လါမးရှး ၂၅သီႇ ၂၀၂၂နံၣ်ႇ ခ့ၣ်အဲးစံၣ်
ဖဲမဟါလါမးရှး ၂၄ သီ မုၢ်နၤခီ ၉း၂၀ မံးနံးအဆၢကတီၢ် မ့ၣ်ပိၢ်ပိၢ်ဖးထီၣ်တဖျၢၣ်လၢကညီကီၢ်စဲၣ် မၠၣ်၀တံၣ်က၀ီၤဒ့(၃) သုးခိးကီၢ်ဆၢ(BGF)သုးဟီၣ်က၀ီၤ(၄)အခိၣ် သုးခိၣ်ဒိၣ်ဖိစီၤမိၣ်သိၤအကိၣ်ကျးတၢ်သူၣ်ထီၣ်ကပၤအဂ့ၢ်န့ၣ် သ့ၣ်ညါဘၣ်န့ၣ်လီၤႉ
ခီဖျိမ့ၣ်ပိၢ်ပိၢ်ဖးထီၣ်အဃိသုးခိၣ်ဒိၣ်ဖိအကိၣ်ကျးလ့သံၤရံၣ်တၢ်သူၣ်ထီၣ်အတြဲၤမဲၤထံကလၤတနီၤသဲၣ်ဖးဟးဂီၤ၀ဲအဂ့ၢ်န့ၣ် ၦၤလၢအိၣ်ဘူးဒီးတၢ်ကဲသးအလီၢ်တဂၤစံး၀ဲဒ်အံၤန့ၣ်လီၤႉ
“တၢ်ပိၢ်ထီၣ်အကလုၢ်ဒုသီၣ်ဖးဒိၣ်ညါလီၤႉပိၢ်ဖးထီၣ်ဖဲကပိၤကပၤအံၤလီၤအဃိဟံၣ်ဟူးညီမးလီၤႉလၢခံမးသ့ၣ်ညါက့ၤလၢပိၢ်ဖးထီၣ်လၢမၠၣ်၀တံၣ်က၀ီၤဒ့(၃)သုးခိၣ်ဒိၣ်ဖိစီၤမိၣ်သိၤအကိၣ်ကျး(လ့သံၤရံၣ်)တၢ်သူၣ်ထီၣ်လီၢ်အတြဲၤမဲၤထံကလၤနါက့သဲၣ်ဖးလီၤ”အဂ့ၢ်န့ၣ် အ၀ဲစံး၀ဲန့ၣ်လီၤႉ
ဖဲမ့ၣ်ပိၢ်ပိၢ်ဖးထီၣ်အခိၣ်အဃၢၤန့ၣ်အိၣ်ဘူးဒီးကီၢ်ရ့ၣ်ႇကီၢ်ဆၣ်၀ဲၤကျိၤအ၀ဲၤဒၢးတဖၣ်ဒီး ဟဲမၤပိၢ်ဖးထီၣ်ခီဖျိမနုာ်တၢ်ဂ့ၢ်လဲၣ်န့ၣ် ကမျၢၢ်လၢအိၣ်၀့ၢ်ပူၤသ့ၣ်တဖၣ်အဲၣ်ဒိးသ့ၣ်ညါ၀ဲန့ၣ်လီၤႉ
မ့ၣ်ပိၢ်ပိၢ်ဖးထီၣ်တယံၤတမီၢ် နၢ်ဟူကျိဖးဒိၣ်ႇကျိဖိအကလုၢ်သီထီၣ်လၢ မၠၣ်၀တံၣ်က၀ီၤဒ့(၄)ကၠီၣ်လိကၠံက၀ီၤဒ့မုၢ်နုာ်တကပၤအဂ့ၢ်န့ၣ် လီၢ်က၀ီၤဖိတဖၣ်စံး၀ဲအသိးသ့ၣ်ညါဘၣ်န့ၣ်လီၤႉ
