Home တၢ်ကစီၣ် တၢ်ဒုးကဲထီၣ်လၢ(DKBA)၀ဲၤလီၢ်ခိၣ်သ့ၣ်အကပၤႇလီၢ်က၀ီၤကမျၢၢ်သံဘၣ်ဒိဘၣ်ထံးအိၣ်

တၢ်ဒုးကဲထီၣ်လၢ(DKBA)၀ဲၤလီၢ်ခိၣ်သ့ၣ်အကပၤႇလီၢ်က၀ီၤကမျၢၢ်သံဘၣ်ဒိဘၣ်ထံးအိၣ်

309
0
Photo: CJ

လါစဲးပထ့ဘၢၣ် ၁၆ သီႇ ၂၀၂၂ နံၣ်ႇ ခ့ၣ်အဲးစံၣ်

လၢတီနီၢ်မုၢ်ထီၣ် မၠၣ်၀တံၣ်ကလံၤထံးတကပၤန့ၣ် ဖဲမဟါလါစဲးပထ့ဘၢၣ် ၁၅ သီ ဂီၤခီအဆၢကတီၢ် ကညီဒီကလုာ်တၢ်ထူၣ်ဖျဲးသုးမုုၢ်ဒိၣ်(KNLA)သုးပာ်ဖှိၣ်ဒီးပယီၤသုးတဘၢၣ်စၢၤတၢ်ဒုးကဲထီၣ်၀ဲဖဲတၢ်ဘၣ်ဘျုးဒံၣ်မိၣ်ခြ့ၣ်စံၣ်ကညီသုးမုၢ်ဒိၣ်(DKBA)၀ဲၤလီၢ်ခိၣ်သ့ၣ်ဆိၣ်စံမၠဲၣ်သ၀ီကပၤလ့ဂီၤသ၀ီပူၤအဃိလီၢ်က၀ီၤကမျၢၢ်သံဘၣ်ဒိဘၣ်ထံးအိၣ်၀ဲအဂ့ၢ်န့ၣ် ၦၤဘၣ်မူဘၣ်ဒါဘၣ်ထွဲတဖၣ်စံး၀ဲန့ၣ်လီၤႉ

ဖဲမဟါလါစဲးပထ့ဘၢၣ် ၁၅ သီ ဂီၤခီ ၁၁ နၣ်ရံၣ်ဘျဲၣ်အဆၢကတီၢ်န့ၣ် ပယီၤသုးလၢအနုာ်လီၤအိၣ်ဖဲ(DKBA)၀ဲၤလီၢ်ခိၣ်သ့ၣ်ဆိၣ်စံမၠဲၣ်သ၀ီပူၤတဖၣ် ဖဲအ၀ဲသ့ၣ်လဲၤထီၣ်လၢလ့ဂီၤသ၀ီ(ဃိၣ်လူၢ်)အခါခီဖျိတၢ်ဘၣ်သဂၢၢ်ခးလိာ်သးကဲထီၣ်၀ဲဒီး(KNLA)သုးပာ်ဖှိၣ်အဃိ လ့ဂီၤလီၢ်က၀ီၤကမျၢၢ်သံ၀ဲ(၁)ဂၤဒီး(DKBA)သုးဖိဘၣ်ဒိစ့ၢ်ကီးဲ၀(၁)ဂၤအဂ့ၢ်န့ၣ် (DKBA)သုးခိၣ်တဂၤစံး၀ဲဒ်အံၤန့ၣ်လီၤႉ

(DKBA)သုးခိၣ်စံး၀ဲလၢ “ပယီၤသုးတဖၣ်အိၣ်ဖဲလ့ဂီၤဒီးကဘၣ်မ့ၢ်အကလဲၤထီၣ်လၢတၢ်ဖီခိၣ်တကပၤမီၤနီၤႉလၢန့ၣ်တကပၤခီဒုဟဲခး၀ဲဒီး(drone) မီၤနီၤႉပယီၤသုးတကပၤခီက့ၤခးလီၤကဒါဒီး (၁၂၀ မမ) လီၤႉ ခံခီခံကပၤခးလိာ်သးအဃိဘၣ်၀ဲဒၣ်လီၢ်က၀ီၤကမျၢၢ် (၁) ဂၤဒီးသံ၀ဲတဘျီဃီလီၤႉဘၣ်ဒိဃုာ်စ့ၢ်ကီး (DKBA) သုးဖိတဂၤဒံး” အဂ့ၢ်န့ၣ်စံးဘၣ်ခ့ၣ်အဲးစံၣ်ဖဲမဟါလါစဲးပထ့ဘၢၣ် ၁၅ သီအနံၤန့ၣ်လီၤႉ

