လါယူၤလံ ၁၈ သီႇ ၂၀၂၂ နံၣ်ႇ ခ့ၣ်အဲးစံၣ်
စးထီၣ်ဖဲတနံၣ်အံၤ(၂၀၂၂)ထီၣ်န့ၣ်လၢကညီကီၢ်စဲၣ် ကီးတရံးကီၢ်ဆၣ် ခွံတၢၣ်–ကၠၤအ့စ့ၣ်ကၠံကျဲန့ၣ် ပယီၤသုးဒီးသုးခိးကီၢ်ဆၢ(BGF)သုးပာ်ဖှိၣ်ဃုာ်ဒီးလီၢ်က၀ီၤကလုာ်ဒူၣ်ဖီၣ်စုက၀ဲၤတနီၤန့ၣ်ဆီလီၤတြဲၤ(Gate)အိၣ်ခိးထၢစ့ဟဲအါထီၣ်၀ဲအဂ့ၢ်န့ၣ်သ့ၣ်ညါဘၣ်လၢလီၢ်က၀ီၤဖိတဖၣ်အအိၣ်န့ၣ်လီၤႉ
တၢ်အိၣ်သးလၢလီၢ်က၀ီၤကမျၢၢ်ကီခဲ၀ဲအကတီၢ်အံၤ ခီဖျိတြဲၤလၢအိၣ်ခိးထၢစ့တဖၣ်ဟဲအါထီၣ်၀ဲအဃိ တၢ်ကီတၢ်ခဲဟဲအိၣ်ထီၣ်၀ဲလၢကမျၢၢ်မုၢ်ဆ့ၣ်မုၢ်ဂီၤဖိတဖၣ်အဂီၢ်အသိးကဲထီၣ်စ့ၢ်ကီးတၢ်တံာ်တာ်လၢကမျၢၢ်ဟးထီၣ်က့ၤလီၤတဖၣ်အဂီၢ်အဂ့ၢ်န့ၣ် လီၢ်က၀ီၤကမျၢၢ်တဖၣ်စံးဘၣ်ခ့ၣ်အဲးစံၣ်န့ၣ်လီၤႉ
ၦၤလၢမၤဆါတၢ်သူတၢ်သၣ်တဂၤစံး၀ဲ“ဖဲတူၢ်ရ့ၣ်သၣ်မံအကတီၢ်န့ၣ်တြဲၤ(Gate)တဖၣ်ဟဲအါထီၣ်ႉမ့ဘၣ်တဲန့ၣ်ဖဲသမ့ၤဒိၣ်သ၀ီဒီးခွံတၢၣ်အဘၢၣ်စၢၤန့ၣ်တြဲၤအိၣ်အခါ(၁၀)ညါႉ(BGF)ဒီး(PC)န့ၣ်အါကတၢၢ်လီၤႉနမ့စိာ်တူၢ်ရ့ၣ်သၣ်လၢဆဲးကဲးန့ၣ်တထၢၣ်န့ၣ်ဃ့၀ဲ(၁၀၀၀)ကၠးႉတဘျီတခီၣ်န့ၣ်တဘၣ်ဟ့ၣ်ဘၣ်နါက့အိၣ်လီၤႉတူၢ်ရ့ၣ်သၣ်မ့အါအကတီၢ်န့ၣ်ကျဲလၢနဘၣ်လဲၤတခီနၣ်ရံၣ်တအိၣ်ဘၣ်န့ၣ်လၢသိလ့ၣ်ပူၤမ့ပၣ်ဒီးတၢ်သူတၢ်သၣ်န့ၣ်ဘၣ်ဟ့ၣ်တြဲၤၦ့ၤခဲလၢာ်တကလးညါ”အဂ့ၢ်န့ၣ် စံး၀ဲန့ၣ်လီၤႉ
တချုးလၢသုးဟံးန့ၢ်တၢ်စိတၢ်ကမီၤကဲထီၣ်သးဒံးဘၣ်အခါလၢခွံတၢၣ်ဒီးကၠၤအ့စ့ၣ်ကၠံကျဲန့ၣ်တြဲၤခဲလၢာ်အိၣ်၀ဲ(၅)ခါန့ၣ်လီၤႉဘၣ်ဆၣ်ခဲအံၤတြဲၤခဲလၢာ်အိၣ်၀ဲအခါ(၂၀)ဃၣ်ဃၣ်ညါဒီးဖဲန့ၣ်အါဒၣ်တက့ၢ်န့ၣ်မ့ၢ်၀ဲပယီၤသုးဒီး(BGF)သုးပာ်ဖှိၣ်ႇကညီတၢ်မုာ်တၢ်ခုၣ်ကီၣ်ကး(KNU/KNLA-PC)ႇတၢ်ဘၣ်ဘျုးဒံၣ်မိၣ်ခြ့ၣ်စံၣ်ကညီသုးမုၢ်ဒိၣ် (DKBA)အတြဲၤတဖၣ်လီၤဒီး ဖဲန့ၣ်အကျါပၣ်ဃုာ်၀ဲခ့ၣ်အဲၣ်ယူၣ်–ကညီဒီကလုာ်စၢဖှိၣ်ကရၢ ဒူပျာ်ယာ်ကီၢ်ရ့ၣ် ကြုၢ်တုကီၢ်ဆၣ်တြဲၤတခါအဂ့ၢ်န့ၣ် လီၢ်က၀ီၤဖိတဖၣ်စံး၀ဲန့ၣ်လီၤႉ
