လါဖ့ၤဘြူၤအါရံၤ ၁၅ သီႇ ၂၀၂၃ နံၣ်ႇ ခ့ၣ်အဲးစံၣ်
လၢတနီသရံၣ်ကီၢ်ခီဒိၣ် အ့ၤမဲကီၢ်ဆၣ်အပူၤ ဖဲအပူၤကွံာ်လါယနူၤအါရံၤ ၂၀ သီအနံၤ ပယီၤသုးဖီၣ်၀ဲကညီလံာ်လဲၢ်တၢ်ဆဲးတၢ်လၤကမံးတံာ်သးစၢ်စးသ့စီၣ်မ့၀ံၤအလီၢ်ခံ ဖဲလါဖ့ၤဘြူၤအါရံၤ ၁၃ သီ အနံၤန့ၣ် တၢ်ထုးထီၣ်သမံသမိးအီၤလၢရူဒီး တၢ်လိာ်ကွီၢ်အီၤလၢတၢ်စုဆူၣ်ခီၣ်တကးတၢ်ဘျၢသဲစး (၅၀)‚(၅၂)သ့ၣ်တဖၣ်အဂ့ၢ်န့ၣ် ၦၤလၢဘူးဒီးအီၤတဖၣ်စံး၀ဲန့ၣ်လီၤႉ
စးသ့စီၣ်မ့အံၤနုာ်လီၤပၣ်ဃုာ်မၤသကိးတၢ်လၢကညီလံာ်လဲၢ်တၢ်ဆဲးတၢ်လၤအပူၤဒီးဖဲပယီၤသုးဖီၣ်စးသ့စီၣ်မ့ ၀ံၤအလီၢ်ခံ ဖဲလါဖ့ၤဘြူၤအါရံၤ ၁၃ သီအနံၤန့ၣ် တၢ်ထုးထီၣ်သမံသမိးအီၤလၢရူဒီးဖဲန့ၣ်တၢ်လိာ်ကွီၢ်အီၤလၢ တၢ်စုဆူၣ်ခီၣ်တကးတၢ်ဘျၢသဲစးအသိး ဖျါလီၤဂာ်လၢတၢ်မၤဒၢၣ်ဃာ်စးသ့စီၣ်မ့အံၤအဂ့ၢ်န့ၣ် ၦၤလၢဘူးဒီးအီၤတဂၤစံး၀ဲဒ်အံၤန့ၣ်လီၤႉ
အ၀ဲစံး၀ဲလၢ“ဖဲမဟါန့ၣ်တၢ်တၢ်ထုးထီၣ်သမံသမိးစးသ့စီၣ်မ့လၢ(အ့ၤမဲမၠိၣ်မၣ်)ကွီၢ်ဘျီၣ်မီၤနီၤႉအ၀ဲသ့ၣ်လိာ်ကွီၢ်၀ဲလၢ (၅၀)(က)ဒီး(၅၂)(က)တၢ်စုဆူၣ်ခီၣ်တကးတၢ်ဘျၢသဲစးမီၤနီၤႉလိာ်ကွီၢ်၀ဲလၢအခဲအံၤမီၤနီၤ” အဂ့ၢ်န့ၣ် စံးဘၣ် ခ့ၣ်အဲးစံၣ်–ကညီတၢ်ကစီၣ်န့ၣ်လီၤႉ
တကးဒံးဘၣ်လၢန့ၣ်အမဲာ်ညါတၢ်သမံသမိးစးသ့စီၣ်မ့အံၤလၢ(ပသံၣ်၀့ၢ်)တၢ်သမံသမိးလီၢ်ဒီးခီဖျိတၢ်မၤဒၢၣ်အီၤအဃိ အမဲာ်ချံထီၣ်ဂီၤတကပၤဒီးတၢ်မၤဒၢၣ်အစုအခီၣ်လီၢ်အိၣ်တ့ၢ်၀ဲအဂ့ၢ်န့ၣ် ၦၤလၢဘူးဒီးအီၤတဂၤဃီ၀ဲန့ၣ်စံးအါထီၣ်၀ဲ န့ၣ်လီၤႉ
ဖဲအပူၤကွံာ်လါယနူၤအါရံၤ ၁၃ သီအနံၤ တၢ်မၤ၀ဲလံာ်လဲၢ်တၢ်ဆဲးတၢ်လၤတၢ်အိၣ်ဖှိၣ်အံၤလၢ(အ့ၤမဲ) ကညီလံာ်လဲၢ်တၢ်ဆဲးတၢ်လၤ၀ဲၤဒၢးအခါန့ၣ် ပယီၤသုးဖီၣ်က့ၤကိးသမံသမိး၀ဲစးသ့စီၣ်မ့အဆိကတၢၢ်တဘျီန့ၣ်လီၤႉ
