လါမ့ၤ ၆ သီႇ ၂၀၂၂ နံၣ်ႇ ခ့ၣ်အဲးစံၣ်
ဖဲအပူၤကွံာ်လါမ့ၤ ၁ သီအခါ ကညီကီၢ်စဲၣ် သုးခိးကီၢ်ဆၢ(BGF)၁၀၁၄ သုးရ့ၣ် ဖီၣ်၀ဲဒၣ်သ၀ီ(၈)ဖျၢၣ်လီၢ်က၀ီၤသ၀ီဖိအဂၤ(၁၀၀)ဃၣ်ဃၣ်လၢအအိၣ်ဖဲဃိၣ်လိာ်ကျိမုၢ်နုာ်အံၤ ဖဲန့ၣ်အကျါအဂၤ(၅၀)ဃၣ်ဃၣ်န့ၣ်တၢ်ဆှၢထီၣ်အီၤဆူတၤပီဒီးလ့က့ၣ်သုးကလၢၤတကပၤလၢက၀ံန့ၢ်သုးတၢ်ဖိတၢ်လံၤအဂ့ၢ်န့ၣ် သ့ၣ်ညါဘၣ်လၢလီၢ်က၀ီၤသ၀ီဖိတဖၣ်အအိၣ်န့ၣ်လီၤႉ
ဒူသ၀ီ(၈)ဖျၢၣ်လီၢ်က၀ီၤသ၀ီဖိအဂၤ(၁၀၀)ဃၣ်ဃၣ်လၢအိၣ်ဖဲဃိၣ်လိာ်ကျိမုၢ်နုာ် ခ့ၣ်အဲၣ်ယူၣ်–ကညီဒီကလုာ်စၢဖှိၣ်ကရၢ(သုးက့ ၁)ဟီၣ်က၀ီၤ ၀ါဘိတီ–ကမးမိၢ်ကျဲအံၤန့ၣ် သုးခိၣ်တ့ၤ၀့တီခိၣ်ရိၣ်မဲ(BGF)၁၀၁၄ သုးရ့ၣ်အၦၤတဖၣ်ဖီၣ်က့ၤကိး၀ဲသ၀ီဖိတဖၣ်အံၤ၀ံၤအလီၢ်ခံ သ၀ီဖိအဂၤ(၅၀)ဃၣ်ဃၣ်န့ၣ်တၢ်ဆှၢထီၣ်အီၤဆူတၢ်ဒုးကဲထီၣ်အလီၢ်လၢတၤပီဒီးလ့က့ၣ်သုးကလၢၤလၢက၀ံန့ၢ်ပယီၤသုးတၢ်ဖိတၢ်လံၤဒီး ၦၤလၢအအိၣ်တ့ၢ်တဖၣ်န့ၣ်ဘၣ်ရ့ထီၣ်၀ဲလၢစ့အဂ့ၢ်န့ၣ် လီၢ်က၀ီၤဖိတဂၤစံး၀ဲဒ်အံၤန့ၣ်လီၤႉ
“သ၀ီဖိလၢတၢ်ဖီၣ်အီၤဖဲအပူၤကွံာ်တဖၣ်န့ၣ်ဘၣ်က့ၤရ့ထီၣ်လၢစ့မီၤနီၤႉၦၤနီၢ်ဒိၣ်န့ၣ်ဘၣ်ရ့ထီၣ်အကလီၢ်(၁၀)ႇမ့မ့ၢ်ၦၤသးစၢ်န့ၣ်အကလီၢ်(၂၀)လီၤႉၦၤလၢအဟ့ၣ်စ့တန့ၢ်ဘၣ်တဖၣ်န့ၣ်ၦၤဆှၢထီၣ်အ၀ဲသ့ၣ်ဆူတၤပီဒီးလ့က့ၣ်သုးကလၢၤလီၤႉတန့ၢ်တၢ်ဆဲးကျိးလၢၤဘၣ်ႉပၣ်၀ဲအဂၤ(၅၀)ညါဒီးၦၤလၢအဂၤတဖၣ်န့ၣ်ဟဲက့ၤတုၤလၢသ၀ီလၢၤလံ”အဂ့ၢ်န့ၣ်စံးဘၣ်ခ့ၣ်အဲးစံၣ်န့ၣ်လီၤႉ
