လါအ့ဖြ့ၣ် ၁၂ သီႇ ၂၀၂၃ နံၣ်ႇ ခ့ၣ်အဲးစံၣ်
ဖဲလါအ့ဖြ့ၣ် ၇ သီအနံၤ နီၣ်ဂံၢ်(၂)ဒုးယၤခိၣ် သုးခိၣ်ဒိၣ်စိ စီၤလဲၣ်ကဲၣ်လၢဘၣ်တၢ်ထုးထီၣ်ကွံာ်အီၤလၢ ကညီတၢ်မုာ်တၢ်ခုၣ်ကီၣ်ကး(PC)တၢ်ကရၢကရိပူၤအံၤ ဖဲလါအ့ဖြ့ၣ် ၁၀ သီအနံၤန့ၣ် သုးခိးကီၢ်ဆၢ(BGF)သ့ကွံာ်အ၀ဲသ့ၣ်ကျိအဂ့ၢ်န့ၣ် သ့ၣ်ညါဘၣ်လၢဂံၢ်ခီၣ်ထံးၦၤဟ့ၣ်တၢ်ကစီၣ်ဖိအအိၣ်န့ၣ်လီၤႉ
ဖဲလါအ့ဖြ့ၣ် ၁၀ သီ မုၢ်ဃ့ၢ်လီၤ ၁ နၣ်ရံၣ်ဃၣ်ဃၣ်အဆၢကတီၢ် သုးခိးကီၢ်ဆၢ-BGF သုးဟီၣ်က၀ီၤ(၃) သုးဟီၣ်က၀ီၤခိၣ် သုးခိၣ် စီၤမီၤ၀့လဲၤထံၣ်လိာ်သးဒီး နီၣ်ဂံၢ်(၂)ဒုးယၤခိၣ် သုးခိၣ်ဒိၣ်စိ စီၤလဲၣ်ကဲၣ် ဖဲနဘူကီၢ်ဆၣ် ထၣ်လီၣ်သ၀ီပူၤဒီး သ့ကွံာ်၀ဲကျိတဖၣ်အဂ့ၢ်န့ၣ် (PC)ဂံၢ်ခီၣ်ထံးၦၤဟ့ၣ်တၢ်ကစီၣ်ဖိလၢတအဲၣ်ဒိးပာ်ဖျါအမံၤတဂၤ စံး၀ဲဒ်အံၤန့ၣ်လီၤႉ
အ၀ဲစံး၀ဲလၢ“ကျိန့ၣ်သ့ကွံာ်၀ဲဒၣ်ခဲလၢာ်လီၤႉမ့ၢ်အသ့၀ဲၦဲၤခိၣ်လဲၣ်ဒုပတသ့ၣ်ညါလီၤတံၢ်ဘၣ်ႉအ၀ဲသ့ၣ်တဲ၀ဲခီန့ၣ်သ့၀ဲတစိၢ်တလီၢ်လီၤမီၤနီၤႉတဲ၀ဲလၢအ၀ဲသ့ၣ်မၤရှဲဟီၣ်က၀ီၤမ့၀ံၤန့ၣ်ကဟ့ၣ်ကဒါ၀ဲလီၤႉတဖီၣ်ၦၤကညီနီတဂၤဘၣ်ႉ အ၀ဲသ့ၣ်တဲသကိးတၢ်ဒီးသုးခိၣ်လဲၣ်ကဲၣ်၀ံၤမးအသ့၀ဲလီၤမီၤနီၤႉခဲအံၤလၢ(BGF)ကီၢ်ဆၢတၢ်လီၢ်န့ၣ်ၦၤမၤရှဲဟီၣ်က၀ီၤ”အဂ့ၢ်န့ၣ် စံးဘၣ်ခ့ၣ်အဲးစံၣ်–ကညီတၢ်ကစီၣ်န့ၣ်လီၤႉ
လၢ(စိၤရှၢၤမံၣ်ဒံၣ်ယၢၣ်)အပူၤတၢ်ကစီၣ်ပာ်ဖျါ၀ဲလၢ(BGF)နုာ်လီၤသမံသမိးသုးခိၣ်လဲၣ်ကဲၣ်ဘၣ်ဆၣ် ဘၣ်ဃးတၢ်သ့ကွံာ်ကျိတၢ်ဂ့ၢ်အံၤန့ၣ်ခံခီခံကပၤတၢ်ခးလိာ်သးကဲထီၣ်တအိၣ်၀ဲဘၣ်ဒီး(PC) ဟ့ၣ်လီၤကျိလၢတၢ်မုာ်တၢ်ခုၣ်အပူၤလီၤအဂ့ၢ်န့ၣ် ဂံၢ်ခီၣ်ထံးၦၤဟ့ၣ်တၢ်ကစီၣ်ဖိတဂၤဃီ၀ဲန့ၣ် စံးအါထီၣ်၀ဲန့ၣ်လီၤႉ
