ဒ်သိးဖိဒံဖိသၣ်တဖၣ်သုတမၤလၢာ်ဂီၤတၢ်ဆၢကတီၢ်ဒ်န့ၣ်တဂ့ၤအဂီၢ်ဆၣ်သူလ့ၤကၠိအိးထီၣ်ကဒီး၀ဲတၢ်ကိၢ်ခါတၢ်မၤလိ

လါအ့ဖြ့ၣ် ၅ သီႇ ၂၀၂၄ နံၣ်ႇ ခ့ၣ်အဲးစံၣ်

မ့တုၤဃီၤလၢကၠိပံးတၢ်ကိၢ်ခါလါမးရှးဒီးလါအ့ဖြ့ၣ်အဆၢကတီၢ်လံန့ၣ် လၢၦၤကၠိဖိ ဖိဒံဖိသၣ်ဒီး သူၣ်ဘီၣ်သးစၢ် သ့ၣ်တဖၣ်အဂီၢ် ကီၢ်ပူၤကီၢ်ချၢႇထံဆၢကီၢ်ဆၢ လီၢ်က၀ီၤၦၤဘၣ်မူဘၣ်ဒါကၠိၦၤဘၣ်မူဘၣ်ဒါတဖၣ် ညီနုၢ်န့ၣ် အိးထီၣ်န့ၢ်၀ဲ တၢ်ကိၢ်ခါတၢ်မၤလိအံၤလၢတၢ်လီၢ်သကုၤဆးဒးအပူၤန့ၣ်လီၤႉ

ဒ်န့ၣ်အသိးလၢၦၤအိးထီၣ်တၢ်ကိၢ်ခါတၢ်မၤလိတဖၣ်အကျါအံၤန့ၣ်ခီကီၢ်ဆၣ်သူလ့ၤကၠိအံၤစ့ၢ်ကီးတီခိၣ်ရိၣ်မဲအိးထီၣ်၀ဲဒၣ်တၢ်ကိၢ်ခါတၢ်မၤလိလၢၦၤဖိဒံဖိသၣ် သ့ၣ်တဖၣ် အဂီၢ်အိၣ်၀ဲကိးမုၢ်နံၣ်ဒဲးန့ၣ်လီၤႉ

မုၢ်ဆ့ၣ်ထီၣ်တချုးလၢတၢ်မၤလိစးထီၣ်ဒံးဘၣ်အခါန့ၣ် လၢဂီၤခီ ၈း၀၀ နၣ်ရံၣ်န့ၣ် ပထံၣ်ဘၣ်လၢဖိဒံဖိသၣ် ၦၤကၠိဖိသူၣ်ဘီၣ်သးစၢ်တဖၣ်ဟဲထုးဖှိၣ်အသးလၢ(hall)ခါအပူၤဒီးဖိဒံဖိသၣ်တဖၣ်အံၤ ဖဲအ၀ဲသ့ၣ်ထံၣ်လိာ်သး တဂၤဒီးတဂၤအခါန့ၣ်တဲသကိးတၢ်ၦဲၤဒီးတၢ်နံၤတၢ်အ့တၢ်သူၣ်ဖှံသးညီန့ၣ်လီၤႉ

ဖဲၦၤကၠိဖိႇဖိဒံဖိသၣ်သူၣ်ဘီၣ်သးစၢ်တဖၣ်ထုးဖှိၣ်သးလၢာ်(၈း၃၀)ဘၣ်လံန့ၣ်ဒၢလွဲဖိသီၣ်ထီၣ်၀ဲကျ့ကျ့ကျ့လံဘျီန့ၣ် ဖိဒံဖိသၣ်တဖၣ်တဂၤလၢတၢ်ပာ်လီၤန့ၢ်ဃာ်အလီၢ်ဒၣ်၀ဲန့ၣ်အ၀ဲသ့ၣ်ဟဲက့ၤဆ့ၣ်နီၤဖှိၣ်၀ဲဒၣ်တဂၤအကရူၢ်ဒၣ်၀ဲလၢအလီၢ်န့ၣ်လီၤႉ

