ပယီၤသုးနုာ်လီၤဃုခွံခွးတၢ်လၢခ့ၣ်အဲၣ်ယူၣ်လၢၢ်ဒိၣ်တၢ်ရ့လိာ်မုာ်လိာ်၀ဲၤဒၢးပူၤ

လါယူၤလံ ၂၅ သီႇ ၂၀၂၂ နံၣ်ႇ ခ့ၣ်အဲးစံၣ်

လၢခ့ၣ်အဲၣ်ယူၣ်–ကညီဒီကလုာ်စၢဖှိၣ်ကရၢတၢ်ပၢဟီၣ်ဟီၣ်က၀ီၤ လၢၢ်ဒိၣ်၀့ၢ်ပူၤန့ၣ် ဖဲအပူၤကွံာ်လါယူၤလံ ၁၆ သီအနံၤန့ၣ် ပယီၤသုးဒီး၀ဲၤကျိၤဘၣ်ထွဲတဖၣ်နုာ်လီၤဃုခွံခွးတၢ်လၢခ့ၣ်အဲၣ်ယူၣ်(သုးက့ ၃) တၢ်ရ့လိာ်မုာ်လိာ်၀ဲၤဒၢးပူၤအဂ့ၢ်န့ၣ် တၢ်ရ့လိာ်မုာ်လိာ်၀ဲၤဒၢးၦၤဘၣ်မူဘၣ်ဒါစံး၀ဲအသိးသ့ၣ်ညါဘၣ်န့ၣ်လီၤႉ

ဖဲအပူၤကွံာ်လါယူၤလံ ၁၆ သီ ဂီၤခီ ၁၀ နၣ်ရံၣ်ဃၣ်ဃၣ်အဆၢကတီၢ်န့ၣ် ပယီၤသုး(ခလရ–၆၀) သုးခိၣ်စိစ့ၣ်ယၣ်လ့အူတီၤခိၣ်ရိၣ်မဲအၦၤဒီး၀ဲၤကျိၤဘၣ်ထွဲဃုာ်ဒီးက၀ီၤဒ့ၦၤဘၣ်မူဘၣ်ဒါတဂၤခဲလၢာ်ကအိၣ်(၄၂)ဂၤဃၣ်ဃၣ်နုာ်လီၤဃုခွံခွးတၢ်ဖိတၢ်လံၤလၢ၀ဲၤဒၢးပူၤအဂ့ၢ်န့ၣ်လၢၢဒိၣ်၀့ၢ်(ခ့ၣ်အဲၣ်ယူၣ်)တၢ်ရ့လိာ်မုာ်လိာ်၀ဲၤဒၢးမူဒါခိၣ်ပဒိၣ်၀ါယ့ၤတိစံးဘၣ်ခ့ၣ်အဲးစံၣ်ဒ်အံၤန့ၣ်လီၤႉ

“မ့ၢ်အနုာ်လီၤလၢတၢ်ဂ့ၢ်မနုၤလဲၣ်န့ၣ်မတၤတဂၤမးတသ့ၣ်ညါဘၣ်ႉဖဲအ၀ဲသ့ၣ်ဟဲအခါန့ၣ်ဟဲကိးဃုာ်၀ဲဒီးက၀ီၤဒ့ၦၤဘၣ်မူဘၣ်ဒါတဂၤမီၤနီၤႉအ၀ဲသ့ၣ်ဟဲန့ၣ်ခီဖျိလၢ၀ဲၤဒၢးတြဲၤန့ၣ်တၢ်ခးတံၢ်အီၤဒီးသီးအဃိနုာ်လီၤ၀ဲဒၣ်လၢတြဲၤတၢ်လီၢ်ခံတကပၤလီၤႉမၤဟးဂီၤ၀ဲ၀ဲၤဒၢးတြဲၤဒီးနုာ်လီၤ၀ဲမီၤနီၤႉတီၢ်မၤဟးဂီၤကွံာ်(သ့ၣ်တၣ်)လၢအိၣ်၀ဲၤဒၢးပူၤအံၤဒီးဟးဃုခွံခွးတၢ်ဖိတၢ်လံၤလီၤႉလီတဲစိလၢအိၣ်၀ဲၤဒၢးပူၤတဖျၢၣ်နါက့ဟံဃုာ်၀ဲ”အဂ့ၢ်န့ၣ်စံးဘၣ်ခ့ၣ်အဲးစံၣ်န့ၣ်လီၤႉ

