တၢ်ဟ့ၣ်လီၤထီထီၣ်န့ၢ် ကညီဒီကလု၁်ပၢၤကီၢ်သုး(၈)ဂၤလၢလီၢ်လၤမူဒါ

လါစဲးပထ့ဘၢၣ် ၈ သီႇ ၂၀၂၃ နံၣ်ႇ ခ့ၣ်အဲးစံၣ်

ဖဲမဟါလါစဲးပထ့ဘၢၣ် ၇ သီအနံၤ လၢခ့ၣ်အဲၣ်ယူၣ်(သုးက့ ၇)ဟီၣ်က၀ီၤ ဖၣ်အၣ်ကီၢ်ရ့ၣ်အပူၤ တၢ်မၤ၀ဲတၢ်ဟ့ၣ်လီၤ ထီထီၣ်န့ၢ်ကညီဒီကလုာ်ပၢၤကီၢ်သုး(KNPF)လီၢ်ခၢၣ်သးဒီး ဖၣ်အၣ်ကီၢ်ရ့ၣ် ကီၢ်ဆၣ်ကိးဘ့ၣ်ဒဲး ကညီဒီကလုာ် ပၢၤကီၢ်သုး(၈)ဂၤလၢလီၢ်လၤမူဒါတၢ်ရဲၣ်တၢ်ကျဲၤမူးတခါန့ၣ်လီၤႉ

(KNPF)လီၢခၢၣ်သး ပၢၤကီၢ်လၢအမၤတ့ၢ်တၢ်မၤယံၤ(၃)ဂၤအံၤဃုာ်ဒီး ဖၣ်အၣ်ကီၢ်ရ့ၣ် ကီၢ်ဆၣ်ကိးဘ့ၣ်ဒဲး ပၢၤကီၢ်သုး(၅)ဂၤလၢအဖျိထီၣ်ပၢၤကီၢ်တၢ်သိၣ်လိအံၤ ပာ်ဖှိၣ်ခဲလၢာ်(၈)ဂၤ တၢ်ဟ့ၣ်လီၤထီထီၣ်န့ၢ်၀ဲလၢ ကီၢ်ဆၣ်ပၢၤကီၢ်ခိၣ် ပၢၤကီၢ်ခိၣ်–၂ လီၢ်လၤ အဂ့ၢ်န့ၣ် ဖၣ်အၣ်ကီၢ်ရ့ၣ် ပၢၤကီၢ်ခိၣ် သုးခိၣ်ဒိၣ်စိ–၂ စီၤမီၤကၠံၤ စံး၀ဲန့ၣ်လီၤႉ

အ၀ဲစံး၀ဲလၢ“ပထီထီၣ်န့ၢ်အ၀ဲသ့ၣ်ဆၣ်လီၢ်လၤဒ်အံၤတမ့ၢ်ပထီထီၣ်အီၤယိယိဒ်န့ၣ်ဘၣ်ႉပကွၢ်အကပၤကပၤ၀ံၤမးပထီထီၣ်န့ၢ်အ၀ဲသ့ၣ်မီၤနီၤႉၦၤလၢအမၤန့ၢ်လီၢ်လၤတဖၣ်အံၤတမ့ၢ်အဒိးန့ၢ်၀ဲညီညီဘၣ်ႉပကွၢ်အ၀ဲသ့ၣ်တၢ်အိၣ်တၢ်ဆိးႇလုၢ်လၢ်တၢ်သကဲးပ၀းတဖၣ်မီၤနီၤႉဘၣ်မနုၤအဃိလဲၣ်န့ၣ်ၦၤတဂၤလၢကကဲပၢၤကီၢ်ကပၢတၢ်ပြးတၢ်န့ၣ်အသကဲးပ၀းကဘၣ်ဂ့ၤမီၤနီၤႉကဘၣ်ဟးဆှဲး၀ဲတၢ်မူၤတၢ်ဘှီးတၢ်တၤကျိၣ်တၤစ့မီၤနီၤႉဘၣ်မနုၤလဲၣ်န့ၣ်ပၢၤကီၢ်န့ၣ်မ့ၢ်ၦၤတဖုလၢအရ့ဒိၣ်ဒ်သိးထံဖိကီၢ်ဖိကနာ်န့ၢ်အီၤႇဒ်န့ၣ်အသိးပၢၤကီၢ်စ့ၢ်ကီးကဘၣ်ပာ်လုၢ်ပာ်ၦ့ၤကမျၢၢ်မီၤနီၤႉဒ်န့ၣ်မးကမျၢၢ်ကနာ်န့ၢ်ၦၤလီၤ”အဂ့ၢ်န့ၣ် စံးဘၣ် ခ့ၣ်အဲးစံၣ်–ကညီတၢ်ကစီၣ်န့ၣ်လီၤႉ

