့ၣ်လီၤႉ
“သုးဟံးန့ၢ်တၢ်စိတၢ်ကမီၤ၀ံၤအလီၢ်ခံန့ၣ် အၦၤလၢအိၣ်တၢ်မဲာ်ညါတဖၣ်ပထံၣ်ဘၣ်လၢတၢ်မၤထွဲတၢ် ကလုၢ်ႇသုးရ့ၣ်ခိၣ်မၤထွဲ၀ဲဒၣ်ဒုးယၤတၢ်ကလုၢ်ႇဒုးယၤခိၣ်မၤထွဲ၀ဲဒၣ်အသုးတြိၤခိၣ်အကလုၢ်န့ၣ်ပထံၣ်လၢအတအိၣ်လီၤတံၢ်လၢာ်ဘၣ်မီၤနီၤႉ အိၣ်လၢတဲလံၣ်တဲလီလဲလဲလီၤ တဲလံၣ်လိာ်သးတဆီတဆီလဲလဲလီၤႉ လံၣ်လိာ်သးပၢၢ်တုၤဒၣ်လဲာ်လၢအသံလံႇဘၣ်ဒိလံန့ၣ်တပာ်ဖျါ၀ဲလၢအသံဘၣ်ႉ ၀ံၤဘျီပၢၢ်တုၤလၢတၢ်နဲၣ်လီၤလၢကဘၣ်လဲၤ၀ဲဖဲန့ၣ်ဖဲန့ၣ်န့ၣ်တလဲၤ၀ဲဘၣ် ပာ်ဖျါ၀ဲလၢလဲၤလံဒ်န့ၣ်မီၤနီၤ”အဂ့ၢ်န့ၣ် သုးခိၣ်ဒိၣ်စိ စီၤထူကဆှီ စံးအါထီၣ်၀ဲဒၣ်န့ၣ်လီၤႉ
ဖဲအပူၤကွံာ်လါယနူၤအါရံၤ ၂၉ သီအနံၤစ့ၢ်ကီး ခ့ၣ်အဲၣ်ယူၣ်(သုးက့ ၅)ထုးထီၣ်ဟ့ၣ်ပလီၢ်၀ဲလၢ မုၢ်တြီၢ်ကီၢ်ရ့ၣ် ဖၣ်ပူၣ်၀့ၢ်အပူၤ ဂံၢ်ခီၣ်ထံး၀ဲၤကျိၤၦၤမၤတၢ်ဖိလၢအမၤတၢ်လၢပယီၤသုးမီၤစိရိၤအစုတီၤအဖီလာ်သ့ၣ်တဖၣ် စးထီၣ်လါယနူၤအါရံၤ ၁ သီတုၤလၢ ၁၀ သီ ကဟးထီၣ်ကွံာ်ဒီး ၦၤမၤတၢ်ဖိလၢအိၣ်ဖဲဖၣ်ပူၣ်၀့ၢ်ပူၤတဖၣ်ကဟးဆှဲးပယီၤသုးမီၤစိရိၤအတၢ်ဖံးတၢ်မၤတဖၣ်န့ၣ်လီၤႉ
လံာ်တၢ်ဟ့ၣ်ပလီၢ်လၢအ၀ဲသ့ၣ်ထုးထီၣ်ပာ်ဖျါ၀ဲအံၤ တၢ်မ့တလူၤပိာ်မၤထွဲအီၤဘၣ်န့ၣ် တၢ်ကဟံးအရ့တုၤလီၤတီၤလီၤအဂ့ၢ်န့ၣ် ခ့ၣ်အဲၣ်ယူၣ်(သုးက့ ၅)တကပၤဟ့ၣ်ပလီၢ်စံး၀ဲန့ၣ်လီၤႉ
ခီဖျိတၢ်ထုးထီၣ်ဟ့ၣ်ပလီၢ်လံာ်အံၤအဃိ ကတီၢ်အံၤၦၤမၤတၢ်ဖိလၢအမၤတၢ်လၢပယီၤသုးမီၤစိရိၤအစုတီၤအဖီလာ်ဖဲဖၣ်ပူၣ်၀့ၢ်ပူၤတဖၣ် ပယီၤသုးမီၤစိရိၤဒုးယၤခိၣ်ကိးအိၣ်ဖှိၣ်အ၀ဲသ့ၣ်ဒီးဟ့ၣ်ပလီၢ်၀ဲဒၣ်လၢတဘၣ်ဟးထီၣ်စံၣ်အိၣ်ခူသူၣ်ဘၣ်အသိး ကျဲလၢတၢ်ကဟးထီၣ်အလီၢ်သ့ၣ်တဖၣ်စ့ၢ်ကီးတၢ်မၤဃံးထီၣ်တၢ်ဘံၣ်တၢ်ဘၢအဂ့ၢ်န့ၣ် လီၢ်က၀ီၤဖိတဖၣ်စံး၀ဲန့ၣ်လီၤႉ
ၦၤလၢမ့အဲၣ်ဒိးထုးဖးသးဒီးပယီၤသုးမီၤစိရိၤအစုတီၤအဖီလာ်သ့ၣ်တဖၣ်န့ၣ် ကတီၢ်အံၤမ့ၢ်၀ဲတၢ်ဆၢကတီၢ်လၢအဂ့ၤကတၢၢ်လီၤဒီး ပယီၤသုးမီၤစိရိၤမ့မၤဃံးထီၣ်၀ဲဘၣ်ဆၣ် ၦၤလၢမ့အဲၣ်ဒိးထုးဖးသးသ့ၣ်တဖၣ်န့ၣ် ခ့ၣ်အဲၣ်ယူၣ်ရဲၣ်ကျဲၤ၀ဲလၢကမၤစၢၤ၀ဲဒၣ်အဂ့ၢ်န့ၣ် လီၢ်က၀ီၤတၢ်ကစီၣ်လၢအဘူးဒီးခ့ၣ်အဲၣ်ယူၣ်စံး၀ဲအသိး သ့ၣ်ညါဘၣ်န့ၣ်လီၤႉ
