ပယီၤသုးခးလီၤကျိဖးဒိၣ်လၢ(လောင်းလုံး)၀့ၢ်ကယ့ၤကၠံသ၀ီတၢ်ခိၣ်တၢ်ဃၢၤအဃိကမျၢၢ်ဘၣ်ဃ့ၢ်ထီၣ်အဂၤ(၂၀၀)ဘျဲၣ်

လါမးရှး ၉ သီႇ ၂၀၂၃ နံၣ်ႇ ခ့ၣ်အဲးစံၣ်

ဖဲအပူၤကွံာ်လါမးရှး ၆ သီအနံၤ လၢတနီသရံၣ်ကီၢ်ခီဒိၣ် လီလိကီၢ်ဆၣ် ကယ့ၤကၠံသ၀ီပူၤန့ၣ် တၢ်ဒုးကဲထီၣ်၀ဲလၢပယီၤသုးဒီး(လီလိ၀့ၢ်)တၢ်ဒီသဒၢကမျၢၢ်သုးသိၣ်မှံၤအဘၢၣ်စၢၤ၀ံၤအလီၢ်ခံ ခီဖျိပယီၤသုးက့ၤလီၤကဒါကျိဖးဒိၣ်လၢသ၀ီဖဲန့ၣ်တၢ်ခိၣ်တၢ်ဃၢၤအဃိလီၢ်က၀ီၤကမျၢၢ်အဂၤ(၂၀၀)ဘျဲၣ်ဘၣ်ဃ့ၢ်ထီၣ်၀ဲအဂ့ၢ်န့ၣ် လီလိ၀့ၢ်ကမျၢၢ်တဖၣ်စံး၀ဲန့ၣ်လီၤႉ

ဖဲတၢ်ဒီသဒၢကမျၢၢ်သုးလဲၤခး(ပျူစောထီး)သုးကလၢၤလၢအိၣ်(ကယ့ၤကၠံ)သ၀ီပူၤအခါန့ၣ် ပယီၤသုးခးလီၤတပျုာ်တပျီာ်ကဒါကျိဖးဒိၣ်ဒ်အံၤလီၤအဂ့ၢ်န့ၣ် လီၢ်က၀ီၤကမျၢၢ်စံး၀ဲန့ၣ်လီၤႉ

ခီဖျိပယီၤသုးခးလီၤတပျုာ်တပျီာ်တၢ်ဒ်အံၤအဃိကျိဖးဒိၣ်လီၤတဲာ်ပိၢ်ဖးထီၣ်၀ဲလၢ(သဘော့ဆိပ်)သ၀ီထံကျိကပၤဒီးၦၤကညီဘၣ်ဒိဘၣ်ထံးဟံၣ်ဃီတၢ်ဟးဂူၤဟးဂီၤတအိၣ်၀ဲဘၣ်ဆၣ် ပယီၤသုးဒွဲၣ်အူအီၣ်၀ဲ(ကရင်ကြီး)သ၀ီပူၤ ဟံၣ်(၆)ဖျၢၣ်ဒီးနုာ်လီၤအိၣ်ဆီလီၤသးလၢသ၀ီပူၤအဂ့ၢ်န့ၣ် လီလိလီၢ်က၀ီၤကမျၢၢ်တဂၤစံး၀ဲန့ၣ်လီၤႉ

လီၢ်က၀ီၤကမျၢၢ်စံး၀ဲလၢ“ၦၤအိၣ်ဖဲ(ကရင်ကြီး)သ၀ီပူၤတဖၣ်န့ၣ်လဲၤစံၣ်အိၣ်လၢသ၀ီလၢအဂၤခဲလၢာ်လံႉ ဖဲ(၇)သီအခါန့ၣ်ပယီၤသုးဟဲနုာ်လီၤလၢ(ကရင်ကြီး)သ၀ီပူၤကအိၣ်အဂၤ(၆၀)ဃၣ်ဃၣ်ညါႉအ၀ဲသ့ၣ်အိၣ်လၢသ၀ီပူၤအဃိၦၤသ၀ီဖိက့ၤအိၣ်လၢသ၀ီပူၤတဘူၣ်ႉကိညၢ်ဖဲအ၀ဲသ့ၣ်ဒွဲၣ်အူအီၣ်ဟံၣ်(၆)ဖျၢၣ်အခါန့ၣ်ၦၤတအိၣ်လၢအပူၤဘၣ်အဃိတဘၣ်တၢ်နီတမံၤဘၣ်”အဂ့ၢ်န့ၣ် စံး၀ဲန့ၣ်လီၤႉ

လီၢ်က၀ီၤကမျၢၢ်သ၀ီဖိလၢအအိၣ်ဘူးဖဲတၢ်ဒုးကဲထီၣ်လီၢ်အခိၣ်အဃၢၤသ့ၣ်တဖၣ်အံၤကဟးစံၣ်အိၣ်အဂီၢ်တၢ်လီၢ်လီၤတံၢ်လီၤဆဲးတအိၣ်၀ဲဘၣ်ဒီးဘၣ်လဲၤစံၣ်အိၣ်စိလၢအဘူးအတံၢ်ဟံၣ်ဒ်န့ၣ်လီၤႉတကးဒံးဘၣ်လီၢ်က၀ီၤကမျၢၢ်လၢအဘၣ်ဃ့ၢ်တဖၣ်အံၤၦၤတအဲၣ်ဒိးတူၢ်လိာ်အ၀ဲသ့ၣ်ဘၣ်အိၣ်အဂ့ၢ်န့ၣ် လီၢ်က၀ီၤကမျၢၢ်လၢအဂၤတဂၤစ့ၢ်ကီးစံး၀ဲန့ၣ်လီၤႉ

