လါအီကူး ၃၀ သီႇ ၂၀၂၂ နံၣ်ႇ ခ့ၣ်အဲးစံၣ်
လၢပကိကီၢ်ခီဒိၣ် လၢၢ်ဒိၣ်ကီၢ်ဆၣ် လၢၢ်ဒိၣ်၀့ၢ်ပူၤ(မၠ့ၣ်တၤ)က၀ီၤဒ့လၢကညီဖိအိၣ်ဆိး၀ဲအါကတၢၢ်အံၤ စးထီၣ်ဖဲအပူၤကွံာ်လါအီကူး ၂၄ သီတုၤလၢခဲအံၤတစု ကွၢ်ဆၢၣ်မဲာ်ဘၣ်၀ဲတၢ်မၤတဲာ်မ့ၣ်အူအဂ့ၢ်န့ၣ် သ့ၣ်ညါဘၣ်လၢကမျၢၢ်အိၣ်က၀ီၤဒ့ပူၤတဖၣ်အအိၣ်န့ၣ်လီၤႉ
လၢလၢၢ်ဒိၣ်၀့ၢ်ပူၤက၀ီၤဒ့အိၣ်၀ဲ(၇)ဘ့ၣ်ဒီးတၢ်နီၤလီၤဟ့ၣ်မ့ၣ်အူလၢက၀ီၤဒ့တဖၣ်အပူၤဘၣ်ဆၣ် မ့မ့ၢ်(မၠ့ၣ်တၤ)က၀ီၤဒ့လၢကညီဖိအိၣ်ဆိး၀ဲအါကတၢၢ်အံၤမ့ၣ်အူတဟဲ၀ဲဘၣ်အဂ့ၢ်န့ၣ်ကမျၢၢ်လၢအိၣ်က၀ီၤဒ့ပူၤတဂၤစံး၀ဲဒ်အံၤန့ၣ်လီၤႉ
“စးထီၣ်ကဲထီၣ်သးလၢ ၂၄ သီဟါခီန့ၣ်မီၤနီၤႉတုၤလၢခဲအံၤတဟဲဒံးဘၣ်ႉမ့၀ံၤက၀ီၤဒ့လၢအဂၤန့ၣ်ဟဲႉ ယသံကွၢ်ဘျီတဲ၀ဲလၢတၢ်ဖီခိၣ်မၢမၤတဲာ်ကွံာ်၀ဲနသ့ၣ်ညါလီၤတဲ၀ဲဒ်န့ၣ်ႉဖဲမ့ၣ်အူတဟဲလၢၤဘၣ်တနၤန့ၣ်စ့ၢ်ကီးပယီၤသုးနုာ်လီၤမၤဟးဂီၤၦၤကရၢၢ်လၢဟံၣ်ကစၢ်တအိၣ်ဘၣ်၀ံၤဒီးနုာ်လီၤမံလၢၦၤဟံၣ်ပူၤတနၤဒံး”အဂ့ၢ်န့ၣ်စံးဘၣ်ခ့ၣ်အဲးစံၣ်န့ၣ်လီၤႉ
ခီဖျိမ့ၣ်အူတဟဲလၢၤဘၣ်အဃိကၠိဖိသ့ၣ်တဖၣ်တၢ်ကီတၢ်ခဲအိၣ်ထီၣ်လၢကဖးလံာ်ဖးလဲၢ်အသိးလၢမုၢ်နၤခီစ့ၢ်ကီးဘၣ်ယိၣ်လၢတၢ်ဘံၣ်တၢ်ဘၢအဂီၢ်တကးဒံးဘၣ်လၢကဖီအီၣ်တ့ၤအီၣ်အဂီၢ်စ့ၢ်ကီးတၢ်ကီတၢ်ခဲဟဲအိၣ်ထီၣ်၀ဲအဂ့ၢ်န့ၣ်ကမျၢၢ်လၢအိၣ်က၀ီၤဒ့ပူၤတဖၣ်စံး၀ဲန့ၣ်လီၤႉ
