လါယနူၤအါရံၤ ၃ သီႇ ၂၀၂၃ နံၣ်ႇ ခ့ၣ်အဲးစံၣ်
သုးမီၤစိရိၤအကီၢ်ဆၣ်ႇက၀ီၤဒ့ဒူသ၀ီသးၦၢ်ဒီး၀ဲၤကျိၤၦၤမၤတၢ်ဖိတဖၣ်လၢအိၣ်ခ့ၣ်အဲၣ်ယူၣ်–ကညီဒီကလုာ်စၢဖှိၣ်ကရၢ မုၢ်တြီၢ်ကီၢ်ရ့ၣ်(သုးက့ ၅)ဟီၣ်က၀ီၤအပူၤတဖၣ်အံၤ ကဟးထီၣ်ကွံာ်လၢလီၢ်လၤဒီးမူဒါတဖၣ်အပူၤခဲလၢာ်အဂ့ၢ်န့ၣ် ကညီဒီကလုာ်တၢ်ထူၣ်ဖျဲးသုးမုၢ်ဒိၣ်-KNLA(သုးက့ ၅)၀ဲၤလီၢ်ခိၣ်သ့ၣ် ထုးထီၣ်လံာ်တၢ်နဲၣ်လီၤဖဲလါယနူၤအါရံၤ ၁ သီအနံၤန့ၣ်လီၤႉ
လီၢ်က၀ီၤကမျၢၢ်ဒီးၦၤမၤတၢ်ဖိလၢအိၣ်ဖၣ်ပူၣ်ႇကမၤမိၢ်၀့ၢ်ဒီးက၀ီၤဒ့ႇဒူသ၀ီအပူၤတဖၣ်ဒီးသုးမီၤစိရိၤစုတီၤဖီလာ်ၦၤမၤတၢ်ဖိလၢအဟဲလီၤမူဒါတဖၣ်ခဲလၢာ်တဘၣ်ပာ်ဖှိၣ်မၤသကိးတၢ်လၢသုးမီၤစိရိၤအတၢ်ပၢတၢ်ပြးပူၤဘၣ်ဒီး စးထီၣ်လါယနူၤအါရံၤ ၁ သီ တုၤလၢ ၁၀ သီ လၢအသီတဆံအတီၢ်ပူၤကဟးထီၣ်ကွံာ်လၢဟီၣ်က၀ီၤပူၤ အဂ့ၢ်န့ၣ် ခ့ၣ်အဲၣ်ယူၣ်(သုးက့ ၅)ဟ့ၣ်ပလီၢ်၀ဲန့ၣ်လီၤႉ
လံာ်တၢ်ထုးထီၣ်ပာ်ဖျါ၀ဲအံၤန့ၣ်မ့ၢ်တၢ်ထုးထီၣ်၀ဲလၢၦၤမၤတၢ်ဖိလၢအိၣ်မုၢ်တြီၢ်ကီၢ်ရ့ၣ်ဒီတဘ့ၣ်အပူၤလၢအကဲထီၣ်တၢ်တိစၢၤမၤစၢၤလၢသုးမီၤစိရိၤအတၢ်ပၢတၢ်ပြးတဖၣ်အဂီၢ်လီၤအဂ့ၢ်န့ၣ် ခ့ၣ်အဲၣ်ယူၣ်(သုးက့ ၅) ၦၤကတိၤတၢ်ပၢ ပဒိၣ်မါမါ စံး၀ဲဒ်အံၤန့ၣ်လီၤႉ
“အနီၢ်နီၢ်န့ၣ်အ၀ဲသ့ၣ်တအိၣ်အါအါလၢၤဘၣ်ႉတအိၣ်ဘၣ်ဆၣ်သနါက့ၦၤမၤတၢ်ဖိလၢအကဲထီၣ်တၢ်တိစၢၤမၤစၢၤလၢ(နစက)အဂီၢ်တဖၣ်န့ၣ်ဟဲနုာ်လီၤလၢဖၣ်ပူၣ်၀့ၢ်ပူၤအိၣ်တနီၤမီၤနီၤႉဒ်န့ၣ်အသိးလၢကမၤမိၢ်ႇဒူသ၀ီဟီၣ်က၀ီၤလၢအဂၤတဖၣ်အပူၤနါက့အိၣ်ဒံးမီၤနီၤ” အဂ့ၢ်န့ၣ် ပဒိၣ်မါမါစံးဘၣ်ခ့ၣ်အဲးစံၣ်–ကညီတၢ်ကကစီၣ်န့ၣ်လီၤႉ
ဒ်သိးသုးမီၤစိရိၤအသနူကလီၤၦီၢ်ကွံာ်ချ့ချ့အဂီၢ်န့ၣ်ခ့ၣ်အဲၣ်ယူၣ်(သုးက့ ၅)အံၤဖီၣ်လိာ်စုပာ်ဖှိၣ်မၤသကိးတၢ်ဒီး တၢ်ဒီသဒၢကမျၢၢ်သုးႇကလုာ်ဒူၣ်ကမျၢၢ်ထံဖိကီၢ်ဖိတဖၣ်အိၣ်၀ဲဒီးႇဒ်သိးသုးမီၤစိရိၤအသုးကလၢၤလၢအိၣ်ဟီၣ်က၀ီၤပူၤသ့ၣ်တဖၣ်အံၤကထုးကွံာ်သးအဂီၢ်န့ၣ်ပကဟ့ၣ်အ၀ဲသ့ၣ်တၢ်ဆီၣ်သနံးတကးဒံးဘၣ်အမဲာ်ညါအ၀ဲသ့ၣ်တၢ်ပၢတၢ်ပၢတၢ်ပြးခဲလၢာ်ကဟးထီၣ်ကွံာ်အဂီၢ်စ့ၢ်ကီးန့ၣ်ပကဟ့ၣ်တၢ်ဆီၣ်သနံးလၢကျဲအဘိဘိအဂ့ၢ်န့ၣ် လံာ်တၢ်ပာ်ဖျါအပူၤ ပာ်ဖျါ၀ဲန့ၣ်လီၤႉ
