ပယီၤသုးဖီၣ်တီၢ်မၤဒၢၣ်၀ဲ၀ီၢ်ရ့ၣ်လီၢ်က၀ီၤကမျၢၢ်အဂၤ(၁၀)ဘျဲၣ်နးနးကျံၤကျံၤ

လါယနူၤအါရံၤ ၁၆ သီႇ ၂၀၂၃ နံၣ်ႇ ခ့ၣ်အဲးစံၣ်

လၢခ့ၣ်အဲၣ်ယူၣ်–ကညီဒီကလုာ်စၢဖှိၣ်ကရၢ ဒူပျာ်ယာ်ကီၢ်ရ့ၣ် ၀ီၢ်ရ့ၣ်ကီၢ်ဆၣ် ၀ီၢ်ရီဟီၣ်က၀ီၤအပူၤ ဖဲလါယနူၤအါရံၤ ၁၄ သီအနံၤန့ၣ် ခီဖျိပယီၤသုးဖီၣ်တီၣ်မၤဒၢၣ်၀ဲလီၢ်က၀ီၤကမျၢၢ်အဂၤ(၁၀)ဘျဲၣ်အံၤနးနးကျံၤကျံၤအဃိ ၦၤသ့ၣ်တဖၣ်အံၤဘၣ်ဒိဘၣ်ထံး၀ဲနးနးကလဲာ်အဂ့ၢ်န့ၣ် လီၢ်က၀ီၤကမျၢၢ်စံး၀ဲန့ၣ်လီၤႉ

လီၢ်က၀ီၤကမျၢၢ်အတၢ်ကူတၢ်ကၤဒီးသ့ၣ်အကလုာ်ကလုာ်လၢကၠၤအ့စ့ၣ်ကၠံ၀့ၢ်(လ့နိး)သ၀ီပယီၤသုးခီၣ်သုးရ့ၣ်(၂၈၄)စုတီၤဖီလာ်ဒီးသုးခိးကီၢ်ဆၢ-BGF(၁၀၂၂)သုးရ့ၣ်သုးပာ်ဖှိၣ်နုာ်လီၤဟံ၀ဲသ့ၣ်တဖၣ်အံၤ ဖဲလါယနူၤအါရံၤ ၁၄ သီ ဂီၤခီအဆၢကတီၢ်န့ၣ် အ၀ဲသ့ၣ်ကိးမၢ၀ဲကမျၢၢ်သိလ့ၣ်(၄)ခိၣ် မၢတၢ်လဲၤဆှၢန့ၢ်အ၀ဲသ့ၣ်တၢ်ဖိတၢ်လံၤသ့ၣ်တဖၣ်အံၤဆူ (နိၣ်ခၠိနဲၣ်)ဒုးယၤသုးကလၢၤဒီးဖဲလဲၤလၢကျဲအခါတၢ်ပၢၢ်ဆၢသုးပာ်ဖှိၣ်အိၣ်ခိးခးအ၀ဲသ့ၣ်လၢတၢ်ဘၢၣ်စၢၤန့ၣ်လီၤႉ

တၢ်ခးလိာ်သးကဲထီၣ်၀ံၤအလီၢ်ခံပယီၤသုးပာ်ဖှိၣ်ကရူၢ်တဖၣ်အံၤကယဲၢ်မ့ၢ်အထံၣ်ကမျၢၢ်လၢအဟးထီၣ်က့ၤလီၤဖဲန့ၣ်သ့ၣ်တဖၣ်န့ၣ်ဖီၣ်သမံသမိးတီၢ်မၤဒၢၣ်၀ဲအဂ့ၢ်န့ၣ်ကမျၢၢ်လၢပယီၤသုးဖီၣ်တီၢ်အီၤတဖၣ်စံးဘၣ်ခ့ၣ်အဲးစံၣ်–ကညီတၢ်ကစီၣ် ဒ်အံၤန့ၣ်လီၤႉ

ကမျၢၢ်လၢပယီၤသုးဖီၣ်တီၢ်အီၤတဂၤစံး၀ဲ“ပယီၤသုးဖီၣ်ဆၢဃာ်ၦၤကိးဂၤဒဲးဒီးသံကွၢ်၀ဲတထံၣ်ႇတီၢ်၀ဲတထံၣ်မၤ၀ဲဒ်န့ၣ်ႉထိ၀ဲဒီးအစုႇခးပုး၀ဲဒီးအခီၣ်ႉမ့၀ံၤအ၀ဲသ့ၣ်ဟံန့ၢ်၀ဲ၀ၣ်ကုးတီၢ်၀ဲတကးဒံးဘၣ်တီၢ်ၦၤခိၣ်သၣ်ဃံလၢကျိအဃိၦၤခိၣ်သဲၣ်ဖး၀ဲခဲလၢာ်လီၤႉအသံကွၢ်၀ဲလၢမ့ၢ်သုထံၣ်သိလ့ၣ်(၄)ခိၣ်ဟးထီၣ်က့ၤလီၤစ့ၢ်ဧါန့ၣ်ပက့ၤစံးဆၢကဒါအ၀ဲသ့ၣ်လၢပတထံၣ်ဘၣ်ႉကယဲၢ်မ့ၢ်ၦၤဟးထီၣ်က့ၤလီၤဖဲအံၤတဖၣ်န့ၣ်အ၀ဲသ့ၣ်သမံသမိးတီၢ်၀ဲကိးဂၤဒဲးလီၤႉၦၤပိာ်မုၣ်နါက့အ၀ဲသ့ၣ်ခးပုး၀ဲႉတနီၤန့ၣ်ပျၢ်လီၤ၀ဲလံ”အဂ့ၢ်န့ၣ်စံး၀ဲန့ၣ်လီၤႉ