လၢၢ်ဒိၣ်၀့ၢ်ပူၤက၀ီၤဒ့အိၣ်၀ဲ(၇)ဘ့ၣ်လၢအမ့ၢ်ပကိႇတီၤငူၤတါႇသ့ၤတါႇဆါတါႇကၣ်ကၠ့ႇမၠ့ၣ်တၤက၀ီၤဒ့တဖၣ်ဒီးမၠ့ၣ်တၤက၀ီၤဒ့အံၤဟံၣ်ခိၣ်အိၣ်၀ဲအဖျၢၣ်(၄၀၀)ဘျဲၣ်ဒီးကညီဖိအိၣ်ဆိး၀ဲအါကတၢၢ်န့ၣ်လီၤႉက၀ီၤဒ့လၢအဂၤတဖၣ်ၦၤပယီၤဖိအိၣ်၀ဲအါဒီးကလုာ်ဒူၣ်လၢအဂၤအိၣ်ဆိး၀ဲစှၤန့ၣ်လီၤႉကတီၢ်ခဲအံၤတၢ်ဒီၣ်တဲာ်ကွံာ်မ့ၣ်အူအံၤလီၤဂာ်ဒ်သိးတၢ်နီၤဖး၀ဲကလုာ်အဒူၣ်အထၢလီၤအဂ့ၢ်န့ၣ်ကမျၢၢ်လၢအိၣ်က၀ီၤဒ့ပူၤတဖၣ်စံး၀ဲန့ၣ်လီၤႉ
“တၢ်အိၣ်သးလၢအကဲထီၣ်သးဖဲအံၤတဖၣ်အ၀ဲသ့ၣ်နါက့ကသူၣ်ဆှိးသးဆှိးကအိၣ်မီၤနီၤႉ ဖဲအံၤနါက့ၦၤဟဲခးတၢ်ဒီး(ဒြိ)အိၣ်ႉတၢ်အဃိန့ၣ်ကဆိမိၣ်၀ဲလၢက၀ီၤဒ့ကညီဖိဒီးၦၤသ့ၣ်တဖၣ်အံၤအတၢ်ဘၣ်ထွဲကအိၣ်မီၤနီၤႉခဲအံၤနါက့အ၀ဲသ့ၣ်ဟဲသမံသမိးၦၤတမှံၤစရီထဲပက၀ီၤဒ့တခါလီၤႉက၀ီၤဒ့လၢအဂၤန့ၣ်တသမံသမိး၀ဲဘၣ်”အဂ့ၢ်န့ၣ်ကမျၢၢ်လၢအိၣ်က၀ီၤဒ့ပူၤတဖၣ်ပဲာ်ထံနီၤဖးစံး၀ဲန့ၣ်လီၤႉ
ခီဖျိတၢ်ဒီၣ်တဲာ်ကွံာ်မ့ၣ်အူဒ်အံၤအဃိကမျၢၢ်လၢအိၣ်က၀ီၤဒ့ပူၤတဖၣ်ဘၣ်ယိၣ်လၢတၢ်ကနုာ်လီၤဟုၣ်တၢ်လၢ(မၠ့ၣ်တၤ)က၀ီၤဒ့ပူၤန့ၣ်လီၤႉ
ဖဲအပူၤကွံာ်စှၤလါအခါလၢၢ်ဒိၣ်၀့ၢ်ဃုာ်ဒီးသ၀ီလၢအိၣ်ဘူးဖဲန့ၣ်သ့ၣ်တဖၣ်အခိၣ်အဃၢၤန့ၣ် တၢ်ဒုးကဲထီၣ်၀ဲလၢပယီၤသုးဒီးဟီၣ်က၀ီၤကညီဒီကလုာ်တၢ်ထူၣ်ဖျဲးသုးမုၢ်ဒိၣ်(KNLA)အဘၢၣ်စၢၤအသိး ပယီၤသုးကဘီယူၤဟဲခးလီၤစၢၤတၢ်ကဲထီၣ်တ့ၢ်အသးဒံးန့ၣ်လီၤႉ