သုးဟံးန့ၢ်ထံကီၢ်တၢ်စိတၢ်ကမီၤ၀ံၤအလီၢ်ခံစးထီၣ်မ့ၢ်လၢဒုးယၤတၢ်ဖ့ၣ်ဆၢအိၣ်ထီၣ်လၢခ့ၣ်အဲၣ်ယူၣ်ချၢၣ်လွံၢ်ထူၣ်ကီၢ်ရ့ၣ်(သုးက့ ၃)ဟီၣ်က၀ီၤပူၤန့ၣ်တၢ်ကးတံၢ်ကွံာ်လၢၢ်ဒိၣ်တၢ်ရ့လိာ်မုာ်လိာ်၀ဲၤဒၢးအဃိ ဖဲပယီၤသုးနုာ်လီၤဃုတၢ်အဆၢကတီၢ်န့ၣ်၀ဲၤဒၢးၦၤမၤတၢ်ဖိတအိၣ်နီတဂၤဘၣ်အဂ့ၢ်န့ၣ်ပဒိၣ်၀ါယ့ၤတိစံးအါထီၣ်၀ဲန့ၣ်လီၤႉ

အ၀ဲစံး၀ဲလၢ“စးထီၣ်မ့ၢ်တၢ်ဒုးကဲထီၣ်ကဒါလၢလၢၢ်ဒိၣ်ပူၤလံၤလံၤန့ၣ်ပတဒုးအိၣ်ၦၤမၤတၢ်ဖိလၢ၀ဲၤဒၢးပူၤလၢၤဘၣ်ႉပမၢ၀ဲၤဒၢးၦၤမၤတၢ်ဖိတဖၣ်သုးအလီၢ်အကျဲလီၤႉအိၣ်ဒၣ်လၢပမၢၦၤအိၣ်ခိးကွၢ်ၦၤနုာ်လီၤဟးထီၣ်လၢ၀ဲၤဒၢးလၢတၢ်ချၢလီၤမီၤနီၤႉဟဲနုာ်လီၤလၢ၀ဲၤဒၢးတၢ်ဂ့ၢ်တၢ်ကျိၤခီန့ၣ်ပတသ့ၣ်ညါဘၣ်ႉဟဲဃုာ်ဒီး၀ဲၤကျိၤဘၣ်ထွဲတဖၣ်အဃိကဘၣ်မ့ၢ်ကဟဲသံကွၢ်တၢ်တမံၤမံၤလီၤမီၤနီၤ”အဂ့ၢ်န့ၣ်စံး၀ဲန့ၣ်လီၤႉ

လၢန့ၣ်အမဲာ်ညါလၢၢ်ဒိၣ်ကီၢ်ဆၣ်အပူၤဒုးယၤတၢ်ဖ့ၣ်ဆၢကဲထီၣ်ဒံး၀ဲလၢခ့ၣ်အဲၣ်ယူၣ်ဒီးပယီၤသုးတဖၣ်အဘၢၣ်စၢၤဒီးခီဖျိပယီၤသုးခးလီၤကျိဖးဒိၣ်ဆူလၢၢ်ဒိၣ်၀့ၢ်ဒူသ၀ီတဖၣ်အပူၤအဃိလီၢ်က၀ီၤကမျၢၢ်တဖၣ်အါအါဂီၢ်ဂီၢ်ဘၣ်ဃ့ၢ်ထီၣ်လဲၤစံၣ်အိၣ်၀ဲလၢတၢ်လီၢ်အဂၤအိၣ်၀ဲအသိးတနီၤန့ၣ်လဲၤစံၣ်အိၣ်တုၤလၢကီၢ်ဆၢတၢ်လီၢ်ညါအဂ့ၢ်န့ၣ် သ့ၣ်ညါဘၣ်လၢလီၢ်က၀ီၤခ့ၣ်အဲၣ်ယူၣ်ၦၤဘၣ်မူဘၣ်ဒါအအိၣ်န့ၣ်လီၤႉ

