ပယီသုးတပျဲၦၤဟးထီၣ်က့ၤလီၤလၢသရိ၁်၀ါ–ဃိၣ်သၢဖျၢၣ်ကျဲလၢၤဘၣ်

လါယနူၤအါရံၤ ၁၈ သီႇ ၂၀၂၃ နံၣ်ႇ ခ့ၣ်အဲးစံၣ်

လၢကညီကီၢ်စဲၣ် ကၠၤအ့စ့ၣ်ကၠံကီၢ်ဆၣ်အပူၤ စးထီၣ်လါယနူၤအါရံၤ ၁၇ သီအနံၤန့ၣ် နိၣ်ခၠိနဲၣ်ဒုးယၤသုးကလၢၤၦၤဘၣ်မူဘၣ်ဒါတပျဲၦၤဟးထီၣ်က့ၤလီၤလၢသရိာ်၀ါ–ဃိၣ်သၢဖျၢၣ်ကျဲအံၤလၢၤဘၣ် အဂ့ၢ်န့ၣ် သ့ၣ်ညါဘၣ်လၢသ၀ီၦၤဘၣ်မူဘၣ်ဒါအအိၣ်န့ၣ်လီၤႉ

လၢခ့ၣ်အဲၣ်ယူၣ်–ကညီဒီကလုာ်စၢဖှိၣ်ကရၢ ၀ီၢ်ရ့ၣ်ကီၢ်ဆၣ်အပူၤ မုၢ်ထီၣ်ကီၢ်ခီဒိၣ်သုး၀ဲၤလီၢ်ခိၣ်သ့ၣ်(ရတခ) စုတီၤဖီလာ်ဒုးယၤသုးကလၢၤအိၣ်ဆီလီၤသးဖဲနိၣ်ခၠိနဲၣ်သ၀ီခၢၣ်သးအံၤန့ၣ် တပျဲလီၢ်က၀ီၤကမျၢၢ်ဟးထီၣ်က့ၤလီၤလၢ ကျဲ၀ဲအံၤအဖီခိၣ်လၢၤဘၣ်အမဲာ်ညါ တပျဲစ့ၢ်ကီးကမျၢၢ်လၢကလဲၤခီလိာ်သးသ၀ီတဖျၢၣ်ဒီးတဖျၢၣ်ဘၣ်အဂ့ၢ်န့ၣ် သ၀ီဖိတဖၣ်စံး၀ဲန့ၣ်လီၤႉ

လီၢ်က၀ီၤသ၀ီဖိတဂၤစံး၀ဲ“စးထီၣ်တနံၤညါအံၤန့ၣ်(နိၣ်ခၠိနဲၣ်)ဒုးယၤခိၣ်ဒုးသ့ၣ်ညါသ၀ီၦၤဘၣ်မူဘၣ်ဒါလၢတၢ်တဘၣ်ဟးထီၣ်က့ၤလီၤလၢသရိာ်၀ါ–ဃိၣ်သၢဖျၢၣ်ကျဲအံၤလၢၤဘၣ်မီၤနီၤႉ သ၀ီဖိနါက့တဘၣ်လဲၤခီဂာ်လိာ်သး သ၀ီတဖျၢၣ်ဒီးတဖျၢၣ်စ့ၢ်ကီးဘၣ်ႉအ၀ဲသ့ၣ်တဲ၀ဲလၢမ့ထံၣ်ၦၤဟးထီၣ်က့ၤလီၤလၢကျဲမုၢ်ခိၣ်န့ၣ်အ၀ဲသ့ၣ်တဟံမူဒါဘၣ်ႉၦၤပျံၤတၢ်ခဲလၢာ်လီၤမီၤနီၤႉလၢကအီၣ်ကအီအဂီၢ်တၢ်ကီတၢ်ခဲအိၣ်ထီၣ်လၢကလဲၤၦ့ၤလဲၤဆါတၢ်သူတၢ်သၣ်တၢ်ဒိးတၢ်လၣ်ဒ်န့ၣ်အိၣ်လီၤ”အဂ့ၢ်န့ၣ်စံး၀ဲန့ၣ်လီၤႉ

