လါမ့ၤ ၅ သီႇ ၂၀၂၂ နံၣ်ႇ ခ့ၣ်အဲးစံၣ်
ဖဲတနံၤအံၤလါမ့ၤ ၅ သီအနံၤ တၢ်မၤ၀ဲတၢ်တူၢ်လိာ်မုာ်သုးခိၣ်စးလိတီခိၣ်ရိၣ်မဲ တၢ်ဘၣ်ဘျုးဒံၣ်မိၣ်ခြ့ၣ်စံၣ်ကညီသုးမုၢ်ဒိၣ်(DKBA)အၦၤလၢပျိာ်လဲက့ၤအသးဆူကညီဒီကလုာ်ဂၢၤသးကရၢ(KNDO)ပူၤတၢ်ရဲၣ်တၢ်ကျဲၤအဂ့ၢ်န့ၣ် သ့ၣ်ညါဘၣ်န့ၣ်လီၤႉ
(DKBA)လၢအနီၣ်ဂံၢ်ကအိၣ်(၂၀၀)ဘျဲၣ်အံၤပျိာ်လဲက့ၤအသးဆူသုးခိၣ်ကျၢၢ်ဖိစီၤနၢၤဒါမၠးတီခိၣ်ရိၣ်မဲ(KNDO)ကရူၢ်အပူၤဒီး သုးခိၣ်ကျၢၢ်ဖိစီၤနၢၤမၠးအနီၢ်ကစၢ်ဒၣ်၀ဲတူၢ်လိာ်သဂၢၢ်လီၤ၀ဲဒၣ်န့ၣ်လီၤႉ တၢ်ရဲၣ်တၢ်ကျဲၤအပူၤန့ၣ်သုးခိၣ်ကျၢၢ်စီၤနၢၤဒါမၠးဆီတလဲန့ၢ်က့ၤ(DKBA)သုးဖိတဖၣ်အတၢ်ပနီၣ်ဒီးဟ့ၣ်လီၤက့ၤ၀ဲမူဒါလီၢ်လးတဖၣ်အဂ့ၢ်န့ၣ် သ့ၣ်ညါဘၣ်န့ၣ်လီၤႉ
(DKBA)သုးဖိသီလၢအပျိာ်လဲက့ၤသးတဖၣ်အံၤတၢ်ဒုးအိၣ်ထီၣ်န့ၢ်၀ဲ(KNDO)သိၣ်ဒူစိသုးရ့ၣ်ဒီး တၢ်ဟ့ၣ်လီၤ၀ဲသုးခိၣ်စးလိလၢသုးရ့ၣ်ခိၣ်မူဒါဒီးကတီခိၣ်ရိၣ်မဲ၀ဲသုးရ့ၣ်အံၤအဂ့ၢ်န့ၣ် သုခိၣ်ကျၢၢ်ဖိစီၤနၢၤဒါမၠးစံးတ့ၢ်ဃာ်၀ဲဖဲစှၤသီအခါန့ၣ်လီၤႉ
တကီၢ်ခါခဲအံၤတၢ်ဒုးလၢကဲထီၣ်ဖဲခ့ၣ်အဲၣ်ယူၣ်–ကညီဒီကလုာ်စၢဖှိၣ်ကရၢ ဒူပျာ်ယာ်ကီၢ်ရ့ၣ်(သုးက့ ၆)တီနီၢ်မုၢ်ထီၣ်ဟီၣ်က၀ီၤတဖၣ်အပူၤန့ၣ် ပၣ်ဃုာ်စ့ၢ်ကီးဒီးသုးခိၣ်စးလိတီခိၣ်ရိၣ်မဲအၦၤတဖၣ်န့ၣ်လီၤႉ လၢန့ၣ်အမဲာ်ညါနုာ်လီၤခးတၢ်လၢကမျၢၢ်ထံဖိကီၢ်ဖိအဂီၢ်လီၤဒီးဒ်ကမျၢၢ်ထံဖိကီၢ်ဖိအတၢ်ဘၣ်သးအသိးန့ၣ်ဘၣ်ပျိာ်လဲက့ၤသးဆူ(KNDO)လီၤအဂ့ၢ်န့ၣ် သုးခိၣ်စးလိစံးတ့ၢ်ပာ်ခ့ၣ်အဲးစံၣ်န့ၣ်လီၤႉ
သုးဟံးဆူၣ်ကွံာ်တၢ်စိတၢ်ကမီၤ၀ံၤအလီၢ်ခံလၢတၢ်က့ၤခီၣ်ဆၢကဒါက့ၤသုးမီၤစိရိၤလၢစုက၀ဲၤအဖီခိၣ်အံၤ အပူၤကွံာ်န့ၣ်တပၣ်ဃုာ်ဒီး(DKBA)ဘၣ်ဆၣ်သနါက့ လၢလီၢ်ခံန့ၣ်သးစၢ်လၢအိၣ်တၢ်လီၢ်အါတီၤအပူၤတဖၣ် ဟဲအိၣ်ကဒုသးလၢ(DKBA)သုးကျိၤခိၣ်သုးခိၣ်စးလိအတၢ်လီၢ်ဒီးႇပာ်ဖှိၣ်ထီၣ်သးဒီးဟီၣ်က၀ီၤ(KNDOıKNLA)သုးရ့ၣ်အၦၤဒုးထီဒါက့ၤသုးမီၤစိရိၤအံၤန့ၣ်လီၤႉ
ခီဖျိအ၀ဲနုာ်လီၤပၣ်ဃုုာ်လၢတၢ်ဒုးတၢ်ယၤပူၤအဃိ ဖဲအပူၤကွံာ်လါယနူၤအါရံၤ ၁၂ သီအနံၤန့ၣ် သုးခိၣ်စးလိအသုးကလၢၤလၢအအိၣ်ဆီလီၤသးဖဲသူမှဲကျိကၢၢ်နံၤအံၤ သုးခိးကီၢ်ဆၢ(BGF)ဒီးပယီၤသုးတဖၣ်ပာ်ဖှိၣ်ထီၣ်သးနုာ်လီၤမၤ၀ဲတၢ်ထီၣ်ဒုးလၢပျီပူၤဒီးကဘီယူၤဒိၣ်ဒိၣ်မုၢ်မုၢ်အဃိ ဖဲန့ၣ်အၦၤတနီၤဘၣ်ဟ့ၣ်လီၤကွံာ်အသးသမူဒံးန့ၣ်လီၤႉ
