လါယူၤ ၂၉ သီႇ ၂၀၂၂ နံၣ်ႇ ခ့ၣ်အဲးစံၣ်
လၢတလၢၤကီၢ်စဲၣ် ပီၤကီၢ်ဆၣ် သ၀ီ(၄)ဖျၢၣ်အပူၤန့ၣ် စးထီၣ်ဖဲလါယူၤထီၣ်န့ၣ်ဖိဒံဖိသၣ်ဘၣ်၀ဲတၢ်ညၣ်ဂိၢ်သွံၣ်ဟးထီၣ်တၢ်ဆါအါမးဒီး ဖဲလါယူၤ ၂၇ သီအနံၤန့ၣ်ဖိသၣ်သံကွံာ်တဂၤလၢတၢ်ဆါအံၤအဃိအဂ့ၢ်န့ၣ် ကီၢ်ဆၣ်ကသံၣ်သရၣ်တဂၤစံး၀ဲန့ၣ်လီၤႉ
ပီၤ၀့ၢ်ပူၤ မိနဲၤက၀ီၤဒ့ႇကတိၤႇသ၀ီအလၣ်ႇထါပ့ၤခၠီဒီးနၣ်ကၠံခၠီသ၀ီတဖၣ်အံၤ ခီဖျိပစိၤတဖၣ်ဒံၣ်ထီၣ်ဖးထီၣ်လၢထံကျိၤဘၣ်အၢဘၣ်သီပူၤအဃိဖိသၣ်(၅)နံၣ်ဒီး(၁၅)နံၣ်အဘၢၣ်စၢၤတဖၣ်ဘၣ်၀ဲတၢ်ညၣ်ဂိၢ်သွံၣ်ဟးထီၣ်တၢ်ဆါအါ၀ဲအဂ့ၢ်န့ၣ် ကီၢ်ဆၣ်ကသံၣ်သရၣ်တဂၤအံၤစံး၀ဲဒ်အံၤန့ၣ်လီၤႉ
အ၀ဲစံး၀ဲလၢ“စးထီၣ်လၢလါမ့ၤလၢာ်ဒီးလါယူၤထီၣ်မူခိၣ်စးထီၣ်စူၤလီၤန့ၣ်ဖိသၣ်တဖၣ်ဘၣ်၀ဲတၢ်ညၣ်ဂိၢ်သွံၣ်ဟးထီၣ်တၢ်ဆါအါမီၤနီၤႉဘၣ်၀ဲဒၣ်ဖိသၣ်(၅)နံၣ်တုၤလၢ(၁၅)နံၣ်မီၤနီၤႉၦၤဘၣ်အါလၢပီၤ၀့ၢ်(မိနဲၤ)က၀ီၤဒ့ပူၤႉဖဲအ၀ဲတနံၤန့ၣ်ၦၤဖိသၣ်လၢအိၣ်(စ့ကၠဲၣ်)တဂၤတၢ်ဘၣ်အီၤနးဒီးသံ၀ဲမီၤနီၤႉထံကျိၤဘၣ်အၢပံးသးအဃိနး၀ဲတစဲးမီၤနီၤႉတၢ်ဆါအံၤဘၣ်ၦၤသ့ကိးဂၤဒဲးလီၤႉမ့မ့ၢ်တၢ်ဆါအတၢ်ပနီၣ်ဒုဒိးသန့ၤထီၣ်သးလၢသးနံၣ်ဘီၣ်ၦၢ်ဒီးလီၤဆီက့ၤလၢတၢ်ဆါအကလုာ်လီၤမီၤနီၤ”အဂ့ၢ်န့ၣ်စံး၀ဲန့ၣ်လီၤႉ
ဒူသ၀ီက၀ီၤဒ့လၢတၢ်ဆါကဲထီၣ်သးအပူၤတဖၣ်န့ၣ် သုးမီၤစိရိၤအဆူၣ်ချ့ကိတိာ်၀ဲၤကျိၤဒီးဂာ်တဲာ်ဂီၤကရူၢ်တဖၣ်ဟဲခးကသံၣ်မၤသံတၢ်ဃၢ်လၢသ၀ီပူၤထံကမါအိၣ်စ့ၢ်ကီး၀ဲအဂ့ၢ်န့ၣ် ကသံၣ်သရၣ်တဂၤဃီ၀ဲန့ၣ်စံးအါထီၣ်၀ဲန့ၣ်လီၤႉ