တၢ်သူတၢ်သၣ်တၢ်ဒိးတၢ်လၣ်လၢအဟးထီၣ်ဖဲလ့နိးသ၀ီႇစ့ၤပၠ့ႇခိၤခၤႇသၤပယၤႇကိၤယီၤသ၀ီပူၤသ့ၣ်တဖၣ်အံၤ ဖဲသ၀ီဖိလဲၤစိာ်ဆါ၀ဲလၢ(နိၣ်ခၠိနဲၣ်)သ၀ီ၀ံၤဟဲက့ၤလၢကျဲအခါပယီၤသုးအိၣ်(သၤပယၤ)သ၀ီနုာ်လီၤတဖၣ်အံၤဖီၣ်တီၢ်မၤဒၢၣ်၀ဲလီၢ်က၀ီၤကမျၢၢ်အံၤစးထီၣ်မုၢ်ထူၣ် ၁၂ နၣ်ရံၣ်တုၤလၢ ၅ နၣ်ရံၣ်ညါအဂ့ၢ်န့ၣ် လီၢ်က၀ီၤကမျၢၢ် စံး၀ဲ န့ၣ်လီၤႉ

“မ့မ့ၢ်ယၤခီန့ၣ်ဘၣ်ဖဲယလဲၤဆါသဲးသၣ်အခါပယီၤသုးဖီၣ်တီၢ်မၤဒၢၣ်ယၤလၢကျဲပူၤမီၤနီၤႉအ၀ဲသ့ၣ်သံကွၢ်ယၤလၢနထံၣ် (PDF)ဧါႇအ၀ဲသ့ၣ်အိၣ်ဖဲလဲၣ်သံကွၢ်၀ဲဒ်န့ၣ်ႉၦၤဒီမိၢ်၀ၤလၢအိၣ်ယမဲာ်ညါ (၂) ဂၤအံၤခီန့ၣ်ပယီၤသုးတီၢ်မၤဒၢၣ်အ၀ၤႇမ့မ့ၢ်အမါခီန့ၣ်ပယီၤသုးခးပုးအီၤလီၤႉယထံၣ်လၢၦၤအိၣ်လၢတၢ်မဲာ်ညါအဂၤ (၁၀) နါက့ပယီၤသုးမၢအဆ့ၣ်နီၤဒီးတီၢ်မၤဒၢၣ်၀ဲလီၤႉပယီၤသုးပျၢ်လီၤက့ၤယၤန့ၣ်ကဘၣ်ဖဲဟါခီ ၅ နၣ်ရံၣ်ဃၣ်ဃၣ်မီၤနီၤ” အဂ့ၢ်န့ၣ် လီၢ်က၀ီၤသ၀ီဖိတဂၤစံး၀ဲ န့ၣ်လီၤႉ

ပယီၤသုးပာ်ဖှိၣ်ကရူၢ်သ့ၣ်တဖၣ်အံၤအ၀ဲသ့ၣ်နုာ်လီၤဟံးန့ၢ်လီၢ်က၀ီၤကမျၢၢ်လၢအဃ့ၢ်မှံဟးဖျိးတဖၣ်အတၢ်ဖိတၢ်လံၤတကးဒံးဘၣ်အမဲာ်ညါတၢ်ဒုးကဲထီၣ်အဃိအ၀ဲသ့ၣ်သုးကလၢၤလၢအဟးဂီၤသ့ၣ်တဖၣ်အံၤလၢကဘှီဂ့ၤထီၣ်က့ၤ၀ဲအဂီၢ်န့ၣ်မၢသ၀ီဖိလဲၤဆှၢန့ၣ်အ၀ဲသ့ၣ် သ့ၣ်၀ၣ်ႇဂၢၤတၢၣ်သ့ၣ်တဖၣ်လၢအ၀ဲသ့ၣ်သုးကလၢၤအဂ့ၢ်န့ၣ် လီၢ်က၀ီၤသ၀ီဖိတဖၣ်စံး၀ဲန့ၣ်လီၤႉ