လါအ့ဖြ့ၣ် ၅ သီႇ ၂၀၂၂ နံၣ်ႇ ခ့ၣ်အဲးစံၣ်
ဖဲအပူၤကံွာ်လါမးရှးတလါအတီၢ်ပူၤခီဖျိပယီၤသုးမီၤစိရိၤဒီးသုးခိးကီၢ်ဆၢ(BGF)သုးခးလီၤနါစိၤကျိဖးဒိၣ်ကျိဖိတဖၣ်ဆူခ့ၣ်အဲၣ်ယူၣ်-ကညီဒီကလုာ်စၢဖှိၣ်ကရၢတၢ်ပၢဟီၣ်က၀ီၤပူၤအဃိ ကမျၢၢ်သံ(၂၅)ဂၤဒီးဘၣ်ဒိ(၃၁)ဂၤအဂ့ၢ်န့ၣ် ခ့ၣ်အဲၣ်ယူၣ်ထုးထီၣ်ပာ်ဖျါ၀ဲန့ၣ်လီၤႉ
ခီဖျိပယီၤသုးဒီး(BGF)သုးတဖၣ်ခးလီၤကျိဖးဒိၣ်အဃိမ့ၢ်ဂ့ၤႇဟဲခးလီၤတၢ်လၢကဘီယူၤမ့ၢ်ဂ့ၤႇမၤဟးဂီၤကမျၢၢ်အတၢ်ဖိတၢ်လံၤမ့ၢ်ဂ့ၤ ပထိၣ်ဒွးက့ၤလၢစိၤခဲအံၤအလုၢ်အၦ့ၤကလီၤလၢ၀ဲလၢစ့အကလီၢ်တကထိဃၣ်ဃၣ်ညါအဂ့ၢ်န့ၣ် ခ့ၣ်အဲၣ်ယူၣ်လံာ်တၢ်ပာ်ဖျါအပူၤ ပာ်ဖျါ၀ဲန့ၣ်လီၤႉ
လၢန့ၣ်အမဲာ်ညါလၢခ့ၣ်အဲၣ်ယူၣ်-ချၢၣ်လွံၢ်ထူၣ်ကီၢ်ရ့ၣ်ႇမုၢ်တြီၢ်ကီၢ်ရ့ၣ်ဒီးဒူပျာ်ယာ်ကီၢ်ရ့ၣ်ဟီၣ်က၀ီၤတဖၣ်အပူၤ ခီဖျိပယီၤသုးသူ၀ဲကဘီယူၤဟဲခးလီၤတၢ်အိၣ်၀ဲ(၈)ဘျီညါအဃိ ကမျၢၢ်ဘၣ်ဒိ၀ဲ(၂)ဂၤဒီးကမျၢၢ်အဟံၣ်အဃီတၢ်သူၣ်ထီၣ်ဟးဂီၤ၀ဲအါမးအဂ့ၢ်န့ၣ် ခ့ၣ်အဲၣ်ယူၣ်လံာ်တၢ်ပာ်ဖျါအပူၤပာ်ဖျါ၀ဲန့ၣ်လီၤႉ
ခီဖျိပယီၤသုးမၤ၀ဲတၢ်ထီၣ်ဒုးႇခးလီၤကျိဖးဒိၣ်ကျိဖိတဖၣ်ဒီးကဘီယူၤဟဲတ့ၢ်လီၤမ့ၣ်ပိၢ်လၢခ့ၣ်အဲၣ်ယူၣ်တၢ်ပၢဟီၣ်က၀ီၤပူၤအဃိ လီၢ်က၀ီၤကမျၢၢ်(၁၀၀ႇ၀၀၀)ဘျဲၣ်ဘၣ်ပာ်တ့ၢ်ကွံာ်အဟံၣ်အဃီဘၣ်ဟးစံၣ်ပလဲာ်သးအဂ့ၢ်န့ၣ် ခ့ၣ်အဲၣ်ယူၣ်စံး၀ဲန့ၣ်လီၤႉ
ကညီဂ့ၢ်၀ီခွဲးယာ်ကရူၢ်(KHRG)ၦၤကတိၤတၢ်ပၢစီၤနဒၣ်ဆူစံး၀ဲ“လၢတၢ်ကဲထီၣ်သးတခါအံၤအဖီခိၣ်န့ၣ်ပမ့ကွၢ်ကဒါက့ၤလၢၦၤဂ့ၢ်၀ီခွဲးယာ်တကပၤခီန့ၣ်မ့ၢ်တၢ်မၤဘၣ်ဒိ၀ဲဒၣ်ၦၤဂ့ၢ်၀ီခွဲးယာ်ဒိၣ်ဒိၣ်မုၢ်လီၤမီၤနီၤႉဒီးဒ်န့ၣ်အသိးစ့ၢ်ကီးလၢထံဂုၤကီၢ်ဂၤတၢ်သိၣ်တၢ်သီတၢ်ဘျၢ(International