ဒီတနံၤအတီၢ်ပူၤတချုးလၢကရူၢ်တဖၣ်က့ၤလၢအကစၢ်လီၢ်ကျဲဒံးဘၣ်ဖဲ(၈း၃၀)အဆၢကတီၢ် ဖိဒံဖိသၣ်ႇ ၦၤကၠိဖိသ့ၣ်တဖၣ်ထုးဖှိၣ်လၢ(hall)ဒၢးပူၤလၢာ်လံတဘျီန့ၣ်သရၣ်၊မုၣ်တဖၣ်စးထီၣ်၀ဲဂီၤခီတၢ်ဘါဒီးတၢ်ဘါအဆၢကတီၢ်နကနၢ်ဟူဘၣ်ဃုာ်၀ဲဒီးကစၢ်ယွၤအတၢ်သူၣ်၀ံၣ်သးဆၢလၢအမုာ်တဖၣ်န့ၣ်လီၤႉ

ကိးမုၢ်နံၤဒဲးဂီၤခီတၢ်ဘါ၀ံၤလီၢ်ခံ(၉း၀၀)ဘျီန့ၣ်ၦၤကၠိဖိႇဖိဒံဖိသၣ်သ့ၣ်တဖၣ်အံၤနီၤဖးလီၤသးက့ၤကဒါ၀ဲလၢတဂၤ လၢ အကစၢ်လီၢ်ကစၢ်ကျဲဒီးတၢ်စးထီၣ်မၤလိက့ၤ၀ဲတၢ်ဖံးလိမၤဒိးလၢတၢ်ပာ်လီၤဃာ်၀ဲသ့ၣ်တဖၣ်အံၤန့ၣ်လီၤႉ

ဖိဒံဖိသၣ်လၢအဟဲထီၣ်တၢ်မၤလိသ့ၣ်တဖၣ်အံၤပထံၣ်ဘၣ်လၢအမဲာ်သၣ်န့ၣ်ၦဲၤ၀ဲဒီးတၢ်သူၣ်ဆူၣ်သးဂဲၤတၢ်သူၣ်ဖှံသးညီန့ၣ်လီၤႉလၢတၢ်န့ၣ်အဃိဘၣ်ဃးတၢ်အိးထီၣ်တၢ်ကိၢ်ခါတၢ်မၤလိဘျီ၀ဲအံၤအတၢ်ပညိၣ်မ့ၢ်မနုၤလဲၣ်န့ၣ်ပလဲၤထံၣ် လိာ်သံကွၢ်၀ဲတၢ်မၤလိဘျီ၀ဲအံၤၦၤဘၣ်မူဘၣ်ဒါတဂၤလၢအမ့ၢ် သရၣ်မုၣ် တီနီၢ်ဖီ ဒီးအ၀ဲစံးဘၣ်ၦၤဒ်အံၤန့ၣ်လီၤႉ

“ပအိးထီၣ်တၢ်ကိၢ်ခါတၢ်မၤလိအံၤဒ်သိးဖိသၣ်တဖၣ်ကၠိပံးအဆၢကတီၢ်န့ၣ်အ၀ဲသ့ၣ်သုတအိၣ်ခီလီလီတဂ့ၤအဂီၢ်မီၤႉဒ်သိးအ၀ဲသ့ၣ်ကမၤလိဘၣ်၀ဲတၢ်တခါခါမ့၀ံၤဖိသၣ်လၢအဆံးတဖၣ်န့ၣ်ဒ်သိးကအိၣ်ဒီးတၢ်ရ့လိာ်မုာ်လိာ်လၢကဒဲကဒဲအဘၢၣ်စၢၤႉဘျီဒုပအဲၣ်ဒိးလၢအ၀ဲသ့ၣ်ကသ့၀ဲတၢ်သ့တၤလၣ်လၢအမ့ၢ်တၢ်ဒ့တၢ်အူမီၤနီၤႉတနီၤနီၤန့ၣ်အ၀ဲသ့ၣ်ဒ့ပာ်တယီသ့ၣ်တဖၣ်သ့အဃိဖဲတၢ်ကိၢ်ခါတၢ်မၤလိအဆၢကတီၢ်န့ၣ်ဒ်သိးအ၀ဲသ့ၣ်ကသ့အါထီၣ်ဘၣ်၀ဲအဂီၢ်လီၤမီၤနီၤ” အဂ့ၢ်န့ၣ် စံး၀ဲန့ၣ်လီၤႉ

