တၢ်ဒုးကဲထီၣ်ဒိၣ်ဒိၣ်မုၢ်မုၢ်လၢဖလူ–သ့ၣ်ဘီဘိကျဲ ခံခီခံကပၤတၢ်သံတၢ်ဘၣ်ဒိဘၣ်ထံးအိၣ်

လါနိၣ်၀့ဘၢၣ် ၂၃ သီႇ ၂၀၂၂ နံၣ်ႇ ခ့ၣ်အဲးစံၣ်

ဖဲမဟါလါနိၣ်၀့ဘၢၣ် ၂၂ သီ ဟါခီ ၅ နၣ်ရံၣ်ဃၣ်ဃၣ်အဆၢကတီၢ်န့ၣ် လၢမၠၣ်၀တံၣ်ကလံၤထံး ဂီၤလ့ၤကျဲ ဘျၢၣ်ဒိၣ်သ၀ီကပၤန့ၣ် တၢ်ဒုးကဲထီၣ်ဒိၣ်ဒိၣ်မုၢ်မုၢ်လၢပယီၤသုးဒီးကညီဒီကလုာ်တၢ်ထူၣ်ဖျဲးသုးမုၢ်ဒိၣ်(KNLA)သုး ပာ်ဖှိၣ်အဘၢၣ်စၢၤဒီးခံခီခံကပၤတၢ်သံတၢ်ဘၣ်ဒိဘၣ်ထံးအိၣ်၀ဲအဂ့ၢ်န့ၣ် သ့ၣ်ညါဘၣ်လၢဟီၣ်က၀ီၤ ဂံၢ်ခီၣ်ထံးၦၤဟ့ၣ်တၢ်ကစီၣ်ဖိအအိၣ်န့ၣ်လီၤႉ

ဂံၢ်ခီၣ်ထံးၦၤဟ့ၣ်တၢ်ကစီၣ်ဖိတဂၤစံး၀ဲ“ဖဲမဟါလၢဘျၢၣ်ဒိၣ်သ၀ီ(DKBA)တြဲၤအိၣ်ခိးတၢ်လီၢ်လီၢ်လံၤကပၤန့ၣ်(KNLA)သုးပာ်ဖှိၣ်ဒီးပယီၤသုးအဘၢၣ်စၢၤတၢ်ဒုးကဲထီၣ်ႇၦၤသုးဖိလၢအလဲၤဆှၢတၢ်အီၣ်တၢ်အီလၢတၢ်မဲာ်ညါတဖၣ်ဖဲအ၀ဲသ့ၣ်ဟဲက့ၤဒီးသိလ့ၣ်လၢကျဲအခါန့ၣ်အ၀ဲသ့ၣ်ဘၣ်၀ဲကိးဂၤဒဲးလီၤႉသံ(၃)ဂၤအကျါန့ၣ်ပၣ်ဃုာ်သုးမုၣ်(၂)ဂၤဒီးဘၣ်ဒိ(၄)ဂၤႉတၢ်ဒုးကဲထီၣ်ဒိၣ်ဒိၣ်မုၢ်မုၢ်အဃိခံခီခံကပၤလၢာ်တၢ်ဘၣ်ဒိဘၣ်ထံးအိၣ်လီၤ”အဂ့ၢ်န့ၣ်စံး၀ဲန့ၣ်လီၤႉ

