လါအ့ဖြ့ၣ် ၂၁သီ, ၂၀၂၅နံၣ်, ခ့ၣ်အဲးစံၣ်,
ခ့ၣ်အဲၣ်ယူၣ်ကညီဒီကလုၥ်စၢဖှိၣ်ကရၢ,သုးက့(၇)ဖၣ်အၣ်ကီၢ်ရ့ၣ်တန့ဆါကီၢ်ဆၣ်ကညီဒီကလုၥ်ဂၢၤသးသုးမုၢ်ဒိၣ်(KNDO)သုးရ့ၣ်(၅)ဟီၣ်ကဝီၤ,လ့ဂီၤကၠိတၢ်ဒုးအပူၤကျိချံပှၥ်သၣ်အမဲၥ်ညါတၢ်ဖီၣ်န့ၢ်ဝဲဒုၣ်ဒါတနီၤအိၣ်ဝဲအဂ့ၢ်,ဟီၣ်ကဝီၤပှၤဘၣ်မူဘၣ်ဒါတဖၣ်စံးဝဲဒၣ်န့ၣ်လီၤ.
မီဖါသူ,မီၤကလၤ(ကိး)လ့ဂီၤကၠိပယီၤသုးကလၢၤအံၤ(KNU)သုးက့(၇)ကညီဒီကလုၥ်တၢ်ထူၣ်ဖျဲးသုးမုၢ်ဒိၣ်(KNLA)တီခိၣ်ရိၣ်မဲဒီးတၢ်ပၢၢ်ဆၢသုးပၥ်ဖှိၣ်ထီၣ်မၤန့ၢ်ဝဲဖဲအပူၤကွံၥ်လါအ့ဖြ့ၣ်(၁၉)သီဟါခီအနံၤအဂ့ၢ်,သ့ၣ်ညါဘၣ်န့ၣ်လီၤ.
လ့ဂီၤကၠိသုးကလၢၤတၢ်ဒုးအပူၤကညီတၢ်ထူၣ်ဖျဲးသုးမုၢ်ဒိၣ်(KNLA)မၤန့ၢ်ဝဲစုကဝဲၤစုကဝဲၤကျိချံပှၥ်သၣ်တဖၣ်အါမးအမဲၥ်ညါ,ဖီၣ်န့ၢ်ဝဲဒုၣ်ဒါတနီၤအိၣ်ဝဲဒီးတကီၢ်ခါခဲအံၤတၢ်မၤရှဲလဲဝဲဟီၣ်ကဝီၤတၢ်လီၢ်တၢ်ကျဲအဖၢမုၢ်ဒံးလီၤအဂ့ၢ်,(KNDO)သုးရိၢ်မဲခိၣ်ကျၢၢ်,သုးခိၣ်ကျၢၢ်ဖိစီၤရှံလ့ၣ်စံးဘၣ်ခ့ၣ်အဲးစံၣ်ကညီတၢ်ကစီၣ်ဒ်အံၤန့ၣ်လီၤ.
“မ့ၢ်လီၤတၢ်စုကဝဲၤလၢပမၤန့ၢ်ပၥ်ဝဲဒုအိၣ်တပူလီၤ.ဒုၣ်ဒါလၢပဖီၣ်န့ၢ်တဖၣ်န့ၣ်စ့ၢ်ကီးပန့ၢ်ဃုၥ်ဒီးတၢ်စုကဝဲၤလီၤ.ပှၤလၢဃ့ၢ်ထီၣ်တနီၤအကျါဒုပၥ်လီၤဘၢ,ခူၣ်လီၤဘၢဃၥ်ဝဲအစုကဝဲၤအိၣ်အဃိပသံကွၢ်သံဒိးဒီးပက့ၤဃုဃိထုးထီၣ်က့ၤလံ.တနီၤတခီတတဲဖျါထီၣ်ဝဲဒံးဘၣ်အဃိ,ပရှဲလဲတလၢၥ်ဒံးဘၣ်,ပမၤအဖၢဒံးလီၤ.မ့မ့ၢ်လၢစံၣ်ဖျိးလၢကၠီၣ်တဲၣ်ပူၤတခီမ့ၢ်အိၣ်ပှဲၤဂၤလဲၣ်ပတသ့ၣ်ညါဘၣ်.”အဂ့ၢ်စံးဝဲဒၣ်န့ၣ်လီၤ.