တကးဒံးဘၣ်အမဲာ်ညါလၢတၢ်မၤလိဘျီ၀ဲအံၤအပူၤန့ၣ်တၢ်နီၤဖးလီၤ၀ဲကရူၢ်သၢကရူၢ်ဒီးတၢ်မၤလိဒီတကတီၢ်အပူၤ န့ၣ်တၢ်မၤလိန့ၢ်ဃုာ်၀ဲကစၢ်ယွၤကလုၢ်ကထါဃုာ်ဒီးတၢ်သူၣ်၀ံၣ်သးဆၢတၢ်ဒ့တၢ်အူအိၣ်၀ဲဒၣ်တဘျုးကလုာ်အဂ့ၢ်န့ၣ် သရၣ်မုၣ် တီနီၢ်ဖီ စံး၀ဲန့ၣ်လီၤႉ

“တၢ်မၤလိတဘျီညါအံၤပနီၤဖးလီၤ၀ဲဒၣ်ကရူၢ်သၢကရူၢ်နီၤႉကရူၢ်သၢကရူၢ်န့ၣ်ပယုၢ်န့ၢ်အမံၤစ့ၢ်အိၣ်၀ဲဒၣ်မိၤရှ့ႇ ယိၤဟၣ်ဒီးယိၤဆှူန့ၣ်လီၤႉသၢကရူၢ်န့ၣ်လၢတၢ်မၤလိအပူၤန့ၣ်အိၣ်ဒံးလၢအကရူၢ်သ့ၣ်တဖၣ်ဒံးမီၤနီၤႉတၢ်မၤလိတဖၣ်ခီန့ၣ်ပမၤလိဘၣ်ဃး၀ဲဒၣ်လံာ်စီဆှံႇလံာ်ကညီႇတၢ်ဒ့တၢ်အူတဖၣ်လၢအမ့ၢ်ယူကလံႇတၢ်အူပံ(ရံၤခီၤဒၢၤ)ဒီး တၢ်အူတယီသ့ၣ်တဖၣ်”အဂ့ၢ်န့ၣ် စံး၀ဲန့ၣ်လီၤႉ

တၢ်မၤလိအံၤစးထီၣ်၀ဲဒၣ်လၢဂီၤခီ ၈း၃၀ တုၤဃီၤ၀ဲဒၣ်လၢဟါခီ ၃း၃၀ ဒီး တကးဒံးဘၣ်ဖဲမုၢ်ထူၣ်ၦၤအိၣ်ဘှံး အဆၢကတီၢ်စ့ၢ်ကီးန့ၣ်သရၣ်၊မုၣ်တဖၣ်ကတဲၤကတီၤရဲၣ်ကျဲၤန့ၢ်၀ဲတၢ်အီၣ်တၢ်အီတနံၤတမၠိတနံၤတမၠိလၢ ၦၤကၠိဖိဖိဒံဖိသၣ်သ့ၣ်တဖၣ်အံၤအဂီၢ်ကိးမုၢ်နံၤဒဲးန့ၣ်လီၤႉလၢတၢ်န့ၣ်အဃိဖိဒံဖိသၣ်လၢအဟဲထီၣ်တၢ်မၤလိသ့ၣ်တဖၣ်အံၤစ့ၢ်ကီးတၢ်မုာ်ဘၣ်အ၀ဲသ့ၣ်ဒိၣ်မးန့ၣ်လီၤႉ