အ၀ဲစံး၀ဲလၢ“လၢ(ကရင်ကြီး)သ၀ီတကပၤန့ၣ်ၦၤတဲလၢပယီၤသုးခးလီၤကျိဖးဒိၣ်လီၤတဲာ်လၢကစၢၢၢ်ခိၣ်တကပၤန့ၣ်မီၤနီၤႉလီၢ်က၀ီၤကမျၢၢ်တဖၣ်အါဒၣ်တက့ၢ်န့ၣ်လဲၤစံၣ်အိၣ်လၢအဘူးအတံၢ်အဟံၣ်ဒီးၦၤလၢစံၣ်တၢ်လီၢ်တအိၣ်ဘၣ်ညါန့ၣ်မုၢ်ဆါခီန့ၣ်အိၣ်လၢသ၀ီပူၤႇမ့မ့ၢ်လၢမုၢ်နၤခီန့ၣ်ဟးစံၣ်ပလဲာ်သးလၢတၢ်လီၢ်အဂၤလီၤႉပအိၣ်၀့ၢ်အံၤလီၤဂာ်ဒ်သိးဟီၣ်ကမျိၤအဃိၦၤကဟးစံၣ်အဂီၢ်တၢ်လီၢ်တအိၣ်လီၤတံၢ်ဘၣ်”အဂ့ၢ်န့ၣ် စံးဘၣ်ခ့ၣ်အဲးစံၣ်–ကညီတၢ်ကစီၣ်န့ၣ်လီၤႉ

ပယီၤသုးသ့ၣ်တဖၣ်အံၤနုာ်လီၤလၢ၀့ၢ်ပူၤဒူသ၀ီပူၤအံၤလၢထံကျဲႇခိကျဲတဆီဒီးအ၀ဲသ့ၣ်ဖီၣ်မၤသံ၀ဲကမျၢၢ်သ၀ီဖိအိၣ်၀ဲအသိး လီၤဆီဒၣ်တၢ်ပယီၤသုးအံၤပညိၣ်ဖီၣ်၀ဲဒၣ်ၦၤပိာ်ခွါသူၣ်ဘီၣ်သးစၢ်တဖၣ်ဒီးဒွဲၣ်အူအီၣ်ၦၤဟံၣ်ၦၤဃီအဃိ လီၢ်က၀ီၤကမျၢၢ်တဖၣ်ဘၣ်အိၣ်လၢတၢ်ပျံၤတၢ်ဖုးပူၤအဂ့ၢ်န့ၣ် လီၢ်က၀ီၤကမျၢၢ်တဂၤဃီ၀ဲန့ၣ်စံးအါထီၣ်၀ဲန့ၣ်လီၤႉ

ဒ်န့ၣ်အသိးဖဲအပူၤကွံာ်လါမးရှး ၄ သီအနံၤန့ၣ် ပယီၤသုးဒီး(ပျူစောထီး)ဖီၣ်မၤသံ၀ဲ(အောက်ကျောက်၀ပ်) သ၀ီဖိ(၅)ဂၤဒီးဒွဲၣ်အူအီၣ်၀ဲကမျၢၢ်အဟံၣ်(၃)ဖျၢၣ်အဃိ ကမျၢၢ်လၢအိၣ်(လီလိ၀့ၢ်)ပူၤတဖၣ်ကဟးထီၣ်က့ၤလီၤ လၢတၢ်ပလီၢ်ပဒီပူၤဒီးကသုးလီၢ်ဟးအိၣ်ဘၣ်လၢတၢ်ဘံၣ်တၢ်ဘၢလီၢ်အဂ့ၢ်န့ၣ် လီလိတၢ်ဒီသဒၢကမျၢၢ်သုးကရူၢ် ထုးထီၣ်ပာ်ဖျါ၀ဲဖဲလါမးရှး ၇ သီအနံၤန့ၣ်လီၤႉ

စးထီၣ်သုးဟံးန့ၢ်တၢ်စိိတၢ်ကမီၤတုၤလၢတနံၣ်အံၤ(၂၀၂၃)လါဖ့ၤဘြူၤအါရံၤန့ၣ် လၢခ့ၣ်အဲၣ်ယူၣ်တၢ်ပၢဟီၣ်က၀ီၤအပူၤကမျၢၢ်ၦၤဃ့ၢ်မှံဟးဖျိးအနီၣ်ဂံၢ်အိၣ်အဂၤ(၅၀၀ႇ၀၀၀)ဘျဲၣ်လံဒီး မ့မ့ၢ်လၢခ့ၣ်အဲၣ်ယူၣ်ဘျံးဒ၀ဲၢ်ကီၢ်ရ့ၣ်(သုးက့ ၄)တၢ်ပၢဟီၣ်က၀ီၤအပူၤန့ၣ် ၦၤဃ့ၢ်မှံဟးဖျိးအနီၣ်ဂံၢ်အိၣ် (၁၀၀၀၀)ဘျဲၣ်လံအဂ့ၢ်န့ၣ် ကညီတၢ်မုာ်တၢ်ခုၣ်တၢ်တိစၢၤၦၤဘျးစဲကရူၢ်(KPSN)ထုးထီၣ်ပာ်ဖျါတ့ၢ်၀ဲဖဲ လါဖ့ၤဘြူၤအါရံၤ ၂၇ သီအနံၤန့ၣ်န့ၣ်လီၤႉ