(ၦၤဂဲၤကလံၣ်)ကၠးကရူၢ်သိလ့ၣ်လီၤတကျၢၢ်ကဲထီၣ်သးလၢမၠၣ်၀တံၣ်အ့ရှါကျဲမုၢ်ခိၣ်အံၤ သံအိၣ်တုၤလၢ (၁၀) ဂၤ

လါအီးကထိဘၢၣ် ၆ သီႇ ၂၀၂၂ နံၣ်ႇ ခ့ၣ်အဲးစံၣ်

လၢကညီကီၣ်စဲၣ် ကီးတရံး–မၠၣ်၀တံၣ်အ့ရှါကျဲမုၢ်ခိၣ်န့ၣ် ဖဲမဟါလါအီးကထိဘၢၣ် ၅ သီအနံၤ ခီဖျိ(ပွ့ၣ်န့ၤခၠံၤ)ၦၤဂဲၤကလံၣ်ကၠးကရူၢ်အသိလ့ၣ်လီၤတကျၢၢ်ကဲထီၣ်သးအဃိသံ၀ဲတဘျီဃီ(၅)ဂၤ၀ံၤ ဖဲတနံၤအံၤန့ၣ်သံကဒီး၀ဲ(၅)ဂၤအဃိၦၤသံခဲလၢာ်အိၣ်တုၤလၢအဂၤ(၁၀)လံအဂ့ၢ်န့ၣ် မၠၣ်၀တံၣ်၀့ၢ်တၢ်တိစၢၤမၤစၢၤကရူၢ်စံး၀ဲန့ၣ်လီၤႉ

ဖဲမဟါဟါခီ ၄ နၣ်ရံၣ်ဘျဲၣ်အဆၢကတီၢ်န့ၣ် လၢမၠၣ်၀တံၣ်အ့ရှါကစၢၢ်ကျဲ(ကိခၠၤကိ)တၢ်လီၢ်န့ၣ် (ပွ့ၣ်န့ၤခၠံၤ)ၦၤဂဲၤကလံၣ်ကၠးသိလ့ၣ်လီၤတကျၢၢ်အဃိၦၤသံ၀ဲဒၣ်(၅)ဂၤအကျါပၣ်ဃုာ်၀ဲဖိသၣ်(၂)နံၣ်တဂၤအဂ့ၢ်န့ၣ် အလ့သ့ၣ်(Rescue Myawaddy)ဂ့ၢ်ဂီၢ်အူတၢ်တိစၢၤမၤစၢၤကရူၢ်ၦၤဘၣ်မူဘၣ်ဒါတဂၤ စံးဘၣ်ခ့ၣ်အဲးစံၣ်ဒ်အံၤန့ၣ်လီၤႉ

အ၀ဲစံး၀ဲလၢ“ခဲအံၤပဆှၢလီၤၦၤဆါ(၇)ဂၤလၢမီၣ်လမၠဲၣ်တၢ်ဆါဟံၣ်ဖးဒိၣ်န့ၣ်မီၤနီၤႉသိလ့ၣ်န့ၣ်ဟဲထီၣ်ခံခိၣ်ႉတခိၣ်ခီန့ၣ်အဟးဂီၤအိၣ်တ့ၢ်လၢကျဲႉလၢအ၀ဲတခိၣ်ခီန့ၣ်လီၤတကျၢၢ်ႉၦၤသံခဲလၢာ်န့ၣ်(၉)ဂၤႉဘၣ်တဘျီဃီန့ၣ်သံ(၅)ဂၤႉလဲၤတုၤလၢတၢ်ဆါဟံၣ်န့ၣ်သံကဒီး(၂)ဂၤႉတဂီၤညါအံၤသံကဒီး(၂)ဂၤႉဖဲမၠၣ်၀တံၣ်တၢ်ဆါဟံၣ်အံၤၦၤဆါအိၣ်တ့ၢ်(၁၂)ဂၤမီၤနီၤႉၦၤသံတဖၣ်အကျါန့ၣ်ပၣ်ဃုာ်ဖိသၣ်(၂)နံၣ်တဂၤႉဖိသၣ်ခီန့ၣ်အတုၤလၢတၢ်ဆါဟံၣ်မးသံႉဖိသၣ်န့ၣ်လီၤတဲာ်ဖျိးကွံာ်လၢအမိစုပူၤမီၤနီၤႉဟဲတုၤလၢတၢ်ဆါဟံၣ်ဘျီၦၤကူဆါဘၣ်ဆၣ်တန့ၢ်လၢၤဘၣ်ႉဖဲတဂီၤအံၤလဲၤတုၤလၢမီၣ်လမၠဲၣ်တၢ်ဆါဟံၣ်သံကဒီးပိာ်ခွါတဂၤ”အဂ့ၢ်န့ၣ်စံး၀ဲန့ၣ်လီၤႉ

(ပွ့ၣ်န့ၤခၠံၤ)ၦၤဂဲၤကလံၣ်ကၠးကရူၢ်အံၤဖဲအ၀ဲသ့ၣ်ကဟဲထီၣ်ဂဲၤကလံၣ်လၢမၠၣ်၀တံၣ်၀့ၢ်ဟဲလၢကျဲအခါသိလ့ၣ်လီၤတကျၢၢ်ကဲထီၣ်သးဒီးၦၤဆါႇၦၤသံအစိၣ်တဖၣ်တၢ်က့ၤစိာ်၀ဲလၢမီၣ်လမၠဲၣ်လံအဂ့ၢ်န့ၣ် သ့ၣ်ညါဘၣ်န့ၣ်လီၤႉ

မၠၣ်၀တံၣ်–ကီးတရံးအ့ရှါကျဲ(ကိခၠၤကိ)တၢ်လီၢ်အံၤမ့ၢ်တၢ်လီၢ်တခါလၢသိလ့ၣ်လီၤတကျၢၢ်ႇ သိလ့ၣ်ဘၣ်သဂၢၢ်တဲးလိာ်သးကဲထီၣ်တလီၢ်လီၢ်န့ၣ်လီၤႉဖဲအပူၤကွံာ်နံၣ်အခါစ့ၢ်ကီးသိလ့ၣ်ဖးဒိၣ်လၢအတီၣ်၀ဲကီၢ်ပယီၤၦၤမၤတၢ်ဖိလၢကလဲၤထီၣ်မၤတၢ်လၢကီၢ်ကၠီၣ်တဲၣ်ပူၤအံၤလီၤတဲာ်လၢတၢ်တြီၤပူၤဒီးဖဲန့ၣ်ၦၤသံဘၣ်ဒိဘၣ်ထံးအါအါဂီၢ်ဂီၢ်ကဲထီၣ်တ့ၢ်အသးဒံးန့ၣ်လီၤႉ