လါမးရှး ၂၉ သီႇ ၂၀၂၃ နံၣ်ႇ ခ့ၣ်အဲးစံၣ်
လၢခ့ၣ်အဲၣ်ယူၣ်–ကညီဒီကလုာ်စၢဖှိၣ်ကရၢ(သုးက့ ၁)ဟီၣ်က၀ီၤအပူၤ ဖဲအပူၤကွံာ်လါမးရှး ၂၄ သီအနံၤန့ၣ် ပယီၤသုးလၢအိၣ်ဆီလီၤခူသူၣ်သးဖဲသထူၣ်–ဘံလ့ကျဲမုၢ်ဖးဒိၣ်ကပၤ(ဒေါက်ရပ်)သ၀ီကပၤတဖၣ်အံၤ ခးသံ၀ဲကမျၢၢ်လၢအဟးထီၣ်က့ၤလီၤဖဲန့ၣ်(၂)ဂၤအဂ့ၢ်န့ၣ် သ့ၣ်ညါဘၣ်န့ၣ်လီၤႉ
ပယီၤသုးလၢအိၣ်ဆီလီၤခူသူၣ်သးဖဲသ၀ီ၀ဲန့ၣ်ကပၤတဖၣ်ခးသံကွံာ်ၦၤသးစၢ်(၁၈)နံၣ် ၂ ဂၤလၢအဟးထီၣ်က့ၤလီၤဖဲ ကျဲ၀ဲန့ၣ်လၢတၢ်ဂ့ၢ်တအိၣ်နီတမံၤဘၣ်အဂ့ၢ်န့ၣ် ခ့ၣ်အဲၣ်ယူၣ်ထုးထီၣ်ပာ်ဖျါ၀ဲဖဲလါမးရှး ၂၈ သီအနံၤန့ၣ်လီၤႉ
ဒ်န့ၣ်အသိး(ရွှေအင်းဒုံ)သ၀ီဖိ အူမၠၣ်သူၤဒီးအူဘၣ်မီၤလၢအဟဲက့ၤပိာ်ကျဲဖဲတၢ်လီၢ်၀ဲန့ၣ်ခံဂၤအံၤစ့ၢ်ကီး ပယီၤသုးတဲပျံၤတဲဖုးဟံဆူၣ်ကွံာ်အ၀ဲသ့ၣ်လီတဲစိ(၁)ဖျၢၣ်ဒီးစ့(၅)ကလီၢ်ကၠးအဂ့ၢ်န့ၣ် ခ့ၣ်အဲၣ်ယူၣ် လံာ်တၢ်ပာ်ဖျါအပူၤပာ်ဖျါ၀ဲန့ၣ်လီၤႉ
ပယီၤသုးလၢအမၤပျံၤဟံဆူၣ်ၦၤကျိၣ်ၦၤစ့ၦၤတၢ်ဖိတၢ်လံၤဒီးမၤသံၦၤသးစၢ်ခံဂၤန့ၣ်မ့ၢ်၀ဲနီၣ်ဂံၢ်(၈)ခီၣ်သုးရ့ၣ် သုးဖိ(၄)ဂၤဒီး သုးစကီၤ မိစဲၣ် အဂ့ၢ်န့ၣ် ခ့ၣ်အဲၣ်ယူၣ်လံာ်တၢ်ပာ်ဖျါပူၤအသိး သ့ၣ်ညါဘၣ်န့ၣ်လီၤႉ
လၢန့ၣ်အမဲာ်ညါဖဲအပူၤကွံာ်လါမးရှး ၂၅ သီအခါစ့ၢ်ကီး ခီဖျိပယီၤသုးကျိၤ ၃ ကျိၤ နုာ်လီၤလၢ(ကၠဲၣ်ထိၤ)ကီၢ်ဆၣ်ပူၤအဃိ (ငှက်ပျောတော)ဒီး(ကရဝေးဆိပ်)သ၀ီဃုာ်ဒီးသ၀ီလၢအိၣ်တၢ်ခိၣ်တၢ်ဃၢၤဖဲန့ၣ်ကမျၢၢ်တဖၣ်ဘၣ်ဃ့ၢ်ထီၣ်၀ဲအဂ့ၢ်န့ၣ် လီၢ်က၀ီၤကမျၢၢ်စံး၀ဲန့ၣ်လီၤႉ
လီၢ်က၀ီၤကမျၢၢ်လၢတအဲၣ်ဒိးပာ်ဖျါအမံၤတဂၤစံး၀ဲလၢ“ခဲအံၤတၢ်နးဒိၣ်ကတၢၢ်န့ၣ်(ကၠဲၣ်ထိၤ)ကီၢ်ဆၣ်ပူၤလီၤႉ အပူၤကွံာ်လါမးရှး ၂၅ သီအခါန့ၣ် ၦၤနၢ်ဟူလၢပယီၤသုးနုာ်လီၤအါအါဂီၢ်ဂီၢ်အဃိ လီၢ်က၀ီၤကမျၢၢ်တဖၣ် ဟဲက့ၤလၢဟံၣ်တဘူၣ်ဘၣ်ႉအ၀ဲသ့ၣ်ဟးစံၣ်ပလဲာ်သးဟးအိၣ်လၢၦၢ်ပူၤဒ်န့ၣ်လီၤႉဖဲအပူၤကွံာ်တနွံအခါနါက့ကျိဖးဒိၣ်လီၤတဲာ်လၢ(ကရေ၀းဆိပ်)သ၀ီပူၤအဃိၦၤသံၦၤဘၣ်ဒိဘၣ်ထံးအိၣ်လီၤႉလီၢ်က၀ီၤကမျၢၢ်တဖၣ်တုၤလၢခဲအံၤက့ၤအိၣ်လၢဟံၣ်တဘူၣ်ဒံးဘၣ်”အဂ့ၢ်န့ၣ် စံးဘၣ်ခ့ၣ်အဲးစံၣ်–ကညီတၢ်ကစီၣ်န့ၣ်လီၤႉ
ဖဲအပူၤကွံာ်လါမးရှး ၂၂ သီအခါစ့ၢ်ကီး လၢခ့ၣ်အဲၣ်ယူၣ်(သုးက့ ၁)ဖၣ်အၣ်ကီၢ်ဆၣ်အပူၤ (ညောင်ကုန်း)ပယီၤသုးကလၢၤခးလီၤကျိဖးဒိၣ်ဆူ(ကျုံခန)ကရူၢ် တတါအူသ၀ီပူၤအဃိ ဘၣ်သံ၀ဲဒၣ်ၦၤဖိသၣ်(၁၃)နံၣ်တဂၤဒီး ဖံ၀ါ(၆၆)နံၣ်တဂၤအဂ့ၢ်န့ၣ် သ့ၣ်ညါဘၣ်န့ၣ်လီၤႉ