ဖိသၣ်လၢအဘၣ်တၢ်ညၣ်ဂိၢ်သွံၣ်ဟးထီၣ်တၢ်ဆါ(၅)မျးကယၤဃၣ်ဃၣ်န့ၣ်တၢ်ဆါအပတီၢ်အံၤကဲထီၣ်သးတုၤလၢတၢ်ညၣ်ဂိၢ်သွံၣ်ဟးထီၣ်လၢနးနးကျံၤကျံၤသ့၀ဲဒီးမ့ကဲထီၣ်သးလၢသွံၣ်လီၤယွၤႇသွံၣ်ဟးထီၣ်န့ၣ်ခီဖျိသးသမူတၢ်ဘၣ်ယိၣ်အိၣ်အဃိကရူၢ်လၢအံးထွဲကွၢ်ထွဲဆူၣ်ချ့တဖၣ်ပာ်ဖျါထီၣ်ကျိၤကျဲလၢတၢ်ကတြီဆၢဒီသဒၢတၢ်ဆါအံၤလၢ(social media)အပူၤအိၣ်၀ဲန့ၣ်လီၤႉ
လီၤဆီဒၣ်တၢ်တၢ်ညၣ်ဂိၢ်သွံၣ်ဟးထီၣ်တၢ်ဆါအတၢ်ပနီၣ်သ့ၣ်တဖၣ်န့ၣ်မ့ၢ်၀ဲကသါချ့ႇဘှီးလီၤလၢ(coffee)အလွဲၢ်ႇဘှီးတပယူၤဃီႇမဲကူၤသွံၣ်ယွၤလီၤႇဖိသၣ်အစုလီၤၦဲာ်ခီၣ်လီၤၦဲာ်ႇအိၣ်တသ့အိၣ်တဘၣ်သ့ၣ်တဖၣ်န့ၣ်လီၤႉခီဖျိတၢ်ဆါအံၤကဲထီၣ်သးလၢပစိၤအ့ၣ်အဃိဒ်သိးဖိသၣ်တဖၣ်ပစိၤသုတအ့ၣ်အီၤတဂ့ၤအဂီၢ်န့ၣ် ကူသိးဘံၣ်ဘံၣ်ဘၢဘၢႇမံလၢပ့ၢ်ပီၤပူၤႇသူပ့ၢ်ပီၤလၢတၢ်မၤဃာ်အီၤဒီးကသံၣ်ပစိၤႇဖူလိၤဒီး(mosquito repellent)ကသံၣ်ဖူဒီးဖိသၣ်တဖၣ်ကဂဲၤလိာ်ကွဲလၢတၢ်လီၢ်လၢအကပီၤတဖၣ်န့ၣ်လီၤႉ
ဖဲအပူၤကွံာ်လါမ့ၤ ၃၀ သီအနံၤစ့ၢ်ကီး ကညီကီၢ်စဲၣ် ကၠၤအ့စ့ၣ်ကၠံကီၢ်ဆၣ် ထါတီသ၀ီအပူၤန့ၣ် ခီဖျိတၢ်ညၣ်ဂိၢ်သွံၣ်ဟးထီၣ်တၢ်ဆါအဃိဖိသၣ်သံတဂၤကဲထီၣ်သးဒံးန့ၣ်လီၤႉဒ်န့ၣ်အသိးဖဲစှၤသီအတီၢ်ပူၤအံၤလၢကညီကီၢ်စဲၣ် မုၢ်တြီၢ်ကီၢ်ရ့ၣ် ဘုသိၣ်ကီၢ်ဆၣ် ဃိၣ်လိာ်ကျိကၢၢ်ခိၣ်အံတူၢ်ထၣ်သ၀ီတကပၤန့ၣ်စ့ၢ်ကီး တၢ်ညၣ်ဂိၢ်တၢ်ဆါကဲထီၣ်သးဟဲအါထီၣ်၀ဲအဂ့ၢ်န့ၣ် လီၢ်က၀ီၤဆူၣ်ချ့ၦၤဘၣ်မူဘၣ်ဒါတဖၣ်စံး၀ဲန့ၣ်လီၤႉ
