ခီဖျိပယီၤသုးခးလီၤကျိဖးဒိၣ်အဃိ ကၠီၣ်ထၣ်သ၀ီဖိတနီၤဘၣ်လဲၤစံၣ်အိၣ်လၢကီၢ်ကၠီၣ်တဲၣ်ကီၢ်ဆၢတကပၤ

လါအ့ဖြ့ၣ် ၈ သီႇ ၂၀၂၂ နံၣ်ႇ ခ့ၣ်အဲးစံၣ်

ဖဲလါအ့ဖြ့ၣ် ၆ သီ ဟါခီအဆၢကတီၢ် ခီဖျိပယီၤသုးခးလီၤကျိဖးဒိၣ်တပယူာ်ဃီဆူခ့ၣ်အဲၣ်ယူၣ်-ကညီဒီကလုာ်စၢဖှိၣ်ကရၢ ဒူပျာ်ယာ်ကီၢ်ရ့ၣ်(သုးက့ ၆)ဟီၣ်က၀ီၤ ကီးတရံးကီၢ်ဆၣ် ကၠီၣ်ထၣ်သ၀ီပူၤအဃိ လီၢ်က၀ီၤသ၀ီဖိတနီၤဘၣ်လဲၤစံၣ်အိၣ်လၢကီၢ်ကၠီၣ်တဲၣ်ကီၢ်ဆၢတကပၤအဂ့ၢ်န့ၣ် သ့ၣ်ညါဘၣ်န့ၣ်လီၤႉ

ဖဲလါအ့ဖြ့ၣ် ၆ သီ ဟါခီ ၈ နၣ်ရံၣ်ဃၣ်ဃၣ်အဆၢကတီၢ် ဟီၣ်က၀ီၤကညီဒီကလုာ်တၢ်ထူၣ်ဖျဲးသုးမုၢ်ဒိၣ်(KNLA)လဲၤထီၣ်ခး၀ဲပယီၤသုးကလၢၤလၢအအိၣ်ဖဲကၠီၣ်ထၣ်သ၀ီမုၢ်ထီၣ်တကပၤကဲထီၣ်သး၀ံၤ ခီဖျိပယီၤသုးကလၢၤလၢအအိၣ်ဖဲဖိဆံၣ်မုၢ်သ၀ီတဖၣ် က့ၤခးလီၤကျိဖးဒိၣ်ဆူကၠီၣ်ထၣ်သ၀ီပူၤအဃိ သ၀ီဖိတဖၣ်ပျံၤတၢ်ဖုးတၢ်ဘၣ်ဟးစံၣ်ပလဲာ်သးန့ၣ်လီၤႉ

ပယီၤသုးခးလီၤကျိဖးဒိၣ်ဘျီ၀ဲအံၤလီၢ်က၀ီၤသ၀ီဖိတၢ်ဘၣ်ဒိဘၣ်ထံးတအိၣ်၀ဲဘၣ်ဆၣ် ခီဖျိဘၣ်ယိၣ်၀ဲလၢတၢ်ဒုးကဆူၣ်ထီၣ်အဃိဟးစံၣ်ပလဲာ်စိအသးဒီး ၦၤဃ့ၢ်တၢ်ဒုးဖိလၢအလဲၤစံၣ်အိၣ်လၢ ကီၢ်ကၠီၣ်တဲၣ်-ကီၢ်ပယီၤကီၢ်ဆၢတဖၣ်အါဒၣ်တက့ၢ်န့ၣ်မ့ၢ်၀ဲၦၤသူၣ်က့သးၦၢ်ႇမိၢ်ဒီးဖိဒံဖိသၣ်သ့ၣ်တဖၣ်လီၤအဂ့ၢ်န့ၣ် သ၀ီဖိတဖၣ်စံး၀ဲန့ၣ်လီၤႉ

ကၠီၣ်ထၣ်သ၀ီဖိတဂၤစံး၀ဲ“ခးလီၤတၢ်န့ၣ်အိၣ်အါလၢကျိဖးဒိၣ်လီၤႉမ့မ့ၢ်ကျိချံဖိဒုပအိၣ်ဟံၣ်ပူၤသ့လီၤမီၤႉအမၤ၀ဲလၢတၢ်ဖးဒိၣ်ခါန့ၣ်ဘျီပဘၣ်အိၣ်၀ဲလၢတၢ်ပူၤလီၤႉအိၣ်လၢတၢ်ပူၤတနီၤလဲၤထီၣ်အိၣ်လၢသီခါဖၠၣ်တနီၤမီၤႉသ၀ီဖိလၢအအိၣ်ဒီးအဒံၣ်ဆံးဖိဆံးႇသူၣ်က့သးၦၢ်တဖၣ်န့ၣ်လဲၤစံၣ်အိၣ်၀ဲလၢပၢချၢတကပၤန့ၣ်ဒီဒူၣ်ညါႉအိၣ်၀ဲတဘူၣ်ဘၣ်ဘၣ်ယိၣ်၀ဲလၢကဘီယူၤကဟဲတ့ၢ်လီၤမ့ၣ်ပိၢ်လီၤႉ”အဂ့ၢ်န့ၣ်စံးဘၣ်ခ့ၣ်အဲးစံၣ်န့ၣ်လီၤႉ

ဖဲအပူၤကွံာ်လါမးရှးဘူးကလၢာ်အခါစ့ၢ်ကီး ဟီၣ်က၀ီၤဖဲန့ၣ်အပူၤခီဖျိတၢ်ဒုးကဲထီၣ်၀ဲလၢဟီၣ်က၀ီၤ(KNLA)သုးပာ်ဖှိၣ်ဒီးပယီၤသုးတဖၣ်အဘၢၣ်စၢၤဒံးအဃိ သ၀ီ(၆)ဖျၢၣ်လၢအပၣ်ဃုာ်ဒီးထံတဘျုၣ်ခံသ၀ီႇကွံလ့ႇကွံလိတၣ်ဒီးမီၣ်သ၀ီ လီၢ်က၀ီၤဖိ(၁၀၀၀)ဘျဲၣ် ဘၣ်လဲၤစံၣ်အိၣ်၀ဲလၢကီၢ်ကၠီၣ်တဲၣ်-ကီၢ်ပယီၤကီၢ်ဆၢကဲထီၣ်တ့ၢ်အသးဒံးန့ၣ်လီၤႉ

ဖဲအပူၤကွံာ်လါအ့ဖြ့ၣ် ၃ သီဒီး ၄ သီအနံၤစ့ၢ်ကီး ဟီၣ်က၀ီၤ(KNLA)ဒီးပယီၤသုးတဖၣ်အဘၢၣ်စၢၤတၢ်ဒုးကဲထီၣ်ဒံး၀ဲလၢကီးတရံးကလံၤထံးကျ့းသ၀ီပူၤဒီး ဖဲန့ၣ်ခီဖိပယီၤသုးကဘီယူၤဟဲခးလီၤတၢ်ခံသီတပယူာ်ဃီအဃိ လီၢ်က၀ီၤသ၀ီဖိဘၣ်ဒိ၀ဲ(၂)ဂၤဒီး ဟံၣ်ဃီတၢ်သူၣ်ထူၣ်ဟးဂီၤ၀ဲတနီၤဒံးန့ၣ်လီၤႉခီဖျိပယီၤသုးကဘီယူၤဟဲခးလီၤတၢ်အဃိ သ၀ီဒီတဖျၢၣ်ဘၣ်ဟးစံၣ်ပလဲာ်အသးန့ၣ်လီၤႉ