လါမးရှး ၂၄ သီႇ ၂၀၂၃ နံၣ်ႇ ခ့ၣ်အဲးစံၣ်
လၢကညီကီၢ်စဲၣ် ဒူသထူၣ်ကီၢ်ရ့ၣ် ကၠဲၣ်ထိၤကီၢ်ဆၣ်အပူၤ စးထီၣ်လါမးရှး ၁၆ သီတုၤလၢခဲအံၤတစု ခီဖျိပယီၤသုခးလီၤကျိဖးဒိၣ်လၢသ၀ီပူၤအဃိ လီၢ်က၀ီၤကမျၢၢ်ဘၣ်ဃ့ၢ်ထီၣ်၀ဲအဂၤ(၂ႇ၀၀၀)ဃၣ်ဃၣ်အဂ့ၢ်န့ၣ် သ့ၣ်ညါဘၣ်လၢလီၢ်က၀ီၤဂံၢ်ခီၣ်ထံးၦၤဟ့ၣ်တၢ်ကစီၣ်ဖိတဖၣ်အအိၣ်န့ၣ်လီၤႉ
တကီၢ်ခါခဲအံၤခီဖျိပယီၤသုးခးလီၤကျိဖးဒိၣ်အဃိ(ငှက်ပျောတော)ကရူၢ်(ဇီးပြောင်း)ကရူၢ် ဟံၣ်အဖျၢၣ်(၅၀၀)ၦၤနီၣ်ဂံၢ်အဂၤ(၂၀၀၀)ဃၣ်ဃၣ်ဘၣ်ဃ့ၢ်ထီၣ်၀ဲဒီးလၢတၢ်အီၣ်တၢ်အီတၢ်အိၣ်တၢ်ဆိးအဂီၢ်ဘၣ်အိၣ်ဘၣ်အီၣ်နါစိၤ၀ဲဒ်န့ၣ်လီၤအဂ့ၢ်န့ၣ် လီၢ်က၀ီၤကမျၢၢ်တဂၤစံး၀ဲန့ၣ်လီၤႉ
အ၀ဲစံး၀ဲလၢ“လီလီစဲၤခဲအံၤဒုတၢ်မၤဘူၣ်ကစၢ်တအိၣ်ဒံးဘၣ်ႉဘၣ်အိၣ်ဘၣ်အီၣ်နါစိၤ၀ဲဒ်န့ၣ်လီၤမီၤနီၤႉ တဘျီတခီၣ်ကဘီယူၤမ့တဟဲဘၣ်လၢမုၢ်ဆါခီန့ၣ်ပက့ၤကွၢ်ပဟံၣ်ပဃီအိၣ်ဘၣ်ဆၣ်ပအိၣ်လၢဟံၣ်ဒုတဘူၣ်ဒံးဘၣ်” အဂ့ၢ်န့ၣ် စံးဘၣ်ခ့ၣ်အဲးစံၣ်–ကညီတၢ်ကစီၣ်န့ၣ်လီၤႉ
ဖဲအပူၤကွံာ်လါမးရှး ၁၆ သီဒီး ၂၀ သီအခါန့ၣ် ခီဖျိပယီၤသုးတြိၤ(၄၄)ဒီးစုတီၤဖီလာ်သုးရ့ၣ်လၢအိၣ်ကၠဲၣ်ထိၤ၀့ၢ်ပူၤ တဖၣ်အံၤခးလီၤကျိဖးဒိၣ်အဃိ ကမျၢၢ်သံ(၂)ဂၤဒီးဘၣ်ဒိ(၂)ဂၤဒံးအဂ့ၢ်န့ၣ် ခ့ၣ်အဲၣ်ယူၣ်–လီၢ်ခၢၣ်သး ထုးထီၣ်ပာ်ဖျါ၀ဲဖဲလါမးရှး ၂၂ သီအနံၤန့ၣ်လီၤႉ
