ပယီၤသုးလၢအနုာ်လီၤအိၣ်ဖဲကၠိကရၢၢ်ပူၤတဖၣ်ဒိးလီၤဃာ်မ့ၣ်ပိၢ်အဃိသ၀ီဖိတဖၣ်ဘၣ်ဟးထီၣ်က့ၤလီၤလၢတၢ်ဘၣ်ယိၣ်ဘၣ်ဘှီအပူၤ

လါအီကူး ၄ သီႇ ၂၀၂၂ နံၣ်ႇ ခ့ၣ်အဲးစံၣ်

လၢခ့ၣ်အဲၣ်ယူၣ်–ကညီဒီကလုာ်စၢဖှိၣ်ကရၢ ဒူပျာ်ယာ်ကီၢ်ရ့ၣ် ကြုၢ်တုကီၢ်ဆၣ်အပူၤ ပယီၤသုးလၢအနုာ်လီၤအိၣ်ဖဲတီၤကၠၤအ့သ၀ီတီၤထီကၠိကရၢၢ်အပူၤတဖၣ်အံၤခီဖျိအ၀ဲသ့ၣ်ဒိးဃာ်ဟီၣ်လာ်မ့ၣ်ပိၢ်လၢကရၢၢ်ကပၤအဃိဘၣ်ဟးထီၣ်က့ၤလီၤလၢတၢ်ပျံၤတၢ်ဖုးတၢ်ဘၣ်ယိၣ်ဘၣ်ဘှီအပူၤအဂ့ၢ်န့ၣ် လီၢ်က၀ီၤသ၀ီဖိတဖၣ်စံး၀ဲန့ၣ်လီၤႉ

ဘၣ်ဃးတၢ်ဒိးလီၤဃာ်ဟီၣ်လာ်မ့ၣ်ပိၢ်လၢကၠိကရၢၢ်အကပိၤကပၤတၢ်ဂ့ၢ်အံၤ ပယီၤသုးလၢအိၣ်ကၠိကရၢၢ်ပူၤတဖၣ်တဲပၠး၀ဲမးသ့ၣ်ညါဘၣ်၀ဲလီၤအဂ့ၢ်န့ၣ် လီၢ်က၀ီၤဖိလၢတအဲၣ်ဒိးပာ်ဖျါအမံၤတဂၤစံး၀ဲဒ်အံၤန့ၣ်လီၤႉ

“ၦၤဒိးလီၤဃာ်မ့ၣ်ပိၢ်လၢကၠိကပၤအိၣ်န့ၣ်ပယီၤသုးလၢအနုာ်လီၤအိၣ်ကၠိကရၢၢ်ပူၤလၢညါတဖၣ်တဲပၠးၦၤမးပသ့ၣ်ညါဘၣ်လီၤႉပယီၤသုးလၢအဟဲအိၣ်လၢညါတဖၣ်န့ၣ်က့ၤကဒါဒီးခဲအံၤပယီၤသုးဟဲအိၣ်လၢအသီတဒူၣ်ႉအ၀ဲသ့ၣ်နါက့တဲၦၤတအိၣ်နီတမံၤဘၣ်ႉမ့ၢ်အဒိးလီၤဃာ်မ့ၣ်ပိၢ်ဒံးဧါႇက့ၤထုးထီၣ်ကွံာ်၀ဲလံဧါန့ၣ်တတဲတၢ်နီတမံၤဘၣ်ႉခဲအံၤၦၤလဲၤလၢကၠိကပၤတဘူၣ်နီတဂၤလၢာ်ဘၣ်”အဂ့ၢ်န့ၣ်လီၢ်က၀ီၤသ၀ီဖိဖဲန့ၣ်စံး၀ဲန့ၣ်လီၤႉ

ဖဲအပူၤကွံာ်လါမးရှးအခါစ့ၢ်ကီးကျီၢ်တဒုဖဲအဟးဃုအီၣ်ဆၣ်လၢကၠိကရၢၢ်လီၢ်ခံအဆၢကတီၢ်ယီၢ်ဘၣ်မ့ၣ်ပိၢ်ကဲထီၣ်သးမးပယီၤသုးဒုးသ့ၣ်ညါတဲပၠး၀ဲသ၀ီဖိတဖၣ်လၢအဒိးလီၤဃာ်မ့ၣ်ပိၢ်အိၣ်အဂ့ၢ်န့ၣ် လီၢ်က၀ီၤဖိတဂၤဃီ၀ဲန့ၣ်စံးအါထီၣ်၀ဲန့ၣ်လီၤႉ

ပယီၤသုးလၢအနုာ်လီၤအိၣ်ဖဲကၠိကရၢၢ်ပူၤအံၤတဖၣ်အနီၣ်ဂံၢ်ကအိၣ်လၢအဂၤ(၅၀)ဃၣ်ဃၣ်ညါဒီး ဆီလီၤစ့ၢ်ကီးတြဲၤအိၣ်ခိးတၢ်လီၢ်လၢကၠိမဲာ်ညါ(ဟီၣ်သရီ)တိၤဖီခိၣ်ဒီးအိၣ်ခိးသမံသမိး၀ဲၦၤဟးထီၣ်က့ၤလီၤတဖၣ်အဂ့ၢ်န့ၣ် လီၢ်က၀ီၤဖိတဖၣ်စံး၀ဲန့ၣ်လီၤႉ