လီၢ်က၀ီၤဖိလၢအဂၤတဂၤစံး၀ဲ“ခီဖျိပကဲ၀ဲဒၣ်ၦၤလီၢ်က၀ီၤဖိပဘၣ်ဟးထီၣ်က့ၤလီၤၦ့ၤတၢ်ဆါတၢ်မၢ်မၢ်အဃိပဘၣ်ဟ့ၣ်၀ဲ(ခ့ၣ်အဲၣ်ယူၣ်)ကီၢ်ဆၣ်တြဲၤအခိတနံၣ်ဂီၢ်န့ၣ်ခံကလးႉဖဲန့ၣ်(DKBA)တြဲၤတခါနါက့ဒ်န့ၣ်လီၤႉဘၣ်ဟ့ၣ်ခံနံၣ်ဂီၢ်န့ၣ်တြဲၤ(၂)ခါလီၤႉအ၀ဲသ့ၣ်ဟ့ၣ်ၦၤ(ကး)ႇခံနံၣ်အတီၢ်ပူၤနဟးထီၣ်က့ၤလီၤနမ့နဲၣ်ပၠးကးအံၤန့ၣ်တြဲၤ(၂)ခါအံၤတဘၣ်လိၣ်ဟ့ၣ်လၢၤဘၣ်ႉဘၣ်ဆၣ်နါက့အိၣ်တ့ၢ်ဒံးလၢပယီၤသုးဒီး(BGF)တြဲၤႇမ့၀ံၤ(PC)အတြဲၤအိၣ်တ့ၢ်ဒံးမီၤနီၤႉတြဲၤ၀ဲန့ၣ်တၢ်ဖိတၢ်လံၤမ့ပၣ်လၢသိလ့ၣ်ပူၤန့ၣ်နဘၣ်ဟ့ၣ်ဒ်အ၀ဲသ့ၣ်ဃ့၀ဲအသိးလီၤႉမ့ၢ်သုးခိၣ်တဂၤန့ၣ်အိးထီၣ်၀ဲတြဲၤတခါဧါတသ့ၣ်ညါဘၣ်”အဂ့ၢ်န့ၣ်စံးဘၣ်ခ့ၣ်အဲးစံၣ်န့ၣ်လီၤႉ
ဘၣ်ဃးဒီးတၢ်ဂ့ၢ်အံၤကြုၢ်တုကီၢ်ဆၣ်ခိၣ်မါကၠၤညိၤစံး၀ဲလၢ“ကျဲ၀ဲအံၤပ(ခ့ၣ်အဲၣ်ယူၣ်)တြဲၤအိၣ်ထဲတခါလီၤႉအိၣ်ထဲကြုၢ်တုကီၢ်ဆၣ်တြဲၤတခါလီၤႉတြဲၤအံၤပၣ်ဃုာ်၀ဲဒီးတၢ်ခိတၢ်သွဲႇတၢ်သမံသမိးမီၤနီၤႉသိလ့ၣ်တီၣ်တၢ်ဖိတၢ်လံၤဖးဒိၣ်လၢအဟဲကျဲအံၤပပာ်ပနီၣ်၀ဲတခိၣ်န့ၣ်(၅၀၀၀)ကၠးလီၤႉလၢအဂၤဒုပပာ်ပနီၣ်တအိၣ်ဘၣ်ႉပဟံဒ်ကမျၢၢ်ဟ့ၣ်၀ဲန့ၢ်အသိးလီၤ”အဂ့ၢ်န့ၣ်စံး၀ဲန့ၣ်လီၤႉ
လၢန့ၣ်အမဲာ်ညါအပူၤကွံာ်န့ၣ်တြဲၤသ့ၣ်တဖၣ်အံၤထၢ၀ဲစ့ထဲလၢသိလ့ၣ်တီၣ်တၢ်ဖိတၢ်လံၤလၢအိၣ်ဟဲက့ၤလီၤလၢမၠၣ်၀တံၣ်လီၤဘၣ်ဆၣ်ကတီၢ်ခဲအံၤမ့ဘၣ်တူၢ်ရ့ၣ်သၣ်ဟးထီၣ်အကတီၢ်ဒီးတၢ်သူတၢ်သၣ်လၢအဂၤဟးထီၣ်အကတီၢ်န့ၣ် တြဲၤတနီၤအိၣ်ခိးထၢစ့လၢၦၤၦ့ၤဆါတၢ်ဖိအအိၣ်ဟဲအါထီၣ်၀ဲအဂ့ၢ်န့ၣ်သ့ၣ်ညါဘၣ်န့ၣ်လီၤႉ
ဒ်န့ၣ်အသိးတနံၣ်ညါအံၤအလီၢ်ခံလၢကြုၢ်တုခၠီဖျါဒီးတန့ခၠါကျဲစ့ၢ်ကီးန့ၣ်သုးခိးကီၢ်ဆၢ(BGF)ဒီးကညီတၢ်မုာ်တၢ်ခုၣ်ကီၣ်ကး(KNU/KNLA-PC)ကရူၢ်ကရၢတဖၣ်ဆီလီၤအါထီၣ်တြဲၤအိၣ်ခိးထၢစ့ဟဲအါထီၣ်၀ဲစ့ၢ်ကီးအဂ့ၢ်န့ၣ် သ့ၣ်ညါဘၣ်လၢလီၢ်က၀ီၤဖိလၢအဟးထီၣ်က့ၤလီၤတဖၣ်အအိၣ်န့ၣ်လီၤႉ
