လါအီးကထိဘၢၣ် ၃၀သီ, ၂၀၂၅နံၣ်, ခ့ၣ်အဲးစံၣ်.
KK park တၢ်လံၣ်အီၣ်လီအီၣ်ကျိၣ်စ့လၢအီၣ်လဲ အကရၢၢ်ပူၤ အပူၤကွံၥ်ပှၤမၤတၢ်ဖိလၢအဃ့ၢ်ဖျိးထီၣ်သ့ၣ်တဖၣ်န့ၣ် တကီၢ်ခါခဲအံၤတၢ်ပၥ်အဝဲသ့ၣ်လၢရၤမတံဝ့ၢ်ဟီၣ်ကဝီၤတၢ်လီၢ်သၢတီၤအဂ့ၢ် သ့ၣ်ညါဘၣ်လၢရမၤတံဝ့ၢ်ပှၤလီၢ်ကဝီၤဖိအအိၣ်န့ၣ်လီၤ.
ဖဲအပူၤကွံၥ်လါအီးကထိဘၢၣ်(၁၉)သီအနံၤအဆၢကတီၢ်န့ၣ် ပယီၤသုးနုၥ်လီၤဝဲဒၣ်လၢKK Parkကရၢၢ်ပူၤဝံၤအလီၢ်ခံ ကၠါဖၠၣ်ပှၤမၤတၢ်ဖိလၢအကထိဃ့ၢ်ထီၣ်ဝဲဒၣ်လၢတၢ်ချၢဒီးတနီၤန့ၣ် ဃ့ၢ်လီၤဝဲဒၣ်ဆူရမၤတံဒီးတနီၤန့ၣ် ခီဃီၤဝဲဆူသူမွဲကျိဝၢ်ဒီးဃ့ၢ်နုၥ်ဝဲဒၣ်ဆူကီၢ်ကၠီၣ်တဲၣ်ပူၤပှၤကညီလၢအကထိအိၣ်ဝဲဒၣ်အဂ့ၢ် ကီၢ်ကၠီၣ်တဲၣ်တၢ်ကစီၣ်သန့တနီၤပၥ်ဖျါဝဲဒၣ်စ့ၢ်ကီးန့ၣ်လီၤ.
တကီၢ်ခါခဲအံၤန့ၣ် ကၠါဖၠၣ်ပှၤမၤတၢ်ဖိလၢအဃ့ၢ်ထီၣ်သ့ၣ်တဖၣ်န့ၣ် တၢ်ပၥ်အဝဲလၢရၤမတံဝ့ၢ် တၢ်လီၢ်သၢတီၤဒီးBGFအိၣ်ခိးန့ၣ်ဝဲဒၣ်တၢ်ဘံၣ်တၢ်ဘၢအဂ့ၢ် ရမၤတံဝ့ၢ်လီၢ်ကဝီၤဖိတဂၤ စံးဘၣ်ဝဲဒၣ် ခ့ၣ်အဲးစံၣ်-ကညီတၢ်ကစီၣ်ဒ်အံၤန့ၣ်လီၤ.
အဝဲစံးဝဲဒၣ်လၢ“ပှၤလၢဃ့ၢ်ထီၣ်လၢ KK Park ပူၤသ့ၣ်တဖၣ်န့ၣ် အခဲအံၤတၢ်ပၥ်အဝဲသ့ၣ်ဖဲ ရမတံဝ့ၢ်တၢ်ကူၣ်လဲၤမၤကၤလီၢ်(Trade Zone)တတီၤ ပှၤကညီနီၣ်ဂံၢ်ကအိၣ်(၂၀၀၀)ဃၣ်ဃၣ်, ဖဲရမၤတံ ဖျၢၣ်ထူပျီတၢ်လီၢ်တတီၤ ပှၤကညီနီၣ်ဂံၢ် ကအိၣ်(၁၀၀၀)ဃၣ်ဃၣ်ဒီးအဂၤတတီၤဖဲ အီၤစဘိၣ်ဟီးတဲး တတီၤန့ၣ်လီၤ.တၢ်လီၢ်သ့ၣ်တဖၣ်အံၤပှၤတၢ်ချၢလဲၤနုၥ်တန့ၢ်ဘၣ်.BGF သုးဟီကဝီၤနီၣ်ဂံၢ်(၃)အိၣ်ခိးန့ၢ်ဝဲဒၣ်တၢ်ဘံၣ်တၢ်ဘၢန့ၣ်လီၤ. ပှၤသ့ၣ်တဖၣ်အံၤလၢတၢ်ကဆှၢအဝဲသ့ၣ်ဆူတၢ်လီၢ်အဂၤဒ်သိးကဆဲးမၤဝဲကၠါဖၠၣ်တၢ်မၤအဂီၢ် တၢ်ဃုဝဲဒၣ်တၢ်လီၢ်တၢ်ကျဲအဖၢမုၢ်န့ၣ်လီၤ.”စံးဝဲဒၣ်န့ၣ်လီၤ.