ပယီၤသုးအံၤဒ်သိးကထီၣ်ဟံန့ၢ်က့ၤသ့ၣ်ဘီဘိသုးလၢၤလၢ(KNLA)သုးပာ်ဖှိၣ်ထီၣ်မၤန့ၢ်၀ဲဖဲအပူၤကွံာ်လါမ့ၤ ၁၈ သီအံၤအဂီၢ်န့ၣ် အ၀ဲသ့ၣ်ပာ်ဖှိၣ်ထီၣ်အသးဒီးကရူၢ်လၢအမၤဃာ်တၢ်ပတုာ်တၢ်ခးႇသုးခိးကီၢ်ဆၢ(BGF)သ့ၣ်တဖၣ်န့ၣ် လီၤႉလၢန့ၣ်အမဲာ်ညါမၤအါထီၣ်၀ဲအသုးဂံၢ်လၢဆိၣ်စံမၠဲၣ်ႇဖလူ(သိထၣ်ကွ့ၣ်)ႇမွ့ၤသိကီၤႇဃိၣ်လူၢ်ႇလ့က့ၣ်ကိာ်ကလံၤစိးတကပၤဒီးနုာ်လီၤထီၣ်ဒုး၀ဲ(KNLA)သုးပာ်ဖှိၣ်အံၤလၢသုးကျိၤ(၃)ဘိန့ၣ်လီၤႉ

“ကျိဖးဒိၣ်ကျိဖိဒုပနၢ်ဟူကိးမုၢ်နံၤဒဲးလီၤႉပယီၤသုးအံၤနုာ်လီၤအိၣ်လၢ(DKBA)ဟီၣ်က၀ီၤပူၤဒီးဟးဆှၣ်တၢ်ႉလၢဂီၤလ့ၤကျဲတကပၤန့ၣ်မ့ၢ်လၢ(DKBA)ဒီး(BGF)အသိလ့ၣ်ဟးထီၣ်က့ၤလီၤအိၣ်အဃိပယီၤသုးဟဲပၣ်ဃုာ်လၢအ၀ဲသ့ၣ်သိလ့ၣ်ပူၤအိၣ်မီၤနီၤႉဘၣ်ပျံၤစ့ၢ်ကီးလၢကဘီယူၤကဟဲတ့ၢ်လီၤမ့ၣ်ပိၢ်အဃိသ၀ီဖိတဖၣ်ဘၣ်ဟဲစံၣ်အိၣ်လၢသူမှဲကျိကၢၢ်နံၤအံၤလီၤ”အဂ့ၢ်န့ၣ်သ့ၣ်ဘီဘိလီၢ်က၀ီၤကမျၢၢ်တဂၤစံး၀ဲန့ၣ်လီၤႉ

ဒ်တၢ်အိၣ်သးလၢတကီၢ်ခါခဲအံၤအသိးန့ၣ်လၢခ့ၣ်အဲၣ်ယူၣ်–ကညီဒီကလုာ်စၢဖှိၣ်ကရၢ(သုးက့ ၆)ဟီၣ်က၀ီၤ မၠၣ်၀တံၣ်ကလံၤထံးလီၢ်က၀ီၤဃုာ်ဒီးကၠၤအ့စ့ၣ်ကၠံႇဃိၣ်သၢဖျၢၣ်ႇကီးတရံးႇမၠၣ်၀တံၣ်–ဂီၤလ့ၤလီၢ်က၀ီၤတဖၣ် အပူၤန့ၣ်ခီဖျိပယီၤသုးအံၤမၤ၀ဲတၢ်ထီၣ်ဒုးလၢကဘီယူၤႇခးလီၤကျိဖးဒိၣ်ဒီးလၢပျီပူၤစ့ၢ်ကီးအ၀ဲသ့ၣ်ပာ်ဖှိၣ်ထီၣ်သးဒီး(BGF)မၤ၀ဲဒုးယၤတၢ်ဟူးတၢ်ဂဲၤဟဲအါထီၣ်အဃိလီၢ်က၀ီၤကမျၢၢ်ဘၣ်ဃ့ၢ်မှံဟးဖျိးအနီၣ်ဂံၢ်ဟဲအါထီၣ်၀ဲအဂ့ၢ်န့ၣ် ၦၤလၢမၤစၢၤၦၤဃ့ၢ်မှံဟးဖျိးတဖၣ်စံး၀ဲန့ၣ်လီၤႉ