လါယနူၤအါရံၤ ၂၆ သီႇ ၂၀၂၃ နံၣ်ႇ ခ့ၣ်အဲးစံၣ်
လါလၢကဟဲလါဖ့ၤဘြူၤအါရံၤ ၁၁ သီအနံၤ လၢအလီၤဘၣ်၀ဲ(၇၅)၀ီတ၀ီ ကညီဒီကလုာ်မုၢ်နံၤအဂီၢ် ကွဲမုာ်၀ဲကညီစၢၤသွဲၣ်သီသးစၢ်အိၣ်ကီၢ်ပူၤကီၢ်ချၢတဖၣ်အံၤကဆှၢထီၣ်အတၢ်ကွဲးအဂ့ၢ်န့ၣ် ကညီဒီကလုာ်စၢၤသွဲၣ်ကရူၢ် စံးဘၣ်ခ့ၣ်အဲးစံၣ်-ကညီတၢ်ကစီၣ်န့ၣ်လီၤႉ
လၢတၢ်ကွဲးဘျီ၀ဲအံၤကဘၣ်မ့ၢ်၀ဲထါႇတၢ်ကစီၣ်ထီရီၤႇတၢ်ကွဲးဖုၣ်သ့ၣ်တဖၣ်ဒီး တၢ်ကွဲးသ့ၣ်တဖၣ်အံၤ တၢ်ကွဲးအီၤသ့၀ဲလၢကျိာ်လွံၢ်မံၤလၢအမ့ၢ်ၦိၢ်ကျိာ်ႇစှီၤကျိာ်ႇကီၤလၤ၀ါကျိာ်ဒီး ကညီသးစၢ်လၢသးနံၣ်အိၣ်(၃၅)နံၣ် ဆူဖီလာ်တဖၣ်နုာ်လီၤတပြၢ၀ဲသ့အဂ့ၢ်န့ၣ်သ့ၣ်ညါဘၣ်န့ၣ်လီၤႉ
လၢတၢ်ကွဲမုာ်ဘျီ၀ဲအံၤန့ၣ်ကညီဒီကလုာ်စၢၤသွဲၣ်ကရူၢ်တီခိၣ်ရိၣ်မဲမၤ၀ဲဒီး အတၢ်ပညိၣ်န့ၣ်မ့ၢ်ဒ်သိး ကညီစၢၤသွဲၣ်သီတဖၣ်ကသ့ၣ်ညါနၢ်ပၢၢ်အါထီၣ်ကညီဒီကလုာ်အတၢ်စံၣ်စိၤတဲစိၤႇတၢ်ဆဲးတၢ်လၤႇလုၢ်လၢ်ထူသနူဒီးကပၣ်ဃုာ်ပၣ်ဂီၢ်အါထီၣ်လၢကညီဒီကလုုာ်တၢ်ဟူးတၢ်ဂဲၤပူၤအဂီၢ်အဂ့ၢ်န့ၣ် ၦၤကွဲမုာ်တၢ်မူဒါခိၣ် စီၤကၠီၤစွၤ စံး၀ဲန့ၣ်လီၤႉ
လၢကညီဒီကလုာ်မုၢ်နံၤအတၢ်ပနီၣ်အဂီၢ်ကညီဒီကလုာ်စၢၤသွဲၣ်ကရူၢ်လၢအကွဲမုာ်၀ဲလၢကဆှၢထီၣ်တၢ်ကွဲးအံၤ ဒ်ယမ့ၢ်သးစၢ်တဂၤအသိးသးခုဒိၣ်မးအဂ့ၢ်န့ၣ် ကညီသးစၢ်ကရၢ(KYO)လီၢ်ခၢၣ်သး ကမံးတံာ်ကရူၢ် စီၤစိပဲၤ စံး၀ဲဒ်အံၤန့ၣ်လီၤႉ
“ကညီခိၣ်နၢ်လၢအသ့ဆိမိၣ်တၢ်လၢသးစၢ်တဖၣ်အဂီၢ်ဒ်အံၤပစံးဘျုးဘၣ်အ၀ဲသ့ၣ်ဒိၣ်မးလီၤႉယအဲၣ်ဒိးဃ့ကညးသးစၢ်လၢအိၣ်ကီၢ်ပူၤကီၢ်ချၢႇအိၣ်လၢတၢ်လီၢ်တပူၤဂ့ၤတပူၤဂံမန့ၣ်ကဆှၢထီၣ်အ၀ဲသ့ၣ်တၢ်ကွဲးလၢဒီကလုာ်မုၢ်နံၤအဂီၢ်ဒီးကနုာ်လီၤပၣ်ဃုာ်မၤသကိးတၢ်လၢဒီကလုာ်တၢ်ဖံးတၢ်မၤဒ်တၢ်သ့အိၣ်ဒီးၦၤအသိးမီၤနီၤ” စီၤစိပဲၤ စံး၀ဲလီၤႉ
တၢ်ကွဲးအံၤန့ၣ်လီၢ်ခံကတၢၢ်တၢ်ကဘၣ်ဆှၢထီၣ်အီၤဖဲလါဖ့ၤဘြူၤအါရံၤ ၃ သီအနံၤဒီး လံာ်တၢ်ကွဲးလၢတၢ်ဆှၢထီၣ်အီၤသ့ၣ်တဖၣ်အံၤကညီစၢၤသွဲၣ်ကရူၢ်ကဃုထၢဟ့ၣ်လီၤ၀ဲခိၣ်ဖးအဂ့ၢ်န့ၣ် သ့ၣ်ညါဘၣ်လီၤႉ
ဖဲအပူၤကွံာ်(၁၉၄၈)နံၣ် လါဖ့ၤဘြူၤအါရံၤ ၁၁ သီအနံၤန့ၣ် ကီၢ်ပယီၤဒီတဘ့ၣ်အပူၤ အဆိကတၢၢ်တဘျီ ကညီဖိ(၄)ကလီၢ်ဘျဲၣ် ပာ်ဖျါထီၣ်အတၢ်ဘၣ်သးဃ့ထီၣ်၀ဲတၢ်ဂ့ၢ်(၄)ထံၣ်လၢအမ့ၢ် (၁)ဟ့ၣ်ကညီကီၢ်တဘျီဃီႇ (၂)ပယီၤတဘးကညီတဘးဒုးနဲၣ်ခဲအံၤႇ(၃)ပတသးလီကလုာ်တၢ်သဘံၣ်သဘုၣ်ဘၣ်ႇ (၄)ပတလိၣ်ဘၣ်ထံလီၢ်ကီၢ်ပူၤတၢ်ဒုးတၢ်ယၤဘၣ်န့ၣ်လီၤႉဒီးမုၢ်နံၤလၢကညီကလုာ်ပာ်ဖျါထီၣ်တၢ်ဘၣ်သးအံၤန့ၣ်တၢ်ပာ်ပနီၣ်၀ဲလၢအမ့ၢ်ကညီဒီကလုာ်မုၢ်နံၤန့ၣ်လီၤႉ