မီဖါသူ(လ့ဂီၤကၠိ)သုးကီၣ်ကးသုးကလၢၤအံၤ,ပယီၤသုးအနီၢ်ဂံၢ်အိၣ်ဝဲဒၣ်တအါန့ၢ်အဂၤ(၂၀)ဘၣ်ဒီးသုးကလၢၤအပူၤပှၤတီခိၣ်ရိၢ်မဲတၢ်အိၣ်ထဲသုးဒ့ခိၣ်ပတီၢ်တဂၤလီၤဒီးတၢ်စုကဝဲၤလၢတၢ်မၤန့ၢ်အီၤမ့ၢ်ဂ့ၤဒုၣ်ဒါလၢတၢ်ဖီၣ်မူဒံးန့ၢ်မ့ၢ်ဂ့ၤအနီၣ်ဂံၢ်နီၣ်ဒွးန့ၣ်တၢ်မၤလီၤတံၢ်အီၤအဖၢမုၢ်အဂ့ၢ်,ဟီၣ်ကဝီၤပှၤဘၣ်မူဘၣ်ဒါတဖၣ်စံးဝဲဒၣ်န့ၣ်လီၤ.
တကတီၢ်ဃီ,သုးကလၢၤအံၤခီဖျိအိၣ်ဘူးဝဲဒၣ်ဒီးကညီဖီၣ်စုကဝဲၤကရူၢ်ကရၢဒ်အမ့ၢ်(သုးခိးကီၢ်ဆၢ)(BGF)ဃုၥ်ဒီး(ကညီတၢ်မုၥ်တၢ်ခုၣ်ကီၣ်ကးကရၢ)(PC)အဃိ,ပညိၣ်ခးလီၤဝဲတၢ်ဆူကမျၢၢ်လီၢ်ကဝီၤဖိအိၣ်ဆိးတၢ်လီၢ်တၢ်ကျဲတအိၣ်ဝဲဘၣ်ဘၣ်ဆၣ်တၢ်ဒုးအပူၤခံခီခံကပၤတၢ်ခးလိၥ်သးအဖီခိၣ်လီၢ်ကဝီၤဖိအဂၤ(၂၀၀)ဘျဲၣ်ဘၣ်ဃ့ၢ်ထီၣ်ဝဲဆူကၠီၣ်တဲၣ်တကပၤအိၣ်ဝဲအဂ့ၢ်,သ့ၣ်ညါဘၣ်ဒ်ပှၤဘၣ်မူဘၣ်ဒါတဖၣ်စံးဝဲဒၣ်အသိးန့ၣ်လီၤ.
ဒ်န့ၣ်အသိး,သုးကလၢၤအံၤမ့ၢ်သုးကလၢၤတဖျၢၣ်လၢအအိၣ်ဆီလီၤဝဲအသးယံၥ်လၢအနံၣ်(၃၀)ဘျဲၣ်ဃၣ်ဃၣ်လံဒီးအိၣ်ဝဲဒီးတၢ်ရဲၣ်တၢ်ကျဲၤလၢကဒိၣ်စိဒိၣ်ကမီၤဝဲထံဆၢကီၢ်ဆၢတၢ်လီၢ်တဖၣ်ဒီးဃုၥ်ဒီးကီၢ်ပယီၤဒီတဘ့ၣ်အဃိ,တၢ်ထီၣ်ဒုးဟံးန့ၢ်ကွံၥ်ဝဲအဂ့ၢ်,(KNDO)ခိၣ်နၢ်တဖၣ်စံးဝဲဒၣ်န့ၣ်လီၤ.
