လါယူၤ ၂၆ သီ, ၂၀၂၆ နံၣ်, ခ့ၣ်အဲးစံၣ်
ကီၢ်ကၠီၣ်တဲၣ်-ကီၢ်ပယီၤကီၢ်ဆၢ တးကီၢ်ရ့ၣ် မဲၢ်ဆီးဟီၣ်ကဝီၤအပူၤ စးထီၣ်ဖဲလါယူၤထီၣ်အံၤန့ၣ် ကၠီၣ်တဲၣ်ပှၤဘၣ်မူဘၣ်ဒါ ဘၣ်ထွဲ တဖၣ်နုၥ်လီၤသမံသမိးတၢ်ဟဲအါထီၣ်ဝဲတပယူၥ်ဃီအဃိ ခီကီၢ်ပှၤမၤတၢ်ဖိလၢအလံၥ်လဲၢ်(လံၥ်အုၣ်သး)တအိၣ် လၢပှဲၤဘၣ် သ့ၣ်တဖၣ် အံၤ တၢ်ဘၣ်ယိၣ်ဘၣ်ဘှီဟဲအါထီၣ်ဝဲအဂ့ၢ်န့ၣ် သ့ၣ်ညါဘၣ်န့ၣ်လီၤ.
စးထီၣ်ဖဲအပူၤကွံၥ်လါမ့ၤဘူးကလၢၤအခါန့ၣ် မဲၢ်ဆီးပၢၤကီၢ်ဒီး(တီမီ)ဃုၥ်ဒီးပှၤဘၣ်မူဘၣ်ဒါဘၣ်ထွဲလၢအဂၤပၥ်ဖှိၣ်ထီၣ်သးနုၥ် လီၤ သမံသမိးဝဲတၢ်လၢမဲၢ်ဆီးဝ့ၢ်ဃၢၤ မဲၢ်ပး မၤလွ့ၤတၢး(၄)ကထြၢတၢ်သူၣ်ထီၣ်အပူၤဒီး ဖဲန့ၣ်ဖီၣ်က့ၤကိးဝဲကီၢ်ပယီၤခီကီၢ် ပှၤမၤတၢ်ဖိ လၢအဆါတၢ်တအိၣ်ဝဲဒီးတၢ်ဟ့ၣ်အခွဲးအံၤဘၣ်တနီၤန့ၣ်လီၤ.
တကးဒံးဘၣ်ဖဲတလါအံၤလါယူၤ ၁၀ သီအနံၤစ့ၢ်ကီး ကၠီၣ်တဲၣ်ပှၤဘၣ်မူဘၣ်ဒါနုၥ်လီၤသမံသမိးတၢ်လၢ(ဖၣ်ခၠၤလိၤ)တၢ်ဆါ တၢ်ပှ့ၤတၢ်လီၢ်ဒီး ဒ်န့အၣ်သိးဖဲန့ၣ်ဖီၣ်က့ၤကိးဝဲကီၢ်ပယီၤခီကီၢ်ပှၤမၤတၢ်ဖိအဂၤ(၁၀)အဂ့ၢ်န့ၣ် ကၠီၣ်တဲၣ်တၢ်ကစီၣ်ထုးထီၣ် ပၥ်ဖျါ တ့ၢ်ဃၥ်ဝဲအိၣ် န့ၣ်လီၤ.
ဘၣ်ဆၣ်လီၢ်ခံအံၤ ကၠီၣ်တဲၣ်ပှၤဘၣ်မူဘၣ်ဒါတဖၣ် ကျဲဖးဒိၣ်ပူၤအမဲၥ်ညါ နုၥ်လီၤသမံသမိးတၢ်တုၤလၢကဝီၤဒ့ပူၤ, ဟံၣ်ပူၤ, ဟံၣ်ဒၢးခါလၢပှၤကီၢ်ပယီၤအိၣ်အလီၢ်အါတကးဒံးဘၣ်နုၥ်လီၤသမံသမိးတုၤဝဲလၢပှၤဆါတၢ်လီၢ်(ကျးဖးဒိၣ်)တဖၣ်ပူၤအဃိ ကီၢ်ပယီၤခီကီၢ်ပှၤမၤတၢ်ဖိလၢအတအိၣ်ဒီးလံၥ်လဲၢ်လၢအဖိးသဲးစးဘၣ်တဖၣ်အံၤ မုၢ်နၤခီမ့ၢ်ဂ့ၤ,မုၢ်ဆါခီမ့ၢ်ဂ့ၤ အဝဲသ့ၣ်ဘၣ် ယိၣ် ဘၣ်ဘှီတၢ်ဟဲအါထီၣ်ဝဲဒၣ်န့ၣ်လီၤ.
