တၢ်စံးဝဲလၢဟီၣ်ကဝီၤပူၤကၠါဖၠၣ်တၢ်မၤလီၢ်အိၣ်ဘၣ်ဆၣ် တၢ်ဘၣ်ထွဲတအိၣ်ဝဲဘၣ်အဂ့ၢ် DKBA က့ၤခီၣ်ဆၢကဒါဝဲ

လါယူၤ ၂၅ သီ, ၂၀၂၆ နံၣ်, ခ့ၣ်အဲးစံၣ်

ကီၢ်ကၠီၣ်တဲၣ်-ကီၢ်ပယီၤကီၢ်ဆၢ ဒူပျၥ်ယၥ်ကီၢ်ရ့ၣ်(သုးက့ ၆)ရၤမတံကီၢ်ဆၣ်ဟီၣ်ကဝီၤအပူၤ ထံဂုၤကီၢ်ဂၤကၠါဖၠၣ်ပှၤမၤတၢ်ဖိ (၅၀၀၀)ဘျဲၣ်အိၣ်ကတၥ်ထီသးလၢ (DKBA)ဟီၣ်ကဝီၤပူၤအဂ့ၢ် ဂံၢ်ခီၣ်ထံးတၢ်ကရၢကရိထုးထီၣ်ပၥ်ဖျါဝဲအဖီခိၣ် ဟီၣ်ကဝီၤပူၤ ဖီၣ်စုကဝဲၤကရူၢ်ကရၢအိၣ်ဃါဃုၥ်ဝဲအသိးတၢ်ဖံးတၢ်မၤတဖၣ်အံၤတၢ်ဘၣ်ထွဲတအိၣ်ဝဲဘၣ်အဂ့ၢ်န့ၣ် DKBA ပှၤကတိၤတၢ်ပၢ သုးခိၣ်စီၤစ့ၤဝ့ က့ၤခီၣ်ဆၢစံးကဒါဝဲန့ၣ်လီၤ.

ကၠါဖၠၣ်တၢ်ဖံးတၢ်မၤလီၢ်(၄)တီၤလၢအိၣ် (DKBA)တၢ်ပၢဟီၣ်ကဝီၤပူၤအံၤန့ၣ် ထံဂုၤကီၢ်ဂၤ(ကၠါဖၠၣ်)ပှၤမၤတၢ်ဖိပၥ်ဖှိၣ်ခဲလၢၥ် (၅၃၀၀)ဘျဲၣ် အိၣ်ကတၥ်ထီအသးဒီး ပှၤသ့ၣ်တဖၣ်အံၤမုၢ်လၢ်ဝဲလၢတၢ်ကဟဲမၤထူၣ်ဖျဲးထီၣ်အီၤအဂ့ၢ်န့ၣ် (Civil Society Network for Human Trafficking Victim Assistance-CSNHTV) ထုးထီၣ်ပၥ်ဖျါဝဲဖဲလါယူၤ ၂၂ သီအနံၤန့ၣ်လီၤ.

ဘၣ်ဃးဒီး(CSNHTV)အတၢ်ပၥ်ဖျါထီၣ်အဖီခိၣ်အံမၢၢ်ံၣ် ထံၣ်ဘၣ်လၢတၢ်ဘၣ်ဘျုးဒံၣ်မိၣ်ခြ့ၣ်စံၣ်ကညီသုးမုၢ်ဒိၣ်-DKBA ပှၤကတိၤတၢ်ပၢ သုးခိၣ်စီၤစ့ၤဝ့ စံးဘၣ် BBC တၢ်ကစီၣ်သန့လၢပယီၤကျိၥ် စံးဝဲလၢ“ဘၣ်ဃးတၢ်ဖံးတၢ်မၤတဖၣ်အံၤ တဘၣ် ဃးဒီးပှၤဘၣ်. ဟီၣ်ကဝီၤပူၤအံၤတမ့ၢ်ပအိၣ်ထဲ(DKBA)တဒူၣ်ဘၣ်.

(BGF)အိၣ်,(PC)အိၣ်, KNU အိၣ်ဒီး ပယီၤသုးစ့ၢ်ကီးအိၣ် အိၣ်ဃါဃုၥ်ခဲလၢၥ်လီၤ. အဃိပှၤတဲဝဲလၢတၢ်သ့ၣ်တဖၣ်အံၤအိၣ်လၢပဟီၣ်ကဝီၤပူၤလီၤလီၤဆီဆီဒ်အံၤန့ၣ်တဘၣ်ဝဲ ဘၣ်” အဂ့ၢ်န့ၣ် စံးဝဲန့ၣ်လီၤ.

ဒ်(CSNHTV)လံၥ်တၢ်ပၥ်ဖျါပူၤပၥ်ဖျါဝဲအသိးန့ၣ် ထံဂုၤကီၢ်ဂၤကၠါဖၠၣ်ပှၤမၤတၢ်ဖိအဂၤ(၅၀၀၀)ဘျဲၣ်လၢအပၣ်ဃုၥ်ဝဲတရူးထံဖိကီၢ်ဖိ, ပှၤကီၢ်ပယီၤဖိ,ကၠီၣ်တဲၣ်ထံဖိကီၢ်ဖိ,ဖံးလံးပံ,မလ့ရှါ,နံၤပီဃုၥ်ဒီးပှၤထံဂုၤကီၢ်ဂၤဖိလၢအိၣ်ကတၥ်ထီသးဖဲန့ၣ်တဖၣ်န့ၣ် တၢ်ဒုးဃၥ်, တၢ်မၤဒၢၣ်မၤလီၤမၤဆါမၤပယွဲအဝဲသ့ၣ်တကးဒံးဘၣ် အမဲၥ်ညါတၢ်မၢအီၣ် အဝဲသ့ၣ်အဃိ ဒ်သိးတၢ်ကဟံထီၣ်ဖီၣ်ဝဲတၢ်ဂ့ၢ်သ့ၣ် တဖၣ်အံၤကသ့အဂီၢ် ဆှၢထီၣ်ဃုၥ်ဝဲလံၥ်အံၤဆူကီၢ်ကၠီၣ်တဲၣ် ပၢၤကီၢ်ခိၣ် အအိၣ်လံအဂ့ၢ်န့ၣ် စံးဝဲန့ၣ်လီၤ.

