တၢ်ဒုးဆဲးကဲထီၣ်လၢကီးတရံးႇကြုၢ်တု၀့ၢ်ပူၤ၀့ၢ်ချၢဒီးကမျၢၢ်ဟံၣ်အူအီၣ်ႇၦၤသံဘၣ်ဒိဘၣ်ထံးဆဲးအိၣ်

လါမးရှး ၂၇ သီႇ ၂၀၂၃ နံၣ်ႇ ခ့ၣ်အဲးစံၣ်

လၢကညီကီၢ်စဲၣ် မၠၣ်၀တံၣ်ႇကီးတရံးႇကြုၢ်တုဟီၣ်က၀ီၤအပူၤ တၢ်ဒုးစးထီၣ်ကဲထီၣ်၀ဲဖဲလါမးရှး ၂၅ သီအနံၤဒီး တုၤလၢလါမးရှး ၂၆ သီ ဂီၤခီတစု တၢ်ဒုးဆဲးကဲထီၣ်ဒံး၀ဲလၢကီးတရံး၀့ၢ်ဒီးကြုၢ်တု၀့ၢ်တကပၤဒံးအဂ့ၢ်န့ၣ် သ့ၣ်ညါဘၣ်န့ၣ်လီၤႉ

တုၤလၢမဟါလါမးရှး ၂၆ သီအနံၤ တၢ်ဒုးဆဲးကဲထီၣ်ဒံး၀ဲဒီးခီဖျိပယီၤသုးခးလီၤကျိဖးဒိၣ်ႇကဘီယူၤစ့ၢ်ကီးဟဲခးလီၤ တၢ်အဃိ ကမျၢၢ်အဟံၣ်အဃီဟးဂူာ်ဟးဂီၤဒီးကမျၢၢ်သံဘၣ်ဒိဘၣ်ထံးဆဲးအိၣ်ဒံး၀ဲအသိး ကမျၢၢ်လၢအိၣ်က၀ီၤဒ့ပူၤတဖၣ်ကတာ်ထီသးလၢ၀့ၢ်ပူၤအဂ့ၢ်န့ၣ် လီၢ်က၀ီၤၦၤဟ့ၣ်တၢ်ကစီၣ်ဖိတဖၣ်စံး၀ဲန့ၣ်လီၤႉ

“ဖဲဂီၤခီန့ၣ်ၦၤနုာ်လီၤခးပယီၤသုးလၢအိၣ်ကီးတရံးအ့ရှါကျဲ(ချောင်းတောင်)ထံကမါကျဲတဖၣ်န့ၣ်မီၤနီၤႉ ကညီကရူၢ်အိၣ်ဟဲလၢ(ခနိမ်းမူ)ႇ(တံတန်ကူး)တကပၤဒီးနုာ်လီၤလၢ၀့ၢ်ပူၤအဃိပယီၤသုး(၉၇)ခးလီၤကျိဖးဒိၣ်ႉ ကဘီယူၤဟဲခးလီၤတၢ်ဒီးကျိစဲးအဃိလၢ(ချောင်းတောင်)တကပၤန့ၣ်ဘၣ်၀ဲဒၣ်ဖံသးၦၢ်တဂၤႇဖိသၣ်တဂၤႉ ၦၤဟံၣ်ဟးဂီၤမီၤနီၤ”အဂ့ၢ်န့ၣ် စံး၀ဲန့ၣ်လီၤႉ

