Home တၢ်ကစီၣ် သၣ်တီၣ်ကၠံကျဲကပၤတၢ်လီၢ်လၢပယီၤသုးဟံးဃာ်ကျဲတၢ်ဘံၣ်တၢ်ဘၢအလီၢ်န့ၣ် လီၢ်က၀ီၤကမျၢၢ်ယီၢ်ဘၣ်မ့ၣ်ပိၢ်တဂၤ

သၣ်တီၣ်ကၠံကျဲကပၤတၢ်လီၢ်လၢပယီၤသုးဟံးဃာ်ကျဲတၢ်ဘံၣ်တၢ်ဘၢအလီၢ်န့ၣ် လီၢ်က၀ီၤကမျၢၢ်ယီၢ်ဘၣ်မ့ၣ်ပိၢ်တဂၤ

905
0
Photo: CJ

လါအီကူး ၃ သီႇ ၂၀၂၂ နံၣ်ႇ ခ့ၣ်အဲးစံၣ်

လၢကညီကီၢ်စဲၣ် သၣ်တီၣ်ကၠံကီၢ်ဆၣ်အပူၤ ဖဲတနံၤအံၤလါအီကူး ၃ သီ ဂီၤခီ ၉ နၣ်ရံၣ်ဃၣ်ဃၣ်အဆၢကတီၢ်န့ၣ် တီအူ–သၣ်တီၣ်ကၠံကျဲမုၢ် ပၠါစခါ(၁၀)တၢၣ်သ၀ီပူၤ တၢ်လီၢ်လၢပယီၤသုးဟံးတ့ၢ်ဃာ်ကျဲတၢ်ဘံၣ်တၢ်ဘၢအလီၢ်န့ၣ် လီၢ်က၀ီၤကမျၢၢ်(၁)ဂၤ ယီၢ်ဘၣ်၀ဲမ့ၣ်ပိၢ်ဒီးအခီၣ်တူာ်ကွံာ်၀ဲတကပၤအဂ့ၢ်န့ၣ် သ့ၣ်ညါဘၣ်လၢလီၢ်က၀ီၤဖိအအိၣ်န့ၣ်လီၤႉ

ၦၤလၢအယီၢ်ဘၣ်မ့ၣ်ပိၢ်န့ၣ်မ့ၢ်၀ဲကိၤန့ၤလ့(၃၈)နံၣ်အိၣ်၀ဲဒၣ်လၢပၠါစခါသ၀ီဒီး အ၀ဲဒီးအမါခံဂၤအံၤဖဲအလဲၤလၢကျီးပူၤအဆၢကတီၢ်ယီၢ်ဘၣ်၀ဲမ့ၣ်ပိၢ်အဂ့ၢ်န့ၣ် လီၢ်က၀ီၤဖိတဂၤစံးဘၣ်ခ့ၣ်အဲးစံၣ်န့ၣ်လီၤႉ

အ၀ဲစံး၀ဲလၢ“တၢ်လီၢ်ဖဲန့ၣ်အဖဲအပူၤကွံာ်တသီခံသီအခါန့ၣ်ပယီၤသုးဟံးဃာ်ကျဲတၢ်ဘံၣ်တၢ်ဘၢအလီၢ်မီၤနီၤႉဖဲအကလဲၤလၢကျီးပူၤအစံၣ်လီၤဃုအီၣ်တၢ်ဒီးတၢ်လၣ်လၢကျဲကပၤအခါယီၢ်ဘၣ်၀ဲမ့ၣ်ပိၢ်မီၤနီၤႉၦၤတနီၤန့ၣ်တဲ၀ဲလၢအသံလံႇယက့ၤဆဲးကျိးကဒါန့ၣ်အတသံဒံးဘၣ်ႉတၢ်အိၣ်သးဒုတဂ့ၤအါအါဘၣ်”အဂ့ၢ်န့ၣ်စံးဘၣ်ခ့ၣ်အဲးစံၣ်န့ၣ်လီၤႉ

ကိၤန့ၤလ့လၢအယီၢ်ဘၣ်မ့ၣ်ပိၢ်အံၤအခီၣ်လၢအစ့ၣ်တကပၤဘၣ်ဒီၣ်တူာ်ကွံာ်၀ဲတကးဒံးဘၣ်အမဲာ်ညါခီဖျိအသးသမူတၢ်ဘၣ်ယိၣ်အိၣ်အဃိကတီၢ်ခဲအံၤဘၣ်တၢ်လဲၤကူစါယါဘျါအီၤလၢတီအူတၢ်ဆါဟံၣ်အဂ့ၢ်န့ၣ် လီၢ်က၀ီၤဖိတဖၣ်စံး၀ဲအသိးသ့ၣ်ညါဘၣ်န့ၣ်လီၤႉ

ဖဲအပူၤကွံာ်လါအီကူး ၁ သီအနံၤစ့ၢ်ကီး တၢ်လီၢ်လၢကိၤန့ၤလ့ယီၢ်ဘၣ်မ့ၣ်ကဲထီၣ်သးအလီၢ်ကပိၤကပၤန့ၣ် သၣ်တီၣ်တၢ်ဒီသဒၢကမျၢၢ်(PDF)သုးတဂၤယီၢ်ဘၣ်ဒံး၀ဲမ့ၣ်ပိၢ်လၢပယီၤသုးဒိးလီၤဃာ်၀ဲအံၤဒီးသံကွံာ်၀ဲအဂ့ၢ်န့ၣ် သၣ်တီၣ်(PDF)ထုးထီၣ်ပာ်ဖျါ၀ဲန့ၣ်လီၤႉ