(DKBA)ဟီၣ်ကဝီၤအပူၤ အပူၤကွံၥ်ကၠါဖၠၣ်တၢ်ဖံးတၢ်မၤလီၢ်လၢအိၣ်ဖလူ,မ့လဲၣ်ပၤတကပၤတဖၣ်တၢ်အိၣ်သးဘံဘူထီၣ်ဝံၤလီၢ်ခံ ဖဲအပူၤကွံၥ်လါမးရှးအခါန့ၣ် လၢဆိၣ်စံမၠဲၣ် ဒီး ဖလူဟီၣ်ကဝီၤအပူၤ လၢကတ့ထီၣ်(ကၠါဖၠၣ်)တၢ်သူၣ်ထီၣ်အံၤအဂီၢ် (DKBA)ဟးပှ့ၤ ဝဲလီၢ်ကဝီၤကမျၢၢ်အဟီၣ်ခိၣ်ကပံၥ်တၢ်လီၢ်တၢ်ကျဲလၢအတအိၣ်ဝဲဒီးကမျၢၢ်တၢ်အဲၣ်ဒိးဘၣ်အံၤအိၣ်ဝဲဒၣ်န့ၣ်လီၤ.

ဒ်န့ၣ်အသိးဘၣ်ဃးတၢ်ဟးပှ့ၤကမျၢၢ်အဟီၣ်ခိၣ်ကပံၥ်ဒီးတၢ်တ့ထီၣ်ဝဲ(ကၠါဖၠၣ်)တၢ်ဖံးတၢ်မၤလီၢ်သ့ၣ်တဖၣ်အံၤ တမ့ၢ်ကအိၣ် ဆီလီၤသးလၢကတီၢ်ယံၤဘၣ်မ့မ့ၢ်တခီဘၣ်တၢ်ဆီလီၤအီၤလၢတစိၢ်တလီၢ်အတီၢ်ပူၤလီၤအဂ့ၢ်န့ၣ် (DKBA) ပှၤကတိၤတၢ်ပၢ သုးခိၣ်ဒိၣ်စိ စီၤဖျါဘျဲၣ် စံးဘၣ်တ့ၢ်ဃၥ် ပခ့ၣ်အဲးစံၣ်-ကညီတၢ်ကစီၣ်အိၣ်ဝဲန့ၣ်လီၤ.

တကးဒံးဘၣ်ဘၣ်ဃး(CSNHTV)အတၢ်ပၥ်ဖျါထီၣ်အဖီခိၣ်အံၤ ဒ်သိးကသ့ၣ်ညါအါထီၣ်ဘၣ်တၢ်ဂ့ၢ်တၢ်ကျိၤအံၤအဂီၢ် လၢ(messenger)ဒီး လၢ(လီတဲစိ)အံၤတဆီ တနံၤအံၤ ပခ့ၣ်အဲးစံၣ်-ကညီတၢ်ကစီၣ် ဆဲးကျိးဝဲ(DKBA)သုးရိၣ်မဲခိၣ်ကျၢၢ် သုးခိၣ်ကျၢၢ်ဒိၣ်စိ စီၤစွ့ၤဝၣ်, ပှၤကတိၤတၢ်ပၢ သုးခိၣ်စီၤစ့ၤဝ့ ဃုၥ်ဒီးသုးခိၣ်စီၤဖါဘျဲၣ်အိၣ်ဝဲဘၣ်ဆၣ် တဖီၣ်ဖိဒီး တၢ်စံးဆၢတဟဲ ကဒါဝဲ နီတမံၤဘၣ် န့ၣ်လီၤ.

ကၠါဖၠၣ်တၢ်ဖံးတၢ်မၤလၢသုးမီၤစိရိၤဃုၥ်ဒီးအစုတီၤဖီလၥ်ကရူၢ်ကရၢ ပၥ်မၤသးလၢကမၤလီၤမၢ်ဝဲအံၤန့ၣ် တုၤလၢခဲအံၤတစု ထံဆၢကီၢ်ဆၢ (သုးက့ ၆)ဟီၣ်ကဝီၤအမဲၥ်ညါ လၢ(သုးက့ ၇)ထံဆၢကီၢ်ဆၢဟီၣ်ကဝီၤ ပူၤစ့ၢ်ကီးကၠါဖၠၣ်တၢ်ဖံးတၢ်မၤလၢ ဟီၣ်ခိၣ်ဒီဘ့ၣ်တတူၢ်လိၥ်ဝဲဘၣ်အံၤ ရၤလီၤသးဟဲအါထီၣ်ကဒါဝဲရုၢ်ရုၢ်အဂ့ၢ်န့ၣ် သ့ၣ်ညါဘၣ်န့ၣ်လီၤ.