စးထီၣ်ဖဲတလါအံၤလါအ့ဖြ့ၣ် ၅ သီအနံၤ လၢသုးခိးကီၢ်ဆၢ(BGF)တၢ်ပၢဟီၣ်က၀ီၤ စွ့ၤကိၣ်ကိၤ၀့ၢ်သီကပၤန့ၣ် တၢ်ဒုးကဲထီၣ်၀ဲလၢကီၢ်သူလ့ၤသုးမုၢ်ဒိၣ်(KTLA)တီခိၣ်ရိၣ်မဲတၢ်ပၢၢ်ဆၢကရူၢ်ဒီး ပယီၤသုးႇ(BGF)သုးပာ်ဖှိၣ်အဘၢၣ်စၢၤဒီး တၢ်ဒုးဘျီ၀ဲအံၤအပူၤပၣ်ဃုာ်၀ဲ(PC)သုးရ့ၣ် ၇၀၈ သုးရ့ၣ်ခိၣ် သုးခိၣ်ဒိၣ်ဂီၢ်ဂ့ၢ် စီၤကၠီၤကြီဒီး နီၣ်ဂံၢ်(၂)ဒုးယၤခိၣ် သုးခိၣ်ဒိၣ်စိ စီၤလဲၣ်ကဲၣ် ခံဂၤအံၤအဂ့ၢ်န့ၣ် သ့ၣ်ညါဘၣ်န့ၣ်လီၤႉ
သုးခိၣ်ခံဂၤလၢအပၣ်ဃုာ်လၢစွ့ၤကိၣ်ကိၤတၢ်ဒုးပူၤတဖၣ်အံၤခီဖျိအ၀ဲသ့ၣ်တလူၤပိာ်မၤထွဲလီၢ်ခၢၣ်သးအတၢ်နဲၣ်လီၤဒီးသုးတၢ်သိၣ်တၢ်သီဘၣ်အဃိဒ်တၢ်ကရၢကရိတၢ်အိၣ်ဖှိၣ်တၢ်ဆၢတဲာ်အသိးဘၣ်တၢ်ထုးထီၣ်အ၀ဲသ့ၣ်ဒ်အံၤလီၤ အဂ့ၢ်န့ၣ် (PC)ထုးထီၣ်ပာ်ဖျါ၀ဲန့ၣ်လီၤႉ
တၢ်ဒုးကဲထီၣ်ဘျီ၀ဲအံၤအပူၤန့ၣ်(BGF)တကပၤသံဘၣ်ဒိဘၣ်ထံးအါမးဒီးမၤန့ၢ်စ့ၢ်ကီး၀ဲစုက၀ဲၤတနီၤအဂ့ၢ်န့ၣ် ကီၢ်သူလ့ၤသုးမုၢ်ဒိၣ်(KTLA)သုးပာ်ဖှိၣ်ထုးထီၣ်ပာ်ဖျါ၀ဲန့ၣ်လီၤႉတကီၢ်ခါခဲအံၤခီဖျိ(BGF)က၀ီၤဃာ်တၢ်ပၢၢ်ဆၢသုးပာ်ဖှိၣ်ဒီးရှဲလဲဟီၣ်က၀ီၤအဃိသုးခိၣ်အဲၣ်စ့၀ါတီခိၣ်ရိၣ်မဲ(KTLA)သုးပာ်ဖှိၣ်တဖၣ်ဂုၤကဒါလီၢ်ခံဒီးဒုၣ်ဒါဖီၣ်န့ၢ်စ့ၢ်ကီးတၢ်ပၢၢ်ဆၢသုးပာ်ဖှိၣ်အၦၤအိၣ်၀ဲတနီၤအသိးတၢ်မၤန့ၢ်ဃုာ်ကျိတနီၤဒီးသိလ့ၣ်သ့ၣ်တဖၣ်အဂ့ၢ်န့ၣ် (BGF)ဒိဃာ်၀ဲတၢ်ဂီၤမူရၤလီၤ၀ဲလၢအ၀ဲသ့ၣ်(ဖ့ၣ်ဘူၣ်)ပူၤန့ၣ်လီၤႉ
ဒ်န့ၣ်အသိးဖဲလါအ့ဖြ့ၣ် ၁၁ သီအခါစ့ၢ်ကီး သုးမီၤစိရိၤကဘီယူၤ(၂)ဘ့ၣ်ဟဲတ့ၢ်လီၤမ့ၣ်ပိၢ်လၢမၠၣ်၀တံၣ်၀့ၢ်ဃၢၤ မဲၢ်ကနဲသ၀ီတကပၤန့ၣ်ဒီးလၢကျိဖးဒိၣ်လူၢ်တၢ်လီၢ်သ့ၣ်တဖၣ်န့ၣ်စ့ၢ်ကီးကျိဖးဒိၣ်သီတပယူာ်ဃီအဂ့ၢ်န့ၣ် လီၢ်က၀ီၤကမျၢၢ်စံး၀ဲန့ၣ်လီၤႉ