ဖဲလါမးရှး ၂၅ သီအနံၤန့ၣ် တၢ်ဒုးကဲထီၣ်၀ဲလၢ(မၠၣ်၀တံၣ်)တၢ်ကူၣ်လဲၤမၤကၤလီၢ်ႇသ့ၣ်ကါညံၣ်နီၣ်ပၢၤကီၢ်၀ဲၤလီၢ် (၂၇၅)သုးတၢ်လီၢ်ႇအ့ရှါကျဲတကပၤန့ၣ်ဒီးဖဲန့ၣ်ပယီၤသုးသံကအိၣ်လၢအဂၤ(၁၀)ဃၣ်ဃၣ်ညါဒီးပယီၤသုးလၢလီၤဘၣ်မူဒါဖဲတၢ်ကူၣ်လဲၤမၤကၤလီၢ်အံၤဒီးပၢၤကီၢ်သုးႇၦၤမၤတၢ်ဖိ(၁၆)ဂၤဃၣ်ဃၣ်လီၤမၢ်၀ဲအဂ့ၢ်န့ၣ် သ့ၣ်ညါဘၣ်လၢ ၦၤဘူးဒီးပယီၤသုးတဖၣ်အအိၣ်န့ၣ်လီၤႉ

“ကညီကရူၢ်နုာ်လီၤလၢတၢ်ကူၣ်လဲၤမၤကၤလီၢ်ဒီးတၢ်ခးလိာ်သးကဲထီၣ်အဃိၦၤသံအိၣ်ႉၦၤဖီၣ်သမူန့ၢ်နါက့အိၣ်လီၤႉ ၦၤတဲလၢပယီၤသုးဟးမၤရှဲတၢ်လီၢ်ႉခဲအံၤပယီၤသုးခးလီၤကျိဖးဒိၣ်လၢတၢ်လီၢ်တဘျုးတီၤညါႉပယီၤသုးန့ၣ်ပျံၤ၀ဲလၢကညီကရူၢ်ကဟဲတ့ၢ်လီၤအ၀ဲသ့ၣ်ဒီးမ့ၢ်ပိၢ်လၢ(ဒြိ)မီၤနီၤႉခဲအံၤဟီၣ်က၀ီၤ(၃)သုးခိးကီၢ်ဆၢ(BGF)ဒီးပယီၤသုးပာ်ဖှိၣ်ထီၣ်သးလဲၤထီၣ်လၢအ့ရှါကျဲဒီးတီၢ်နီၢ်ကျဲလီၢ်လံၤတကပၤန့ၣ်မီၤနီၤ”အဂ့ၢ်န့ၣ် ၦၤလၢဘူးဒီးပယီၤသုးတဂၤစံး၀ဲန့ၣ်လီၤႉ

တၢ်ဒုးကဲထီၣ်လၢခံသီအတီၢ်ပူၤန့ၣ်ပယီၤသုးႇပၢၤကီၢ်ဒီးသုးခိးကီၢ်ဆၢ(BGF)တကပၤသံဘၣ်ဒိဘၣ်ထံးအိၣ်၀ဲဒီး ၦၤဖီၣ်သမူန့ၢ်စ့ၢ်ကီးအိၣ်၀ဲအဂ့ၢ်န့ၣ် (KNLA)သုးပာ်ဖှိၣ်ကရူၢ် ၦၤဟ့ၣ်တၢ်ကစီၣ်ဖိစံး၀ဲအသိးသ့ၣ်ညါဘၣ်န့ၣ်လီၤႉ

ဒ်န့ၣ်အသိးမ့မ့ၢ်လၢ(KNLA)သုးပာ်ဖှိၣ်ကရူၢ်တကပၤန့ၣ်တၢ်သံတၢ်ဘၣ်ဒိဘၣ်ထံးအိၣ်၀ဲတနီၤဒီး ခီဖျိတၢ်ဒုးဆဲးကဲထီၣ်ဒံးအဃိတၢ်ပၢၢ်ဆၢသုးကျိၤကရူၢ်တကပၤစ့ၢ်ကီးထုးထီၣ်ပာ်ဖျါ၀ဲလၢလီၢ်က၀ီၤကမျၢၢ်တဘၣ်ဟးထီၣ်က့ၤလီၤလၢကျဲအံၤဘၣ်အဂ့ၢ်န့ၣ် သ့ၣ်ညါဘၣ်န့ၣ်လီၤႉ