(သ့ၣ်ဂ့ၤလူၢ်)တၢ်ဒုးအပူၤပယီၤသုးသံ(၃၈)ဂၤ,ဘၣ်ဒိ(၂၀)ဘျဲၣ်အဂ့ၢ်ချၢၣ်လွံၢ်ထူၣ်ကီၢ်ရ့ၣ်ထုးထီၣ်ပၥ်ဖျါ

လါယူၤလံ ၂၈ သီ, ၂၀၂၅ နံၣ်, ခ့ၣ်အဲးစံၣ်

ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢချၢၣ်လွံၢ်ထူၣ်ကီၢ်ရ့ၣ်,မူကီၢ်ဆၣ်ဟီၣ်ကဝီၤ ဖဲအပူၤကွံၥ်လါယူၤလံ(၂၅)သီအ နံၤန့ၣ် KNLA သုးရ့ၣ်(၉)ထီၣ်မၤန့ၢ်ကွံၥ်ပယီၤသုးရ့ၣ်တၢ်လီၢ်တတီၤလၢအအိၣ်ဆီလီၤအသးဖဲ(သ့ၣ်ဂ့ၤလူၢ်)သဝီအပူၤ ဒီးတၢ်ဒုးအပူၤပယီၤသုးသံ(၃၈)ဂၤ,ဘၣ်ဒိ(၂၀)ဘျဲၣ်အဂ့ၢ်ချၢၣ်လွံၢ်ထူၣ်ကီၢ်ရ့ၣ်ထုးထီၣ်ပၥ်ဖျါဝဲဖဲမဟါ(၂၇)သီအနံၤန့ၣ်လီၤ.

ပယီၤသုးရ့ၣ်လၢအိၣ်ဆီလီၤအသးဖဲကမျၢၢ်ဒူသဝီအပူၤအံၤမ့ၢ်ဝဲသုးတမှံၤသုးပၥ်ဖှိၣ်သ့ၣ်တဖၣ်လၢဟဲအိၣ်ဆီလီၤအသးလၢ(၂၀၂၄)နံၣ်အဆၢကတီၢ်အခါလံၤလံၤအဂ့ၢ်မူကီၢ်ဆၣ်အပှၤကတိၤတၢ်ပၢပဒိၣ်စီၤစံးပတြၢၤစံးဝဲဒ်အံၤန့ၣ်လီၤ.

“ပယီၤသုးလၢဟဲအိၣ်ဆီလီၤအသးဖဲဒူသဝီအပူၤသ့ၣ်တဖၣ်အံၤအါတက့ၢ်မ့ၢ်ဝဲသုးပၥ်ဖှိၣ်သ့ၣ်တဖၣ်လၢအမ့ၢ်သုးတမှံၤ ဒီးသုးလၢအိၣ်ဟီၣ်ကဝီၤဖဲအံၤပၥ်ဖှိၣ်အသးန့ၣ်လီၤ. ဒီးဟဲအိၣ်ဆီလီၤအသးဖဲ(သ့ၣ်ဂ့ၤလူၢ်)သဝီဒီး(လဲၣ်ပၣ်)သဝီသ့ၣ် တဖၣ်အပူၤန့ၣ်လီၤ.” အဂ့ၢ်စံးဘၣ်ခ့ၣ်အဲးစံၣ်-ကညီတၢ်ကစီၣ်န့ၣ်လီၤ.

တၢ်ထီၣ်ဒုးပယီၤသုး(သ့ၣ်ဂ့ၤလူၢ်)တၢ်လီၢ်အံၤဘၣ်တၢ်တီခိၣ်ရိၣ်မဲအီၤလၢ KNLA သုးရ့ၣ်(၉)ဃုၥ်ဒီးတၢ်ပၢၢ်ဆၢသုးပၥ် ဖှိၣ်သ့ၣ်တဖၣ်ဒီးပယီၤသုးသံ(၃၈)ဂၤအကျါပၣ်ဃုၥ်ပယီၤသုးအပှၤဘၠူးဆီထံး(၁၄)ဂၤ,ဒီးဘၣ်ဒိတစှၤန့ၢ်အဂၤ(၂၀)ဘၣ်အဂ့ၢ်ကီၢ်ရ့ၣ်ထုးထီၣ်ပၥ်ဖျါဝဲအသိးလၢ KNLA သုးပၥ်ဖှိၣ်တကပၤဘၣ်သံ(၁)ဂၤ,ဘၣ်ဒိဝဲခဲလၢၥ်(၂၄)ဂၤန့ၣ်လီၤ.

လၢန့ၣ်အမဲၥ်ညါတၢ်မၤန့ၢ်ဝဲ 81MM-၁ခိၣ်, 60MM-၁ခိၣ်, ၆၀ကိမဲၣ်ဒိၣ်-၁ခိၣ်, RPG-ခိၣ်, MA11-၆ခိၣ်, MA3-၁ခိၣ်, တၢ်ဆဲးကျိးစဲး-၁ဖျၢၣ်, ဒြိကၠါမၢၣ်-၂ဖျၢၣ်, စဲးလီဂံၢ်-၂ဖျၢၣ်, 81MMအချံ-၃ဖျၢၣ်, 60MMအချံ-၁၄ဖျၢၣ်, RPGအချံ-၂ ဖျၢၣ်ဒီးတၢ်မၤန့ၢ်ဃုၥ်စ့ၢ်ကီးသုးတၢ်ပီးတၢ်လီအဂၤသ့ၣ်တဖၣ်အဂ့ၢ်သ့ၣ်ညါဘၣ်န့ၣ်လီၤ.

ဒ်န့ၣ်အသိးဖဲတနံၤဃီဝဲန့ၣ်န့ၣ်မူကီၢ်ဆၣ်ဟီၣ်ကဝီၤအပူၤKNLA သုးက့နီၣ်ဂံၢ်(၃)ထီၣ်မၤန့ၢ်စ့ၢ်ကီးဝဲပယီၤသုးတၢ်လီၢ်တ တီၤလၢဟဲအိၣ်ဆီလီၤအသးဖဲ(လဲၤပၣ်)သဝီအပူၤဒီးတၢ်မၤန့ၢ်ဃုၥ်ဝဲတၢ်စုကဝဲၤ,သုးတၢ်ပီးတၢ်လီသ့ၣ်တဖၣ်အဂ့ၢ်ချၢၣ်လွံၢ်ထူၣ်ကီၢ်ရ့ၣ်ထုးထီၣ်ပၥ်ဖျါဝဲအသိးသ့ၣ်ညါဘၣ်န့ၣ်လီၤ.