လါယူၤ ၂၆ သီ, ၂၀၂၆ နံၣ်, ခ့ၣ်အဲးစံၣ်
ခ့ၣ်အဲၣ်ယူၣ် မုၢ်တြီၢ်ကီၢ်ရ့ၣ်(သုးက့ ၅) ဖၣ်ပူၣ်ဝ့ၢ်လၢကဘီယူၤလဲၤခးလီၤတၢ်တလီၢ်လီၢ်အံၤန့ၣ် ခီဖျိလဲၤတ့ၢ်လီၤကဒီးမ့ၣ်ပိၢ်လၢ သီခါဖၠၣ်အဃိ သီခါဖၠၣ်တၢ်သူၣ်ထီၣ်ဟးဂီၤလီၤပှီၢ်ဝဲတဘျုးဖျၢၣ်အဂ့ၢ်န့ၣ် သ့ၣ်ညါဘၣ်လၢလီၢ်ကဝီၤဂံၢ်ခီၣ်ထံးပှၤဟ့ၣ်တၢ်စီၣ် ဖိ အအိၣ်န့ၣ်လီၤ.
ဖၣ်ပူၣ်ဝ့ၢ် ကဝီၤဒ့(၄)အပူၤ ဖဲလါယူၤ ၂၄ သီ မုၢ်နၤခီဖးဖီမုၢ်နုၥ်လီၤဝဲလၢလါယူၤ ၂၅ သီ ဂီၤခီ ၁း၀၀ နၣ်ရံၣ်ဃၣ်ဃၣ်အဆၢကတီၢ် သုးမီၤစိရိၤ(jet fighter)ကဘီယူၤပညိၣ်လဲၤတ့ၢ်လီၤမ့ၣ်ပိၢ်လၢသီခါဖၠၣ်ကရၢၢ်ပူၤ လိၤလိၤအဃိ သီခါဖၠၣ်တၢ်သူၣ်ထီၣ်တစှၤန့ၢ် (၃)ဖျၢၣ် လီၤပှီၢ်ဟးဂူၥ်ဟးဂီၤဝဲဒၣ်န့ၣ်လီၤ.
ဒီးဖၣ်ပူၣ်ဝ့ၢ်လၢကဘီယူၤလဲၤခးလီၤတၢ်အံၤန့ၣ် လီၢ်ကဝီၤကမျၢၢ်လၢအအိၣ်ဖဲန့ၣ်သ့ၣ်တဖၣ် အိၣ်လၢဟံၣ်လၢဃီတဘူၣ် ဃ့ၢ်ထီၣ်ဝဲတၢ်ဆၢကတီၢ်န့ၢ်လၢအနံၣ်လံန့ၣ်လီၤ. ဘၣ်ဆၣ်ကဘီယူၤလဲၤခးလီၤတၢ်ဘျီဝဲအံၤ သီခါဖၠၣ် တၢ်သူၣ်ထီၣ်အမဲၥ်ညါ တၢ်ဟးဂူၥ်ဟးဂီၤဘၣ်ဒိဘၣ်ထံးလၢအဂၤတၢ်အိၣ်သးတဖၣ်န့ၣ် ပခ့ၣ်အဲးစံၣ်-ကညီတၢ်ကစီၣ် ဃုသ့ၣ်ညါမၤ လီၤတံၢ်အီၤအဖၢမုၢ် န့ၣ်လီၤ.
ဘၣ်ဃးကဘီယူၤလဲၤခးလီၤတၢ်အံၤ ဖဲအပူၤကွံၥ်လါယူၤ ၄ သီအနံၤစ့ၢ်ကီး လၢဖၣ်ပူၣ်ကဝီၤဒ့(၃)အပူၤ ကဘီယူၤလဲၤတ့ၢ်လီၤဝဲ မ့ၣ်ပိၢ်ဒံးဒီး ဖဲန့ၣ်စ့ၢ်ကီးကမျၢၢ်ဟံၣ်အူအီၣ်ဟးဂီၤ(၃)ဖျၢၣ်ကဲထီၣ်ဒံးဝဲန့ၣ်လီၤ.
