တၢ်လဲၤခးသုး၀ဲၤလီၢ်ခိၣ်သ့ၣ်ဒီးဒြိ၀ံၤလီၢ်ခံပယီၤသုးမၤအါထီၣ်တၢ်ဘံၣ်တၢ်ဘၢလၢ၀့ၢ်ပူၤ၀့ၢ်ချၢ

လါမးရှး ၂၇ သီႇ ၂၀၂၃ နံၣ်ႇ ခ့ၣ်အဲးစံၣ်

လၢတလၢၤကီၢ်စဲၣ် မီၣ်လမၠဲၣ်ကီၢ်ဆၣ်အပူၤ တၢ်လဲၤခးမုၢ်ထီၣ်ကလံၤထံးကီၢ်ခီသုး၀ဲၤလီၢ်ခိၣ်သ့ၣ်လၢ(ဒြိ)၀ံၤလီၢ်ခံ ပယီၤသုးမၤအါထီၣ်တၢ်ဘံၣ်တၢ်ဘၢလၢ၀့ၢ်ပူၤ၀့ၢ်ချၢဒီးအိၣ်ခိးသမံသမိးတၢ်ဟဲအါထီၣ်၀ဲအဂ့ၢ်န့ၣ် ကမျၢၢ်လၢအိၣ်၀့ၢ်ပူၤတဖၣ်စံး၀ဲန့ၣ်လီၤႉ

မုၢ်ထီၣ်ကလံၤထံးကီၢ်ခီသုး၀ဲၤလီၢ်ခိၣ်သ့ၣ်လၢအိၣ်(မီၣ်လမၠဲၣ်ကီၢ်ဆၣ်)ပူၤအံၤ ဖဲအပူၤကွံာ်လါမးရှး ၁၆ သီအနံၤန့ၣ် ဟီၣ်က၀ီၤတၢ်ဒီသဒၢကမျၢၢ်သုးပာ်ဖှိၣ်လဲၤတ့ၢ်လီၤမ့ၣ်ပိၢ်(၃)ဖျၢၣ်လၢဒြိဒီးခီဖျိအ၀ဲသ့ၣ်တၢ်သူၣ်ထီၣ်ဟးဂီၤတဖျၢၣ်အဃိ ပယီၤသုးအံၤမၤအါထီၣ်တၢ်ဘံၣ်တၢ်ဘၢလၢ၀့ၢ်ပူၤ၀့ၢ်ချၢအိၣ်ခိးသမံသမိးတၢ်တုၤလၢခဲအံၤတစုအဂ့ၢ်န့ၣ် လီၢ်၀ီၤကမျၢၢ်တဂၤ စံး၀ဲဒ်အံၤန့ၣ်လီၤႉ

အ၀ဲစံး၀ဲလၢ“မ့မ့ၢ်လၢ၀့ၢ်ပူၤန့ၣ်အ၀ဲသ့ၣ်သမံသမိး၀ဲဒၣ်သိလ့ၣ်လီၤႉလၢညါခါန့ၣ်အ၀ဲသ့ၣ်သမံသမိးသိလ့ၣ်တစဲးတမွဲးဒ်န့ၣ်လီၤႉခဲအံၤတမ့ၢ်ဒ်န့ၣ်ဘၣ်အ၀ဲသ့ၣ်သမံသမိး၀ဲသိလ့ၣ်လီၤတံၢ်လီၤဆဲးလီၤႉလၢမနုၤအဃိလဲၣ်န့ၣ်ပတသ့ၣ်ညါဘၣ်ႉမ့မ့ၢ်ဆဲးကဲးန့ၣ်သမံသမိး၀ဲတုၤလၢအဒၢပူၤညါ”အဂ့ၢ်န့ၣ် စံးဘၣ်ခ့ၣ်အဲးစံၣ်–ကညီတၢ်ကစီၣ်န့ၣ်လီၤႉ

လၢန့ၣ်အမဲာ်ညါစှၤသီအတီၢ်ပူၤအံၤပယီၤသုးနုာ်လီၤသမံသမိးထၢၦၤတမှံၤစရီလၢမီၣ်လမၠဲၣ်၀့ၢ်က၀ီၤဒ့ဟံၣ်ပူၤသတူၢ်ကလာ်အဃိၦၤမၤ(CDM)ဖိလၢအိၣ်ဟီၣ်က၀ီၤပူၤတဖၣ်အိၣ်ဒီးတၢ်ဘၣ်ယိၣ်ဘၣ်ဘှီအဂ့ၢ်န့ၣ် အ၀ဲသ့ၣ်စံး၀ဲအသိး သ့ၣ်ညါဘၣ်န့ၣ်လီၤႉ

(CDM)ကၠိသရၣ်မုၣ်တဂၤစံး၀ဲလၢ“အ၀ဲသ့ၣ်ဘၣ်ဒိဆါအဃိအ၀ဲသ့ၣ်ဟးဆှၣ်တၢ်လၢ၀့ၢ်ပူၤဒ်န့ၣ်လီၤႉ မ့၀ံၤတၢ်ကဲထီၣ်သးန့ၣ်ဖးယံၤလံတုၤလၢခဲအံၤန့ၣ်ပယီၤသုးဒီးပၢၤကီၢ်သုးဟးသမံသမိးၦၤတမှံၤစရီ”အဂ့ၢ်န့ၣ် စံးဘၣ်ခ့ၣ်အဲးစံၣ်–ကညီတၢ်ကစီၣ်န့ၣ်လီၤႉ

ဘၣ်ဃးတၢ်ဂ့ၢ်ကဲထီၣ်သးအံၤန့ၣ်သုးမီၤစိရိၤအၦၤအိၣ်ခိးကွၢ်ကမျၢၢ်လၢအဟးထီၣ်က့ၤလီၤ၀့ၢ်ပူၤတဖၣ်အံၤလၢ(CCTV)တဆီဒီးတကးဒံးဘၣ်အ၀ဲသ့ၣ်ကူကၤကမျၢၢ်ကူကၤသူ၀ဲဒၣ်ဟံၣ်သိလ့ၣ်ႇဆဲးကဲးတဖၣ်၀ံၤ ဟးသမံသမိးတၢ်လၢ က၀ီၤဒ့ပူၤတုၤလၢခဲအံၤအဂ့ၢ်န့ၣ် သ့ၣ်ညါဘၣ်လၢလီၢ်က၀ီၤၦၤဟ့ၣ်တၢ်ကစီၣ်ဖိတဖၣ်အအိၣ်န့ၣ်လီၤႉ