တၢ်မၤတၢ်ဟ့ၣ်လီၤထီထီၣ်န့ၢ်ပၢၤကီၢ်သုးလီၢ်လၤတၢ်ရဲၣ်တၢ်ကျဲၤဘျီ၀ဲအံၤအပူၤန့ၣ် (KNPF)လီၢ်ခၢၣ်သး ပၢၤကီၢ်သုးကရူၢ် ပၢၤကီၢ်ခိၣ်ကျၢၢ် သုးခိၣ်ဒိၣ်စိ စီၤကၠံနိၤႇ ဖၣ်အၣ်ကီၢ်ရ့ၣ် ပၢၤကီၢ်ခိၣ်ကျၢၢ် သုးခိၣ်ဒိၣ်စိ–၂ စီၤမီၤကၠံၤႇ ဖၣ်အၣ်ကီၢ်ရ့ၣ် စံၣ်ညီၣ်ကွီၢ် ပဒိၣ်မါပၤသံၤႇ (သုးက့ ၇)သုးၦၤဘၣ်မူဘၣ်ဒါဒီးဟီၣ်က၀ီၤခ့ၣ်အဲၣ်ယူၣ်ၦၤဘၣ်မူဘၣ်ဒါႇ ကညီဒီကလုာ် ပၢၤကီၢ်သုးကရူၢ် ပၢၤကီၢ်သုးဖိတဖၣ်ဒီးကမျၢၢ်ခဲလၢာ်ဟဲထီၣ်၀ဲအဂၤ(၄၀)ဘျဲၣ်န့ၣ်လီၤႉ

တၢ်ကြဲၢ်ကီၢ်ဆၣ် ပၢၤကီၢ်ခိၣ် စီၤထူကိၣ်လိၣ်လၢတၢ်ဟ့ၣ်လီၤထီထီၣ်န့ၢ်အလီၢ်လၤအံၤ စံး၀ဲလၢ “တနံၤအံၤၦၤဟ့ၣ်လီၤၦၤ လီၢ်လၤအံၤအဖီခိၣ်ပမူဒါအိၣ်ထီၣ်မီၤနီၤႉအဃိတၢ်လၢပကဘၣ်မၤအီၤစ့ၢ်ကီးဟဲအါထီၣ်ႉၦၤအိၣ်လၢကီၢ်ဆၣ်ပူၤႇကီၢ်ရ့ၣ်ပူၤတဖၣ်ဒ်သိးအ၀ဲသ့ၣ်ကလူၤပိာ်မၤထွဲကီၢ်သူလ့ၤတၢ်သိၣ်တၢ်သီတၢ်ဘျၢအဂီၢ်န့ၣ်ပကဘၣ်မၤဒ်သိးတၢ်သိၣ်တၢ်သီတၢ်ဘျၢ ကဒိၣ်စိအဂီၢ်မီၤနီၤႉ”အဂ့ၢ်န့ၣ် စံးဘၣ်ခ့ၣ်အဲးစံၣ်–ကညီတၢ်ကစီၣ်န့ၣ်လီၤႉ

ဒ်ကီၢ်သူလ့ၤတၢ်သိၣ်တၢ်သီလၢခ့ၣ်အဲၣ်ယူၣ်ပာ်လီၤဃာ်၀ဲလၢ(ခ့ၣ်အဲၣ်ယူၣ်)တၢ်ပၢဟီၣ်က၀ီၤ ကီၢ်ရ့ၣ်(၇)ဘ့ၣ် လၢာ် အပူၤအံၤ ဒ်သိးၦၤသုတမၤကမၣ်ကီၢ်သူလ့ၤကွီၢ်ထံသဲစးတၢ်မၤအကျဲတဂ့ၤအဂီၢ် (KNPF)အံၤကဘၣ်မၤလိၣ်ထီၣ်ဖးထီၣ် တၢ်သိၣ်တၢ်သီတၢ်ဒိၣ်စိလၢဟီၣ်က၀ီၤပူၤအံၤန့ၣ်လီၤႉ

ကညီဒီကလုာ်ပၢၤကီၢ်သုးကရူၢ်အံၤ ဘၣ်တၢ်ဒုးအိၣ်ထီၣ်အီၤဖဲ(၁၉၉၁)နံၣ် လၢခ့ၣ်အဲၣ်ယူၣ် ၁၀ ၀ီတ၀ီ ခီကရဲးအပူၤဒီး ဘၣ်ဆၣ်ခီဖျိတၢ်တပာ်ဂၢၢ်ပာ်ကျၢၤဘၣ်အီၤလီၤတံၢ်လီၤဆဲးဒံးဘၣ်အဃိ ဖဲ(၂၀၁၇)နံၣ် ခ့ၣ်အဲၣ်ယူၣ် ၁၆ ၀ီတ၀ီ ခီကရဲးအခါန့ၣ် တၢ်ပာ်ဂၢၢ်ပာ်ကျၢၤကဒါက့ၤ၀ဲန့ၣ်လီၤႉ ဖၣ်အၣ်ကီၢ်ရ့ၣ်ပူၤ တၢ်ဟ့ၣ်လီၤထီထီၣ်လီၢ်လၤ တၢ်ရဲၣ်တၢ်ကျဲၤ ဒ်အံၤ မ့ၢ်အဆိကတၢၢ်တဘျီလီၤအဂ့ၢ်န့ၣ် သ့ၣ်ညါဘၣ်န့ၣ်လီၤႉ