လၢတၢ်အိးထီၣ်တၢ်ကိၢ်ခါတၢ်မၤလိအဖီခိၣ်အံၤအဘျုးအိၣ်၀ဲဒိၣ်မးတကးဒံးဘၣ်တၢ်မၤလိ ဃုာ်၀ဲကစၢ်ယွၤကလုၢ် ကထါသ့ၣ်တဖၣ်အဃိသူၣ်ဖှံသးညီဒိၣ်မးလၢတၢ်မၤလိအပူၤ အဂ့ၢ်န့ၣ် ကၠိဖိမုၣ် နီၢ်ဂ့ၤဖျါဆဲး လၢအဟဲထီၣ် တၢ်ကိၢ်ခါတၢ်မၤလိအံၤ စံး၀ဲန့ၣ်လီၤႉ

“ကၠိပံးအဆၢကတီၢ်အံၤပမ့အိၣ်ကလီန့ၣ်အတကဲဘျုးလၢပဂီၢ်ဘၣ်ႉမ့၀ံၤသရၣ်မုၣ်အိးထီၣ်န့ၢ်ၦၤသိၣ်လိဒ်အံၤပထီၣ်ဘၣ်ဘျီပနၢ်ပၢၢ်အါထီၣ်ကစၢ်ယွၤကလုၢ်ကထါမ့ၢ်ဂ့ၤႇခိၣ်နူာ်သ့ၣ်မတၤတဃၢလၢၤဘၣ်တၢ်လိာ်ကွဲသ့ၣ်မတၤသရၣ်မုၣ်ဒုးလိာ်ကွဲၦၤအဃိအကဲဘျုးလၢပဂီၢ်ဒီဒူၣ်လီၤႉဒ်သိးပမ့အိၣ်ကလီဒီးပမၤလိတၢ်ဒ်အံၤန့ၣ်အကဲဘျုးလၢအါဒိၣ်လၢပဂီၢ်မီၤနီၤႉဒ်သိးတၢ်ဒ့တၢ်အူတကပၤမ့ၢ်ဂ့ၤအဟ့ၣ်လီၤၦၤလၢအဆၢကတီၢ်အဃိပမၤဒီးပသူၣ်ဖှံသးညီလၢကိးကတီၢ်ဒဲးလီၤမီၤနီၤႉတမ့ၢ်လၢတၢ်ဆၢကတီၢ်တကတီၢ်န့ၣ်အယံၤဘၣ်ကအိၣ်ဖဲတနၣ်ရံၣ်အဆူၣ်ကတၢၢ်တနၣ်ရံၣ်လီၤ”အဂ့ၢ်န့ၣ် စံး၀ဲန့ၣ်လီၤႉ

ဒ်န့ၣ်အသိးတၢ်ကိၢ်ခါတၢ်မၤလိဘျီ၀ဲအံၤခီဖျိတၢ်ထၢနုာ်မၤလိဃုာ်၀ဲတၢ်သူၣ်၀ံၣ်သးဆၢႇတၢ်ဒ့တၢ်အူအကလုာ် ကလုာ်အဃိယနာ်လၢအဘျုးကအိၣ်၀ဲဒၣ်လၢၦၤဖိဒံဖိသၣ်ၦၤကၠိဖိလၢအဟဲထီၣ်တၢ်မၤလိဘျီ၀ဲအံၤသ့ၣ်တဖၣ်အဂီၢ်ကိးဂၤဒဲးတဂၤလၢအလီၢ်ဒၣ်၀ဲစုုာ်စုာ်န့ၣ်လီၤႉ

လၢတၢ်န့ၣ်အဃိစးထီၣ်ဖဲမၤလိဘၣ်တၢ်အံၤအပူၤကွံာ်တၢ်လၢတသ့ၣ်ညါဘၣ်ဒံးဘၣ်တဖၣ်သ့ၣ်ညါဘၣ်၀ဲဒီး လၢန့ၣ်အမဲာ်ညါထံၣ်ဘၣ်ရ့လိာ်ဘၣ်သးဒီးသမူသကိးႇသရၣ်၊မုၣ်သ့ၣ်တဖၣ်အဂ့ၢ်န့ၣ် စီၤကၠီၤကၠံၤဆှူ လၢအဟဲထီၣ် တၢ်ကိၢ်ခါတၢ်မၤလိအံၤ စံး၀ဲစ့ၢ်ကီးဒ်အံၤန့ၣ်လီၤႉ

