တၢ်ကြဲၢ်ကီၢ်ဆၣ်ဒူသ၀ီအပူၤဘုၦ့ၤထီၣ်အဃိကမျၢၢ်တဖၣ်တၢ်ကီတၢ်ခဲအိၣ်ထီၣ်လၢကၦ့ၤဖှိၣ်ဃာ်ဘု

လါဖ့ၤဘြူၤအါရံၤ ၁၇ သီႇ ၂၀၂၃ နံၣ်ႇ ခ့ၣ်အဲးစံၣ်

လၢဖၣ်အၣ်ကီၢ်ရ့ၣ် တၢ်ကြဲၢ်ကီၢ်ဆၣ် လၣ်ကမါကရူၢ် ကၠ့ၤကိသ၀ီႇအၣ်ပလၤကိႇလၣ်ကမါသ၀ီဒီး ကၠဲၣ်ပီၤသ၀ီတဖၣ်အပူၤန့ၣ် တနံၣ်အံၤခီဖျိဘုၦ့ၤထီၣ်အဃိိ ကမျၢၢ်အိၣ်ဟီၣ်က၀ီၤပူၤတဖၣ်အံၤ တၢ်ကီတၢ်ခဲအိၣ်ထီၣ်လၢကၦ့ၤဖှိၣ်ဃာ်၀ဲဘုအဂ့ၢ်န့ၣ် လီၢ်က၀ီၤကမျၢၢ်စံး၀ဲန့ၣ်လီၤႉ

ဒူသ၀ီလၢအိၣ်ဟီၣ်က၀ီၤပူၤဖဲန့ၣ်တဖၣ်ဖဲမဟိန့ၣ်ဘုတနာ်န့ၣ်အၦ့ၤအိၣ်ထဲ(၉၀၀၀)ကၠးတုၤလၢ(၁၀၀၀၀)ကၠးလီၤဘၣ်ဆၣ် တနံၣ်အံၤခီဖျိဘုတနာ်န့ၣ်အၦ့ၤထီၣ်တုၤလၢ(၂၂ႇ၀၀၀)ကၠးဘျဲၣ်ညါအဃိ ၦ့ၤဖှိၣ်ဃာ်ဘုတဘၣ်ဂီၢ်၀ဲလၢၤဘၣ်အဂ့ၢ်န့ၣ် လဲၤဒၤသ၀ီဖိ ဘဲကီၣ်မိ စံး၀ဲန့ၣ်လီၤႉ

အ၀ဲစံး၀ဲလၢ“မ့မ့ၢ်တၢ်မၤအဘူးအလဲခီန့ၣ်အပူၤကွံာ်ဒီးခဲအံၤန့ၣ်ဒ်သိးသိးလီၤႉဘၣ်ဆၣ်ခဲအံၤဘုၦ့ၤထီၣ်အဃိန့ၢ်တၢ်မၤအလဲအံၤက့ၤၦ့ၤအီၣ်ကဒါဘုတန့ၢ်လၢၤဘၣ်ႉလၢညါခါန့ၣ်န့ၢ်ဒံးမီၤနီၤႉလၢညါခါဘုတနာ်န့ၣ်အၦ့ၤတအိၣ်ထဲအံၤဘၣ်ႉခဲအံၤဆီဒံၣ်တကးမးတန့ၢ်လၢၤဘၣ်”အဂ့ၢ်န့ၣ် စံးဘၣ်ခ့ၣ်အဲးစံၣ်–ကညီတၢ်ကစီၣ်န့ၣ်လီၤႉ

လီၢ်က၀ီၤကမျၢၢ်လၢအိၣ်ဟီၣ်က၀ီၤဖဲန့ၣ်အပူၤတဖၣ်အါဒၣ်တက့ၢ်တၢ်စူၤခါတၢ်ဖံးတၢ်မၤစှၤအခါန့ၣ် လၢအဟံၣ်ဖိဃီဖိကသူအီၣ်သူအီ၀ဲအဂီၢ်ထုးထီၣ်ဆါလီၤ၀ဲတၢ်ဖိတၢ်လံၤလၢအ၀ဲသ့ၣ်ၦ့ၤဃာ်၀ဲတဖၣ်အဂ့ၢ်န့ၣ် စံး၀ဲန့ၣ်လီၤႉ

“တၢ်စူၤခါအဆၢကတီၢ်န့ၣ်တၢ်မၤတအိၣ်ဘၣ်ႉဘုၦ့ၤတၢ်အိၣ်သးခဲအံၤန့ၣ်ပၦ့ၤဃာ်တန့ၢ်လၢၤဘၣ်ႉစ့လၢပမၤတၢ်မၤန့ၢ်တနံၤညါအံၤအဂီၢ်န့ၣ်လၢၤဖဲတနံၤညါအံၤလီၤႉအဃိနၦ့ၤဃာ်ကန့ၢ်ဒ်လဲၣ်ႉမ့ဆဲးလဲၤသးဒ်အံၤဒုဟံၣ်ဖိဃီဖိကဘၣ်ကီဘၣ်ခဲလီၤ” အဂ့ၢ်န့ၣ် လီၢ်က၀ီၤကမျၢၢ်လၢတအဲၣ်ဒိးပာ်ဖျါအမံၤတဂၤစံး၀ဲန့ၣ်လီၤႉ

ခီဖျိတနံၣ်အံၤဘုၦ့ၤထီၣ်အဖီခိၣ်လီၢ်က၀ီၤကမျၢၢ်တဖၣ်ၦ့ၤဖှိၣ်ဃာ်ဘုတအိၣ်၀ဲဘၣ်အဃိ နံၣ်လၢကဟဲန့ၣ်ဘုၦ့ၤကထီၣ်အါန့ၢ်ဒံးခဲအံၤသ့၀ဲအဂ့ၢ်န့ၣ် ကမျၢၢ်လၢအိၣ်ဟီၣ်က၀ီၤပူၤဖဲန့ၣ်တဖၣ်စံး၀ဲန့ၣ်လီၤႉ
ဒူသ၀ီလၢအိၣ်ဟီၣ်က၀ီၤပူၤဖဲန့ၣ်သ့ၣ်တဖၣ်အါဒၣ်တက့ၢ်န့ၣ်ၦ့ၤဖှိၣ်ဃာ်၀ဲဘုႇနံၣ်သိႇပဲႇဘုခ့တဖၣ်ကိးမုၢ်နံၣ်ဒဲးန့ၣ်လီၤႉ

တၢ်ကြဲၢ်ကီၢ်ဆၣ် လီၢ်က၀ီၤဒူသ၀ီကမျၢၢ်တဖၣ်အါဒၣ်တက့ၢ်န့ၣ်သူၣ်အီၣ်ဖျးအီၣ်၀ဲဘုႇပဲတဖၣ်ဒီး တနံၣ်အံၤဖဲတၢ်ကူးကဒါဘုအခါခီဖျိတၢ်စူၤအါအဃိဘုတဖၣ်ဟးဂီၤ၀ဲအသိး ဘုဟးထီၣ်အကတီၢ်ဘုၦ့ၤထီၣ်၀ဲဘၣ်ဆၣ်မ့မ့ၢ်ပဲန့ၣ်အၦ့ၤထီၣ်ထဲတစဲးလီၤအဂ့ၢ်န့ၣ် လီၢ်က၀ီၤကမျၢၢ်လၢအသူၣ်အီၣ် ဖျးအီၣ်တၢ်တဖၣ်စံး၀ဲန့ၣ်လီၤႉ