တၢ်ဒုးဆူၣ်ထီၣ်လၢခ့ၣ်အဲၣ်ယူၣ်(သုးက့ ၁)ဟီၣ်က၀ီၤပူၤအဃိ လီၢ်က၀ီၤဖိလၢအထိဘၣ်ဃ့ၢ်ထီၣ်

လါအ့ဖြ့ၣ် ၂၅ သီႇ ၂၀၂၂ နံၣ်ႇ ခ့ၣ်အဲးစံၣ်

စးထီၣ်ဖဲလါအ့ဖြ့ၣ် ၂၃ သီအနံၤန့ၣ် တၢ်ဒုးဆူၣ်ထီၣ်၀ဲလၢခ့ၣ်အဲၣ်ယူၣ်-ကညီဒီကလုာ်စၢဖှိၣ်ကရၢ ဒူသထူၣ်ကီၢ်ရ့ၣ်(သုးက့ ၁)ဟီၣ်က၀ီၤ ဘံလ့ကီၢ်ဆၣ်အပူၤဒီး ခီဖျိပယီၤသုးခးလီၤနါစိၤကျိဖးဒိၣ်ဆူသ၀ီတဖၣ်အပူၤအဃိ လီၢ်က၀ီၤကမျၢၢ်လၢအကထိဘၣ်ဃ့ၢ်ပူၤဖျဲးသးအဂ့ၢ်န့ၣ် သ့ၣ်ညါဘၣ်န့ၣ်လီၤႉ

ဖဲအပူၤကွံာ်စှၤသီအခါ ကညီဒီကလုာ်ဂၢၤသးကရၢ(KNDO)သုးရ့ၣ်(၂)ထုးထီၣ်လံာ်ဟ့ၣ်ပလီၢ်၀ဲလၢ ပယီၤသုးကလၢၤလၢအိၣ်ဖဲခ့ၣ်အဲၣ်ယူၣ်ဘံလ့ကီၢ်ဆၣ်လ့က့ၣ်ဒီးတၤပီသ၀ီပူၤတဖၣ် (၂၃)သီလီၢ်ခံကတၢၢ်အဟးထီၣ်ကွံာ်၀ဲဘၣ်ဆၣ် ပယီၤသုးအံၤမ့မ့ၢ်တခီတဟးထီၣ်ကွံာ်ဘၣ်အမဲာ်ညါ ခးလီၤနါစိၤကျိဖးဒိၣ်ဆူသ၀ီတဖၣ်အပူၤအဂ့ၢ်န့ၣ် ဒူသထူၣ်ကီၣ်ရ့ၣ်ခိၣ် ပဒိၣ်စီၤစိမၠ့ၣ်စံးဘၣ်ခ့ၣ်အဲးစံၣ်န့ၣ်လီၤႉ

“အခီၣ်ထံးန့ၣ်ယနၢ်ဟူလၢအ၀ဲသ့ၣ်ဟဲတဲ၀ဲဒၣ်လၢတၤပီပယီၤသုးကလၢၤကဟးထီၣ်အဂီၢ်မၢဟ့ၣ်အါထီၣ်တၢ်ဆၢကတီၢ်မီၤနီၤႉ ဘၣ်ဆၣ်မ့ၢ်နံၤမုၢ်သီဘၣ်လံတဟးထီၣ်ဘၣ်အဃိပလဲၤခးဟ့ၣ်ပလီၢ်အ၀ဲသ့ၣ်လီၤႉ အ၀ဲသ့ၣ်နါက့က့ၤခးဆၢၦၤလီၤႉကျိချံလီၤတဲာ်လၢတၢ်လီၢ်တဘျုးတီၤညါႉတၢ်အဃိန့ၣ်သ၀ီဖိလၢအကထိအကလးဃၣ်ဃၣ်ဘၣ်ဃ့ၢ်ထီၣ်၀ဲ”အဂ့ၢ်န့ၣ် စံး၀ဲန့ၣ်လီၤႉ

ဖဲအပူၤကွံာ်လါအ့ဖြ့ၣ် ၂၃ သီအနံၤစ့ၢ်ကီး ခီဖျိကတၢၢ်တံာ်ပယီၤသုးကလၢၤလၢအအိၣ်ဖဲဖၣ်ပူၣ်ကီၢ်ရ့ၣ်(သုးက့ ၅)ဟီၣ်က၀ီၤပူၤအံၤ ခးလီၤစိကျိဖးဒိၣ်ဆူတၤအုးနံၤသ၀ီပူၤအဃိ သ၀ီဖိအဟံၣ်အဃီဟးဂီၤ၀ဲ(၅)ဖျၢၣ်အသိး ကမျၢၢ်ဘၣ်ဒိ၀ဲ(၂)ဂၤဒံးန့ၣ်လီၤႉ လၢတၢ်န့ၣ်အဃိသ၀ီအဖျၢၣ်(၁၀)ဘျဲၣ်လၢ အပၣ်ဃုာ်ဒီးတၤအုးနံၤႇလ့က့ၣ်ႇတၤပီႇပယၢ်ရီသ၀ီဖိတဖၣ်စ့ၢ်ကီးဘၣ်ဟးစံၣ်ပလဲာ်သးအဂ့ၢ်န့ၣ် ခ့ၣ်အဲၣ်ယူၣ်ထုးထီၣ်ပာ်ဖျါ၀ဲန့ၣ်လီၤႉ

ဒ်န့ၣ်အသိးလီၢ်က၀ီၤသ၀ီဖိတနီၤဘၣ်ယိၣ်၀ဲလၢပယီၤသုးကဘီယူၤကဟဲခးလီၤတၢ်အဃိ ဟံၣ်ဖိဃီဖိသ့ၣ်တဖၣ်ဘၣ်လဲၤစံၣ်အိၣ်၀ဲဒၣ်လၢလၢၢ်ပူၤလ့ပူၤအဂ့ၢ်န့ၣ် သ့ၣ်ညါဘၣ်န့ၣ်လီၤႉ

လီၢ်က၀ီၤကမျၢၢ်လၢအဘၣ်ဃ့ၢ်ထီၣ်တဖၣ်အံၤအဂီၢ် တၢ်ကရၢကရိလၢအအိၣ်ဖဲလီၢ်က၀ီၤဖဲန့ၣ်အပူၤတဖၣ်လဲၤဟ့ၣ်၀ဲတၢ်ဆီၣ်ထွဲမၤစၢၤအိၣ်ဘၣ်ဆၣ် ၦၤဃ့ၢ်တၢ်ဒုးဖိတဖၣ်အါဒၣ်တက့ၢ်န့ၣ်တဒိးန့ၢ်ဘၣ်၀ဲတၢ်ဆီၣ်ထွဲမၤစၢၤဘၣ်အဃိ လိၣ်ဘၣ်၀ဲဒၣ်တၢ်ဆီၣ်ထွဲမၤစၢၤသ့ၣ်တဖၣ်ဒံးအဂ့ၢ်န့ၣ် သ့ၣ်ညါဘၣ်န့ၣ်လီၤႉ