လါဖ့ၤဘြူၤအါရံၤ ၁၄ သီႇ၂၀၂၃ နံၣ်ႇ ခ့ၣ်အဲးစံၣ်
လၢခ့ၣ်အဲၣ်ယူၣ်–ကညီဒီကလုာ်စၢဖှိၣ်ကရၢ ဒူပျာ်ယာ်ကီၢ်ရ့ၣ် ၀ီၢ်ရ့ၣ်ကီၢ်ဆၣ်အပူၤ ခီဖျိပယီၤသုးခးလီၤကျိဖးဒိၣ်လီၤတဲာ်ပိၢ်ဖးထီၣ်လၢ(ကန့ၤကမီၣ်)သီခါဖၠၣ်ဖီခိၣ်အဃိ ဘၣ်သံ၀ဲတပွဲ(၁)ပါဒီး အူစ့ဘၣ်ဒိဘၣ်ထံးနးနးကျံၤကျံၤ(၁)ပါစ့ၢ်ကီးအဂ့ၢ်န့ၣ် သ့ၣ်ညါဘၣ်လၢသ၀ီဖိတဖၣ်အအိၣ်န့ၣ်လီၤႉ
ဖဲအပူၤကွံာ်လါဖ့ၤဘြူၤအါရံၤ ၁၀ သီ ဂီၤခီအဆၢကတီၢ် လၢ(အီၤသပၠ့ၤ)သ၀ီဒီးတဃ့ၣ်ကျီးအဘၢၣ်စၢၤန့ၣ် တၢ်ဒုးကဲထီၣ်၀ဲလၢတၢ်ပၢၢ်ဆၢသုးပာ်ဖှိၣ်ဒီးပယီၤသုးအဘၢၣ်စၢၤ၀ံၤအလီၢ်ခံ ဖဲဟါခီ ၃ နၣ်ရံၣ်ဃၣ်ဃၣ် အဆၢကတီၢ်န့ၣ် ပယီၤသုးကျိဖးဒိၣ်သုးရ့ၣ်ခးလီၤကျိဖးဒိၣ်ဆူ(ကန့ၤကမီၣ်)သ၀ီပူၤအဃိ သီခါဖၠၣ်ဒီးဟံၣ်ဃီတၢ်သူၣ်ထီၣ်ဟးဂူာ်ဟးဂီၤ၀ဲဒီးတၢ်သံတၢ်ဘၣ်ဒိဘၣ်ထံးကဲထီၣ်၀ဲဒ်အံၤလီၤအဂ့ၢ်န့ၣ် သ၀ီဖိတဂၤစံး၀ဲဒ်အံၤန့ၣ်လီၤႉ
(ကန့ၤကမီၣ်)သ၀ီဖိတဂၤစံး၀ဲလၢ “ပယီၤသုးကျိဖးဒိၣ်သုးရ့ၣ် (၃၈၇) လၢအိၣ်ဆီလီၤသးဖဲယွၤသ့ၣ်သ၀ီဃၢၤအံၤ ခးလီၤစိကျိဖးဒိၣ်ဆူ(ကမီၣ်ကန့ၤ)သ၀ီပူၤအဃိလီၤတဲာ်လၢသီခါဖၠၣ်ကရၢၢ်ပူၤ (၂) ဖျၢၣ်ႉမ့မ့ၢ်တပွဲဖိတပါန့ၣ်သံဖဲန့ၣ်တဘျီဃီလီၤႉလၢအူစ့တပါန့ၣ်ဘၣ်၀ဲအခီၣ်အစုခဲလၢာ်လီၤႉခဲအံၤၦၤလဲၤဆှၢအ၀ဲသ့ၣ်လၢ၀့ၢ်ပူၤႉသ၀ီဖိနါက့ဘၣ်ဒိ (၂) ဂၤဒံးႉၦၤဟံၣ်နါက့ဟးဂီၤအိၣ်မီၤနီၤ” အဂ့ၢ်န့ၣ် စံးဘၣ်ခ့ၣ်အဲးစံၣ်–ကညီတၢ်ကစီၣ်ဖဲလါဖ့ၤဘြူၤအါရံၤ ၁၂ သီအနံၤန့ၣ်လီၤႉ
ဒ်န့ၣ်အသိးဖဲအပူၤကွံာ်လါဖ့ၤဘြူၤအါရံၤ ၁၀ သီအနံၤစ့ၢ်ကီး ပယီၤသုးပာ်ဖှိၣ်လၢအိၣ်ဒူပျာ်ယာ်ကီၢ်ရ့ၣ် (နိၣ်တကီကီၢ်ဆၣ်)၀ီၢ်ရီဟီၣ်က၀ီၤ(လိၣ်ရှါ)သ၀ီပူၤတဖၣ်အံၤ (နအ့ၤ)သ၀ီဖိစီၤမိန့ၤ၀့ လၢအလဲၤၦ့ၤစဲးဖီကဟၣ် တၢ်ဖိတၢ်လံၤလၢ(သၤဖၠူၤစယၣ်)၀့ၢ်အံၤဖဲအဟဲက့ၤလၢကျဲအခါ ပယီၤသုးတဖၣ်အံၤခးအီၤဒီးဘၣ်၀ဲအဟၢဖၢအဃိ တၢ်ကူစါယါဘျါအီၤလၢဂ့ၢ်၀ီအူအဂ့ၢ်န့ၣ် သ့ၣ်ညါဘၣ်လၢလီၢ်က၀ီၤကမျၢၢ်အအိၣ်န့ၣ်လီၤႉ