ဘၣ်ဃးဒီးတၢ်လဲၤပၥ်ဝဲကၠါဖၠၣ်ပှၤမၤတၢ်ဖိဖဲရမၤတံတၢ်ကူၣ်လဲၤမၤကၤအလီၢ်အံၤ တမ့ၢ်ဘၣ်အဂ့ၢ် BGF သုးဟီၣ်ကဝီၤနီၣ်ဂံၢ်(၂)အသုးဟီၣ်ကဝီၤခိၣ် သုးခိၣ်ကျၢၢ်ဖိစီၤတ့ၤဝ့ သမၢဝဲဒၣ်ဒ်အံၤန့ၣ်လီၤ.
အဝဲစံးဝဲလၢ“တမ့ၢ်ဘၣ်. ကိၤသွဲၤယ့စိၤ(တၢ်ကူၣ်လဲၤမၤကၤလီၢ်) န့ၣ်က့ၤအိၣ်ဝဲသ့ဝဲလဲၣ်.က့ၤအိၣ်ဝဲဘူၣ်ဝဲလဲၣ်.အဟးအိၣ်က့ၤလၢဟီးတဲးဒီးတၢ်လီၢ်လၢအဂၤန့ၣ်လီၤ.တနီၤနီၤန့ၣ်က့ၤကဒါဆူထံဝၢ်လၢအကစၢ်ဒၣ်ဝဲတၢ်ဆဲးကျိးန့ၣ်အိၣ်တနီၤန့ၣ်လီၤ.”အဂ့ၢ်စံးဝဲဒၣ်န့ၣ်လီၤ.
ဒ်ကညီကရူၢ်ကရၢလၢအကွၢ်ဟုၣ်ကွၢ်စုၣ်ကၠါဖၠၣ် တၢ်ဖံးတၢ်မၤ အပှၤဘၣ်မူဘၣ်ဒါစံးဝဲဒၣ်အသိးန့ၣ် KK park ကရၢၢ်ပူၤပှၤမၤတၢ်ဖိလၢအဃ့ၢ်ထီၣ်ဒီးဘၣ်တၢ်က့ၤပၥ်အီၤလၢရၤမတံဝ့ၢ်ဟီၣ်ကဝီၤသ့ၣ်တဖၣ်အံၤန့ၣ် လၢတၢ်ဆါအီၣ်ကဒီးအဝဲသ့ၣ်ဆူညါတဆီအဂီၢ် တၢ်ဃုဝဲဒၣ်တၢ်လီၢ်တၢ်ကျဲလၢထံဆၢကီၢ်ဆၢဒ်အမ့ၢ် ခၣ်ဘီဒံယါကီၢ်ဆၢ,လါအိၣ်ကီၢ်ဆၢသ့ၣ်တဖၣ်အိၣ်ဝဲဒၣ်အဂ့ၢ်စံးဝဲဒၣ်န့ၣ်လီၤ.
တကီၢ်ခါခဲအံၤန့ၣ် BGFဒီးပယီၤသုးသ့ၣ်တဖၣ်အံၤပၥ်ဖှိၣ်ထီၣ်သးဝံၤလၢကဒုးနဲၣ်ဝဲလၢ အဝဲသ့ၣ်မၤဟးဂီၤကွံၥ်ကၠါဖၠၣ်တၢ်ဖံးတၢ်မၤလီၢ်အဂီၢ် အ့ကၢၣ်(၅၀၀) KKpark ကရၢၢ်ပူၤတၢ်သူၣ်ထီၣ်သ့ၣ်တဖၣ်န့ၣ်မၤဟးဂီၤဝဲကိးနံၤဒဲးတုၤခဲအံၤအဂ့ၢ် သုးခိၣ်ကျၢၢ်ဖိစီၤတ့ၤဝ့စံးဘၣ်ဝဲ ခ့ၣ်အဲးစံၣ်ကညီတၢ်ကစီၣ်အိၣ်ဝဲဒၣ်စ့ၢ်ကီးန့ၣ်လီၤ.
