ပယီၤသုးနုာ်လီၤအိၣ်ဆီလီၤသးလၢကီးတရံး(၅)တၢၣ်သ၀ီပူၤအါအါဂီၢ်ဂီၢ်ႇခးလီၤကျိဖးဒိၣ်ဆူသ၀ီပူၤ

လါအ့ဖြ့ၣ် ၁ သီႇ ၂၀၂၂ နံၣ်ႇ ခ့ၣ်အဲးစံၣ်

ဖဲမဟါလါမးရှး ၃၁ သီအနံၤ ပယီၤသုးနုာ်လီၤအိၣ်လၢခ့ၣ်အဲၣ်ယူၣ်-ကညီဒီကလုာ်စၢဖှိၣ်ကရၢ ဒူပျာ်ယာ်ကီၢ်ရ့ၣ် ကြုၢ်တုကီၢ်ဆၣ် ကီးတရံး၀့ၢ်ဒီးကြုၢ်တုကျဲမုၢ်ဖီခိၣ်(၅)တၢၣ်သ၀ီပူၤအါအါဂီၢ်ဂီၢ်အဂ့ၢ်န့ၣ် လီၢ်က၀ီၤဖိတဖၣ်စံး၀ဲန့ၣ်လီၤႉ

ဖဲလါမးရှး ၃၀ သီ မုၢ်ဃ့ၢ်လီၤအဆၢကတီၢ် ပယီၤသုးသိလ့ၣ်လၢအိၣ်ဟဲထီၣ်လၢဖၣ်အၣ်တကပၤအံၤတဖၣ် (KNLA)သုးပာ်ဖှိၣ်အိၣ်ခိးထုး၀ဲဒီးမ့ၣ်ပိၢ်ဖဲ(၅)တၢၣ်သ၀ီဒီး(၉)တၢၣ်သ၀ီအဘၢၣ်စၢၤကဲထီၣ်သး၀ံၤအလီၢ်ခံ ပယီၤသုး(၂၀၀)ဘျဲၣ်နုာ်လီၤအိၣ်ဆီလီၤအသးလၢ(၅)တၢၣ်သ၀ီပူၤဟဲကဲထီၣ်သးလီၤအဂ့ၢ်န့ၣ် လီၢ်က၀ီၤဖိတဖၣ်စံး၀ဲန့ၣ်လီၤႉ

“ဖဲမဟါတၢ်ခိးခးအ၀ဲသ့ၣ်ဖဲန့ၣ်အဃိ အ၀ဲသ့ၣ်နုာ်လီၤအိၣ်ဆီလီၤသးလၢ(၅)တၢၣ်သ၀ီပူၤလီၤႉ နုာ်လီၤအိၣ်၀ဲ လၢကၠိကရၢၢ်ဒီးရီဘၢၣ်ကျီးကျဲကပၤတဖၣ်လီၤႉ ဒ်သိးအ၀ဲသ့ၣ်အၦၤကလဲၤထီၣ်လၢမၠၣ်၀တံၣ်အဂီၢ် မ့ၢ်အ၀ဲသ့ၣ်ဟံးစၢၤတၢ်ဘံၣ်တၢ်ဘၢဧါဒုတသ့ၣ်ညါဘၣ်”အဂ့ၢ်န့ၣ် လီၢ်က၀ီၤဖိလၢတအဲၣ်ဒိးပာ်ဖျါအမံၤတဂၤ စံးဘၣ်ခ့ၣ်အဲးစံၣ်န့ၣ်လီၤႉ

ဖဲမဟါတၢ်ဒုးကဲထီၣ်အလီၢ်ခိၣ်ဃၢၤန့ၣ် ပယီၤသုးဖီၣ်က့ၤကိး၀ဲလီၢ်က၀ီၤသ၀ီဖိတဂၤဒံးဒီး လီၢ်က၀ီၤသ၀ီဖိလၢပယီၤသုးဖီၣ်အီၤတဂၤန့ၣ်စ့ၢ်ကီးတုၤလၢခဲအံၤတၢ်တသ့ၣ်ညါဘၣ်အတၢ်အိၣ်သးဒံးဘၣ်အဂ့ၢ်န့ၣ် လီၢ်က၀ီၤဖိတဂၤဃီ၀ဲန့ၣ်စံးအါထီၣ်၀ဲန့ၣ်လီၤႉ

လၢန့ၣ်အမဲာ်ညါတၢ်အိၣ်ခိးထုးပယီၤသုးဒီးမ့ၣ်ပိၢ်ကဲထီၣ်သး၀ံၤအလီၢ်ခံ ဖဲဟါခီ ၃ နၣ်ရံၣ်ဘျဲၣ်အဆၢကတီၢ်န့ၣ် ပယီၤသုးခးလီၤကျိဖးဒိၣ်(၇)ထံၣ်လၢ(၅)တၢၣ်သ၀ီကပၤယ့ၤပူၤကၠံသ၀ီပူၤတကးဒံးဘၣ်အမဲာ်ညါ ခီဖျိကျိဖးဒိၣ်လူၢ်လၢကီးတရံး၀့ၢ်ကပၤအံၤစ့ၢ်ကီးခးလီၤကျိဖးဒိၣ်ဆူလးတကီသ၀ီပူၤအဃိ ဟံၣ်ဃီတၢ်သူၣ်ထီၣ်ဟးဂီၤတစှၤန့ၢ်(၅)ဖျၢၣ်ဘၣ်အဂ့ၢ်န့ၣ် လီၢ်က၀ီၤဖိတဖၣ်စံး၀ဲန့ၣ်လီၤႉ

လးကကီသ၀ီဖိတဂၤစ့ၢ်ကီးစံး၀ဲ“ဖဲမဟါပယီၤသုးခးလီၤကျိဖးဒိၣ်ဘၣ်၀ဲဟံၣ်(၄)ဖျၢၣ်ႉလီၤတဲာ်အါ၀ဲလၢသီခါဖၠၣ်ဃၢၤမီၤနီၤႉသီခါအသိလ့ၣ်ႇဖံ၀ါအသိလ့ၣ်ဟးဂီၤအိၣ်လီၤႉဖဲစှၤသီအတီၢ်ပူၤအံၤပယီၤသုးခးလီၤကျိဖးဒိၣ်အါမးလီၤႉဘၣ်ဒိအအါကတၢၢ်န့ၣ်ဟံၣ်တၢ်သူၣ်ထီၣ်တဖၣ်လီၤမီၤနီၤ”အဂ့ၢ်န့ၣ် စံးဘၣ်ခ့ၣ်အဲးစံၣ်န့ၣ်လီၤႉ

ခီဖျိပယီၤသုးခးလီၤကျိဖးဒိၣ်တဖၣ်အဃိ တီၤကၠၤအ့ႇမၠီၣ်ကၠၤအ့ႇ၀ံၣ်စၤကိႇလီကဲၤသ၀ီႇဖါကၠၣ်သ၀ီဒီးယ့ၤပူၤသ၀ီ လီၢ်က၀ီၤကမျၢၢ်အါအါဂီၢ်ဂီၢ်ဘၣ်ဟးစံၣ်ပလဲာ်သးလၢသ၀ီအဂၤတဖၣ်ဒီး ကတီၢ်ခဲအံၤခီဖျိတၢ်ကိၢ်ဆါအဃိၦၤဃ့ၢ်တၢ်ဒုးဖိလၢအသူၣ်က့သးၦၢ်တဖၣ်သံအိၣ်၀ဲအဂ့ၢ်န့ၣ် လီၢ်က၀ီၤဖိတဖၣ်စံး၀ဲန့ၣ်လီၤႉ