Humanitarian Law)နါက့အ၀ဲမၤဘၣ်ဒိ၀ဲဒၣ်တဲာ်တဲာ်ဖျုဖျုလီၤမီၤနီၤႉအဃိသတးန့ၣ်ခီဖျိလၢကျိဖးဒိၣ်ခးလီၤတၢ်မ့ၢ်ဂ့ၤႇကဘီယူၤဟဲကွံာ်လီၤတၢ်မ့ၢ်ဂ့ၤႇတၢ်ဒုးတၢ်ယၤကဲထီၣ်မ့ၢ်ဂ့ၤန့ၣ်တၢ်လၢအမၤဘၣ်ဒိၦၤဂ့ၢ်၀ီခွဲးယာ်အဒိၣ်ကတၢၢ်န့ၣ်ကမ့ၢ်၀ဲဒၣ်လီၢ်က၀ီၤကမျၢၢ်အတၢ်အိၣ်မူအတၢ်ဘံၣ်တၢ်ဘၢမီၤနီၤႉဒ်န့ၣ်အသိးလၢသူၣ်သးတကပၤစ့ၢ်ကီးန့ၣ်အသုတၢ်ဘံၣ်တၢ်ဘၢတအိၣ်လၢၤဘၣ်ႉခံထံၣ်တထံၣ်န့ၢ်မၤဘၣ်ဒိ၀ဲတၢ်လုၢ်အီၣ်နီၢ်ခိသးသမူခွဲးယာ်လီၤႉတၢ်သ့ၣ်တဖၣ်အံၤကြၢးလၢတၢ်ကဘၣ်ပတုာ်အီၤလၢအဆိအချ့လီၤ”အဂ့ၢ်န့ၣ် စံး၀ဲန့ၣ်လီၤႉ
ဒ်ခ့ၣ်အဲၣ်ယူၣ်ထုးထီၣ်ပာ်ဖျါ၀ဲအသိးန့ၣ် ခ့ၣ်အဲၣ်ယူၣ်-ကညီဒီကလုာ်စၢဖှိၣ်ကရၢကီၢ်သူလ့ၤတၢ်ပၢဟီၣ်က၀ီၤပူၤ ကညီဒီကလုာ်တၢ်ဖူၣ်ဖျဲးသုးမုၢ်ဒိၣ်(KNLA)ႇကညီဒီကလုာ်ဂၢၤသးကရၢ(KNDO)ဒီးသုးမီၤစိရိၤႇသုးခိးကီၢ်ဆၢ(BGF)သုးတဖၣ်အဘၢၣ်စၢၤ တၢ်ဘၣ်သဂၢၢ်ခးလိာ်သးကဲထီၣ်၀ဲ(၅၁၀)ဘျီဒီး ဖဲန့ၣ်ပယီၤသုးႇသုးခိးကီၢ်ဆၢ(BGF)အသုးသံ၀ဲ(၄၂၉)ဂၤႇဘၣ်ဒိ(၂၆၀)ဂၤအဂ့ၢ်န့ၣ် ပာ်ဖျါ၀ဲန့ၣ်လီၤႉ လၢန့ၣ်အမဲာ်ညါ(KNLA)ဒီး(KNDO)မၤဟးဂီၤကွံာ်သုးမီၤစိရိၤအသုးသိလ့ၣ်ခဲလၢာ်(၃၅)ခိၣ်အဂ့ၢ်န့ၣ် စံး၀ဲန့ၣ်လီၤႉ
ဒ်န့ၣ်အသိးကညီဒီကလုာ်တၢ်ထူၣ်ဖျဲးသုးမုၢ်ဒိၣ်(KNLA)ဒီးကညီဒီကလုာ်ဂၢၤသးကရၢ(KNDO)တကပၤဘၣ်ဟ့ၣ်လီၤကွံာ်အသးသမူလၢထံကီၢ်ဒီးၦၤကလုာ်အဂီၢ်(၂၂)ဂၤႇ လုၢ်ထီၣ်အနီၢ်ခိက့ၢ်ဂီၤလၢထံကီၢ်ဒီးကလုာ်ဂီၢ်(၃၅)ဂၤအဂ့ၢ်န့ၣ် ပာ်ဖျါ၀ဲန့ၣ်လီၤႉ