Home တၢ်ကစီၣ် ကညီကီၢ်စဲၣ်ပူၤ ဘီးက့ၣ်တံၢ်ၦ့ၤဂ့ၤအဃိ ၦၤသူၣ်ဘီးက့ၣ်ဟဲအါထီၣ်

ကညီကီၢ်စဲၣ်ပူၤ ဘီးက့ၣ်တံၢ်ၦ့ၤဂ့ၤအဃိ ၦၤသူၣ်ဘီးက့ၣ်ဟဲအါထီၣ်

157
0
Photo: kyawthura

လါမးရှး ၂၄ သီႇ ၂၀၂၃ နံၣ်ႇ ခ့ၣ်အဲးစံၣ်

လၢကညီကီၢ်စဲၣ်ပူၤတကီၢ်ခါခဲအံၤခီဖျိဘီးက့ၣ်တံၢ်အၦ့ၤထီၣ်ကအိၣ်လၢခံဆးညါအဃိ လၢတၢ်သူၣ်တၢ်ဖျးတၢ်ဖံးအီၣ်မၤအီၣ်လီၢ်ကျီးပူၤန့ၣ်ၦၤသူၣ်ၦၤဖျးအါက့ၤထဲလၢဘီးက့ၣ်တဖၣ်လီၤအဂ့ၢ်န့ၣ် သ့ၣ်ညါဘၣ်လၢၦၤသူၣ်ဘီးက့ၣ်ဖိတဖၣ်အအိၣ်န့ၣ်လီၤႉ

ဘီးက့ၣ်တံၢ်အဃ့တတၣ်န့ၣ်အၦ့ၤအိၣ်၀ဲ(၅၀၀ႇ၀၀၀)ကလီၢ်ဘျဲၣ်ညါဒီးမ့မ့ၢ်တပီၢ်န့ၣ်အၦ့ၤအိၣ်၀ဲ(၉၀၀)ကၠးႇ အဒ့ဃ့တဒ့န့ၣ်အၦ့ၤအိၣ်၀ဲ(၂၀၀)ကၠးဘျဲၣ်ညါအဃိၦၤသူၣ်ဘီးက့ၣ်ဟဲအါထီၣ်ကအိၣ်လၢအဆး(၁၀)ညါအဂ့ၢ်န့ၣ် နိၣ်တကီကီၢ်ဆၣ်ပူၤ ၦၤၦ့ၤဘီးက့ၣ်တံၢ်ဖိတဂၤ စံးဘၣ်ခ့ၣ်အဲးစံၣ်–ကညီတၢ်ကစီၣ်န့ၣ်လီၤႉ

အ၀ဲစံး၀ဲလၢ“ဘီက့ၣ်တံၢ်အၦ့ၤဂ့ၤအဃိစံာ်လီၢ်ႇနံၣ်သိလီၢ်ႇရီဘၢၣ်ကျီးလီၢ်ႇပၢၢ်တုၤလၢဟံၣ်ကပိၤကပၤန့ၣ်ၦၤသူၣ်က့ၤထဲဘီးက့ၣ်လီၤႉကျီးလီၢ်ဟီၣ်ခိၣ်လီၢ်တနီၤန့ၣ်ၦၤသူၣ်ကဒါထဲဘီးက့ၣ်လီၤမီၤနီၤႉတၢ်လၢာ်ဘူၣ်လၢာ်စ့နါက့စှၤဒီးအမၠးန့ၢ်အါအဃိၦၤသူၣ်ဘီးက့ၣ်ဟဲအါထီၣ်လၢအဆး(၁၀)ညါ”အဂ့ၢ်န့ၣ် စံး၀ဲန့ၣ်လီၤႉ

လၢကညီကီၢ်စဲၣ် နိၣ်တကီႇကီးတရံးႇမၠၣ်၀တံၣ်ႇကၠဲးဒိဒီးဃိၣ်သၢဖျၢၣ်ကီၢ်ဆၣ် ဒူသ၀ီတဖၣ်အပူၤ အါဒၣ်တက့ၢ်တၢ်သူၣ်တၢ်ဖျးလီၢ်န့ၣ်ၦၤသူၣ်ဆီတလဲက့ၤ၀ဲလၢဘီးက့ၣ်ဒီး တၢ်ဆှၢထီၣ်ဆါအီၤလၢတလၢၤကီၢ်စဲၣ် မူၣ်ဒိၤႇ မီၣ်လမၠဲၣ်(ပွဲရုံ)ဒီးမၠၣ်၀တံၣ်ကီၢ်ဆၢသ့ၣ်တဖၣ်အဂ့ၢ်န့ၣ် သ့ၣ်ညါဘၣ်လၢၦၤကူၣ်လဲၤမၤကၤတၢ်ဖိတဖၣ် အအိၣ်န့ၣ်လီၤႉ

