လါယနူၤအါရံၤ ၃၁သီ, ၂၀၂၅နံၣ်, ခ့ၣ်အဲးစံၣ်,
ခ့ၣ်အဲၣ်ယူၣ်ကညီဒီကလုၥ်စၢဖှိၣ်ကရၢ,သုးက့(၇)တၢ်ပၢဟီၣ်ကဝီၤ,ကျိၣ်ယီၢ်လ့ပျီခိၣ်ဃၢၤတၢ်လီၢ်တဖၣ်အပူၤတနံၤအံၤဂီၤခီ(၇)နၣ်ရံၣ်ဘျဲၣ်အဆၢကတီၢ်,တၢ်ခးလီၤဝဲကၣ်မံးကၣ်စံဒြိ(၂)ဖျၢၣ်ကဲထီၣ်အသးဒီးဘၣ်ဒိဝဲကမျၢၢ်(၁)ဂၤအဂ့ၢ်,သုးက့ခိၣ်ပၥ်ဂၢၢ်ပၥ်ကျၢၤစံးဘၣ်ခ့ၣ်အဲးစံၣ်ကညီတၢ်ကစီၣ်န့ၣ်လီၤ.
တၢ်လီၢ်လၢတၢ်ခးလီၤဝဲဒြိအံၤ,အပူၤကွံၥ်(၂၀၂၉)နံၣ်အပူၤတၢ်မၤတ့ၢ်ဝဲ(၇၀)ဝီတဝီပှဲၤထီၣ်ကညီတၢ်ပၢၢ်ဆၢမုၢ်နံၤတၢ်ရဲၣ်တၢ်ကျဲၤအိၣ်ဝဲဒီး,တၢ်ခးလီၤဝဲဒၣ်ဒြိတနံၤအံၤန့ၣ်မ့ၢ်ဝဲကညီတၢ်ပၢၢ်ဆၢအမုၢ်နံၤပှဲၤထီၣ်(၇၆)ဝီတဝီအနံၤန့ၣ်လီၤ.
တၢ်ခးလီၤတၢ်ကဲထီၣ်အသးအံၤ,တၢ်တယၥ်ဝဲလၢသုးကီၣ်ကးတဖၣ်ဟဲခးလီၤဝဲဒီး,ခီဖျိကၣ်မံးကၣ်စံးဒြိလီၤတဲၥ်ဝဲအဃိ,ဘၣ်ဟးဂီၤဝဲတၢ်သူၣ်ထီၣ်တဖျၢၣ်ဒီးသိလ့ၣ်တခိၣ်အသိး,ဘၣ်ဒိဝဲကမျၢၢ်လီၢ်ကဝီၤဖိတဂၤအခီၣ်အဂ့ၢ်,သ့ၣ်ညါဘၣ်န့ၣ်လီၤ.
ဘၣ်ဃးဒီးတၢ်ကဲထီၣ်အသးအံၤအဖီခိၣ်,သုးက့(၇)အသုးက့ခိၣ်သုးခိၣ်ကျၢၢ်ဖိစီၤဒံၣ်ကွဲၤစံးဘၣ်ခ့ၣ်အဲးစံၣ်ကညီတၢ်ကစီၣ်ဒ်အံၤန့ၣ်လီၤ.