“တၢ်ကိၢ်ခါတၢ်မၤလိဘျီ၀ဲအံၤန့ၣ်ယသူၣ်ဖှံသးညီဒိၣ်မးႉဘၣ်မနုၤလဲၣ်န့ၣ်လၢညါန့ၣ်ယတထီၣ်ဘီၣ်နီတဘျီဘၣ်ႇလံာ်ကညီစ့ၢ်ကီးယတမၤလိဘၣ်ဘၣ်ႇလံာ်စီဆှံစ့ၢ်ကီးယတကျၢဘၣ်ႉအခဲအံၤဒုယထီၣ်ဘၣ်လံာ်စီဆှံယမၤလိဘၣ်လံာ် ကညီယတဲၦၤကညီစ့ၢ်ကီးဘၣ်လံအနီၢ်ကီၢ်န့ၣ်ယကဲ၀ဲဒၣ်(ၦိၢ်)လီၤႉယမၤလိဘၣ်လံာ်စီဆှံဒီးလံာ်ကညီခံခါတကးဒံးဘၣ်ပၣ်ဃုာ်တၢ်ဒ့တၢ်အူအကလုာ်ကလုာ်မီၤနီၤႉအဃိယအဲၣ်ဒိးသ့တၢ်သူၣ်၀ံၣ်သးဆၢတခါအံၤယဟဲမၤလိဘၣ်အံၤန့ၣ်ယသးခုဒိၣ်မးလီၤႉပထံၣ်လိာ်ရ့လိာ်ဘၣ်လိာ်သးဒီးသမူသကိးႇသရၣ်၊မုၣ်သ့ၣ်တဖၣ်မုာ်ဒိၣ်မးႉ”အဂ့ၢ်န့ၣ် စံး၀ဲန့ၣ် လီၤႉ

ဒ်န့ၣ်အသိးပသ့ၣ်ညါဘၣ်လၢတၢ်မၤလိတနွံအံၤမ့၀ံၤလၢကဟဲနီၢ်တနွံန့ၣ်လၢၦၤဖိဒံဖိသၣ်သ့ၣ်တဖၣ်အံၤအဂီၢ်ကအိၣ်၀ဲဒၣ်ဒီးတၢ်ပြၢသ့ၣ်တဖၣ်လၢအမ့ၢ်တၢ်ဖးပြၢလံာ်စီဆှံႇတၢ်ဒ့တၢ်အူတၢ်ပြၢႇတၢ်ဂဲၤကလံၣ်ပြၢႇမီထိၣ်တၢ်သး၀ံၣ်ပြၢႇ တၢ်ကတိၤဂ့ၢ်လိာ်ႇတၤလၣ်တၢ်ပြၢဃုာ်ဒီးတၢ်ပြၢလၢအဂၤသ့ၣ်တဖၣ်ကလုာ်ကလုာ်အဂ့ၢ်န့ၣ် သ့ၣ်ညါဘၣ်န့ၣ်လီၤႉ

တၢ်ကိၢ်ခါတၢ်မၤလိဘျီ၀ဲအံၤဘၣ်တၢ်စးထီၣ်မၤအီၤဖဲတလါအံၤလါအ့ဖြ့ၣ် ၁ သီ ကတုၤဃီၤ၀ဲဒၣ်လၢလါအ့ဖြ့ၣ် ၁၂ သီ လၢခံနွံအတီၢ်ပူၤဒီး တၢ်မၤလိဘျီ၀ဲအံၤၦၤဖိဒံဖိသၣ်ၦၤကၠိဖိသူၣ်ဘီၣ်သးစၢ်ဟဲထီၣ်၀ဲဒၣ်ကအိၣ်လၢအဂၤ (၁၀၀)ဘျဲၣ်ညါဒီးသရၣ်ႇမုၣ်ခဲလၢာ်န့ၣ်အိၣ်၀ဲအဂၤ(၂၀)ဘျဲၣ်အဂ့ၢ်န့ၣ် သ့ၣ်ညါဘၣ်န့ၣ်လီၤႉ