“အ၀ဲသ့ၣ်လဲၤထီၣ်ၦၤ့စဲးဖီကဟၣ်တၢ်ဖိတၢ်လံၤလၢ၀့ၢ်ပူၤခံဂၤမီၤနီၤႉလဲၤဒိး၀ဲဒီးဆဲးကဲးန့ၣ်ႉ ဖဲအ၀ဲသ့ၣ်ဟဲက့ၤလၢကျဲအခါန့ၣ်ခီဖျိ(လိၣ်ရှါ)ပယီၤသုးကလၢၤမဲာ်ညါကျဲပူၤန့ၣ်ၦၤကးတံၢ်ဃာ်၀ဲဒီး၀ၣ်အဃိ အ၀ဲသ့ၣ်ဟဲက့ၤဆှဲး၀ဲကျဲန့ၣ်ႉပယီၤသုးခးစိအ၀ဲသ့ၣ်အဃိဘၣ်၀ဲဒၣ်ၦၤအိၣ်လၢလီၢ်ခံတဂၤန့ၣ်ႉခီဖျိဘၣ်အၦံာ်ဖးဒိၣ်အဃိအဘၣ်က့ၤဆဲးထီၣ်က့ၤ၀ဲမီၤနီၤ” အဂ့ၢ်န့ၣ် ၦၤလၢအဘူးဒီးၦၤဘၣ်ဒိဘၣ်ထံးတဖၣ်အံၤစံးဘၣ်ခ့ၣ်အဲးစံၣ်–ကညီတၢ်ကစီၣ်န့ၣ်လီၤႉ
လၢ၀ီၢ်ရ့ၣ်ကီၢ်ဆၣ် သရိာ်၀ါ–ဃိၣ်သၢဖျၢၣ်ကျဲန့ၣ် ပယီၤသုးနုာ်လီၤအိၣ်ဆီလီၤသးလၢနိၣ်ခၠိနဲၣ်သ၀ီႇ လ့နိးႇလိၣ်ရှါႇစံနပ့ၤဒီးတကူၣ်တၢၣ်သ၀ီတဖၣ်အပူၤဒီး အိၣ်ခိးသမံသမိးလီၢ်က၀ီၤကမျၢၢ်လၢအဟးထီၣ်က့ၤလီၤတဖၣ် အိၣ်၀ဲတလီၢ်လီၢ်အသိး ဖီၣ်မၤဒၢၣ်လီၢ်က၀ီၤကမျၢၢ်ဒီးခးသံ၀ဲကမျၢၢ်အိၣ်(၅)ဂၤဃၣ်ဃၣ်လံအဂ့ၢ်န့ၣ် သ့ၣ်ညါဘၣ်လၢလီၢ်က၀ီၤသ၀ီဖိတဖၣ်အအိၣ်န့ၣ်လီၤႉ
ဖဲလါဖ့ၤဘြူၤအါရံၤ ၂ သီအနံၤ သုးမီၤစိရိၤဘိးဘၣ်ရၤလီၤ၀ဲကၠၤအ့စ့ၣ်ကၠံကီၢ်ဆၣ်ဒီးတလၢၤကီၢ်ဆၣ်တဖၣ်အံၤ မ့ၢ်၀ဲ(မၤရှဲၤလီ)သုးတၢ်ပၢတၢ်ပြး၀ံၤအလီၢ်ခံန့ၣ် ပယီၤသုးခးလီၤကျိဖးဒိၣ်ဆူသ၀ီပူၤအိၣ်၀ဲတလီၢ်လီၢ်အသိး ပယီၤသုးအံၤခးစိကမျၢၢ်လၢအဟးထီၣ်က့ၤလီၤလၢအ၀ဲသ့ၣ်သုးကလၢၤအခိၣ်အဃၢၤတဖၣ်စ့ၢ်ကီးအိၣ်၀ဲအဂ့ၢ်န့ၣ် လီၢ်က၀ီၤကမျၢၢ်စံး၀ဲန့ၣ်လီၤႉ
ဒ်န့ၣ်အသိးလၢတလၢၤကီၢ်စဲၣ် ဒူသထူၣ်ကီၢ်ရ့ၣ် သထူၣ်ကီၢ်ဆၣ်အပူၤ ဖဲလါဖ့ၤဘြူၤအါရံၤ ၁၂ သီ ဂီၤခီအဆၢကတီၢ်န့ၣ် ကညီဒီကလုာ်တၢ်ထူၣ်ဖျဲးသုးမုၢ်ဒိၣ်(KNLA)သုးပာ်ဖှိၣ်နုာ်လီၤခး၀ဲ(၀ီၢ်ရီ)ပၢၤကီၢ်၀ဲၤလီၢ် အံၤကဲထီၣ်၀ံၤအလီၢ်ခံ ခီဖျိပယီၤသုးက့ၤခးလီၤကဒါကျိဖးဒိၣ်အဃိ ဘၣ်ဒိ၀ဲသီခါ(၂)ပါဒီးတပွဲ(၁)ပါဒံးအဂ့ၢ်န့ၣ် သ့ၣ်ညါဘၣ်န့ၣ်လီၤႉ
