ခီဖျိတၢ်စူၤတပယူာ်ဃီဒီးတၢ်ခိၣ်ဒုးတဘံၣ်တဘၢဘၣ်အဃိပလီဟီၣ်က၀ီၤပူၤၦၤဃ့ၢ်မှံဟးဖျိးတဖၣ်ထံၣ်ဘၣ်တၢ်ကီတၢ်ခဲ

လါယူၤလံ ၁၃ သီႇ ၂၀၂၂ နံၣ်ႇ ခ့ၣ်အဲးစံၣ်

လၢတနီသရံၣ်ကီၢ်ခီဒိၣ် ဘျံးဒ၀ဲၢ်ကီၢ်ရ့ၣ် ပလီကီၢ်ဆၣ်အပူၤန့ၣ် ခီဖျိတၢ်စူၤတပယူာ်ဃီအဃိ ၦၤလီၢ်အိၣ်ကမှံတၢ်လီၢ်(၃)တီၤလၢကမျၢၢ်ၦၤဃ့ၢ်မှံဟးဖျိးအိၣ်အဂၤ(၁၀၀၀)ဘျဲၣ်အံၤ သဂၢၢ်ဘၣ်၀ဲတၢ်ခိၣ်ဒုး(မိကၤ)တဘံၣ်တဘၢဘၣ်တၢ်ကီတၢ်ခဲအဂ့ၢ်န့ၣ်ၦၤဘၣ်မူဘၣ်ဒါလၢမၤစၢၤၦၤဃ့ၢ်မှံဟးဖျိးတဖၣ်စံး၀ဲန့ၣ်လီၤႉ

စးထီၣ်ဖဲလါယူၤလံထီၣ်သီန့ၣ်လၢပလီကီၢ်ဆၣ်အပူၤခီဖျိတၢ်စူၤအဆၢတတဲာ်ဘၣ်ဒီးပယီၤသုးမၤအါထီၣ်သုးဂံၢ်ဘါဟူးဂဲၤအါထီၣ်အဃိ ကမျၢၢ်ၦၤဃ့ၢ်မှံဟးဖျိး(၁ႇ၄၀၀)ဘျဲၣ်အဂီၢ်တၢ်ခိၣ်ဒုးတဘံၣ်တဘၢ၀ဲဘၣ်အသိး တၢ်အီၣ်တၢ်အီစ့ၢ်ကီးတကူတလၢ၀ဲဘၣ်အဂ့ၢ်န့ၣ်လီၢ်က၀ီၤၦၤဘၣ်မူဘၣ်ဒါလၢမၤစၢၤၦၤဃ့ၢ်မှံဟးဖျိးတဂၤစံး၀ဲဒ်အံၤန့ၣ်လီၤႉ

အ၀ဲစံး၀ဲလၢ“ခဲအံၤန့ၣ်ၦၤဃ့ၢ်မှံဟးဖျိးအနီၣ်ဂံၢ်ကအိၣ်လၢ(၁ႇ၄၀၀)ဘျဲၣ်ညါလံမီၤနီၤႉတၢ်လိၣ်ဒုအိၣ်အါမးလီၤႉပလဲၤဆှၢတၢ်အီၣ်လၢဂီၤခီမ့တုၤန့ၣ်မုၢ်ဟါလီၤန့ၣ်လၢာ်လံႉခီဖျိတၢ်ဒုးကဲထီၣ်တပယူာ်ဃီအဃိဘၣ်စံၣ်ကအိၣ်(၃)လါဘျဲၣ်လံႉခဲအံၤန့ၣ်သ၀ီဘၣ်ဟးစံၣ်အိၣ်(၇)ဖျၢၣ်လံႉမူခိၣ်စူၤဒီတနံၤညါလီၤႉခီဖျိတၢ်စူၤဒိၣ်အဃိကးဘၢဃာ်ဒီး(တၤလပၣ်)တဘၢဘၣ်မီၤနီၤ”အဂ့ၢ်န့ၣ်စံးဘၣ်ခ့ၣ်အဲးစံၣ်န့ၣ်လီၤႉ

ခီဖျိပယီၤသုးနုာ်လီၤဟူးဂဲၤအါထီၣ်လၢဒူသ၀ီပူၤအဃိတၢ်ဘၣ်သဂၢၢ်ခးလိာ်သးကဲထီၣ်၀ဲဒီးလီၢ်က၀ီၤတၢ်ဒီသဒၢကမျၢၢ်(PDF)သုးဒီးလီၢ်က၀ီၤကမျၢၢ်လၢအဘၣ်စံၣ်သ့ၣ်တဖၣ်အံၤကက့ၤအိၣ်ဆူအဒူသ၀ီတၢ်လီၢ်အဂီၢ်တညီ၀ဲဒံး၀ဲဘၣ်အဂ့ၢ်န့ၣ် ၦၤဘၣ်မူဘၣ်ဒါတဂၤဃီ၀ဲန့ၣ်စံးအါထီၣ်၀ဲန့ၣ်လီၤႉ

ဒ်န့ၣ်အသိးစးထီၣ်ဖဲအပူၤကွံာ်လါယူၤ ၂၇ သီတုၤလၢလါယူၤလၢာ်န့ၣ် တၢ်ဒုးကဲထီၣ်၀ဲ(၄)သီတပယူာ်ဃီလၢပလီကီၢ်ဆၣ်အပူၤဒီးသ၀ီ(၅)ဖျၢၣ်ဃၣ်ဃၣ်ဘၣ်ဃ့ၢ်ထီၣ်၀ဲဒီး တၢ်လီၢ်လၢအိၣ်ပလီ၀့ၢ်အခိၣ်အဃၢၤတဖၣ်စ့ၢ်ကီးပယီၤသုးအိၣ်ခိးသမံသမိးမၤဃံးထီၣ်တၢ်ဟးထီၣ်က့ၤလီၤအိၣ်၀ဲအဂ့ၢ်န့ၣ် လီၢ်က၀ီၤဖိတဖၣ်စံး၀ဲန့ၣ်လီၤႉ

သ၀ီလၢအိၣ်ပလီဟီၣ်က၀ီၤပူၤကျဲလၢတၢ်ဟးထီၣ်က့ၤလီၤ၀ဲတဖၣ်န့ၣ်ပယီၤသုးဆီလီၤတြဲၤအိၣ်ခိးသမံသမိးတၢ်အိၣ်၀ဲအသိးကျဲလၢတၢ်ကလဲၤဆှၢတၢ်အီၣ်တၢ်အီလၢၦၤလီၢ်အိၣ်ကမှံအိၣ်တၢ်လီၢ်အံၤစ့ၢ်ကီးခီဖျိပယီၤသုးကးတံၢ်၀ဲအဃိတၢ်ခိၣ်ဒုး(မိကၤ)ႇကသံၣ်ကသီဒီးတၢ်အီၣ်တၢ်အီတဖၣ်ခီဖျိတတုၤ၀ဲလၢၦၤလီၢ်အိၣ်ကမှံအိၣ်တၢ်လီၢ်ဘၣ်အဃိ ဘၣ်သဂၢၢ်၀ဲတၢ်ကီတၢ်ခဲဒ်အံၤလီၤအဂ့ၢ်န့ၣ် ၦၤလၢမၤစၢၤၦၤဃ့ၢ်မှံဟးဖျိးတဖၣ်စံး၀ဲန့ၣ်လီၤႉ