ဒ်န့ၣ်အသိးဖဲမဟါလါယူၤ ၂၅ သီအနံၤစ့ၢ်ကီး လၢတၢ်ဆါတၢ်ပှ့ၤလီၢ်(လိတၣ်)ဖးဒိၣ်အပူၤ ကၠီၣ်တဲၣ်ပှၤဘၣ်မူဘၣ်ဒါနုၥ်လီၤသမံ သမိးဝဲတၢ်လၢတၢ်မၤဃံလီၢ်တဖျၢၣ်ပူၤဒီး ဖဲန့ၣ်တၢ်ဖီၣ်က့ၤဝဲအိၣ်အဂ့ၢ်န့ၣ် မဲၢ်ဆီးတၢ်ကစီၣ်တဖၣ်ပၥ်ဖျါဝဲအသိး သ့ၣ်ညါဘၣ် န့ၣ်လီၤ.
တချုးတၢ်ကဲထီၣ်သးအံၤဒံးဘၣ်ဖဲအပူၤကွံၥ်လါယူၤ ၂၄ သီအနံၤစ့ၢ်ကီး လၢဟီၤဖၤကဝီဒ့ မုၢ်နွံနံၤတၢ်ဆါတၢ်ပှ့ၤလီၢ်ခံ ဟံၣ်အခါ လၢပှၤကီၢ်ပယီၤအိၣ်ဆိးဝဲအံၤ တီမီပှၤဘၣ်မူဘၣ်ဒါ နုၥ်လီၤသမံသမိးဝဲတၢ်ဒံးဒီး ဘၣ်ဆၣ်ခီဖျိ ပှၤကီၢ်ပယီၤဖိလၢ တၢ်လဲၤသမံ သမိးဝဲတဖၣ်အံၤအိၣ်ဒီးလံၥ်လဲၢ်လၢပှဲၤအဃိ တၢ်ဖီၣ်ဝဲတအိၣ်နၤဂၤဘၣ်အဂ့ၢ်န့ၣ် သ့ၣ်ညါဘၣ် လၢပှၤအိၣ်ဘူး ဖဲန့ၣ်တဖၣ် အအိၣ်န့ၣ်လီၤ.
ဘၣ်ဃးတၢ်ဟးဖီၣ်ခီကီၢ်ပှၤမၤတၢ်ဖိလၢတအိၣ်ဒီးလံၥ်လဲၢ်ဟဲအါထီၣ်တၢ်ဂ့ၢ်အံၤန့ၣ် ခီကီၢ်ပှၤမၤတၢ်ဖိလၢတအိၣ်ဒီး လံၥ်လဲၢ်လၢ ပှဲၤဘၣ်တဂၤ ပၥ်ဖျါထီၣ်တၢ်လၢအသဂၢၢ်ဘၣ်ဝဲဒီးတၢ်တူၢ်ဘၣ်အဂ့ၢ်အကျိၤတဖၣ်ဒ်အံၤန့ၣ်လီၤ.
“ပလ့းဟးဖီၣ်ထီၣ်ဟးသမံသမိးတၢ်ဟဲအါထီၣ်အဃိ ပပျံၤတၢ်ဒီးပဘၣ်ပလီၢ်သးဒိၣ်န့ၢ်ပှၤလၢအလံၥ်အလဲၢ်အိၣ်ဒံးမီၤနီၤ. ပဘၣ်အိၣ် ဒီးတၢ်ပျံၤတၢ်ဖုးအဃိကဲထီၣ်တၢ်ကီတၢ်ခဲဖးဒိၣ်ညါ.လၢအိၣ်တနံၤန့ၣ်ဖဲပအိၣ်ဃၢၤအံၤကၠီၣ်တဲၣ်ပှၤ ဘၣ်မူဘၣ်ဒါ (တီမီ)နုၥ်လီၤသမံသမိးတၢ်လၢပှၤပယီၤကီၢ်အိၣ်ဟံၣ်ပူၤ.အဝဲသ့ၣ်တဲဝဲလၢအနၢ်ဟူပှၤမၤကၠါဖၠၣ်အိၣ်ဖဲအံၤ.ဘၣ်ဆၣ်အဟဲသမံသမိးဝဲဘျီတမ့ၢ်ဘၣ်.အခါဖဲန့ၣ်ပဟးထီတၢ်ချၢတဘူၣ်ဘၣ်.ဘၣ်မနုၤလဲၣ်ပလံၥ်ပလဲၢ်တအိၣ်လၢလၢပှဲၤပှဲၤဘၣ်.ခဲအံၤပနၢ်ဟူလၢမဲၢ်ဆီးဟီၣ်ကဝီၤပူၤအံၤ ပှၤမၤ ကၠါဖၠၣ်အိၣ်အါထီၣ်မီၤ.ပဘၣ်ယိၣ်လၢပှၤကဆိမိၣ်ကမၣ်ပှၤလၢ ပမၤကၠါဖၠၣ်တၢ်မၤ လီၤ.” အဂ့ၢ်န့ၣ် စံးဘၣ်ခ့ၣ်အဲးစံၣ်-ကညီတၢ်က စီၣ်န့ၣ်လီၤ.