Photo: kyawthura

ဃိၣ်သၢဖျၢၣ်လီၢ်က၀ီၤကမျၢၢ်တဂၤစံး၀ဲလၢ“ဖဲမဟိဘီးက့ၣ်တံၢ်တတၣ်န့ၣ်အၦ့ၤအိၣ်ထဲ(၂၅၀ႇ၀၀၀)ကၠးလီၤႉ မ့မ့ၢ်လၢယိၤကီၢ်တကံလိန့ၣ်အၦ့ၤအိၣ်(၃)ဘးဘျဲၣ်ခဲအံၤထီၣ်တုၤလၢ(၆)ဘးဘျဲၣ်လံအဃိအၦ့ၤထီၣ်ကအိၣ်လၢတ၀၁်ညါမီၤနီၤႉဘီးက့ၣ်န့ၣ်ၦၤက့ၤခူၣ်ထီၣ်ကဒါအတံၢ်ဖဲလါဖ့ၤဘြူၤအါရံၤဒီးလါမးရှးအခါမီၤနီၤႉတနံၣ်အံၤလၢၦၤကသူၣ်၀ဲအဂီၢ်န့ၣ်ၦၤမၢ်လီၤဘီးက့ၣ်အဒ့ဒီဒူၣ်ညါ”အဂ့ၢ်န့ၣ် စံး၀ဲန့ၣ်လီၤႉ

ဘီးက့ၣ်တံၢ်သ့ၣ်တဖၣ်အံၤတၢ်ဆှၢထီၣ်အီၤဆူတရူးကီၢ်ႇယိၤကီၢ်ဒီးတၢ်က့ၤထုးထီၣ်တ့က့ၤအီၤလၢဆီဆၣ်ႇ ထိးဆၣ်ႇညၣ်ဆၣ်ဒီးဆၣ်ဖိကီၢ်ဖိလၢအဂၤအဆၣ်သ့ၣ်တဖၣ်အိၣ်၀ဲအဂ့ၢ်န့ၣ် သ့ၣ်ညါဘၣ်လၢၦၤၦ့ၤဘီးက့ၣ်တံၢ်ဖိတဖၣ်အအိၣ်န့ၣ်လီၤႉ

ကီၢ်ကၠီၣ်တဲၣ်ပူၤခီဖျိတနံၣ်အံၤမူခိၣ်ကလံၤသီၣ်ဂီၤတၢ်အိၣ်သးဒီးဘီးက့ၣ်တံၢ်အလီၢ်န့ၣ်တၢ်သူၣ်ဖျးကဒါတၢ်လၢအဂၤတဖၣ်အဃိဘီးက့ၣ်တံၢ်ဟးထီၣ်လီၤစှၤ၀ဲဒီးလၢတၢ်န့ၣ်အဃိကီၢ်ပယီၤပူၤဘီးက့ၣ်တံၢ်အၦ့ၤဘၣ်ထီၣ်၀ဲဒ်အံၤလီၤအဂ့ၢ်န့ၣ် ၦၤၦ့ၤဘီးက့ၣ်ဖိဒီးၦၤကူၣ်လဲၤမၤကၤတၢ်ဖိတဖၣ်စံး၀ဲန့ၣ်လီၤႉ

လၢ၀့ၢ်တကူၣ်ကီၢ်ခီႇပကိကီၢ်ခီႇအ့ၣ်ယၣ်၀တံၣ်ကီၢ်ခီႇကခၠ့ၣ်ကီၢ်စဲၣ်ႇရၢၣ်ခၢၣ်ကီၢ်စဲၣ်ႇ ကညီကီၢ်စဲၣ်ကလံၤထံးဟီၣ်က၀ီၤတဖၣ်အပူၤန့ၣ်ၦၤသူၣ်ဘီးက့ၣ်အါကတၢၢ်ဒီးကီၢ်ပယီၤဒီတဘ့ၣ်အပူၤ ဟီၣ်ခိၣ်လီၢ်လၢတၢ်သူၣ်ဘီးက့ၣ်န့ၣ်ကအိၣ်အအ့ကၢၣ်(၁)ကလီၢ်ဘျဲၣ်ညါအဂ့ၢ်န့ၣ် တၢ်သူၣ်တၢ်ဖျးကိတိာ်၀ဲၤကျိၤ ထုးထီၣ်ပာ်ဖျါ၀ဲတၢ်ဂ့ၢ်တၢ်ကျိၤအသိး သ့ၣ်ညါဘၣ်န့ၣ်လီၤႉ