လ့က့ၣ်ကိာ်လီၢ်က၀ီၤကမျၢၢ်ၦၤဃ့ၢ်မှံဟးဖျိးတဖၣ်လိၣ်ဘၣ်၀ဲယၣ်လုးဒီးဆ့ကၤကလၢၤ

လါနိၣ်၀့ဘၢၣ် ၁၁ သီႇ ၂၀၂၂ နံၣ်ႇ ခ့ၣ်အဲးစံၣ်

လၢကီၢ်ကၠီၣ်တဲၣ်–ကီၢ်ပယီၤကီၢ်ဆၢ လီၢ်က၀ီၤဒူသ၀ီဃုာ်ဒီးလ့လ့ၣ်ကိာ်ၦၤဃ့ၢ်တၢ်ဒုးဖိအဂၤ(၅၀၀၀)ဘျဲၣ်လၢ အလဲၤစံၣ်အိၣ်သူမှဲကျိကၢၢ်နံၤဒီတကျိၤအံၤတဖၣ် ကတီၢ်ခဲအံၤခီဖျိတၢ်ချံၣ်ထီၣ်လံအဃိ လိၣ်ဘၣ်၀ဲယၣ်လုးဒီးဆ့ကၤကလၢၤသ့ၣ်တဖၣ်အဂ့ၢ်န့ၣ်ၦၤလၢမၤစၢၤၦၤဃ့ၢ်မှံဟးဖျိးတဖၣ်စံး၀ဲန့ၣ်လီၤႉ

“ခီဖျိဖိသၣ်အိၣ်အါအဃိလိၣ်ဘၣ်၀ဲဒၣ်ယၣ်လုးဒီးဆ့ကၤကလၢၤတဖၣ်မီၤနီၤႉလၢၦၤသူၣ်က့သးၦၢ်အဂီၢ်နါက့လိၣ်စ့ၢ်ကီးလီၤႉခီဖျိတၢ်တလၢတၦဲၤဘၣ်အဃိအ၀ဲသ့ၣ်ဘၣ်ကၤဖှိၣ်ကထြၢ၀ဲဆ့ကၤခံကထြၢသၢကထြၢဒ်န့ၣ်လီၤမီၤနီၤႉမ့မ့ၢ်လၢမုၢ်ဆါခီန့ၣ်တၢ်ကိၢ်ႇလၢမုၢ်နၤခီန့ၣ်တၢ်ချံၣ်ဒိၣ်ထီၣ်မီၤနီၤႉကကုၢ်ထီၣ်မ့ၣ်အူဒၢးကုၢ်ထီၣ်တဘူၣ်ဘၣ်ႉပဟးစံၣ်ဒ်အံၤနီၢ်တလါကဒီးန့ၣ်ကၦဲၤထီၣ်တနံၣ်လီၤ”အဂ့ၢ်န့ၣ်လ့ၣ်က့ၣ်ကိာ်လီၢ်က၀ီၤၦၤဃ့ၢ်တၢ်ဒုးဖိတဂၤစံး၀ဲန့ၣ်လီၤႉ

လၢမၠၣ်၀တံၣ်ကလံၤထံး လ့က့ၣ်ကိာ်–ဖလူ–ဂီၤလ့ၤကျဲန့ၣ် စးထီၣ်လါနိၣ်၀့ဘၢၣ် ၉ သီ တုၤလၢလါနိၣ်၀့ဘၢၣ် ၁၀ သီ ဂီၤခီအဆၢကတီၢ်န့ၣ် လၢဆိၣ်စံမၠဲၣ်သ၀ီဒီးသ့ၣ်ဘီဘိသ၀ီတကပၤန့ၣ် ကညီဒီကလုာ်တၢ်ထူၣ်ဖျဲးသုးမုၢ်ဒိၣ်(KNLA)ဒီးပယီၤသုးတဖၣ်အဘၢၣ်စၢၤတၢ်ဒုးကဲထီၣ်ဒံး၀ဲအဂ့ၢ်န့ၣ် လီၢ်က၀ီၤၦၤဟ့ၣ်တၢ်ကစီၣ်ဖိတဖၣ်စံး၀ဲအသိးသ့ၣ်ညါဘၣ်န့ၣ်လီၤႉ