“တုၤလၢခဲအံၤ၀့ၢ်ပူၤန့ၣ်ပဒိၣ်အ၀ဲၤဒၢးလဲၤတရံးသးအိၣ်ဒံးမီၤနီၤႉမ့၀ံၤပဒိၣ်အကၠိတဖၣ်နါက့အိးထီၣ်သးအိၣ်ဒံးႉတၢ်ဒုးကဲထီၣ်မ့တအိၣ်ဘၣ်မးအပံးလီၤမီၤနီၤႉလီၤဆီဒၣ်တၢ်လၢ၀့ၢ်ပူၤမီၤနီၤႉမ့မ့ၢ်လၢသ၀ီပူၤဒုတမ့ၢ်ထဲန့ၣ်ဘၣ်ႉဘၣ်ဃးဒီးလၢပၢပြးသးၦၢ်နါက့လၢပဒိၣ်တကပၤမ့ၢ်ဂ့ၤႇလၢခ့ၣ်အဲၣ်ယူၣ်တကပၤမ့ၢ်ဂ့ၤန့ၣ် တနီၤန့ၣ်ဘၣ်ဖီၣ်တွဲဃုာ်၀ဲတဂၤဃီဒ်န့ၣ် အိၣ်မီၤနီၤ” အဂ့ၢ်န့ၣ်စ့းဘၣ်ခ့ၣ်အဲးစံၣ်–ကညီတၢ်ကစီၣ်န့ၣ်လီၤႉ
လၢန့ၣ်အမဲာ်ညါတၢ်ဃုထၢလၢသုးမီၤစိရိၤကမၤ၀ဲဖဲ(၂၀၂၃)အတီၢ်ပူၤအံၤစ့ၢ်ကီး ၦၤတဂၤလၢ်လၢ်လၢအိၣ် KNLA (သုးက့ ၅)ဟီၣ်က၀ီၤပူၤအံၤတဖၣ် တဘၣ်ပာ်ဖှိၣ်မၤဘၣ်ဃးသးဒီးပယီၤသုးမီၤစိရိၤကရူၢ်ဘၣ်အဂ့ၢ်န့ၣ် ခ့ၣ်အဲဟ့ၣ်ပလီၢ်၀ဲန့်ၣလီၤႉ
လံာ်တၢ်ကလုၢ်ဟ့ၣ်ပလီၢ်လၢတၢ်ထုးထီၣ်၀ဲလၢလီၢ်ခံကတၢၢ်အံၤၦၤလၢအမ့တလူၤပိာ်မၤထွဲ၀ဲဘၣ်န့ၣ် ကဟံးန့ၢ်၀ဲအရ့တုၤလီၤတီၤလီၤဒီးလံာ်တၢ်ဟ့ၣ်ပလီၢ်၀ဲအံၤမ့ၢ်စ့ၢ်ကီးအလီၢ်ခံကတၢၢ်လီၤအဂ့ၢ်န့ၣ် (သုးက့ ၅)ဟ့ၣ်ပလီၢ်စံး၀ဲန့ၣ်လီၤႉ
ဒ်န့ၣ်အသိးဖဲအပူၤကွံာ်(၂၀၂၂)လါယနူၤအါရံၤ ၂၉ သီအခါစ့ၢ်ကီး (KNLA)ထုးထီၣ်လံာ်ဟ့ၣ်ပလီၢ် သုးမီၤစိရိၤစုတီၤဖီလာ်၀ဲၤကျိၤဘၣ်ထွဲၦၤမၤတၢ်ဖိလၢအိၣ်မုၢ်တြီၢ်ကီၢ်ရ့ၣ် ဖၣ်ပူၣ်၀့ၢ်ပူၤတဖၣ်အံၤလၢ ကဟးထီၣ်ကွံာ်ခဲလၢာ်၀ံၤအလီၢ်ခံ သုးမီၤစိရိၤအၦၤမၤတၢ်ဖိဟးထီၣ်ကွံာ်အိၣ် အဂၤ(၁၀၀)ဘျဲၣ်အဂ့ၢ်န့ၣ် ဟီၣ်က၀ီၤ(KNLA)ၦၤဘၣ်မူဘၣ်ဒါတဖၣ်စံး၀ဲန့ၣ်လီၤႉ
ဒ်န့ၣ်အသိးသုးမီၤစိရိၤစုတီၤဖီလာ်၀ဲၤကျိၤၦၤမၤတၢ်ဖိလၢအိၣ်ခ့ၣ်အဲၣ်ယူၣ်တၢ်ပၢဟီၣ်က၀ီၤ ဒူသထူၣ်ကီၢ်ရ့ၣ်(သုးက့ ၁)ဖၣ်အၣ်ကီၢ်ဆၣ်ပူၤတဖၣ်ကဟးထီၣ်ကွံာ်လၢဟီၣ်က၀ီၤအပူၤဒီး သုးခိးကီၢ်ဆၢ(BGF)သုးအဟံၣ်ဖိဃီဖိလၢအိၣ် သုးကလၢၤကရၢၢ်ပူၤတဖၣ်ကဟးထီၣ်ကွံာ်လၢသုးကရၢၢ်ပူၤအဂ့ၢ်န့ၣ်ခ့ၣ်အဲၣ်ယူၣ်(သုးက့ ၁)ထုးထီၣ်လံာ်ဟ့ၣ်ပလီၢ်၀ဲစ့ၢ်ကီးန့ၣ်လီၤႉ