တၢ်ဖီၣ်သမံသမိးစးသ့စီၣ်မ့အဆိကတၢၢ်တဘျီ၀ံၤအလီၢ်ခံဖဲလါယနူၤအါရံၤ ၁၄ သီအနံၤန့ၣ် တၢ်ပျၢ်လီၤက့ၤအီၤဒီးတၢ်က့ၤဖီၣ်ကဒီးအီၤခံဘျီတဘျီအံၤတၢ်လိာ်ကွီၢ်အီၤလၢတၢ်စုဆူၣ်ခီၣ်တကးတၢ်ဘျၢသဲစးအံၤန့ၣ်လီၤႉ
တၢ်နုာ်လီၤဖီၣ်စးသ့စီၣ်မ့တနံၤဃီ၀ဲန့ၣ်တၢ်ဖီၣ်ဃုာ်၀ဲ(အ့ၤမဲကီၢ်ဆၣ်)ကည့ၤကိကၠံသ၀ီသးၦၢ်ဒီးအမါအံၤစ့ၢ်ကီးအသိး အ၀ဲသ့ၣ်ခံဂၤအံၤစ့ၢ်ကီးတၢ်လိာ်ကွီၢ်၀ဲလၢတၢ်စုဆူၣ်ခီၣ်တကးတၢ်ဘျၢသဲစးဒီးတၢ်ကလဲၤဆှၢအီၤဆူ(မၠီမၠး)ဃိာ်ပူၤအဂ့ၢ်န့ၣ် ၦၤလဲၤထီၣ်ဒိနကနၣ်တၢ်ဖိတဂၤစံး၀ဲဒ်အံၤန့ၣ်လီၤႉ
“ခဲအံၤတၢ်ထုးထီၣ်သမံသမိးအီၤမ့၀ံၤန့ၣ်ၦၤကဆှၢအီၤဆူ(မၠီမၠး)ဃိာ်ပူၤႉၦၤကလဲၤဆှၢအီၤခဲမုၢ်ဆ့ၣ်မီၤနီၤႉခဲအံၤတၢ်လိာ်ကွီၢ်အ၀ဲသ့ၣ်လၢတၢ်ဘျၢသဲစး (၅၀) ဒီး (၅၂) မီၤနီၤႉဃုာ်ဒီးစးသ့စီၣ်မ့န့ၣ်ခဲလၢာ် (၃) ဂၤမီၤနီၤႉတၢ်လိာ်ကွီၢ်အ၀ဲသ့ၣ် (၃) အံၤလၢတၢ်ဘျၢသဲစး၀ဲန့ၣ်လီၤ” အဂ့ၢ်န့ၣ် စံးဘၣ်ခ့ၣ်အဲးစံၣ်–ကညီတၢ်ကစီၣ်န့ၣ်လီၤႉ
လၢ(အ့ၤမဲကီၢ်ဆၣ်)အပူၤကညီသးစၢ်စးသ့စီၣ်မ့အံၤဟူးဂဲၤဖံးမၤတၢ်လၢကညီလံာ်လဲၢ်တၢ်ဆဲးတၢ်လၤကလဲၤထီၣ်လဲၤထီအဂီၢ်တကးဒံးဘၣ်အမဲာ်ညါဟးမၤလိကလီန့ၢ်၀ဲကညီသူၣ်ဘီၣ်သးစၢ်တဖၣ်လၢ(ခီၣ်ဖၠူထၢၣ်)ဒီးလံာ်ကီၤလၤ၀ါန့ၣ်လီၤႉဒ်န့ၣ်အသိးပယီၤသုးလိာ်ဘၢလိာ်ကွီၢ်စးသ့စီၣ်မ့လၢအမ့ၢ်(PDF)အၦၤအံၤတမ့ၢ်၀ဲဘၣ်အဂ့ၢ်န့ၣ် ၦၤလၢအမၤသကိးဃုာ်တၢ်ဒီးအီၤတဖၣ်စံး၀ဲန့ၣ်လီၤႉ
ဒ်န့ၣ်အသိးတချုးသုးဟံးန့ၢ်တၢ်စိတၢ်ကမီၤကဲထီၣ်ဒံးဘၣ်ဖဲအပူၤကွံာ်(၂၀၂၀)လါအီကူး ၁၂ သီအနံၤ ခီဖျိတၢ်တီခိၣ်ရိၣ်မဲမၤ၀ဲနံၣ်(၇၀)ၦဲၤထီၣ်ကညီမၤထူရၤမုၢ်နံၤတၢ်ရဲၣ်တၢ်ကျဲၤအံၤလၢ၀့ၢ်တကူၣ်(ဘျီၣ်)မဲာ်ညါအဃိ (ကၠီၣ်တတါ)ကီၢ်ဆၣ်ပၢၤကီၢ်ဖီၣ်၀ဲစးသ့စီၣ်မ့ကဲထီၣ်တ့ၢ်အသးဒံးန့ၣ်လီၤႉ