လ့က့ၣ်ကိာ်(က၀ီၤဒ့ ၃)ကမျၢၢ်လၢဟဲအိၣ်စံၣ်အိၣ်သ့ၣ်ဘီဘိသ၀ီတဂၤစံး၀ဲ“စှၤသီအံၤတၢ်ချံၣ်ဒိၣ်ထီၣ်မီၤနီၤႉ ယၣ်လုးႇဆ့ကၤကလၢၤတအိၣ်ဘၣ်ႉဖိသၣ်တဖၣ်လိၤကိၢ်ႇတၢ်ကူးအီၣ်ႇပသိၣ်ဘၣ်တၢ်ခုၣ်အဃိကသံၣ်နါက့တအိၣ်ဘၣ်ႉပဘၣ်လဲၤၦ့ၤကသံၣ်လၢယိၤကီၢ်တကပၤမီၤနီၤႉစ့ဒၢးတအိၣ်တၢ်မၤစ့ၢ်ကီးတအိၣ်ႉၦၤတဟဲမၤဘူၣ်လီၤတၢ်ဒ်သိးလၢညါခါလၢၤဘၣ်အဃိၦၤဃ့ၢ်တၢ်ဒုးဖိတဖၣ်တၢ်ကီတၢ်ခဲအိၣ်ထီၣ်လၢကအီၣ်ကအီအဂီၢ်မီၤနီၤ”အဂ့ၢ်န့ၣ်စံး၀ဲန့ၣ်လီၤႉ

ခီဖျိပယီၤသုးနုာ်လီၤမၤတၢ်ထီၣ်ဒုးလၢခ့ၣ်အဲၣ်ယူၣ်(သုးက့ ၆)ဟီၣ်က၀ီၤပူၤအဃိ လီၢ်က၀ီၤဒူသ၀ီအဖျၢၣ်(၂၀)ဘျဲၣ်ကမျၢၢ်ဘၣ်ဃ့ၢ်မှံဟးဖျိး၀ဲအဂၤ(၅၀၀၀)ဘျဲၣ်ဒီးၦၤသ့ၣ်တဖၣ်အံၤလဲၤစံၣ်အိၣ်၀ဲလၢကီၢ်ကၠီၣ်တဲၣ်–ကီၢ်ပယီၤကီၢ်ဆၢသူမှဲကျိကၢၢ်နံၤအဖၢမုၢ်ဒံးန့ၣ်လီၤႉ

ဖဲအပူၤကွံာ်လါအီးကထိဘၢၣ်အခါစ့ၢ်ကီးဒ်လီၢ်က၀ီၤခိၣ်နၢ်အတၢ်ရဲၣ်တၢ်ကျဲၤအသိးန့ၣ်ထံမဲး၀ါခံႇပဟံၣ်ကျီးႇဖလူဖးဒိၣ်ႇဖလူဖိသ၀ီလီၢ်က၀ီၤကမျၢၢ်တနီၤက့ၤအိၣ်လၢသ၀ီပူၤအိၣ်၀ဲဘၣ်ဆၣ်ခီဖျိတၢ်ဖံးအီၣ်မၤအီၣ်ကျီးႇဟံၣ်ဃီတဖၣ်ဟးဂူာ်ဟးဂီၤအဃိတၢ်ကီတၢ်ခဲအိၣ်လၢကအိၣ်ကဆိးႇကဖံးအီၣ်မၤအီၣ်တၢ်အဂ့ၢ်န့ၣ်သ့ၣ်ညါဘၣ်န့ၣ်လီၤႉ