တၢ်ဒုးကဲထီၣ်ဘျီ၀ဲအံၤအပူၤခီဖျိပယီၤသုးတကပၤခးလီၤကဒါကျိဖးဒိၣ်အဃိလ့ဂီၤဒီးသ့ၣ်ဘီဘိသ၀ီ ၦၤလီၢ်အိၣ်ကမှံဘၣ်ဒိစ့ၢ်ကီး(၁)ဂၤအဂ့ၢ်န့ၣ် သ၀ီပှၤဘၣ်မူဘၣ်ဒါတဖၣ်စံးဘၣ်ခ့ၣ်အဲးစံၣ်န့ၣ်လီၤ

ခီဖျိပယီၤသုးနုာ်လီၤအိၣ်ဆီလီၤသးလၢလ့ဂီၤသ၀ီပူၤအါအါဂီၢ်ဂီၢ်အဃိလီၢ်က၀ီၤသ၀ီဖိတဖၣ်ဃ့ၢ်ထီၣ်၀ဲသ၀ီဒီတဖျၢၣ်ညါဒီးတၢ်လီၢ်ဖဲန့ၣ်အိၣ်တ့ၢ်က့ၤထဲပယီၤသုးဒီး(DKBA)သုးတဖၣ်လီၤအဂ့ၢ်န့ၣ် (KNLA)သုးပာ်ဖှိၣ်တကပၤစံး၀ဲန့ၣ်လီၤႉ

Photo: CJ

(KNLA)သုးပာ်ဖှိၣ်ၦၤဘၣ်မူဘၣ်ဒါတဂၤစံး၀ဲ “လၢလ့ဂီၤန့ၣ်အိၣ်ထဲပယီၤသုးလီၤႉလီၢ်က၀ီၤကမျၢၢ်တအိၣ်လၢၤဘၣ်ႉမ့ဘၣ်လၢန့ၣ်တကပၤဒုကဘၣ်မ့ၢ်ၦၤလၢအအိၣ်ဒီးပယီၤသုးတဖၣ်လီၤႉဘၣ်ခီန့ၣ်ပတသ့ၣ်ညါဘၣ်ႉပယီၤသုးခးလီၤကျိဖးဒိၣ်လၢသ့ၣ်ဘီဘိသ၀ီပူၤတကပၤအဃိပသ့ၣ်ညါဘၣ်လၢလီၢ်က၀ီၤဖိဘၣ်ဒိမီၤနီၤ” အဂ့ၢ်န့ၣ်စံး၀ဲန့ၣ်လီၤႉ

ပယီၤသုးလၢအနုာ်လီၤအိၣ်ဆီလီၤသးဖဲ(DKBA)၀ဲၤလီၢ်ခိၣ်သ့ၣ်ဆိၣ်စံမၠဲၣ်သ၀ီပူၤအံၤတဖၣ်စ့ၢ်ကီးခီဖျိအ၀ဲသ့ၣ်ခးလီၤစၢၤကျိဖးဒိၣ်အဃိလီၢ်က၀ီၤကမျၢၢ်ၦၤလီၢ်အိၣ်ကမှံအဂၤ(၃၀၀)ဘျဲၣ်လၢအိၣ်ဆိၣ်စံမၠဲၣ်သ၀ီသီခါဖၠၣ်ကရၢၢ်ပူၤအံၤတဖၣ်စ့ၢ်ကီးဘၣ်လဲၤဃ့ၢ်ထီၣ်၀ဲဆူကီၢ်ကၠီၣ်တဲၣ်ပူၤအဂ့ၢ်န့ၣ်သ့ၣ်ညါဘၣ်န့ၣ်လီၤႉ

စးထီၣ်ဖဲအပူၤကွံာ်လါစဲးပထ့ဘၢၣ် ၁ အနံၤန့ၣ် ပယီၤသုးနုာ်လီၤဟံးန့ၢ်အလီၢ်လၢ (DKBA)၀ဲၤလီၢ်ခိၣ်သ့ၣ်ဆိၣ်စံမၠဲၣ်ဒီးလ့ဂီၤသ၀ီပူၤအဂၤ(၃၀၀)ဃၣ်ဃၣ်ညါန့ၣ်လီၤႉ

ကတီၢ်ခဲအံၤမ့ၢ်စ့ၢ်ကီးတၢ်ဆၢကတီၢ်လၢတၢ်ဘၣ်ဘျုးဒံၣ်မိၣ်ခြ့ၣ်စံၣ်ကညီသုးမုၢ်ဒိၣ်(DKBA)သုးရိၣ်မဲခိၣ်ကျၢၢ် သုးခိၣ်ကျၢၢ်ဒိၣ်စိ စီၤစတံတီခိၣ်ရိၣ်မဲခၢၣ်စၢးကရူၢ် လဲၤတုၤ၀ဲဒၣ်လၢ(န့ၢ်ပၠံၣ်တီၣ်)လၢ ကတၢၣ်ပီၣ်တဲသကိးတၢ်မုာ်တၢ်ခုၣ်ဒီးသုးမီၤစိရိၤအခိၣ်မ့အီၣ်လဲၣ်အံၤန့ၣ်လီၤႉ