ဒ်န့ၣ်အသိးတကီၢ်ခါခဲအံၤလၢကတၢတံၥ်ဆၢခိၣ် နိၣ်ဖီထံတကပၤန့ၣ်စ့ၢ်ကီး စးထီၣ်ဖဲလါယူၤ ၂၃ သီအနံၤန့ၣ် ပယီၤသုးလၢအတုၤ အိၣ် ဖဲန့ၣ်တဖၣ်လၢ ကလဲၤထီၣ်ဆူဖၣ်ပူၣ်အဂီၢ်ဂုၥ်ကျဲးတိကျဲအဃိ တၢ်ဒုးကဲထီၣ်ဝဲဒီးဟီၣ်ကဝီၤတၢ်ပၢၢ်ဆၢသုးပၥ်ဖှိၣ် ကရူၢ် ဒိၣ်ဒိၣ် မုၢ်မုၢ်အဂ့ၢ်န့ၣ် တၢ်ပၢၢ်ဆၢကရူၢ်အပှၤတဂၤ စံးဝဲန့ၣ်လီၤ.
“လၢကတၢတံၥ်ဆၢခိၣ် နိၣ်ဖီထံတကပၤန့ၣ် တၢ်ဒုးစးထီၣ်ကဲထီၣ်ဖဲလါယူၤ ၂၃ သီန့ၣ်. ဒုၣ်ဒါန့ၣ်ဟဲထီၣ်မီၤ.ဝဲဒၣ်စ့ၢ်ကီးပခိးလီၤ ဃၥ်အီၤအဃိအဝဲသ့ၣ်ဟဲထီၣ်ဒုဘၣ်ဝဲန့ၣ်.အဝဲသ့ၣ်န့ၣ်ဆီလီၤသးဖဲနိၣ်ဖီထံန့ၣ်ဖးယံၤလံ.တိဝဲတန့ၢ် ဘၣ်ဘျီအဝဲသ့ၣ်ဂုၥ်ကဒါ လီၢ်ခံ. ပခိးခး အီၤဘျီအဝဲသ့ၣ်န့ၣ်ကွၢ်ဝဲလၢတၢ်အိၣ်သးအဖီခိၣ်ဒီးဆဲးတိထီၣ်ဝဲန့ၣ်. တိဝဲတဘျုးဂီၤလံ. တိဝဲတနံၤန့ၣ်အိၣ်လၢ ခံဘျီ သၢဘျီညါ. တၢ်ဒုးကဲထီၣ်ကိးမုၢ်နံၤဒဲးလီၤ” အဂ့ၢ်န့ၣ် စံးဘၣ်ခ့ၣ်အဲးစံၣ်-ကညီတၢ်ကစီၣ်ဖဲတနံၤအံၤလီၤ.
တကးဒံးဘၣ်လၢတၢ်ဒုးကဲထီၣ်(၄)သီအတီၢ်ပူၤအံၤစ့ၢ်ကီး ပယီၤသုးတကပၤသံဘၣ်ဒိဘၣ်ထံးအိၣ်ဝဲအိၣ်ဝဲအဂ့ၢ် တၢ်ထံၣ်ဝဲ အိၣ်ဘၣ်ဆၣ် ဘၣ်ဃးတၢ်သံ တၢ်ဘၣ်ဒိဘၣ်ထံး အနီၣ်ဂံၢ်နီၣ်ဒွးခီန့ၣ် တၢ်မၤလီၤတံၢ်တန့ၢ်ဒံးဘၣ်အဂ့ၢ်န့ၣ် တၢ်ပၢၢ်ဆၢသုး ကရူၢ်တဂၤဃီဝဲန့ၣ်စံးဝဲဒၣ်န့ၣ်လီၤ.
လၢကလဲၤထီၣ်ဆူဖၣ်ပူၣ်အံၤအဂီၢ် လၢကမၤမိၢ်ဝ့ၢ်တဆီ ပယီၤသုးတဖၣ်အံၤဟဲထီၣ်တုၤဝဲဖဲကတၢတံၥ်အံၤ တၢ်ဆၢကတီၢ်အိၣ် လၢအသီ(၁၀) ခိၣ်ဃၢၤ လံန့ၣ်လီၤ. အဝဲသ့ၣ်ဟဲထီၣ်တုၤဝံၤလီၢ်ခံစးထီၣ်ဖဲအပူၤကွံၥ်စှၤသီအခါန့ၣ် စးထီၣ်တိဝဲကျဲဒီး လၢဟီၣ်ကဝီၤတၢ်ပၢၢ်ဆၢသုးပၥ်ဖှိၣ်တကပၤစ့ၢ်ကီးလၢတၢ်ဒီ သဒၢက့ၤဟီၣ်ကဝီၤတၢ်လီၢ်တၢ်ကျဲအဂီၢ် တၢ်ဒုးဘၣ်ဟဲကဲထီၣ်ဒ်အံၤ န့ၣ်လီၤ.
