ခီဖျိပယီၤသုးတၢ်အိၣ်ခိးလီၢ်အဃိကီၢ်ဆၢကမျၢၢ်ၦၤဃ့ၢ်တၢ်ဒုးဖိတဖၣ်တၢ်ကီတၢ်ခဲအိၣ်ထီၣ်ကလဲၤက့ၤဖံးမၤဟးထီၣ်က့ၤလီၤအဂီၢ်

လါယနူၤအါရံၤ ၁၂ သီႇ ၂၀၂၃ နံၣ်ႇ ခ့ၣ်အဲးစံၣ်

ပယီၤသုးတၢ်အိၣ်ခိးလီၢ်လၢအိၣ်ဆီလီၤသးဖဲကီၢ်ကၠီၣ်တဲၣ်–ကီၢ်ပယီၤကီၢ်ဆၢ သ့ၣ်ဘီဘိ–ဂီၤလ့ၤကျဲဒီတကျိၤအံၤတဖၣ် ခီဖျိအိၣ်ခိးသမံသမိး၀ဲလီၢ်က၀ီၤကမျၢၢ်လၢအလဲၤက့ၤဖံးမၤဟးထီၣ်က့ၤလီၤတဖၣ်အဃိ တၢ်ကီတၢ်ခဲအိၣ်ထီၣ်လၢ အီၣ်အီအိၣ်ဆိးအဂ့ၢ်န့ၣ် သ့ၣ်ညါဘၣ်န့ၣ်လီၤႉ

လၢဖလူ–ဂီၤလ့ၤကျဲမုၢ် သိထၣ်ကွ့ၣ်ႇကၠီၤ၀ါဘိႇမွ့ၤနကီၤႇမွ့ၤသိကီၤႇသဲဖၠူၤခၠီႇကၠီးခဲးႇသ့ၣ်ဘီဘိႇဘျၢၣ်ဒိၣ်ႇ အူကြ့ၣ်ထၣ်ႇဂီၤလ့ၤကျဲတကပၤန့ၣ်ခီဖျိပယီၤသုးဆီလီၤ၀ဲဒၣ်တၢ်အိၣ်ခိးလီၢ်အိၣ်ခိးသမံသမိးတၢ်အဃိ လီၢ်က၀ီၤကမျၢၢ်လၢအလဲၤက့ၤဖံးမၤဟးထီၣ်က့ၤလီၤသ့ၣ်တဖၣ်အံၤထံၣ်ဘၣ်၀ဲတၢ်ကီတၢ်ခဲအဂ့ၢ်န့ၣ် ကမျၢၢ်လၢအဃ့ၢ်တၢ်ဒုးတဂၤစံး၀ဲဒ်အံၤန့ၣ်လီၤႉ

“အ၀ဲသ့ၣ်အိၣ်ခိးသမံသမိးသံဒိးသံကွၢ်တၢ်ဆူၣ်မးႉနမ့ဟဲက့ၤၦ့ၤတၢ်အီၣ်တၢ်အီန့ၣ်အ၀ဲသ့ၣ်ဃ့အီၣ်၀ဲႉ ဟုသးနါက့အ၀ဲသ့ၣ်တပျဲတီၣ်၀ဲအါအါဘၣ်ႉအ၀ဲသ့ၣ်တဲ၀ဲလၢကသ့ကွံာ်၀ဲဒ်န့ၣ်ႉနကလဲၤထီၣ်ၦ့ၤဟုသးလၢ၀့ၢ်ပူၤတတလီးခံတလီးဒ်န့ၣ်မးတသ့န့ၣ်ႉအ၀ဲသ့ၣ်မ့ထံၣ်သိဒီပိႇဟုသးဒီထၢၣ်န့ၣ်ကွၢ်၀ဲတဘၣ်အမဲာ်အါအါဘၣ်” အဂ့ၢ်န့ၣ် လီၢ်က၀ီၤကမျၢၢ်စံး၀ဲန့ၣ်လီၤႉ

ခီဖျိပယီၤသုးကျိၤတဖၣ်ဆီလီၤသုးကလၢၤႇဆီလီၤတြဲၤအိၣ်ခိးတၢ်လီၢ်ဒီးနုာ်လီၤမၤ၀ဲဒုးယၤတၢ်ဟူးဂဲၤလၢ မၠၣ်၀တံၣ်–ဂီၤလ့ၤကျဲအဃိ တုၤလၢတနံၣ်အံၤ(၂၀၂၃)လါယနူၤအါရံၤတနံၣ်ဘျဲၣ်အတီၢ်ပူၤအံၤန့ၣ် လီၢ်က၀ီၤပူၤဒူသ၀ီအဖျၢၣ်(၂၀)ဃၣ်ဃၣ်ကမျၢၢ်တဖၣ်တက့ၤဘၣ်လၢအဒူသ၀ီတၢ်လီၢ်တၢ်ကျဲဒံးဘၣ်န့ၣ်လီၤႉဒ်န့ၣ်အသိးခီဖျိပယီၤသုးအိၣ်ခိးသမံသမိးလီၢ်က၀ီၤကမျၢၢ်လၢအဟးထီၣ်က့ၤလီၤတဖၣ်အဃိကဲထီၣ်တၢ်ကီတၢ်ခဲလၢတၢ်လဲၤထီၣ်က့ၤလီၤဒီးတၢ်ဖံးအီၣ်မၤအီၣ်အဂ့ၢ်န့ၣ်လီၢ်က၀ီၤကမျၢၢ်လၢအဂၤတဂၤစ့ၢ်ကီးစံး၀ဲဒ်အံၤန့ၣ်လီၤႉ