ဒ်န့ၣ်အသိးဖဲအပူၤကွံၥ်စှၤသီအခါန့ၣ်စ့ၢ်ကီး လၢမဲၢ်ဆီးဝ့ၢ်ပူၤ ဖၠါဖးဒိၣ်ပှၤကီၢ်ပယီၤဆါတၢ်အလီၢ်ဖးဒိၣ်အခိၣ်အဃၢၤန့ၣ် ဟံၣ်အခါလၢတဖျၢၣ်အပူၤန့ၣ် ကၠီၣ်တဲၣ်ပှၤဘၣ်မူဘၣ်ဒါနုၥ်လီၤဖီၣ်ဝဲပှၤမၤအီၤလါ(ကၠါဖၠၣ်)တၢ်တၤကျိၣ်တၤစ့အဃိ ဖဲန့ၣ် တၢ်ဖီၣ်က့ၤ ကိးဝဲတရူးကလုၥ်ဃုၥ်ဒီး ကီၢ်ပယီၤခီကီၢ်ပှၤမၤတၢ်ဖိအဂ့ၢ်န့ၣ် သ့ၣ်ညါဘၣ်န့ၣ်လီၤ.
မဲၢ်ဆီဝ့ၢ်ပူၤလၢအိၣ်ဘူးဝဲဒီးကီၢ်ပယီၤ မၠၣ်ဝတံၣ်ဝ့ၢ်လၢခီကီၢ်ပှၤမၤတၢ်ဖိနုၥ်လီၤအိၣ်ဆိးအါဝဲအံၤန့ၣ် တကီၢ်ခါခဲအံၤခီဖျိ တၢ်နုၥ်လီၤ သမံသမိးတၢ်ဟဲအါထီၣ်အဖီခိၣ် ကီၢ်ပယီၤခီကီၢ်ပှၤမၤတၢ်ဖိလၢအလံၥ်လဲၢ်တအိၣ်လၢပှဲၤ ဘၣ်တဖၣ်အံၤဃုၥ်ဒီး ပှၤလၢတမၤဘၣ် ဒံးလံၥ်လဲၢ်တဖၣ်တနီၤန့ၣ်ဟးထီၣ်တၢ်ချၢတဘူၣ်လၢၤဘၣ်အိၣ်အသိးတနီၤန့ၣ်ဘၣ်လဲၤမၤတၢ်စ့ၢ်ကီး တဘူၣ်လၢၤဘၣ်အိၣ်ဝဲ အဂ့ၢ်န့ၣ် သ့ၣ်ညါဘၣ်န့ၣ်လီၤ.
ဒ်ကရူၢ်ကရၢလၢအဟူးဂဲၤလၢခီကီၢ်ပှၤမၤတၢ်ဖိဂ့ၢ်ဝီတဖၣ်ပဲၥ်ထံနီၤဖးစံးဝဲအသိးန့ၣ်မဲၢ်ဆီးဝ့ၢ်ဃုၥ်ဒီးအခိၣ်အဃၢၤတၢ်လီၢ်တဖၣ်န့ၣ် ကီၢ်ပယီၤခီကီၢ်နုၥ်လီၤအိၣ်ဆိးဝဲအနီၣ်ဂံၢ်အိၣ်(၄၀၀၀၀၀)ခိၣ်ဃၢၤညါဒီး ဖဲန့ၣ်အကျါပှၤလၢအိၣ်ဒီးလံၥ်လဲၢ်လၢတၢ်ပၥ် ပနီၣ်ဝဲတဖၣ်အိၣ်ဝဲဘၣ်ဆၣ် ပှၤအိၣ်ဒံးဝဲအါအါဂီၢ်ဂီၢ်လၢတမၤဘၣ်လံၥ်လဲၢ်လၢတၢ်ပၥ်ပနီၣ်ဝဲအံၤဒံးဘၣ် အိၣ်ဝဲအဂ့ၢ်န့ၣ် သ့ၣ်ညါဘၣ်န့ၣ်လီၤ.