ခီဖျိပယီၤသုးနုာ်လီၤအိၣ်လၢကၠိကရၢၢ်ပူၤအဃိတနံၣ်အံၤတၢ်သိၣ်လိအဂီၢ်န့ၣ်လီၢ်က၀ီၤကၠိဖိသ့ၣ်တဖၣ်ဘၣ်သုးလီၢ်လဲၤမၤလိက့ၤတၢ်လၢသီခါဖၠၣ်ကရၢၢ်ပူၤဒီးခီဖျိတၢ်ကီတၢ်ခဲအိၣ်လၢတၢ်လီၢ်တၢ်ကျဲအဃိဘၣ်သိၣ်လိနီၤဖးလီၤက့ၤအတီၤအဂ့ၢ်န့ၣ် တီၤကၠၤအ့ကၠိဖိမိၢ်ပၢ်တဂၤစံး၀ဲန့ၣ်လီၤႉ

“တမၤလိဘၣ်လံာ်လၢကၠိလၢာ်ဘၣ်အဃိဘၣ်လဲၤမၤလိက့ၤ၀ဲလၢသီခါဖၠၣ်မီၤနီၤႉခီဖျိတၢ်လီၢ်တတြီၢ်ဘၣ်အဃိမ့မ့ၢ်တီၤဖုၣ်န့ၣ်ဘၣ်ထီၣ်၀ဲကၠိလၢဂီၤခီဒီးမ့မ့ၢ်တီၤထီခီန့ၣ်ဘၣ်ထီၣ်၀ဲလၢဟါခီမီၤနီၤႉတုၤလၢခဲအံၤန့ၣ်သ၀ီဖိတဖၣ်ဟဲက့ၤအိၣ်လၢမုၢ်ဆါခီလီၤႉမ့ၢ်လၢဖိသၣ်ဘၣ်ထီၣ်ကၠိအဃိဟဲက့ၤဆှၢအဖိႉလၢမုၢ်နၤခီန့ၣ်မံလၢသ၀ီပူၤတဘူၣ်ဘၣ်ႉၦှၤတနီၤန့ၣ်လဲၤမံလၢသ၀ီအဂၤႉတနီၤန့ၣ်လဲၤမံလၢသီခါဖၠၣ်ႉလၢမုၢ်နၤခီန့ၣ်ပယီၤသုးတပျဲခီဂာ်၀ဲသ၀ီဆၢခိၣ်ဒီးသ၀ီဆၢလာ်လၢာ်ဘၣ်”အဂ့ၢ်န့ၣ်စံးဘၣ်ခ့ၣ်အဲးစံၣ်န့ၣ်လီၤႉ

ပယီၤသုးလၢအနုာ်လီၤအိၣ်ဖဲတီၤကၠၤအ့ကၠိကရၢၢ်အပူၤသ့ၣ်တဖၣ်အံၤခီဖျိဟီၣ်က၀ီၤတၢ်ပၢၢ်ဆၢကရူၢ်တဖၣ်လဲၤခးအ၀ဲသ့ၣ်တလီၢ်လီၢ်အဃိအ၀ဲသ့ၣ်ဆီလီၤ၀ဲမဲးထၢၣ်တဖၣ်လၢကၠိတီၤဒၢးပူၤလၢကဒီသဒၢသးအဂီၢ်အဂ့ၢ်န့ၣ် လီၢ်က၀ီၤဖိတဖၣ်စံး၀ဲန့ၣ်လီၤႉ

ဖဲအပူၤကွံာ်လါမးရှးအခါစ့ၢ်ကီးလၢတီၤကၠၤအ့သ၀ီအပူၤတၢ်ဒုးစးထီၣ်ကဲထီၣ်၀ဲလၢဟီၣ်က၀ီၤကညီဒီကလုာ်တၢ်ထူၣ်ဖျဲးသုးမုၢ်ဒိၣ်(KNLA)ႇကညီဒီကလုာ်ဂၢၤသးကရၢ(KNDO)သုးပာ်ဖှိၣ်ဒီးပယီၤသုးတဖၣ်အဘၢၣ်စၢၤ၀ံၤအလီၢ်ခံပယီၤသုးတဖၣ်နုာ်လီၤမၤအါထီၣ်အသုးဂံၢ်ဘါလၢကၠိကရၢၢ်ပူၤလီၤအဂ့ၢ်န့ၣ်လီၢ်က၀ီၤဖိတဖၣ်စံး၀ဲန့ၣ်လီၤႉ

လၢန့ၣ်အမဲာ်ညါခီဖျိပယီၤသုးလၢအိၣ်ကီးတရံး၀့ၢ်အံၤသ့ၣ်တဖၣ်ခးလီၤကျိဖးဒိၣ်ဆူဒူသ၀ီပူၤခဲအံၤခဲအံၤအဃိ လီၢ်က၀ီၤကမျၢၢ်ဘၣ်ဒိဘၣ်ထံးအိၣ်၀ဲအသိးဟံၣ်ဃီတၢ်သူၣ်ထီၣ်တနီၤဟးဂူာ်ဟးဂီၤအိၣ်၀ဲစ့ၢ်ကီးန့ၣ်လီၤႉ