ဖဲအပူၤကွံာ်လါယနူၤအါရံၤ ၈ သီအနံၤန့ၣ် သုးမီၤစိရိၤကဘီယူၤတဘ့ၣ်ဟဲစီၢ်လီၤလၢ(စ့ၤပၠ့)ဖျၢၣ်ထူပျီ ဟဲဆှၢန့ၢ်၀ဲ(လ့နိး)ပယီၤသုးကလၢၤဒီးနိၣ်ခၠိနဲၣ်ဒုးယၤသုးကလၢၤတဖၣ်အံၤလၢတၢ်အီၣ်တၢ်အီႇကျိချံၦာ်သၣ်၀ံၤအလီၢ်ခံ ဖဲလါယနူၤအါရံၤ ၁၄ သီအနံၤန့ၣ် တၢ်ပၢၢ်ဆၢသုးပာ်ဖှိၣ်ကရူၢ်အိၣ်ခိးဖီၣ်သမံသမိးတၢ်လၢတၢ်ဘၢၣ်စၢၤအဃိ ပယီၤသုးကးတံၢ်ကွံာ်ကျဲတၢ်ဟးထီၣ်က့ၤလီၤဒ်အံၤလီၤအဂ့ၢ်န့ၣ် သ၀ီဖိတဖၣ်ပဲာ်ထံနီၤဖး စံး၀ဲန့ၣ်လီၤႉ

တၢ်အီၣ်တၢ်အီဒီးကျိချံၦာ်သၣ်လၢ(လ့နိး)ပယီၤသုးကလၢၤဒိးန့ၢ်ဘၣ်၀ဲသ့ၣ်တဖၣ်အံၤ ဖဲလါယနူၤအါရံၤ ၁၄ သီအနံၤန့ၣ် ပယီၤသုးကိးမၢဆူၣ်၀ဲလီၢ်က၀ီၤကမျၢၢ်တဖၣ်လၢကလဲၤဆှၢန့ၢ်တၢ်သ့ၣ်တဖၣ်အံၤဆူ(နိၣ်ခၠိနဲၣ်) သုးကလၢၤန့ၣ်လီၤလၢန့ၣ်အမဲာ်ညါ(လ့နိး)တၢ်ဒုးအဃိအ၀ဲသ့ၣ်သုးကလၢၤတၢ်သူၣ်ထီၣ်လၢမ့ၣ်အူအီၣ်ကွံာ်၀ဲသ့ၣ်တဖၣ်အံၤစ့ၢ်ကီးအ၀ဲသ့ၣ်မၢသ၀ီဖိလဲၤဆှၢန့ၢ်သ့ၣ်၀ၣ်ႇဂၢၤတၢၣ်တဖၣ်ဆူအ၀ဲသ့ၣ်သုးကလၢၤအိၣ်အဂ့ၢ်န့ၣ် လီၢ်က၀ီၤသ၀ီဖိတဖၣ်စံး၀ဲန့ၣ်လီၤႉ

ခီဖျိတၢ်ဟံကွံာ်ပယီၤသုးတဖၣ်အံၤအတၢ်အီၣ်တၢ်အီတဖၣ်အဃိ ဖဲအပူၤကွံာ်လါယနူၤအါရံၤ ၁၄ သီ ဂီၤခီအဆၢကတီၢ်န့ၣ် ပယီၤသုးတဖၣ်အံၤဖီၣ်သမံသမိးမၤဒၢၣ်၀ဲလ့နိးသ၀ီႇသၤပယၤႇစ့ၤပၠ့ဒီးသ၀ီလၢအဂၤ သ၀ီဖိအဂၤ(၁၀)ဘျဲၣ်ညါအဃိကမျၢၢ်တဖၣ်ဘၣ်ဒိ၀ဲနးနးကလဲာ်အဂ့ၢ်န့ၣ် ကမျၢၢ်လၢပယီၤသုးဖီၣ်မၤဒၢၣ်အီၤတဖၣ် စံး၀ဲအသိးသ့ၣ်ညါဘၣ်န့ၣ်လီၤႉ

ဒ်န့ၣ်အသိးဖဲအပူၤကွံာ်စှၤသီအခါစ့ၢ်ကီး ခ့ၣ်အဲၣ်ယူၣ် ဒူပျာ်ယာ်ကီၢ်ရ့ၣ် ထုးထီၣ်တၢ်ကလုၢ်လၢ စးထီၣ်လါယနူၤအါရံၤ ၁၆ သီတုၤလၢ ၂၃ သီအနံၤန့ၣ် လီၢ်က၀ီၤကမျၢၢ်တဘၣ်ဟးထီၣ်က့ၤလီၤလၢ ကၠၤအ့စ့ၣ်ကၠံ–ဃိၣ်သၢဖျၢၣ်ကျဲအံၤဘၣ်န့ၣ်လီၤႉ