အဝဲစံးဝဲလၢ“တၢ်ကဲထီၣ်သးအံၤပတသ့ၣ်ညါဆိနီတမံၤဘၣ်,ကဲထီၣ်သးဝံၤမးယဆဲးကျိးသံကွၢ်ဒီးသ့ၣ်ညါထွဲက့ၤလီၤ.ခးလီၤတၢ်ကအိၣ်ကမံးနံးတဆံဝံၤခးလီၤကဒီးဝဲတထံၣ်ခဲလၢၥ်ခံထံၣ်န့ၣ်လီၤ.ယပဲၥ်ထံနီၤဖးအီၤလၢအဘူးကတၢၢ်ကမ့ၢ်(၉၆၂)ပယီၤသ့ၣ်တဖၣ်န့ၣ်လီၤ.ပှၤသ့ၣ်တဖၣ်အံၤခီအိၣ်ဝဲဖဲမဲၢ်တဝီဟီၣ်ကဝီၤန့ၣ်လီၤ.ပမ့တဲလၢမၤဝဲဒ်အံၤခီန့ၣ်,အပူၤကွံၥ်တၢ်လီၢ်ဝဲန့ၣ်ပမၤဝဲထီဘိကမံးတံၥ်တၢ်အိၣ်ဖှိၣ်,ခဲအံၤဒီးမ့ၢ်ဝဲတၢ်ပၢၢ်ဆၢ(၇၆)နံၣ်ဆၢက့ၤအလီၢ်အဃိ,ဒ်သိးပှၤသုတမၤဘၣ်တၢ်ရဲၣ်တၢ်ကျဲၤတဂ့ၤမုၥ်မုၥ်နီၢ်နီၢ်တဂ့ၤအဂီၢ်အဝဲသ့ၣ်မၤဝဲန့ၣ်လီၤ.”အဂ့ၢ်စံးဝဲဒၣ်န့ၣ်လီၤ.
ဒ်န့ၣ်အသိး,ဒုၣ်ဒါအံၤအတၢ်ရဲၣ်တၢ်ကျဲၤအိၣ်ဝဲလၢကမၤတၢ်ဒ်အံၤတပယူၥ်ဃီထီဘိအဃိ,ကမျၢၢ်ထံဖိကီၢ်ဖိတဖၣ်ကဘၣ်အိၣ်ဒီးတၢ်ပလီၢ်ပဒီသးထီဘိအသိး,တၢ်ဒီသဒၢလီၤသးအဂီၢ်ကဘၣ်ဒုးအိၣ်ထီၣ်ဝဲတၢ်ဘံၣ်တၢ်ဘၢအဂီၢ်တဖၣ်အဂ့ၢ်စံးအါထီၣ်စ့ၢ်ကီးဝဲဒၣ်န့ၣ်လီၤ.
သုးက့(၇)ဖၣ်အၣ်ကီၢ်ရ့ၣ်အပူၤအံၤ,အပူၤကွံၥ်(၂၀၂၄)နံၣ်လါအီးကထိဘၢၣ်(၂၂)သီဂီၤခီအနၣ်ရံၣ်(၁၀)အနံၤအပူၤ,တၢ်ခးလီၤဝဲကၣ်မံးကၣ်စံးဒြိ(၄)ဖျၢၣ်လၢကညီဒီကလုၥ်တၢ်ထူၣ်ဖျဲးသုးမုၢ်ဒိၣ်,(KNLA)လီၢ်ခၢၣ်သးဝဲၤလီၢ်ခိၣ်သ့ၣ်ခိၣ်ဃၢၤတၢ်လီၢ်ပူၤကဲထီၣ်တ့ၢ်ဝဲဒၣ်အသးအိၣ်ဝဲစ့ၢ်ကီးန့ၣ်လီၤ.
ဒီးအပူၤကွံၥ်သုးကီၣ်ကးလၢဟဲခးလီၤဝဲကၣ်မံးကၣ်စံးဒြိဆူ(KNLA)လီၢ်ခၢၣ်သးဝဲၤလီၢ်ခိၣ်သ့ၣ်သ့ၣ်တဖၣ်အံၤမ့ၢ်ဝဲ(ရှါယွၤသ့ၣ်)သုးကလၢၤလၢကျီၢ်ကတံၥ်တကပၤအဂ့ၢ်,သ့ၣ်ညါဘၣ်ဒ်ပှၤဘၣ်မူဘၣ်ဒါတဖၣ်စံးဝဲဒၣ်အသိးန့ၣ်လီၤ.