စးထီၣ်ဖဲ(၂၀၁၂)နံၣ်န့ၣ်လၢကီၢ်ပူၤတၢ်မုာ်တၢ်ခုၣ်တၢ်မၤရဲၣ်ကျဲၤတဖၣ်အဂီၢ်ဒ်သိးကီၢ်ပယီၤပဒိၣ်ဒီးခ့ၣ်အဲၣ်ယူၣ်အဘၢၣ်စၢၤဆဲးကျိးဖံးမၤတၢ်ကသ့အဂီၢ်န့ၣ်တၢ်အိးထီၣ်၀ဲခ့ၣ်အဲၣ်ယူၣ်တၢ်ရ့လိာ်မုာ်လိာ်၀ဲၤဒၢးလၢအအိၣ်ဒီးခံခီခံကပၤတၢ်သးလီၤပလိာ်အံၤဒီး လၢၢ်ဒိၣ်၀့ၢ်ခ့ၣ်အဲၣ်ယူၣ်တၢ်ရ့လိာ်မုာ်လိာ်၀ဲၤဒၢးအံၤဘၣ်တၢ်အိးထီၣ်အီၤဖဲ(၂၀၁၂)လါအ့ဖြ့ၣ်(၉)သီဒီး မ့ၢ်စ့ၢ်ကီးခ့ၣ်အဲၣ်ယူၣ်တၢ်ရ့လိာ်မုာ်လိာ်၀ဲၤဒၢးတဖျၢၣ်လၢတၢ်အိးထီၣ်၀ဲအဆိကတၢၢ်တဖျၢၣ်လၢအဖိးသဲစးန့ၣ်လီၤႉ

ဖဲ(၂၀၂၁)လါဖ့ၤဘြူၤအါရံၤ ၁ သီ သုးဟံးန့ၢ်တၢ်စိတၢ်ကမီၤ၀ံၤအလီၢ်ခံတယံၤတမီၢ်ဘၣ်န့ၣ် တၢ်ဒုးစးထီၣ်ကဲထီၣ်၀ဲလၢခ့ၣ်အဲၣ်ယူၣ်စုတီၤအဖီလာ်ကညီဒီကလုာ်တၢ်ထူၣ်ဖျဲးသုးမုၢ်ဒိၣ်(KNLA)ဒီးပယီၤသုးတဖၣ်အဘၢၣ်စၢၤ၀ံၤအလီၢ်ခံ တၢ်ကးတံၢ်ကွံာ်၀ဲခ့ၣ်အဲၣ်ယူၣ်တၢ်ရ့လိာ်မုာ်လိာ်၀ဲၤဒၢးလၢမ့ၢ်တလၢၤကီၢ်စဲၣ် သထူၣ်ကီၢ်ဆၣ် နီၤဘိၤတၢ်ရ့လိာ်မုာ်လိာ်၀ဲၤဒၢးဒီး ပကိကီၢ်ခီ လၢၢ်ဒိၣ်၀့ၢ်တၢ်ရ့လိာ်မုာ်လိာ်၀ဲၤဒၢး သ့ၣ်တဖၣ်အံၤအဂ့ၢ်န့ၣ် သ့ၣ်ညါဘၣ်လၢခ့ၣ်အဲၣ်ယူၣ်ကရူၢ်ကရၢအအိၣ်န့ၣ်လီၤႉ