ဖဲအပူၤကွံာ်လါမ့ၤ ၁ သီ ဂီၤခီအဆၢကတီၢ်န့ၣ် သုးခိးကီၢ်ဆၢ(BGF)၁၀၁၄ သုးရ့ၣ်အၦၤတဖၣ်ဟဲနုာ်လီၤ၀ဲဒၣ်လၢဃိာ်လိာ်ကျိမုၢ်နုာ်မၠဲၤသ၀ီႇကိတါကၠံႇ၀ဲပၠၣ်ခၠီ၀ၣ်ႇဖယါစ့ၣ်ႇ၀ဲပၠၣ်ႇပ့ၤပ့ၤစ့ၣ်ႇမ့ၣ်ထံၤလၤဒီးမံၣ်စဲသ၀ီတဖၣ်အပူၤဒီးသိလ့ၣ်(၆)ခိၣ်ႇၦၤနီၣ်ဂံၢ်အဂၤ(၅၀)ဃၣ်ဃၣ်ဒီး ကးတံၢ်ဃာ်၀ဲသ၀ီခိၣ်ထိးႇကျဲဟးထီၣ်ႇခးပိၢ်ထီၣ်ကျိ၀ံၤဖီၣ်က့ၤကိး၀ဲလီၢ်က၀ီၤသ၀ီဖိဒီးသးစၢ်တဖၣ်လၢတၢ်ဂ့ၢ်တအိၣ်နီတမံၤဘၣ်န့ၣ်လီၤႉ
လၢန့ၣ်အမဲာ်ညါကတီၢ်ခဲအံၤလၢပ့ၤပ့ၤစ့ၣ်ႇ၀ဲပၠၣ်သ၀ီဒီးဃိၣ်လိာ်ကျိ၀ၢ်ခီစွ့ၤကိႇဃိၣ်လိာ်ကျိခၢၣ်သးကီၣ်လိၤကီးတကပၤန့ၣ်သုးခိၣ်တ့ၤ၀့တီခိၣ်ရိၣ်မဲအၦၤတဖၣ်အိးထီၣ်၀ဲဒၣ်တြဲၤ(ဂိတ်)သမံသမိးတၢ်ဒီးဖီၣ်၀ဲၦၤလၢအစံၣ်အိၣ်ခူသူၣ်သ့ၣ်တဖၣ်အဃိ သးစၢ်တဖၣ်ကဟးအိၣ်အလီၢ်တအိၣ်လၢၤဘၣ်အဂ့ၢ်န့ၣ် လီၢ်က၀ီၤဖိတဂၤဃီ၀ဲန့ၣ်စံးအါထီၣ်၀ဲန့ၣ်လီၤႉ
ဖဲအပူၤကွံာ်စှၤသီအခါခီဖျိကညီဒီကလုာ်တၢ်ထူၣ်ဖျဲးသုးမုၢ်ဒိၣ်(KNLA)သုးပာ်ဖှိၣ်ဒီးပယီၤသုးတဖၣ်အဘၢၣ်စၢၤတၢ်ဒုးကဲထီၣ်ဒိၣ်ဒိၣ်မုၢ်မုၢ်ဖဲတၤပီသုးကလၢၤႇလ့က့ၣ်ႇပနွဲၢ်ကျါႇအ့ၤကၣ်ပိၤပယီၤသုးကလၢၤတကပၤအဃိ သ၀ီပာ်ဖှိၣ်အဖျၢၣ်(၃၀)ဘျဲၣ်လီၢ်က၀ီၤကမျၢၢ်(၁၀ႇ၀၀၀)ဘျဲၣ်ဘၣ်ဃ့ၢ်ထီၣ်၀ဲအဂ့ၢ်န့ၣ် သ့ၣ်ညါဘၣ်န့ၣ်လီၤႉ
ဖဲအပူၤကွံာ်လါအ့ဖြ့ၣ်ဒီးလါမးရှးအခါစ့ၢ်ကီးတၢ်လီၢ်ဖဲန့ၣ်တဖၣ်အပူၤန့ၣ်တၢ်ဖီၣ်ပီၣ်တၣ်မၢ၀ံယိးန့ၢ်သုးကျိချံၦာ်သၣ်ကဲထီၣ်ဒံး၀ဲဒီး သုးဟံးန့ၢ်ဆူၣ်ကွံာ်ထံကီၢ်တၢ်စိတၢ်ကမီၤ၀ံၤအလီၢ်ခံ (BGF)ဟဲကရၢကရိ၀ဲလီၢ်က၀ီၤသ၀ီဖိတနီၤလၢကဲသုးအဂီၢ်ဒီး တုၤလၢခဲအံၤတစုအ၀ဲသ့ၣ်ဆဲးကျိးဒီးအဟံၣ်ဖိဃီဖိတန့ၢ်၀ဲဘၣ်အဂ့ၢ်န့ၣ် လီၢ်က၀ီၤဖိတဖၣ်စံး၀ဲန့ၣ်လီၤႉ
