လါယနူၤအါရံၤ ၁၇ သီႇ ၂၀၂၃ သီႇ ခ့ၣ်အဲးစံၣ်
လၢကညီကီၢ်စဲၣ် သၣ်တီၣ်ကၠံကီၢ်ဆၣ်အပူၤန့ၣ် ဖံသးၦၢ်အနံၣ်(၇၀)တဂၤဖဲအလဲၤဃုအီၣ်သ့ၣ်မုၣ်အခါ ယီၢ်ဘၣ်၀ဲမ့ၣ်ပိၢ်လၢ(သၤမိတီၤ)ပယီၤသုးကလၢၤကပၤဒီးသံကွံာ်၀ဲအဂ့ၢ်န့ၣ် လီၢ်က၀ီၤကမျၢၢ်စံး၀ဲအသိး သ့ၣ်ညါဘၣ်န့ၣ်လီၤႉ
ဖဲအပူၤကွံာ်လါယနူၤအါရံၤ ၁၃ သီ ဂီၤခီ ၁၁ နၣ်ရံၣ်အဆၢကတီၢ်န့ၣ် သၤမိတီၤသ၀ီဖိ ဖံသးၦၢ်ဒီၤခ့ၤ၀့အနံၣ်(၇၀)အံၤ ဖဲအလဲၤကျီအီၣ်သ့ၣ်မုၣ်ဟဲက့ၤတုၤဖဲ(သၤမိတီၤ)ပယီၤသုးကလၢၤကပၤအခါ ယီၢ်ဘၣ်မ့ၣ်ပိၢ်ဒီးသံကွံာ်၀ဲအဂ့ၢ်န့ၣ် လီၢ်က၀ီၤကမျၢၢ်တဂၤစံး၀ဲဒ်အံၤန့ၣ်လီၤႉ
“အယီၢ်ဘၣ်မ့ၣ်ပိၢ်လၢပယီၤသုးကလၢၤကပၤမီၤနီၤႉတၢ်လီၢ်ဖဲန့ၣ်န့ၣ်ပယီၤသုးတမၢၦၤလဲၤဘၣ်ႉဘၣ်ဆၣ်ဖံသးၦၢ်တဂၤခီန့ၣ်အညါၦၢ်တစဲးအဃိအကလဲၤဘၣ်၀ဲဒ်န့ၣ်မီၤနီၤႉလၢညါခါတၢ်လီၢ်၀ဲန့ၣ်တၢ်ဒုးကဲထီၣ်၀ံၤအလီၢ်ခံန့ၣ် ပယီၤသုးပျံၤတၢ်အဃိဒိးလီၤဃာ်၀ဲမ့ၣ်ပိၢ်မီၤနီၤႉအပူၤကွံာ်လၢညါန့ၣ်တအိၣ်ဘၣ်ႉတၢ်ပၢၢ်ဆၢသုးပာ်ဖှိၣ်ကရူၢ်မ့ဟဲခးအ၀ဲသ့ၣ်န့ၣ်ဒ်သိးၦၤကယီၢ်ဘၣ်မ့ၣ်ပိၢ်အဂီၢ်န့ၣ်ဒိးလီၤ၀ဲဒ်န့ၣ်လီၤ” အဂ့ၢ်န့ၣ်စံးဘၣ်ခ့ၣ်အဲးစံၣ်–ကညီတၢ်ကစီၣ် န့ၣ်လီၤႉ
ဖဲအပူၤကွံ၁်လါနိၣ်၀့ဘၢၣ် ၂၆ သီအနံၤစ့ၢ်ကီး လၢ(သၤမိတီၤ)သ၀ီအပူၤန့ၣ် တၢ်ဒုးကဲထီၣ်၀ဲလၢတၢ်ဒီသဒၢကမျၢၢ်သုး(PDF)သိၣ်မှံၤဒီးပယီၤသုးအဘၢၣ်စၢၤဒီးခီဖျိပယီၤသုးက့ၤခးလီၤကျိဖးဒိၣ်အဃိလီၢ်က၀ီၤကမျၢၢ်ပိာ်မုၣ်သံ၀ဲ(၁)ဂၤဒံးအဂ့ၢ်န့ၣ် သ့ၣ်ညါဘၣ်န့ၣ်လီၤႉ
တၢ်ဒုးကဲထီၣ်ဖဲ(သၤမိတီၤ)သ၀ီပူၤဘျီ၀ဲန့ၣ်အခါပယီၤသုးက့ၤခးလီၤကျိဖးဒိၣ်တကးဒံးဘၣ်အမဲာ်ညါခီဖျိကဘီယူၤစ့ၢ်ကီးဟဲတ့ၢ်လီၤမ့ၣ်ပိၢ်အဃိ(သၤမိတီၤ)သ၀ီဟံၣ်အဖျၢၣ်(၄၀)ဘျဲၣ် ကမျၢၢ်အဂၤ(၄၀၀)ဘျဲၣ် ဘၣ်ဃ့ၢ်ထီၣ်၀ဲဒီး တုၤလၢခဲအံၤအ၀ဲသ့ၣ်က့ၤအိၣ်လၢသ၀ီပူၤတဘူၣ်ဒံး၀ဲဘၣ်အဂ့ၢ်န့ၣ် သ့ၣ်ညါဘၣ်န့ၣ်လီၤႉ
“တၢ်ဒုးကဲထီၣ်လၢညါတဘျီန့ၣ်သုးမီၤစိရိၤကဘီယူၤဟဲခးလီၤတၢ်အဃိကျိဖးဒိၣ်အချံလၢအတပိၢ်ဖးထီၣ်ဒံးဘၣ်န့ၣ်အိၣ်ဒံးမီၤနီၤႉအဃိန့ၣ်လီၢ်က၀ီၤကမျၢၢ်ပျံၤ၀ဲလၢမ့ၣ်ပိၢ်ချံအံၤကပိၢ်ဖးထီၣ်မီၤနီၤႉဖဲကဘီယူၤဟဲခးလီၤတၢ်အခါန့ၣ်(သၤမိတီၤ)လီၢ်က၀ီၤကမျၢၢ်လၢအဃ့ၢ်ထီၣ်တဖၣ်အါဒၣ်တက့ၢ်န့ၣ်အ၀ဲသ့ၣ်က့ၤအိၣ်လၢသ၀ီပူၤတဘူၣ်ဒံးဘၣ် ”အဂ့ၢ်န့ၣ် လီၢ်က၀ီၤကမျၢၢ်တဂၤဃီ၀ဲန့ၣ်စံးအါထီၣ်၀ဲန့ၣ်လီၤႉ
ဖဲအပူၤကွံာ်လါအီကူးအခါစ့ၢ်ကီးလၢတီအူ–သၣ်တီၣ်ကျဲမုၢ်ဖးဒိၣ် ပၠါစခါ(၁၀)မဲၤသ၀ီအပူၤ ကမျၢၢ်ၦၤပိာ်ခွါတဂၤစ့ၢ်ကီးယီၢ်ဘၣ်မ့ၣ်ပိၢ်ဖဲအလဲၤလၢကျီးပူၤဆၢကတီၢ်အဃိအခီၣ်တူာ်ကွံာ်၀ဲတခီဒီး ဒ်နၣ်အသိးတၢ်ဒီသဒၢကမျၢၢ်သုး(PDF)တဂၤစ့ၢ်ကီးယီၢ်ဘၣ်မ့ၣ်ပိၢ်ဖဲတၢ်လီၢ်၀ဲန့ၣ်ကပၤဒံးန့ၣ်လီၤႉ