လၢန့ၣ်အမဲာ်ညါစးထီၣ်လါမးရှး ၂၀ သီလီၢ်ခံန့ၣ် ခီဖျိပယီၤသုးခးလီၤကျိဖးဒိၣ်ကအိၣ်ကိးမုၢ်နၤဒဲးဃၣ်ဃၣ်ညါအဃိ ကမျၢၢ်သံဘၣ်ဒိဘၣ်ထံးအိၣ်၀ဲဒီးကမျၢၢ်လၢအဃ့ၢ်မှံဟးဖျိးတဖၣ်အံၤစ့ၢ်ကီးတၢ်ကီတၢ်ခဲအိၣ်ထီၣ်လၢတၢ်အီၣ်တၢ်အီတကပၤအဂ့ၢ်န့ၣ် ကၠဲၣ်ထိၤကမျၢၢ်တဂၤ စံးဘၣ်ခ့ၣ်အဲးစံၣ်–ကညီတၢ်ကစီၣ်န့ၣ်လီၤႉ
အ၀ဲစံး၀ဲလၢ“စးထီၣ်ဖဲအသီ(၂၀)လီၢ်ခံန့ၣ်ပယီၤသုးခးလီၤကျိဖးဒိၣ်ကအိၣ်ကိးမုၢ်နံၤဒဲးဃၣ်ဃၣ်ညါႉမ့၀ံၤအ၀ဲသ့ၣ်ဒီၣ်တဲာ်ကွံာ်၀ဲဒၣ်(လီတဲစိ)အကျိၤႉပယီၤသုးခးနါစိၤတၢ်အဃိၦၤသ၀ီဖိသံအိၣ်တနီၤႉၦၤမၤစၢၤၦၤဃ့ၢ်မှံဟးဖျိးတဖၣ်နါက့လဲၤလၢန့ၣ်တကပၤတဘူၣ်ဘၣ်အဃိတၢ်ကီတၢ်ခဲအိၣ်လၢကအီၣ်ကအီမီၤနီၤ”အဂ့ၢ်န့ၣ် စံး၀ဲန့ၣ်လီၤႉ
ဖဲအပူၤကွံာ်လါမးရှး ၈ သီအခါစ့ၢ်ကီး ခီဖျိပယီၤသုးခးလီၤကျိဖးဒိၣ်ဆူသထူၣ်ကီၢ်ဆၣ် ကီးလၢၢ်ကရူၢ် (ကျုံမိန်)သ၀ီပူၤအဃိ ဖိသၣ်(၇)နံၣ်ဒီး(၁၄)နံၣ်ခံဂၤသံ၀ဲဒီးဘၣ်ဒိ၀ဲ(၂)ဂၤအသိး လီၢ်က၀ီၤသ၀ီဖိဘၣ်ဃ့ၢ်ထီၣ်စ့ၢ်ကီး ၀ဲအဂ့ၢ်န့ၣ် ခ့ၣ်အဲၣ်ယူၣ်–ဒူသထူၣ်ကီၢ်ရ့ၣ် ထုးထီၣ်ပာ်ဖျါ၀ဲဖဲလါမးရှး ၉ သီအနံၤန့ၣ်လီၤႉ
သုးဟံးန့ၢ်တၢ်စိတၢ်ကမီၤ၀ံၤအလီၢ်ခံတုၤလၢခဲအံၤတစု လၢခ့ၣ်အဲၣ်ယူၣ်–ကညီဒီကလုာ်စၢဖှိၣ်ကရၢ(သုးက့ ၁) တၢ်ပၢဟီၣ်က၀ီၤ ဒူသထူၣ်ကီၢ်ရ့ၣ်အပူၤန့ၣ် ကမျၢၢ်ၦၤဃ့ၢ်မှံဟးဖျိးအနီၣ်ဂံၢ်အိၣ်၀ဲ(၁၃၀ႇ၀၀၀)ဃၣ်ဃၣ်လံအဂ့ၢ်န့ၣ် ကညီဂ့ၢ်၀ီခွဲးယာ်ကရူၢ်(KHRG)စံး၀ဲအသိးသ့ၣ်ညါဘၣ်န့ၣ်လီၤႉ