“ပယီၤသုးတဖၣ်အံၤပလဲၤလၢကျီးပူၤႇဘ့ခ့ကျီးပူၤန့ၣ်ဟဲက့ၤဒီးသမံသမိးႇလဲၤခီဒၢးသမံသမိးအဃိ ခဲအံၤနအိၣ်လၢၦၤလီၢ်အိၣ်ကဒုလီၢ်နါက့တညီဘၣ်ႉနအိၣ်လၢနကဟံၣ်ကစၢ်ကျီးပူၤခီဒၢးတညီႉနကလဲၤထီၣ်က့ၤလီၤဒၢးတညီဘၣ်” အဂ့ၢ်န့ၣ်စံးဘၣ်ခ့ၣ်အဲးစံၣ်–ကညီတၢ်ကစီၣ်န့ၣ်လီၤႉ

ဖဲအပူၤကွံာ်(၂၀၂၂)နံၣ်အတီၢ်ပူၤအခါန့ၣ်ပယီၤသုးဒီးကညီဒီကလုာ်တၢ်ထူၣ်ဖျဲးသုးမုၢ်ဒိၣ်(KNLA)သုးပာ်ဖှိၣ်အဘၢၣ်စၢၤ ဒုးယၤတၢ်ဖ့ၣ်ဆၢကဲထီၣ်၀ဲဒီတနံၣ်ဃၣ်ဃၣ်ညါဒီး ကတီၢ်ခဲအံၤတၢ်ဒုးလီၤကယး၀ဲလံဘၣ်ဆၣ် ခံခီခံကပၤအဘၢၣ်စၢၤဒုးယၤတၢ်ဖ့ၣ်ဆၢႇဒုးယၤတၢ်ဟူးတၢ်ဂဲၤဆဲးကဲထီၣ်ဒံး၀ဲတုၤလၢခဲအံၤတစုန့ၣ်လီၤႉလၢတၢ်န့ၣ်အဃိတၢ်အိၣ်သးအံၤအိၣ်လၢတၢ်ဒုးက့ၤကဲထီၣ်ကဒါသ့ဒံး၀ဲအဂ့ၢ်န့ၣ်ဟီၣ်က၀ီၤဂံၢ်ခီၣ်ထံးၦၤဟ့ၣ်တၢ်ကစီၣ်ဖိတဖၣ် စံး၀ဲန့ၣ်လီၤႉ

တကီၢ်ခါအံၤလၢမၠၣ်၀တံၣ်–ဂီၤလ့ၤကျဲဒီတကျိၤ ဖလူလီၢ်က၀ီၤ မဲၢ်ထီးသလ့ႇမ့လဲၣ်ပၤႇပဟံၣ်ကျီးႇထံမဲး၀ါခံႇ အ့ၤကၠ့မၠဲၤသ၀ီတကပၤန့ၣ်လီၢ်က၀ီၤကမျၢၢ်ၦၤဃ့ၢ်တၢ်ဒုးဖိက့ၤအိၣ်လၢသ၀ီပူၤအိၣ်၀ဲတနီၤလံ အဂ့ၢ်န့ၣ် သ့ၣ်ညါဘၣ်န့ၣ်လီၤႉ

ဘၣ်ဆၣ်လၢလ့က့ၣ်ကိာ်၀့ၢ်သီ(က၀ီၤဒ့)ဃုာ်ဒီးသ့ၣ်ဘီဘိႇအူကြ့ၣ်ထၣ်သ၀ီတကပၤန့ၣ်လီၢ်က၀ီၤကမျၢၢ်က့ၤအိၣ်လၢသ၀ီပူၤတအိၣ်ဒံး၀ဲဘၣ်ဒီးခီဖျိပယီၤသုးအိၣ်ခိးသမံသမိးတၢ်အိၣ်ဒံးအဃိၦၤဟဲဆီၣ်ထွဲမၤစၢၤတၢ်အီၣ်တၢ်အီတအိၣ်၀ဲလၢၤဘၣ်အဖီခိၣ်တၢ်ကီတၢ်ခဲအိၣ်ထီၣ်လၢကမျၢၢ်ၦၤဃ့ၢ်တၢ်ဒုးဖိတဖၣ်အဂီၢ်အဂ့ၢ်န့ၣ်သ့ၣ်ညါဘၣ်န့ၣ်လီၤႉ